Kõmman Katak kin Bible ko Rej Wõnmanlok Iturin Kejam eo im Ilo Ad Kajerbal Telephone
1. Ta unin ad kõmman katak kin Bible ko?
1 Elap ad mõnõnõ ñe jej jino juõn Bible study! Bõtab, ñe jej lo juõn armij ej itoklimo in katak Bible eo ej buñten nee eo jinoin wõt. Unin jej katak Bible ibben armij eo ej ñan jibañ e ñan an erom juõn ri kalor eo emol an Christ. (Mat. 28:19, 20) Ta eo emaroñ jibañ kij ñan tõbar mejenkajjik in?
2. Ta in katak kin Bible ko iturin kejam im ilo kajerbal telephone, im etke wãwen kein rekeie?
2 Armij Reboub: Elaplok an armij ro boub ilo ran kein. Ilo jet jikin ko, eiet armij ilo jinoin rej mõnõnõ in jolok juõn awa ñan air katak Bible. Ñan jibañ rein, kar rejañ kij bwe jen jino im kõmman katak kin Bible ko iturin kejam eo ak ilo kajerbal telephone. Ilo jinoin, katak kein remaroñ kadu im ej kitibuj am bwebwenato kin jejjo wõt eon ko ilo Bible im kajerbal juõn ak ruo paragraph ko ilo juõn book, einwõt book in Jelãlokjen ak Mour Indrio. Ej juõn men in nebar bwe elõñ ri kwalok ro rej kiõ kõmman katak rot kein iturin kejam im ilo kajerbal telephone!
3. Etke jej aikwij kate kij ñan kaetoklok ien ad katak ibben juõn armij iturin kejam eo?
3 Ak, jen juburu ke ñan wõnmanlok im kõmman katak eo iturin kejam iumin juõn ien eaetok? Jaab. Meñe ejjab emõn ñan ad kaetoklok ad konono ñe jej kab jino juõn katak, May 1990 Ad Jerbal Ñan Ailiñ Eo, peij 8, ej ba: “Ñe ri mweo ej keini an katak im ewõr an itoklimo, jemaroñ kaetoklok ad katak ibbeir.” Men in eaorõk. Ñan wanjoñok: Ikijen juõn ajiri ekwuli, ilo jinoin jidik wõt ad aikwij najidiki mae ien ekõnan mõñã, bõtab jeban kõtmene an naj kajurlok im emõn an eddeklok elañe jidik wõt ad najidiki iumin juõn ien eaetok. Eindein, juõn ri katak ej aikwij juõn ien katak eaetoklok im ekkeini kõmmane ñan an erom juõn ri karejaran Anij eritto ilo jitõb.—Hib. 5:13, 14.
4. Ta tokjen ko renaj walok ñe kwoj kõmmane katak kin Bible eo iloan mweo imõn armij eo?
4 Katak Bible Iloan Mweo Imõn: Emõnlok kõmmane katak eo ilo juõn jikin ejenolok im ejelok keroro ie—iloan mweo imõn armij eo ak ilo bar juõn jikin ekkar. Men in enaj kõmman bwe en emõn an ri katak eo katak im jibañ e ñan an melele Nan eo an Anij. (Mat. 13:23) Enaj bareinwõt kamaroñ ri katakin eo ñan an kajejjet katak eo ñan aikwij eo an ri katak eo. Bareinwõt, ñe eaetoklok ien katak eo, enaj kõtlok bwe en emõnlok im let air etale Nan eo an Anij.—Rom. 10:17.
5. Ewi wãwen jemaroñ ukõt jikin eo jej katak jen turin kejam eo ñan loan mweo imõn armij eo?
5 Ewi wãwen kwomaroñ ukõt jikin eo kwoj kõmmane katak eo jen turin kejam eo ñan loan mweo imõn armij eo? Elikin jet katak ko rekadu, kwomaroñ baj ba bwe kwoj mõnõnõ in kaetoklok ien am katak ibben. Ak kwomaroñ ba ilo juõn wãwen ejjab lukkun alikar ilo am kajitõk ibben armij eo, “Ewõr ke am ien rainin ñan jijet im bwebwenato ibben don kin men in?” ak “Ewi aetokin ien eo kwo kõnan bwebwenato kin katak in rainin?” Elañe ejelok tõbrak kin jibadbad ko am, inem wõnmanlok ñan kõmmane katak ko rekadu iturin kejam eo. Ilo juõn ien ekkar, bar kajeoñ in ukõt jikin katak eo ñan loan mweo imõn armij eo.
6. Jej aikwij kõmmane jerbal in kwalok nan eo ad kin mejenkajjik et eo, im ewi wãwen nan in rejañ ko ilo katak in remaroñ jibañ kij kõtõbrak mejenkajjik in?
6 Ke jej wõnmanlok im bukõt ro rej tellokiir, jej aikwij kememej kin unin jej jino im kõmmane katak kin Bible ko. Mejenkajjik eo ad ej ñan jibañ ro emol burueir ñan air erom ri karejar ro an Jehovah emwij air wujleplok air mour im baptais. Jej kejatdikdik bwe enaj kajerammõn jibadbad ko ad ke jej kajejjet jerbal in kwalok nan eo ad ilo ad jibadõk mejenkajjik in.—2 Tim. 4:5.