Jerbal eo Ejej Uan ilo October 20–November 16!
1 Iumin emen week ko ej jino jen Monday, October 20 manlok, jenaj bõk kunad ilo jerbal eo eaorõk kin leto letak tract eo ekãl etan Kwo Kõnan ke Jelã Mol Eo? Jej kejatdikdik bwe jerbal in me enaj walok ibelakin lal, enaj kaitoklimoen armij kin mol eo.—Jon 17:17.
2 Tract in ej kwalok uak ko rejejjet im jimwe kin kajitõk kein jiljino: “Emol ke an Anij lukkun kea kin kij?” “En jemlok ke tarinae im eñtan?” “Ta eo ej walok ñan kij ñe jej mij?” “Ewõr ke jabdewõt kejatdikdik ñan ro remij?” “En ewi wãwen aõ maroñ jar bwe Anij en eoroñ iõ?” im “En ewi wãwen aõ maroñ lo mõnõnõ ilo mour?” Kabuñ wan ko rejañin kar kwalok uak ko remol ñan kajitõk kein. Bareinwõt ro rejjab Christian rej lemnak kin kajitõk kein ak bõlen rejjab jelã bwe uak ko rej bed ilo Bible. Inem, ennan in enaj juõn men ekaitoktoklimo ñan elõñ armij.
3 Jerbal ilo Aolep Territory ko: Kwon kate yuk ñan kajerbal tract ko ilo aolep territory ko joñan wõt am maroñ. Elañe kwoj jerbal ilo juõn territory ekilep, elder ro remaroñ rejañ yuk bwe kwon likit juõn tract ilo moko ejelok armij ro ie ilo lolok eo am kein kajuõn. Kememej wõt bwe kwon lelok juõn tract ñan ro ri turum, ro nukõm, ri jikuul ro mõttam, im armij ro jet ekkeini am bed ibbeir jen ran ñan ran. Bõlen kwomaroñ bõk kunam ilo jerbal in auxiliary pioneer ilo October ak November. Ewõr ke nejõm ak juõn am ri katak Bible me ej wõnmanlok ilo jitõb im ebojak in kwalok nan ibbed ilo jerbal in ejej uan einwõt juõn ri kwalok ejañin baptais? Elañe aet, inem kwon kejelãik elder ro kake.
4 Ta eo Jenaj Ba: Ñan kwalok nan ibben elõñ armij, jej aikwij kakaduik ennan ko ad. Baj jomantak wõt juõn ian kajitõk ko jiljino ilo kilin tract eo im jitõñlok ñan uak eo iloan. Men in enaj kõmman bwe aolep ri kwalok ro ren ukot ennan ko air ekkar ñan aikwij ko an armij ro ilo jikin ko rej kwalok nan ie. Elañe juõn armij ej kwalok an itoklimo, kwon je etan im karõk ibben bwe kwon jeblak im bar bwebwenato ibben. Ilo Saturday im Sunday, kwomaroñ wõnmanlok im lelok magazine ko ibben lok tract in. Ñe ejemlok jerbal in ejej uan ilo November 16, jenaj lelok book eo Jelãlokjen ibben tract eo. Jenaj lelok bwen tract kein ilo ejja wãwen eo wõt jej liloki tract ko jet ilo jerbal in kwalok nan.
5 Jino Katak Bible Ibben Armij eo Ekãl: Unin kar kõmmane tract in ej bwe jen jino katak Bible ibben armij ro rekãl. Ñe kwoj bar jeblak ibben armij eo ear kwalok an itoklimo, kwomaroñ kajitõk ibben ta katak ko remol jen Bible me rar kainemõn e? Kwalok ñan e peij eo eliktata ijo ej kemelele kin kilen katak Bible im lelok book in Jelãlokjen. Elañe emaroñ, ilo tukadu kwon etale juõn ak ruo paragraph ko me ej bar kwalok kemelele ko jet kin katak eo ear kãlete.
6 Jehovah ej bukot ro me rej kabuñ ñan e ilo “jitõb im mol.” (Jon 4:23) Jej aikwij bõk kunad ilo jerbal in ejej uan ñan jibañ ro jet bwe ren jelã kin mol eo!