Jej Aikwij Kijenmij ilo Ar Kwalok Nan
1 Iomin elõñlok jen 30 yiõ ko, dri jilik Paul ear juburuen kin jerbal eo an einwõt juõn dri evanjel. Einwõt kin jabrewõt jibarbar ko reaurõk, ear or abañ ko ilo jerbal in kwalok nan eo an. (2 Kor. 11:23-29) Ak, Paul ear jab ebwer. (2 Kor. 4:1) Ear melele bwe maroñ eo an ñõn kijenmij ñe ej jerbal in kwalok nan enaj itok jen Jeova. (Pil. 4:13) Ke Paul ear likit juõn joñok kin kijenmij ilo tiljek, ear maroñ in ba: “Komin dri kajeoñwe ña, einwõt ña ij bareinwõt dri kajeoñwe Kraist.”—1 Kor. 11:1.
2 Kijenmij Iomin Melejoñ ko Ranin: Kajuju ran, elõñ ian ro jeer im jãter rej iion kajirere, jumae, ak jab kea jen ro uan baamle eo air, dri jerbal ro mõtair, ak dri jikuul ro mõtair. (Mat. 10:35; Jon 15:20) Bwelen men ko kein kwoj iione. Ilo bar juõn wãwen, emaroñ or am abañ kin ejmour eo am, ak ran otemjej kwoj jelmaik men in kamad ko ak kabo ko me rej melejoñwe tõmak im kijenmij eo am. Ar etale joñok ko an dri korijer ro retiljek ilo ien ko etto im an dri Kristian ro mõtar ranin, ro im rar iion im anjo ion abañ ko, emaroñ kakajur kij.—1 Pit. 5:9.
3 Ñõn bõk kajur bwe jen jutõk bin ilo ar kwalok nan, jenaj aikwij “kõnõk aolepen ken tõrinae an Anij.” (Ep. 6:10-13, 15) Jar kin kijenmij ej bareinwõt juõn men eaurõk. Anij ej letok jitõb kwojarjar eo an bwe jen kijenmij iomin melejoñ ko. (2 Kor. 6:4-7) Ñõn bõk anjo ilo ar tõrinaek Setan im lõl eo an enana, jej aikwij bokake nan in kakememej ko an Jeova ñõn kõkãle mour in jitõb eo ar. (Sam. 119:24, 85-88) Einwõt juõn ajiri emaroñ keini an riiti letter eo jen jemen ejitenburu iben, ar riiti Baibel eo ran otemjej enaj kabinlok kõtan eo ar iben Jeova. Jej bõk meletlet ñõn wõnmaik melejoñ ko ñe jej keini ar katak iber mõke, im kõtlok bwe lemnok eo an Anij en beek bebe ko ar im kakajur ar mol ñõn e.—Ken. 2:10, 11.
4 Kijenmij ej Bõktok Jerammõn Ko: Einwõt Paul, ar kijenmij ilo tiljek ñe jej jerbal in kwalok nan enaj kamõnõnõik buruen Jeova im enaj bõktok jerammõn ko ñõn kij im ñõn ro jet. (Ken. 27:11) Jen jek ilo buruer bwe jen wõnmanlok wõt, ilo ar kwalok nan, im ilo wãwen in, jej kamol bwe tõmak eo ar ebin im “e aurõk jen gold eo e jokolok meñe melejoñ e kin kijeek.”—1 Pit. 1:6, 7.