WÃWEEN BWE EN MAROÑ BÕJRAK AN WÕNM̦AANL̦O̦K WÕT KÕJDAT

1 | Jab Kalijekl̦o̦k

Naanin Kakapilõk eo jãn Baibõl̦:

“Anij ejjab kalijekl̦o̦k, bõtab ilo aelõñ otemjej, ej buñbũruon kake jabdewõt eo ej mijake im kõm̦m̦ani men ko rejim̦we.”—JERBAL 10:34, 35.

Mel̦el̦ein Naanin Kakapilõk In:

Jeovaa Anij ejjab ekajete kõj ekkar ñan aelõñ eo ad, ijo jej itok jãne, kain kil rot eo kilid, ak m̦anit im imminene ko ad. Ijello̦kun an ãindein, ej lale im kalimjek wõt men eo eaorõktata—kain armej rot kõj itulowa. Aet, “armej ej lale [paotokin] armej, a Jeova ej lale bũruon.”—1 Samuel 16:7.

Men eo Kwõmaroñ Kõm̦m̦ane:

Meñe jejjab maroñ jel̦ã kobban bũruon armej, ak jemaroñ kate kõj ñan anõke Anij im jab kalijekl̦o̦k ilo wãween ad watõk ak kalimjek ro jet. Kajjioñ kalimjek wãween ko ippãn kajjojo armej ijello̦kun am̦ kalimjek er ãinwõt rej m̦õttan juon kumi. El̦aññe kwõj kile bwe ewõr ippam̦ l̦õmn̦ak ko rejjab em̦m̦an kõn ro jet—bõlen kõn ro me eoktak aelõñ ko aer ak jikin ko rej itok jãne—jar ñan Anij im kajjitõk bwe en jipañ eok ñan jol̦o̦k l̦õmn̦ak kein renana. (Sam 139:23, 24) Ñe em̦ool am̦ eoware Jeova bwe en jipañ eok ñan jab kalijekl̦o̦k, kwõmaroñ lõke bwe enaaj uwaake jar eo am̦ im jipañ eok.—1 Piter 3:12.

a Jeova ej ãt eo etan Anij.—Sam 83:18.

“Ijañin kar jijõt im bwebwenato ilo ainemõn iben bar juõn me eoktõk kil eo kilin jen ña . . . Kiõ ij juõn uan rolul eo eburukuk im ej kwalok yokwe ibelakin lõl.”—TITUS

Bwebwenatoun Mour eo An—TITUS

Ear Maroñ Bõjrak jãn an Wõnm̦aanl̦o̦k Wõt im Dike Ro Jet

Titus ear uwaan juon kumi in ri-nana me relukkuun lãj im rar illu kõn kien ko me rar kõjenolo̦k armej ro me eoktak kil ko kilier jãn doon. Ej ba: “Kimar etal ñõn jikin ko me emo an armij in Africa ber ie, einwõt hotel ko im jikin irak biia ko, im kõmõn ire ie.” Titus ej kile bwe ear l̦ap kõjdat ippãn, im ej bar ba: “Aolep ien ña eo mokta ij kõmõn ire ñe ij akwail iben jabrewõt, man ak kõra.”

Titus ear jino kõm̦m̦an oktak ko ke ear jino katak Baibõl̦ ippãn Ri-Kõnnaan ro an Jeova. Ke ear riiti Baibõl̦ eo, naan ko ie rar lukkuun l̦ap aer jelõte. Men eo me ear lukkuun tõpar bũruon ej kallim̦ur eo kõn juon lal̦ ekããl me “enaaj ejjel̦o̦k bar mej, bũrom̦õj, lim̦õ im eñtaan” ie.—Revelesõn 21:3, 4.

Ilo jinoin, ekar pen an Titus jol̦o̦k an kõjdate ro jet. Ej ba: “Ear lukkun bin aõ ukot wãwen lemnok ko aõ im mwiliõ.” Bõtab men eo ear jipañe ej naan ko ilo Jerbal 10:34, 35, me ej kwal̦o̦k bwe Anij ejjab kalijekl̦o̦k.

Ta tokjãn ko ear loi? Titus ej kõmel̦el̦e im ba: “Iar tõmak bwe kabuñ eo an Dri Kennan ro an Jeova emol ke iar lo air kwalok yokwe ñõn dron, meñe eoktõk kil ko kiliir ak ailiñ ko air jen dron. Meñe ijañin kar baptais, juõn eman ilo kabuñ in me eoktõk kil eo kilin jen ña, ear karuwaineneik iõ ñõn mõña ilo mweo imõn. Ear einwõt juõn ettõnak kinke ijañin kar jijõt im bwebwenato ilo ainemõn iben bar juõn me eoktõk kil eo kilin jen ña, im mõña iben dron ilo mweo imõn. Kiõ ij juõn uan rolul eo eburukuk im ej kwalok yokwe ibelakin lõl.”