El̦ap an Em̦m̦an Peba Jiddik ko Rekããl!
1. Ta ko rekããl me jenaaj kwal̦o̦k naan kaki im eoktak wãween aer kar kõm̦m̦ani?
1 Ilo kar kweilo̦k el̦ap eo an 2013 etan, “Naan in Anij Ej M̦ool Eo!,” ear wõr 5 peba jiddik ko rekããl me kar kõjjel̦ã kaki. Ewõr bar juon peba jiddik, Nuuj kõn Aelõñ in Anij No. 38 im taitõl̦in ej “Ro Remej Renaaj Ke Bar Mour?” Juon wõt wãween aer kar kõm̦m̦ani aolep peba kein 6. Etke eoktak wãween aer kar kõm̦m̦ani peba kein jãn kar peba jiddik ko m̦okta? Im elemen ad maroñ kõjerbali peba kein ñe jej em̦ ñan em̦ kaki?
2. Etke kar kõm̦m̦ani peba jiddik ko rekããl?
2 Unin Aer Oktak: Ñe jej em̦ ñan em̦, ekkã an l̦ap tõprak ñe jej l̦oor wãween kein 4: (1) Kwal̦o̦k juon kajjitõk ñan jino bwebwenato ippãn armej ro. (2) Riiti juon eoon ilo Baibõl̦. (3) Lel̦o̦k an armej ro bok in riit. (4) Kwal̦o̦k bar juon kajjitõk im kõm̦m̦an karõk ippãer bwe kwõn jepl̦aak ñan uwaake kajjitõk eo. Eñin unin kar kõm̦m̦ane peba jiddik kein rekããl. Bwe en pidodo ad kõm̦m̦ani aolep men kein 4.
3. Elemen kilen ad kwal̦o̦k naan kõn peba jiddik ko rekããl?
3 Kilen Ad Kwal̦o̦k Naan Kaki: (1) Ãlikin ad yokyokwe armej eo, kwal̦o̦k ñane kajjitõk eo ilo peba jiddik eo im kajjitõk ippãn kõn ta nãj uwaak eo an. (2) Ãlõke peba eo im etale ijo ej ba “Ekkar ñan Baibõl̦.” Kwõmaroñ riiti eoon eo jãn Baibõl̦ ñe em̦m̦an. Ñe ewõr wõt an armej ro iien, komiro maroñ etale ijen̦e ej ba “Tokjãn Am̦ Tõmake Men In.” (3) Lel̦o̦k peba eo ñane im rõjañe ñan riiti kõmel̦el̦e ko jet ñe ewõr an iien. (4) M̦okta jãn am̦ etal, kwal̦o̦k ñane kajjitõk eo itulikin peba eo kijjeen ijo ej ba “Jouj im L̦õmn̦ak kõn Kajjitõk In.” Innem, kõm̦m̦an karõk ñan jepl̦aak tok ippãn ñan uwaake kajjitõk eo jãn Baibõl̦.
4. Ta eo jemaroñ kõm̦m̦ane ñe jej bar jepl̦aak ippãn armej eo me jaar kwal̦o̦k naan ñane?
4 Enaaj pidodo ñan bar kõjerbale ñe jej jepl̦aak ippãn armej ro. Jemaroñ riit eoon eo itulikin peba eo ñan uwaake kajjitõk eo jaar kwal̦o̦ke m̦oktal̦o̦k ke jaar kwal̦o̦k naan ippãn. M̦okta jãn am̦ etal jãn e, kwõmaroñ jitõñe pijain bok eo etan “Juon Ennaan Em̦m̦an jãn Anij!” im kwal̦o̦k ñane bok eo. Ãlikin, ãlõkl̦o̦k ñan katak eo me ej kwal̦o̦ke ilo peba jiddik eo im lel̦o̦k bok eo. Innem, kwõmaroñ kõm̦m̦an karõk ñan jepl̦aaktok bwe komiro en etale bok eo ippãn doon. Kiiõ ewõr juon am̦ rũkkatak! Ak ñe ejjab, kwõmaroñ bar lel̦o̦k juon iaan peba jiddik ko im kõm̦m̦an karõk ñan bar itok bwe komiro en etale peba eo.
5. Etke ewõr tokjãn ad kõjerbali peba jiddik ko ñe jej kwal̦o̦k naan?
5 Ium̦win 130 iiõ in ad kõjerbal peba jiddik ko ñan kwal̦o̦k naan kaki. Meñe reddik im eokkõtaktak wãween aer kar kõm̦m̦ani, ak el̦ap tõprak ko jaar loi ke jaar kwal̦o̦k naan kaki. Kõn men in, jen wõnm̦aanl̦o̦k wõt im kortokjãn peba kein rekããl ilo ad kajeededl̦o̦k katak ko rem̦ool jãn Baibõl̦.—JK. 15:7.