Kainemõn Ro Rej Buromõj
1. Etke ro rej buromõj rej aikwij bõk kainemõn?
1 Luji juõn eo ejitenburu ibbed ilo mij ej wãwen eo elap an kõmetak buru, elaptata ñan ro me ejelok air kejatdikdik kin Ailiñ eo. (1 Tes. 4:13) Ekkã an elõñ lemnak: ‘Etke armij ro rej mij? Ta eo ej walok ñan ir ñe rej mij? Inaj ke bar lo eo ejitenburu ibba?’ Ewõr jet wãwen ko itulal im renaj kainemõn ro jej iion ir ilo jerbal in kwalok nan me rej buromõj kin mij eo an juõn nukiir ak eo mõttair.—Ais. 61:2.
2. Elañe juõn ri mweo ej ba bwe eburomõj, ej aikwij ke to ad bed im kwalok nan ibbeir?
2 Jen Em ñan Em: Bõlen ri mweo emaroñ ba ñan kij bwe ej kab mij juõn ilo family eo an. Jemaroñ kajitõk ibbed make, Armij in eburomõj ke? Ewõr ke ro nukin ilo mweo reburomõj? Ilo ien rot kein, bõlen enaj emõnlok ñe ejjab to ad bed im kwalok nan ilo mweo. (Ekk. 3:1, 7) Bõlen jemaroñ buromõj lok ibben, lelok juõn tract, magazine ak brochure eo ekkar im etal. Inem tokelik jemaroñ bar jeblak ibben ilo juõn ien emõn ñan bar lelok nan in kainemõn ko jen Bible eo.
3. Ñe ebellok juõn ien emõn, ta eon ko jemaroñ kwaloki ñan ri mweo eburomõj?
3 Ilo ien ko jet, jemaroñ kile ñan kaetoklok ennan eo ad ilo lolok eo moktata. Bõtab jejjab aikwij kabwid lemnak eo air, jemaroñ readi juõn eon ibbeir kin kallimur ko me rej ekkeijaklok ñan jerkakbiji eo. (Jon 5:28, 29) Ak jemaroñ kwalok ta eo Bible ej ba kin ro remij. (Ekk. 9:5, 10) Juõn bwebwenato ilo Bible kin jerkakbiji emaroñ bar lelok kainemõn. (Jon 11:39-44) Bar juõn wãwen ej ñan bwebwenato kin kejatdikdik ilo Jehovah ikijen nan ko me eo etiljek Job ear kwaloke. (Job 14:14, 15) Bõtab mokta jen ad etal, jemaroñ lelok tract eo, Ta Kejatdikdik eo kin Ro Rejitenburu Rej Mij? Ak jemaroñ likit book in Jelãlokjen eo ibben, jitõñlok ñan kamelele ko ilo katak 9, im kõmman karõk ñan bar jeblak ibben ñan kwalok melele ko jet.
4. Ien ta ko jet jemaroñ lelok kainemõn?
4 Ilo Ien ko Jet: Jet ien, kejelã ko ilo newspaper ak ilo radio kin mij ko rar kabellok ien ko remõn ñan jeje juõn letter ekadu ñan ro uan family eo eburomõj. Juõn ien, elikin an kar juõn jemen me ejako belen im ledik eo nejin lo juõn letter ekoba ibben jet tract ko, rar etal ñan mweo mõn ri kwalok eo im kajitõk: “Kwe eo ke ear jilkintok letter in? Eokwe, Ikõnan kalaplok aõ jelã kin Bible eo!” Emaan eo im ledik eo nejin rar errã ñan katak Bible im jino kobalok ibbeir ilo kwelok ko an congregation.
5. Etke jej aikwij in ekkõl wõt ñan bukõt ien ko remõn ñan kainemõn ro rej buromõj?
5 Juõn eo ej buromõj ekkã an naj mõnõnõ in roñjake Nan in Anij jen eo ej itoklimo wõt kin ien mõnõnõ ko. Kij aolep jej aikwij in ekkõl wõt ñan bukõt ien ko rekkar ñan kainemõn ro rej buromõj kin jako eo an ro rejitenburu ibbeir.