Jipañ Ri M̦weo bwe En Mel̦el̦e
1. Ewi wãween eo em̦m̦antata ñan kepaak armej ro ñe jej kwal̦o̦k naan?
1 Ewi wõt in el̦apl̦o̦k an naaj jerbal ñe jej kwal̦o̦k naan? Wãween eo ekajju im eddo ke ak wãween eo ejouj im kwõj jipañ ri m̦weo bwe en tõpar mel̦el̦e eo ejim̦we? Rijjelõk Paul ear kõjerbal wãween eo kein karuo ke ear kõnono ippãn Ri Ju ro ilo Tessalonika. Kõn men in, “jet iaaer e reel bũrueer” im rar erom ri tõmak ro. (Jrb. 17:2-4) Ñe jej kõmel̦el̦e ippãn armej ro, ta men ko jej aikuj kõm̦m̦ani?
2. Ewi wãween ad maroñ l̦oor joñak eo an Paul ñe jej kõnono kõn nuuj eo em̦m̦an ippãn armej ro?
2 L̦õmn̦ak kõn Eñjake im Wãween Mour eo An: Ñe jej l̦õmn̦ak kõn eñjake ko an armej ro ilo bukwõn eo jej kwal̦o̦k ie, enaaj jipañ kõj jel̦ã kilen kõmel̦el̦e ilo jouj. Paul ear jino kwal̦o̦k ñan Ri Grik ro ilo Areopegõs kõn men ko me ejel̦ã bwe remel̦el̦e kaki. (Jrb. 17:22-31) Kõn men in, ñe kwõj kapoje naan in ijjino ko am̦, l̦õmn̦ak kõn tõmak ko an armej ro im men ko ekkã aer jab errã kaki. (1 Ko. 9:19-22, UBS) El̦aññe ri m̦weo ej jino jum̦ae, kajjioñ kõnono kõn juon men eo me komiro jim̦or ej errã kake. Innem ejaake bwebwenato eo amiro kõn men in.
3. Ñe ej kapeel ad kõjerbal kajjitõk ko, ewi wãween an men in maroñ jipañ kõj jel̦ã kõmel̦el̦eik ro jet?
3 En Kapeel Am̦ Kõjerbal Kajjitõk Ko: Jebban jipañ juon armej eo ej jibadekl̦o̦k juon jikin el̦aññe jejaje ia eo ej pãd ie. Ãindein, jebban jipañ ri m̦weo ñan tõpar mel̦el̦e eo ejim̦we el̦aññe jejjab jel̦ã an l̦õmn̦ak ak tõmak eo an. M̦okta jãn an Jijej kõmel̦el̦eik armej ro, ekkã an kõjerbal kajjitõk ko ippãn armej ro bwe en jel̦ã l̦õmn̦ak ko aer. Ñan waanjoñak, ke juon armej ear kajjitõk ippãn Jijej, “Ta men eo I naaj kõm̦m̦ane, bwe in bõk aõ jolõt mour indeeo?,” Jijej ear kajjioñ jel̦ã l̦õmn̦ak ko an m̦okta jãn an uwaake. (Luk 10:25-28) Bar juon iien, ke ear bõd an Piter uwaake Jijej, ear kapeel an Jijej kõjerbal kajjitõk ko ñan kajim̦we l̦õmn̦ak eo an Piter. (Matu 17:24-26) Innem ñe ri m̦weo ej kwal̦o̦k juon kajjitõk ak juon l̦õmn̦ak eo ejjab jim̦we, jemaroñ kõjerbal kajjitõk ko ñan jipañ e tõpar mel̦el̦e eo ejim̦we.
4. Etke jej aikuj kajjioñ jipañ ri m̦weo bwe en mel̦el̦e?
4 Ñe jej jipañ ri m̦weo bwe en mel̦el̦e, jej anõke Ri Kaki eo El̦ap Jijej im bareinwõt joñak ko an ri kwal̦o̦k ro jet rekapeel ilo iien ko an rũkal̦oor ro. Ilo wãween in, jej kwal̦o̦k ad kautiej ri m̦weo. (1 Pi. 3:15) Kõn men in, ri m̦weo emaroñ reel bũruon im kõn̦aan bwe jen bar jepl̦aak ippãn.