Kwalok Nan Ej Jibañ Kij ñan Kijenmij
1 Nan in Anij ej rejañ kij ñan “kijenmij im etõr ilo iaikuij eo emwij likit e imar.” (Hib. 12:1) Einwõt an juõn ri ettõr aikwij kijenmij ñan an lo tõbrak ilo jiai eo, eindein kij jej aikwij kijenmij ñan bõk mejenkajjik eo kin mour indio. (Hib. 10:36) Ewi wãwen jerbal in kwalok nan eo an Christian emaroñ jibañ kij kijenmij ilo tiljek ñan jemlokin?—Mat. 24:13.
2 Jej Bõk Kakajur ilo Jitõb: Ñe jej keañ kin kallimur eo eaibujuij ilo Bible men in ej jibañ kõmman bwe kejatdikdik eo ad en kajur. (1 Tess. 5:8) Ñe jej keini ad bõk kunad ilo jerbal in kwalok nan, ewõr ibbed ien emõn ñan ad kwalok kin mol ko me emwij ad katak kaki ilo Bible eo. Ewõr ien emõn ibbed ñan jojomare tõmak eo ad, eo ilo oktan ej jibañ kakajur kij ilo jitõb.
3 Bwe en bolemen ad katakin ro jet, jej aikwij make melele kin mol ko ilo Bible. Jej aikwij kõmman research im kalmenlokjen kake katak eo. Jibadbad eo jej kõmmane enaj kamũlallok jelãlokjen eo ad, kakajur tõmak eo ad, im kemourur kij ilo jitõb. (Ken. 2:3-5) Ilo wãwen in, ke jej kajeoñ in jibañ ro jet, jej bareinwõt kakajur kij make.—1 Tim. 4:15, 16.
4 Bõk kunad ilo kijejeto ilo jerbal in kwalok nan ej juõn mõttan eaorõk ilo “ken tõrinae an Anij,” me jej aikwiji ñan jutak bin nae Devil im demon ro. (Ep. 6:10-13, 15) Ilo ad boub ilo jerbal in ekwojarjar enaj jibañ kij ñan lemnak wõt kin men ko rej kõketak im bõprae bwe lal eo an Satan en jab katton kij. (Kol. 3:2) Ke jej katakin ro jet kin wãwen ko an Jehovah, jej kakememej kij make kin aikwij eo ñan kejbãrok bwe en kwojarjar mwilid.—1 Pit. 2:12.
5 Anij Ej Kamaroñ Kij: Eliktata, ad bõk kunad ilo jerbal in evanjel eo ej katakin kij ñan atartar ion Jehovah. (2 Kor. 4:1, 7) Ej juõn men elap an emõn! Ilo ad kaddeklok liki rot in ej kamaroñ kij ejjab ñan kõtõbrak wõt jerbal in kwalok nan eo ad ak bareinwõt ñan kijenmij kin jabdewõt wãwen ko jej aikwij jelmaiki ilo ad mour. (Pil. 4:11-13) Emol, ilo ad katak ñan liki Jehovah ej men eo eaorõktata ñan kijenmij. (Sam 55:22) Ilo elõñ wãwen ko, kwalok nan ej jibañ kij ñan kijenmij.