Jibañ Ro Jet Bwe Ren “Bokake Jen [Burueir]”
1. Ta eo Jehovah ej aikwiji jen ri kabuñ ro an?
1 Bokake eaorõk ilo ad kabuñ ñan Jehovah ilo wãwen eo ej buñburuen kake. (Dut. 12:28; 1 Pit. 1:14-16) Ejjabto, ekajet eo an Anij enaj itok ion “ro rejjab jelã Anij im rejjab bokake gospel eo.” (2 Tes. 1:8, NW) Ewi wãwen jemaroñ jibañ ro jet bwe ren “bokake jen [burueir]” katak ko ilo Nan eo an Anij?—Rom 6:17.
2. Etke eaorõk ñan ad jibañ ro jet ñan kalek juõn tõmak ekajur?
2 Ilo Ad Jibañ Ir ñan Kalek Air Tõmak im Yokwe: Ilo Jeje Ko, bokake ej koba ibben tõmak. Ri jilek Paul ear konono kin “kien Anij e in drio, ar kajelaik dri ailiñ kõn otemjej, ñõn bokake kin tõmak.” (Rom 16:26) Dri Hibru katak 11 ej kwalok kin elõñ wanjoñok ko kin tõmak, elõñ iair ej kitibuj air jerbal ekkar ñan ankil an Jehovah. (Hib. 11:7, 8, 17) Ijo tu-rãjet, jab bokake ej koba ibben ejelok tõmak. (Jon 3:36; Hib. 3:18, 19) Jej aikwij kaddeklok kabel eo ñan kajerbal Nan eo an Anij ñan jibañ ro jet ñan kaddek tõmak eo ej kwalok bokake.—2 Tim. 2:15; Jem. 2:14, 17.
3. (a) Ewi wãwen bokake ej ekkejel ibben yokwe? (b) Ewi wãwen jemaroñ jibañ ri katak Bible ro ñan kaddeklok air yokwe Jehovah?
3 Bokake ej bareinwõt ekkejellok ibben yokwe Anij. (Dut. 5:10; 11:1, 22; 30:16) “Bwe eñin yokwe Anij,” 1 Jon 5:3 ej ba, “bwe jen kejbãrok kien ko An: im kien ko An re jab erro.” Ewi wãwen jemaroñ jibañ ri katak Bible ro ñan air kaddeklok air yokwe Jehovah? Bukõt ien ko remõn ilo ien katak eo ñan ad kalek kamolol eo air kin kadkad ko kadkadin Jehovah. Kwalok eñjake ko am remũlal kin Anij. Jibañ ri katak eo bwe en lemnak ñan an kaddeklok juõn kõtan emõn ibben Jehovah. Elaptata, yokwe Jehovah enaj kamakit ro jet—im bareinwõt kij make—ñan bokake e jen buruõd.—Mat. 22:37.
4. (a) Etke joñok eo ad eaorõk? (b) Ta eo jej aikwij kõmmane ñan kaddeklok juõn “buru e jelalokjen”?
4 Ikijen Joñok eo Ad: Juõn wãwen elap jemaroñ rejañ ro jet ñan bokake news eo emõn ej ikijen joñok eo ad. Bõtab, jej aikwij kate wõt kij ñan kaddeklok juõn “buru e jelalokjen.” (1 Kiñ 3:9; Ken. 4:23) Men in ej kitibuj ta? Kobrak buruõm kin ekan ko lor jitõb ilo am keini katak Bible im bed ilo kwelok ko. (Sam 1:1, 2; Hib. 10:24, 25) Kamao ibben ro me burueir ej burukuk ibben kabuñ eo emol. (Ken. 13:20) Kwon ekkeini am bõk kunam ilo jerbal in kwalok nan, ilo an wõr ibbam juõn kõnan emol ñan jibañ armij ro ilo territory eo am. Jar bwe Jehovah en jibañ kij kaddeklok juõn buru emõn. (Sam 86:11) Bõprae men ko me remaroñ kokkure buruõm, einwõt men in kamõnõnõ ko retton ak relej. Jibadõk men ko me renaj karuaklok yuk ñan Anij im kakajurlok kõtan eo am ibben.—Jem. 4:7, 8.
5. Ewi wãwen ro rej bokake rej jerammõn?
5 Jehovah ear kamol ñan armij ro an ilo ien eo etto bwe jerammõn ko renaj itok ioir elañe rej bokake e. (Dut. 28:1, 2) Eindein rainin, Jehovah elap an kajerammõn “ro rej bokake E.” (Jerbal 5:32) Kin men in, ikijen katakin im joñok eo ad, jen jibañ ro jet ñan air bokake jen burueir.
[Kajjitõk ko]