Kõjerbal Tract ko ak Peba Jiddik ko ñan Kajeeded Nuuj eo Em̦m̦an
1. Ewi wãween an kar armej ro an Anij kõjerbal tract ko?
1 Jãn etto, armej ro an Jeova rar kõjerbal tract ko ak peba jiddik ko ñan kajeeded nuuj eo em̦m̦an. Ilo 1880, C. T. Russell im ri kwal̦o̦k naan ro m̦õttan rar jino kõm̦m̦ane tract eo etan Bible Students’ Tracts, im rekõn lel̦o̦k ñan armej ro ekkã aer riiti Imõniaroñroñ ak Naan in Keeañ ko bwe ren lito litak ñan ro jet. Ilo 1884, C. T. Russell ear register e etan doulul in ippãn kien eo ilo Amedka ñan kõm̦m̦ani jerbal ko im rej kajeeded nuuj eo em̦m̦an. Im joñan an kar aorõk tract ko, ear likũt naan eo “tract” ke rar kõm̦m̦ane etan doulul in. Ilo tõre ko, kar etan doulul in ej Zion’s Watch Tower Tract Society, im ilo raan kein kar ukote ñan Watch Tower Bible and Tract Society of Pennsylvania. Jãn iien eo rar jino leto letak tract kein ñan iiõ eo 1918, rein me kar n̦aetaer Ri Katak Baibõl̦ rar maroñ leto letak elõñl̦o̦k jãn 300 milien tract ko ñan armej ro. Ñan rainin, tract ko el̦ap aer jipañ kõj ñan tõpar bũruon armej ro ilo jerbal in kwal̦o̦k naan.
2. Etke em̦m̦an tract ko ñan kwal̦o̦k naan?
2 Unin An Em̦m̦an Tract Ko: Tract ko ak peba jiddik ko el̦ap aer aiboojoj im eitok wõt bwe armej ren kalimjeki. Meñe reddik ak elukkuun jejjet joñan mel̦el̦e ko kar jei ie ñan kõjjel̦ãik armej ro kõn nuuj eo em̦m̦an. Armej ro me rejjab kõn̦aan bũki bok ko jej lil̦o̦k ñan er kõn aer kilep im mijel, epidodol̦o̦k aer itoklimo in bõk peba jiddik kein. Elukkuun pidodo kwal̦o̦k naan kõn tract ko. El̦apl̦o̦k an pidodo ñan an ri kwal̦o̦k naan ro rekããl im ajri ro kwal̦o̦k naan kaki. Bareinwõt, em̦m̦an aer dik im epidodo ad bũkto bũktak ippãd.
3. Kwal̦o̦k juon bwebwenato me kwaar riiti ak kwõjel̦ã kake im ej kaalikkar joñan an aorõk tract ko.
3 Elõñ ro im rar lo m̦ool eo itok wõt jãn aer kar riiti juon tract. Ñan waanjoñak, juon kõrã ilo Haiti ear loe juon iaan tract ko ad ilo turin ial̦. Ear bõke tract in im riiti im ear ba, “Em̦õj aõ loe m̦ool eo!” Tokãlik, ear etal ñan Im̦õn Kweilo̦k eo, jino an katak Baibõl̦, im ãlikin ear peptaij. Ta eo ear jipañ e? Ej kõn an kar riiti juon tract me ej pedped ioon Naan in Anij.
4. Ta mejãnkajjik eo ad ñe jej lel̦o̦k tract ko me rej kein lel̦o̦k an allõñ eo?
4 Jãn Em̦ ñan Em̦: Kõnke elõñ tõprak rej wal̦o̦k jãn tract ko, jãn iien ñan iien jenaaj kõjerbali ãinwõt kein lel̦o̦k eo an allõñ eo. Jenaaj kõm̦m̦ane men in jino jãn allõñ in Nobõm̦ba. Mejãnkajjik eo ad ej bwe jen jab baj lel̦o̦k wõt tract ko ñan ri m̦weo ak jen kajjioñ jino bwebwenato ippãn kake. El̦aññe armej eo ej kwal̦o̦k an itoklimo, jemaroñ lel̦o̦k bok eo Katak ko Rem̦ool ak bar juon bok in katak ilo iien eo wõt ak ñe jej bar jepl̦aak ippãn. Ewi wãween jemaroñ kwal̦o̦k naan kõn tract ko ñe jej em̦ ñan em̦? Alikkar bwe elõñ bwijin kain tract ko im reoktak jãn doon. Innem, m̦okta jãn ad kwal̦o̦k naan kaki jej aikuj riiti kadede bwe jen jel̦ã men ko rej kõnono kaki.
5. Ewi wãween jemaroñ kõjerbale tract ko ñe jej em̦ ñan em̦?
5 Men ko jej ba ñe jej kwal̦o̦k naan rej aikuj jejjet ñan jikin eo jej kwal̦o̦k naan ie im tract eo jej kõjerbale. Jemaroñ jino kwal̦o̦k naan ippãn ri m̦weo ilo ad lel̦o̦k tract eo ñan e. An em̦m̦an im aiboojoj tract eo emaroñ kõm̦m̦an bwe en itoklimo. Ak jemaroñ kwal̦o̦k jet iaan tract ko im kajjitõk ippãn bwe en kããlõt tract eo ej kõn̦aan riiti. Ñe jej kwal̦o̦k naan ilo jikin ko me armej ro rem̦akoko in kepel̦l̦o̦k kõjãm ko aer, jemaroñ baj kwal̦o̦k tract eo ilo ijo me emaroñ em̦m̦an an reitok im loe, ak jemaroñ kajjitõk ñe jemaroñ kõmo̦o̦ne ium̦win kõjãm eo an. Innem jemaroñ ba bwe jekõn̦aan baj bõk l̦õmn̦ak eo an kõn men eo jej iten kõnono kake. El̦aññe taitõl̦ in tract eo ej juon kajjitõk, jemaroñ kajjitõk ewi an l̦õmn̦ak kõn kajjitõk eo. Ak jemaroñ make kõm̦m̦ane juon kajjitõk me enaaj kaitoklimoiki im kõm̦m̦an bwe en kõn̦aan bwebwenato ippãd. Innem jemaroñ riiti juon iaan pãrokõrããp ko ilowaan tract eo ippãn ri m̦weo. Jen bõjrak jidik ñe ej wal̦o̦k kajjitõk ko im kajjitõk bwe en kwal̦o̦k l̦õmn̦ak eo an. Jemaroñ kepel̦l̦o̦k Baibõl̦ eo ad im riiti eoon ko raorõk me rej rejetake men eo jej kõnono kake. Ãlikin ad etale jet iaan kõmel̦el̦e ko ilo tract eo, jemaroñ karõk ñan bar jepl̦aak im bwebwenato ippãn. El̦aññe eklejia eo ad ekkã an likũt bok ko ilo m̦oko me armej ro ie rejako, jemaroñ likũt tract ko ilo jikin ko me armej ro jet reban loi bwe ren jab jel̦ã ke ejjel̦o̦k armej im̦weo.
6. Ewi wãween ad maroñ kõjerbale tract eo ñe jej kwal̦o̦k naan iturin ial̦ ko?
6 Kwal̦o̦k Naan Iturin Ial̦ Ko: Kwõnañin ke kwal̦o̦k naan kõn tract ko ilo turin ial̦ ko? Jet armej me jej iioone er ilo ial̦ ko ekkã aer ekkaiurir im jab kõn̦aan bõjrak im kõnnaan ippãd. Emaroñ pen ad kile el̦aññe rej lukkuun itoklimo in roñjake. Kõnke jejaje el̦aññe armej rein renaaj riiti Naan in Keeañ ko rekããl, em̦m̦an jen lel̦o̦k juon tract ñan er. Tract ko reaiboojoj im naan ko ie rekadu, kõn men in remaroñ kareel bũruon armej ro ñan riiti ñe ewõr aer iien. Ak el̦aññe rejjab ekkaiurir, eokwe alikkar jemaroñ etale kobban tract eo ippãer.
7. Kwal̦o̦k bwebwenato ko me rej kwal̦o̦k kilen ad maroñ kwal̦o̦k naan kõn tract ko ilo iien em̦m̦antok.
7 Kwal̦o̦k Naan ilo Iien Em̦m̦antok: Epidodo ñan kwal̦o̦k naan kõn tract ko ilo jabdewõt iien epel̦l̦o̦k ñan ad kwal̦o̦k naan. Juon jeid im jatid em̦m̦aan ej ãte jet tract ilo bõjo̦ eo an jabdewõt iien ej diwõjl̦o̦k jãn m̦weo im̦õn. Ñe ej iioon juon armej ej jerbal ilo juon m̦õn wia ak ijoko jet, ej baj kajjitõk ñe emaroñ lel̦o̦k juon kein an riit im lel̦o̦k juon tract ñane. Ke ruo ri pãlele rar etal ñan New York City ilo Amedka ñan baj alwõje jikin kaalwõjwõj ko ie, rar jel̦ã bwe renaaj iioon armej ro jãn lal̦ ko jet. Innem rar bõk ippãer bok eo etan Nations im jet tract ko ilo kajin ko jet. Ke rar roñ an juon armej kõnono ilo bar juon kajin me ej wiakake m̦weiuk ko itõrerein ial̦ ko ak ej jijet ilo baak ko ak juon m̦õn m̦õñã, rar lel̦o̦k juon an tract ilo kajin eo an.
8. Ewi wãween an tract ko ãinl̦o̦k wõt ine ko?
8 “Kwõn Kallib Ine”: Tract ko rej ãinl̦o̦k wõt ine ko. Ekkã wõt an juon ri kallib jeor elõñ ine ko ak kajjeplõklõki ilo atake eo an kõnke ejjab jel̦ã ewi wõt iaan ine kein renaaj eddek. Ekklisiastis 11:6 (UBS) ej ba: “Kwõn kallib ine ilo jibboñ im bareinwõt ilo jota, kõnke kwõjjab jel̦ã tõre ta eo em̦m̦an iaaer. Emaroñ aoleper, ak ilo m̦ool kwõjjab jel̦ã.” Kõn men in, jemaroñ “kajjeplõklõk jel̦ãl̦o̦kjen̦” ak kajeeded katak ko jãn Baibõl̦ ilo ad kwal̦o̦k naan kõn tract ko.—JK. 15:7.
[Naan ko ilo peij 3]
Kõnke elõñ tõprak rej wal̦o̦k jãn tract ko, jãn iien ñan iien jenaaj kõjerbali ãinwõt kein lel̦o̦k eo an allõñ eo. Jenaaj kõm̦m̦ane men in jino jãn allõñ in Nobõm̦ba