Jej Mõnõnõ ñan Kate Kij ilo Jerbal eo an Jehovah!
1 Ri jilek Paul ear mõnõnõ in ‘kajerbal men otemjej ewõr ibben’ ñan kajejjet jerbal in kwalok nan eo an. (2 Kor. 12:15) Eindein rainin, elõñ Ri Christian ro rej niknik ilo air jerbal einwõt pioneer ro. Ro jet me ewõr eddo in family ko air rej karõk ien ilo schedule eo air ñan bõk kunair ilo jerbal in kwalok nan kajjojo week. Jet ro me ewõr abañ ko kin ejmour rej kajerbal kajur eo air joñan wõt air maroñ ñan kowõnmanlok men ko an Ailiñ eo. Elap an kõketak kij ñan lo armij ro an Jehovah, jekdon ewi joñan dettair ak wãwen ko ibbeir, rej kate ir ñan kalaplok air jerbal ñan Jehovah!
2 Yokwe Ro Ri Turid: Ñe jej karejar ñan Jehovah joñan wõt ad maroñ, im ilo wãwen in kwalok ad yokwe Anij im ro ri turid, men in ej kõmman bwe en erreo bõklikit eo ad. Kinke Paul ear lelok aolepen an mour ke ear jaketo jaketak news eo emõn, ear maroñ ba ilo mõnõnõ: “Kin men in ij kennan ñõn kom ranin, bwe ña I’reo jen bõtõktõkin armij otemjej.” (Jerb. 20:24, 26; 1 Tes. 2:8) Ñe jej bõk kunad ilo jerbal in kwalok nan ilo joñan eo wõt wãwen ko ibbed ej kõtlok ad maroñ kõmmane, men in enaj bõprae kij jen an wõr ruõd kin bõtõktõkin armij.—Ezek. 3:18-21.
3 Ñe jej kate kij ñan jibañ ro jet, men in ej kamõnõnõik kij. (Jerb. 20:35) Juõn brother ear ba: “Ñe ejota, im ij jeblak ñan mweo elikin juõn ran eyu ilo jerbal eo an Jehovah, emol ij eñjake aõ mõk. Ak I mõnõnõ, im ij kamolol Jehovah bwe ear letok ñan iõ juõn lañliñ me ejelok juõn emaroñ bõke.”
4 Yokwe Anij: Un eo eaorõktata jej kate kij ilo jerbal eo an Jehovah ej kinke jekõnan kamõnõnõik Jemed ilañ. Yokwe Anij ej kamakit kij ñan bokake kien ko an, me ej kitibuj ad kwalok nan im kõmman ri kalor ro. (1 Jon 5:3) Meñe armij rejjab kõnan roñjake ak rej jumae kij, ilo mõnõnõ jej wõnmanlok im kate kij ilo jerbal eo an Jehovah.
5 Kiõ ejjab ien eo ñan kadiklok ad jerbal. Jej mour ilo ien jonikõn eo. (Mat. 9:37) Juõn ri kallip ekkã an kaetoklok ien an jerbal ilo ien jonikõn eo kinke ejelã bwe ewõr joñan ien an maroñ aintok leen jikin kallip eo mokta jen air naj jino jorrãn. Ien jonikõn eo ilo jitõb ewõr joñan bareinwõt. Ilo lemnak kin tõre eo jej bed ie, jen aolep kate kij bwe jen niknik wõt ilo jerbal in kwalok nan.—Luk 13:24; 1 Kor. 7:29-31.