Ewi Wãwen Am Naj Uak?
1. Etke jekõnan anõke joñok eo an Jisõs ñe armij rej kwalok air kajitõk?
1 Ñõn ranin, elap an armij ro bwilõñ kin wãwen an kar Jisõs uake ro im rar kwalok kajitõk im aikwij ko air. Ñe armij ro rej kwalok kajitõk ko im re kajju wãweir ilo ien ar kwalok nan, emõn bwe jen kajeoñwe wãwen an Jisõs kar uak.—1 Pit. 2:21.
2. Ta eo emaroñ jibõñ kij ñõn uake juõn kajitõk ilo juõn wãwen eo ejejit?
2 Mokta Roñjake: Jisõs ear kõnan jela kin etke armij eo ear kwalok kajitõk eo an. Jet ien jenaj aikwij turi buruen armij eo kin jet kajitõk ko. Ñe juõn ej kajitõk, “Kwoj tõmak ke ilo Jisõs?” emaroñ kinke jejjab kememe Christmas. Elañe kwoj lukkun kile ta aikwij eo an armij eo ej kajitõk, enaj jejit am kemeleleik e.—Luk 10:25-37.
3. Ta buk ko iber im rej jibõñ kij ñõn lo uak ko remõn jen Jeje Ko?
3 Uak jen Nan eo an Anij: Enañin aolep ien emõnlok kajerbal Baibel eo ñõn uaki kajitõk ko. (2 Tim. 3:16, 17; Hib. 4:12) Buk kein “Ta eo Baibel Ej Lukkun Katakin?” im “Jelãlokjen,” renaj jibõñ kij ñõn kwalok uak eo ejejit. Im meñe eo ej kajitõk ejjab koutiej Baibel eo, ilo joij kwomaroñ kalikar ta eo Jeje ko rej katakin kake. Rejañ armij in bwe en lukkun lemnok kin meletlet ko rej walok ilo Baibel eo. Ilo am kajeoñwe Jisõs, uak ko am renaj “einwõt apel gold ko re bol kin ok silver”—remõn, raibujuij, im elap air aurõk.—Ken. 25:11.
4. Ñãt eo ekkar bwe jen jab kajeoñ in uaki aolep kajitõk ko?
4 Jen ke Uaki Aolep Kajitõk Ko? Elañe kwojaje uak eo kin juõn kajitõk, kwon jab jok in ba: “Ijaje, ak Imaroñ kabukote im ñe Ij loe Inaj roltok im kalikar ta men ko iar loe.” Am kwalok mol im etã buru emaroñ kamakõt dri mweo bwe ren kõtlok am jeblak ibeir. Elañe kwoj kile wãwen kajitõk eo ej jen ro im rekõnan akwail wõt, kwon kajeoñwe Jisõs ilo wãwen ear uak. (Luk 20:1-8) Ejja eindrein, elañe juõn ejelok an kea kin mol eo ak ej kajeoñ in akwail, kwon kamwij am kennan iben ilo joij im kajerbal ien ko am ñõn kabukot ro remol burueir.—Mat. 7:6.
5. Ta joñok eo Jisõs ear likiti ñõn uaki kajitõk ko?
5 Jisõs ear jela bwe an liki Jeova kar men eo elaptata bwe en kajejit jerbal eo an ñõn “kennan kin mol eo,” im uaki kajitõk ko remol. (Jon 18:37) Ar kajeoñwe Jisõs ej juõn jerammõn elap bwe jen uake ro emol burueir “bwe ren mour in drio”!—Jerbal 13:48.