Jesus “Ear Katak Pokake”

Ejjel̦o̦k juon iien Jesus ear jab pokake Jeova. (Jon 8:29) Innem etke Baibõl̦ ej ba: “Ear katak pokake jãn men ko ear eñtaan kaki”?—Hib. 5:8.

Ke Jesus ear pãd ijin ioon lal̦, ear iiooni wãween ko me ejjañin kar iiooni ke ear pãd ilañ. Ñan waanjoñak, meñe jemãn im jinen rar yokwe Jeova, ak rar jab weeppãn. (Luk 2:51) Ear iioon eñtaan jãn ri-tõlin kabuñ ro retao im ri-utiej ro ilo kien me rar jab kwal̦o̦k ekajet jim̦we. (Matu 26:59; Mark 15:15) Ejjab men in wõt, ak ear mej ilo juon wãween ekaeñtaanan. Baibõl̦ ej ba bwe “ear kõttãiki im pokake wõt ñan mej.”—Pil. 2:8.

Wãween kein Jesus ear iiooni rar jipañe ñan katak pokake ilo juon wãween me ejjañin kar jel̦ã kake ke ear pãd ilañ. Tokjãn men in, ear maroñ erom Kiiñ im Bũrij L̦apl̦ap eo em̦m̦antata me emel̦el̦e kõn eñjake ko ad. (Hib. 4:15; 5:9) Ear l̦apl̦o̦k an Jesus aorõk ippãn Jeova im ear l̦apl̦o̦k an Jeova maroñ kõjerbale ãlikin an kar katak pokake jãn men ko ear eñtaan kaki. Ejja ãindeinl̦o̦k wõt, emaroñ l̦apl̦o̦k ad aorõk ippãn Jeova im emaroñ l̦apl̦o̦k an kõjerbal kõj ilo jabdewõt jerbal ñe jej pokake wõt ium̦win wãween ko reppen.—Jem. 1:4.