Uwaakin Kajjitõk ko

◼ Juon kõrã ej aikuj ke kalbubuuki bõran el̦aññe ej katak Baibõl̦ ippãn juon ilo jabdewõt jikin el̦aññe juon jeid im jatid em̦m̦aan ej jerbal ippãn?

El̦aññe juon jeid im jatid kõrã ilo eklejia eo ej katak ippãn juon an ri katak Baibõl̦ im ej jerbal ippãn juon jeid im jatid em̦m̦aan ilo eklejia eo, kõrã in ej aikuj kalbubuuk bõran. (1 Ko. 11:3-10) Ilo bok eo “Pãd Wõt ilo Yokwe eo an Anij,” peij 240 ej kõmel̦el̦e im ba: ‘Juon kõrã emaroñ wõnm̦aanl̦o̦k wõt im katak Baibõl̦ ippãn ri katak ro an meñe juon em̦m̦aan me em̦õj an peptaij ej pãd ijo. Bõtab, kõnke jerbal in ej an eklejia eo an Anij, kõrã in ej aikuj kalbubuuk bõran ñan kaalikkar ke ej kõm̦m̦ane jerbal in me en kar ñan em̦m̦aan ro.’ Ej aikuj ãindein aolep iien, jekdo̦o̦n ñe rej katak ilowaan juon em̦, ak ilo jikin ko jet.

El̦aññe juon jeid im jatid kõrã ilo eklejia eo ej jepl̦aak ñan ippãn juon armej im juon em̦m̦aan jãn eklejia eo ej jerbal ippãn, eban aikuj kalbubuuk bõran. Ñe kõrã in ej jepl̦aak ippãn armej eo ñan baj kwal̦o̦k wõt kilen katak Baibõl̦ ak ñan etale wõt jet kõmel̦el̦e ko ilo bok in katak ko ad, eokwe ejjab aikuj kalbubuuk bõran. M̦okta jãn an juon ri kwal̦o̦k naan katak Baibõl̦ ippãn juon armej ilo jabdewõt jikin, ekkã an aikuj m̦okta jepl̦aak elõñ alen ippãn armej in. Ilo tõre in me ri kwal̦o̦k eo ej jepl̦aak ippãn armej eo, ñe ej lo bwe elukkuun kõn̦aan roñjake im bwe emaroñ wõnm̦aanl̦o̦k im katak, eokwe el̦aññe ri kwal̦o̦k in ej juon kõrã, ej aikuj lukkuun etale im l̦õmn̦ak ñããt ekkar bwe en kalbubuuk bõran ñe juon em̦m̦aan jãn eklejia eo ej jerbal ippãn.