Jeova​—Eo El̦aptata an Jeorl̦o̦k Bõd

1. Ãinwõt an wal̦o̦k ilo Ekklisiastis 7:20, ta men eo em̦ool me Kiiñ Solomon ear kwal̦o̦ke?

KIIÑ Solomon ear je im ba: “Ejjel̦o̦k juon armej ri-wãnõk ioon lal̦, eo ej kõm̦m̦an em̦m̦an im ejjab bõd.” (Ekl. 7:20) Men in ej juon men elukkuun m̦ool kõnke kõj aolep rijjerawiwi. (1 Jon 1:8) Kõn men in, kõj aolep jej aikuji an Anij jeorl̦o̦k ad bõd im jej bar aikuji an ro jet jeorl̦o̦k ad bõd.

2. Ta eñjake eo jej bõke ñe juon m̦õttad me jepaake ej jeorl̦o̦k ad bõd?

² Ejjel̦o̦k pere bwe bõlen kwõj keememejtok am̦ kar kainepataik juon m̦õttam̦ me kwepaake ilo kar juon iien. Kwaar kõn̦aan kõm̦adm̦õde wãween eo ear wal̦o̦k im kakõm̦anm̦an kõtaamiro, kõn men in kwaar lukkuun jol̦o̦k am̦ bõd ippãn. Kar ta eñjake eo am̦ ke eo m̦õttam̦ ear m̦õn̦õn̦õ in jeorl̦o̦k am̦ bõd? Kwaar ke eñjake am̦ lukkuun emmerara? Aet, im ejjel̦o̦k pere kwaar bar m̦õn̦õn̦õ!

3. Ta ko jenaaj kõnono kaki ilo katak in?

³ Jekõn̦aan bwe Jeova en eo M̦õttad me jepaaketata, bõtab jet iien, jenaaj ba ak kõm̦m̦ani jet men ko me rej kainepataiki. Ak etke jemaroñ tõmak im lõke bwe Jeova ekõn̦aan jeorl̦o̦k ad bõd? Etke ejejuwaan wãween an Jeova jeorl̦o̦k bõd ñe jej keidi ñan wãween ad jeorl̦o̦k bõd? Im ãliktata, wõn ro Jeova ej jeorl̦o̦k aer bõd?

JEOVA EPOJAKIN JEORL̦O̦K AD BÕD

4. Etke jemaroñ tõmak im lõke bwe Jeova epojakin jeorl̦o̦k ad bõd?

⁴ Naanin Anij ej kaalikkar ñan kõj bwe Jeova epojakin jeorl̦o̦k ad bõd. Ke Jeova ear kwal̦o̦k e make ñan Moses ilo Tol̦ Sainai, ear jilkinl̦o̦k juon enjel̦ ñan kõnono ikijjeen im ba: “Jeova, Jeova, juon Anij ej tũriam̦okake, im ejouj, erum̦wij An illu, im el̦ap An tũriam̦okake im m̦ool; Ej kõjparok An tũriam̦o ñan to̦ujin ko, Ej jeorl̦o̦k bõd im jerawiwi.” (Ex. 34:6, 7) Jeova ej juon Anij eo ejouj im tũriam̦o, im epojakin jeorl̦o̦k bõd ko an ro rej ukel̦o̦k jãn jerawiwi ko aer.​—Nih. 9:17; Sam 86:15.

5. Ekkar ñan Sam 103:13, 14, kõn an Jeova lukkuun jel̦ã kõn kõj, ta eo men in ej kõm̦akũti ñan kõm̦m̦ane?

⁵ Kõnke Jeova ej ri-Kõm̦anm̦an eo ad, ejel̦ã aolep men ko kõn kõj. Baj l̦õmn̦ak m̦õk! Ejel̦ã tipdikin aolep men ko kõn kajjojo armej ilo lal̦ in. (Sam 139:15-17) Mel̦el̦ein bwe emaroñ lo aolep likjab ko ippãd me jaar jolõti jãn ro jemãd im jined. Ejjab men in wõt, ak ebar jel̦ã kõn ta ko rar wal̦o̦k ilo mour ko ad me rejelõt kain armej rot kõj. Kõn an Jeova lukkuun jel̦ã kõn kõj, ta eo men in ej kõm̦akũti ñan kõm̦m̦ane? Ej kõm̦akũti ñan kwal̦o̦k an lukkuun tũriam̦okake kõj.​—Sam 78:39; riit Sam 103:13, 14.

6. Ewi wãween an Jeova kar kam̦ool bwe ekõn̦aan jeorl̦o̦k ad bõd?

⁶ Jeova em̦õj an kam̦oole bwe ej juon eo ekõn̦aan jeorl̦o̦k ad bõd. Emel̦el̦e bwe kõn wõt men eo em̦m̦aan eo m̦oktata, Adam, ear kõm̦m̦ane, kõj aolep jelia kõn jerawiwi im mej. (Rom 5:12) Ear ejjel̦o̦k ial̦an ad maroñ kanemkwõj kõj make ak jabdewõt armej jãn jerawiwi im mej. (Sam 49:7-9) Ijoke, Anij eo ad me el̦ap yokwe ippãn ear kwal̦o̦k an tũriam̦okake im karõk bwe en wõr juon wãween ñan kanemkwõj kõj. Ta eo ear kõm̦m̦ane? Ãinwõt an Jon 3:16 kwal̦o̦k kake, Jeova ear jilkintok eo ej make wõt Nejin ñan mej kõn kõj. (Matu 20:28; Rom 5:19) Jesus ear bõk jikid ilo an kar eñtaan im mej ikijjeed ñan kanemkwõj jabdewõt eo ej kwal̦o̦k an tõmak ilo e. (Hib. 2:9) Ejjel̦o̦k pere bwe Jeova ear lukkuun metak ke ej lo an eo Nejin ejitõnbõro mej ilo juon wãween ekaeñtaanan im kajjookok! Elukkuun alikkar bwe ñe Jeova en kar jab kõn̦aan jeorl̦o̦k ad bõd, innem eban kar kõtl̦o̦k bwe eo Nejin en mej kõn kõj.

7. Ta jet waanjoñak ko ilo Baibõl̦ kõn jet iaan ro me Jeova ear m̦õn̦õn̦õ in jeorl̦o̦k aer bõd?

⁷ Baibõl̦ eo eobrak kõn waanjoñak ko an ro me Jeova ear m̦õn̦õn̦õ in jeorl̦o̦k aer bõd. (Eps. 4:32) Wõn ro ejiktok ilo l̦õmn̦ak eo am̦? Bõlen kwõj l̦õmn̦ak kõn Kiiñ Menassa. Em̦m̦aan in enana ear kõm̦m̦an jerawiwi ko rel̦l̦ap n̦ae Jeova. Ear kabuñ ñan anij ko rewaan im tõl ro jet bwe ren kabuñ ñani. Ear m̦an ajri ro nejin make, im katok kake er ñan anij ko rewaan. Ejjab men kein wõt, ak joñan ear likũt juon ekjabin anij waan ilo tampel̦ eo eokkwõjarjar an Jeova. Baibõl̦ eo ej ba kõn e im ba: “Ear kõm̦m̦an [el̦ap] nana im̦aan mejãn Jeova im kallu E.” (2 Kro. 33:2-7) Ijoke, ke Menassa ear lukkuun ukel̦o̦k jãn bũruon, Jeova ear m̦õn̦õn̦õ in jeorl̦o̦k an bõd. Joñan ear bar kõjepl̦aake bwe en kiiñ. (2 Kro. 33:12, 13) Bõlen kwõj bar l̦õmn̦ak kõn Kiiñ Devid, eo me ear kõm̦m̦an jerawiwi ko rel̦l̦ap n̦ae Jeova, me rekitibuj mourin lejãn im uror. Ijoke, ke Devid ear lukkuun ukel̦o̦k im kwal̦o̦k bwe ear jerawiwi, Jeova ear jeorl̦o̦k an bõd. (2 Sa. 12:9, 10, 13, 14) Aet, jemaroñ lukkuun tõmak im lõke bwe Jeova ekõn̦aan jeorl̦o̦k bõd ko ad. Im ãinwõt ad naaj loe, wãween an jeorl̦o̦k bõd ejejuwaan ñe jej keidi ñan wãween an armej jeorl̦o̦k bõd.

MAROÑ EO EJEJUWAAN AN JEOVA ÑAN JEORL̦O̦K BÕD

8. Ewi wãween an maroñ eo ejejuwaan an Jeova ãinwõt eo ej ri-Ekajet jelõt wãween an jeorl̦o̦k bõd?

⁸ Jeova ej “Irooj in ekajet ñan aolepen lal̦.” (Jen. 18:25) Juon ri-ekajet eo em̦m̦an ej aikuj m̦wilal̦ an mel̦el̦e kõn kien eo. Jeova ej ri-Ekajet eo ad, im elukkuun mel̦el̦e kõn kien eo kõnke e eo ej ri-Letok Kien ñan kõj. (Jem. 4:12) Ejjel̦o̦k bar juon ijello̦kun Jeova me el̦ap an jel̦ã kõn ta eo ejim̦we im ta eo ebõd. Bar ta eo me juon ri-ekajet em̦m̦an ej aikuji? Ej aikuj jel̦ã kõn aolep men ko rem̦ool ilo juon keej m̦okta jãn an kõm̦m̦an pepe. Ilo wãween in, Jeova ej ri-Ekajet eo em̦m̦antata kõnke aolep iien ejel̦ã kõn aolep men ko rem̦ool.

9. Ta ko Jeova ejel̦ã kaki ñe ej pepe el̦aññe enaaj jeorl̦o̦k bõd ke ak jaab?

⁹ Jeova eoktakl̦o̦k jãn armej ro rej ri-ekajet, kõnke aolep iien ejel̦ã kõn aolep men ko rem̦ool ilo jabdewõt keej ko me rej bũktok im̦aan. (Jen. 18:20, 21; Sam 90:8, UBS) Ejjab lo wõt men ko me armej remaroñ loi ak roñ. Elukkuun mel̦el̦e kõn wãween an men ko ãinwõt bõdañ, wãween an juon kar dik im rũttol̦o̦k, wãween ko ipel̦aakin juon armej, ekoba wãween ãjmour eo an, maroñ jelõt kõm̦m̦an ko an. Jeova ebar jel̦ã ta ko ilo bũruon juon armej. El̦ap an jel̦ã kõn unin an juon armej kõm̦m̦ane juon men. Ejjel̦o̦k men en̦ en̦ojak jãn Jeova. (Hib. 4:13) Kõn men in, ñe Jeova ej jeorl̦o̦k bõd, aolep iien ej pedped ioon an lukkuun jel̦ã kõn aolep men ko rej wal̦o̦k ilo juon apañ.

10. Etke jemaroñ ba bwe aolep iien ejim̦we im jejjet wãween an Jeova ekajet im ejjel̦o̦k kalijekl̦o̦k ie? (Duteronomi 32:4)

¹⁰ Aolep iien ejim̦we wãween an Jeova ekajet im ejjel̦o̦k kalijekl̦o̦k ie. Ejjel̦o̦k kalijekl̦o̦k ippãn ñan jidik. Ejjel̦o̦k iien en̦ ej pepe in jeorl̦o̦k an juon bõd kõn wõt paotokin armej eo, an m̦weiie, an utiej, ak kõn kapeel im maroñ ko ippãn. (1 Sa. 16:7; Jem. 2:1-4) Ejjel̦o̦k en̦ emaroñ iuuni ak wiaik bũruon Jeova. (2 Kro. 19:7) Ejjab kõtl̦o̦k bwe inepata im wãween an eñjake ren jelõt wãween an kõm̦m̦ani pepe ko. (Ex. 34:7) Elukkuun alikkar bwe an Jeova mel̦el̦e aolep men ko kõn kõj im aolep wãween ko rej wal̦o̦k ippãd, ekõm̦m̦an bwe en e eo ekkartata bwe en ri-Ekajet.​—Riit Duteronomi 32:4.

11. Ilo wãween et ejejuwaan wãween an Jeova jeorl̦o̦k bõd?

¹¹ Ro me rar je bok ko ilo kajin Hibru ilo Baibõl̦ eo rar kile bwe wãween an Jeova jeorl̦o̦k bõd ejejuwaan. Jet iien, rej kõjerbal juon naanin Hibru me juon kõmel̦el̦e ej ba bwe “ej jerbal wõt ñan kõmel̦el̦eik wãween an Anij jeorl̦o̦k an rijjerawiwi ro bõd. Naan in ejjab jerbal ñan wãween an armej jeorl̦o̦k an doon bõd.” Jeova wõt ewõr an maroñ ñan lukkuun jeoril̦o̦k bõd ko an juon rijjerawiwi me ej ukel̦o̦k. Ta eo ej wal̦o̦k ñe Jeova ej jeorl̦o̦k ad bõd?

12-13. (1) Ewi wãween an juon eñjake ñe Jeova ej jeorl̦o̦k an bõd? (2) Ñe em̦õj an Jeova jeorl̦o̦k an juon bõd, ewi toon an men in pãd?

¹² Ñe jej tõmak bwe em̦õj an Jeova jeorl̦o̦k ad bõd, men in ej “kõkajoor” kõj, im kõm̦m̦an bwe en aenõm̦m̦an kõl̦mãnl̦o̦kjen̦ eo ad im erreo bõklõkõt eo ad. Kain eñjake rot in, jemaroñ wõt bõke ñe Jeova eo make ej jeorl̦o̦k ad bõd. (Jrb. 3:19) Ñe Jeova ej jeorl̦o̦k ad bõd, ej kõm̦m̦an bwe en bar ro̦o̦l im lukkuun em̦m̦an kõtaan eo ad ippãn im ãinwõt ñe jekar jab jerawiwi ñan jidik.

¹³ Ñe Jeova ej jeorl̦o̦k ad bõd, eban bar bõklõñtak ak kauweik kõj kõn jerawiwi eo jekar kõm̦m̦ane. (Ais. 43:25; Jrm. 31:34) Jeova ej likũt jerawiwi ko ad ettol̦o̦k “ãinwõt [an] rear ettol̦o̦k jãn kapilõñ.”b (Sam 103:12) Ñe jej kõl̦mãnl̦o̦kjen̦ kõn joñan an l̦ap an Jeova jeorl̦o̦k bõd, men in ekõm̦m̦an ad obrak kõn bwilõñ ak kautiej im kam̦m̦oolol. (Sam 130:4, UBS) Ijoke, wõn ro me Jeova ej jeorl̦o̦k aer bõd?

WÕN RO JEOVA ENAAJ JEORL̦O̦K AER BÕD?

14. Ta ko em̦õj ad katak kaki kõn wãween an Jeova kõm̦m̦an pepe el̦aññe enaaj jeorl̦o̦k an juon bõd?

¹⁴ Em̦õj ad katak bwe pepe ko Jeova ej kõm̦m̦ani ñan jeorl̦o̦k an juon bõd rejjab pedped ioon joñan an kilep ak dik jerawiwi eo juon ear kõm̦m̦ane. Jaar bareinwõt katak bwe Jeova ej kõjerbal jel̦ãl̦o̦kjen̦ eo ippãn ãinwõt ri-Kõm̦anm̦an eo ad, eo ej ri-Letok Kien, im ad ri-Ekajet, ñe ej pepe el̦aññe enaaj jeorl̦o̦k an juon bõd ak jaab. Ak ta men ko Jeova ej l̦õmn̦ak kaki m̦okta jãn an pepe el̦aññe enaaj jeorl̦o̦k an juon bõd?

15. Ekkar ñan Luk 12:47, 48, ta juon iaan men ko Jeova ej l̦õmn̦ak kaki ñe ej pepe im lale el̦aññe enaaj jeorl̦o̦k an juon bõd?

¹⁵ Juon men Jeova ej l̦õmn̦ak kake ej el̦aññe eo ear kõm̦m̦an jerawiwi ear jel̦ã bwe men eo ej kõm̦m̦ane ebõd. Jesus ear kaalikkar men in ãinwõt aer kar je ilo Luk 12:47, 48. (Riit.) Ñe juon ej bũl̦ããn in kõm̦m̦ane juon men enana im elukkuun jel̦ã bwe el̦ap an nana men in im̦aan mejãn Jeova, ak ej wõnm̦aanl̦o̦k wõt im kõm̦m̦ane, men in ej juon jerawiwi el̦ap. Jeova emaroñ pepe ñan jab jeorl̦o̦k an armej in bõd. (Mark 3:29; Jon 9:41) Ijoke jet iien, kõj make jejel̦ã bwe ebõd men eo jaar kõm̦m̦ane. Ilo wãween in, ewõr ke kõjatdikdik bwe naaj jeorl̦o̦k ad bõd? Aet! Kõnke ebar wõr juon men me Jeova ej l̦õmn̦ak kake ñe ej pepe im lale el̦aññe enaaj jeorl̦o̦k ad bõd.

16. Ta in ukel̦o̦k, im etke elukkuun aorõk ñan ad kõm̦m̦ane men in el̦aññe jekõn̦aan bwe Jeova en jeorl̦o̦k ad bõd?

¹⁶ Jeova ej bareinwõt lale el̦aññe eo ear kõm̦m̦an jerawiwi ej m̦ool ilo an ukel̦o̦k. Ta mel̦el̦ein ñe juon ej ukel̦o̦k? Ej mel̦el̦ein ñe juon ej “kõm̦m̦an oktak ilo wãween an l̦õmn̦ak, eñjake, ak kõttõpar eo an.” Ekitibuj an armej eo nana an mour im lukkuun bũrom̦õj kõn men ko renana ear kõm̦m̦ani ak kõn an kar jab kõm̦m̦ane men eo ejim̦we me en kar kõm̦m̦ane. Juon eo me ej kwal̦o̦k an ukel̦o̦k ejjab baj bũrom̦õj wõt kõn men ko renana ear kõm̦m̦ani, ak ej bar bũrom̦õj kõn an m̦õjn̦o̦ kõtaan eo an ippãn Jeova, im eñin unin ear kõm̦m̦ani men kein renana. Kiiñ Menassa im Kiiñ Devid jim̦or rar kõm̦m̦an jerawiwi ko rel̦l̦ap; meñe ãindein, ak Jeova ear jeorl̦o̦k aer bõd kõnke rar m̦ool ilo aer ukel̦o̦k. (1 Kñ. 14:8) Aet, Jeova eban jeorl̦o̦k ad bõd m̦ae iien ej lo bwe jej m̦oolin ukel̦o̦k. Bõtab ejabwe ñan ad baj bũrom̦õj wõt kõn jerawiwi eo jaar kõm̦m̦ane. Jej aikuj pojakin kõm̦m̦an oktak.c Eñin ej bar juon iaan men ko Jeova ej l̦õmn̦ak kaki.

17. Ta mel̦el̦ein kõm̦m̦an oktak, im etke elukkuun aorõk ñan ad kõm̦m̦ane men in ñe jekõn̦aan bwe jen jab bar kõm̦m̦ani ejja jerawiwi ko wõt? (Aiseia 55:7)

¹⁷ Bar juon men eaorõk me Jeova ej l̦õmn̦ak kake ej ñe juon ej kõm̦m̦an oktak. Kõm̦m̦an oktak ej mel̦el̦ein ñe juon ej “oktakl̦o̦k.” Ilo bar juon wãween ba, juon armej ej aikuj ukot ial̦ eo an im etal jãn men ko renana ej kõm̦m̦ani im jibadek wãween mour eo Jeova ekõn̦aan. (Riit Aiseia 55:7.) Armej eo ej aikuj kõm̦m̦an oktak ilo l̦õmn̦ak eo an im kõtl̦o̦k bwe Jeova en tõl l̦õmn̦ak ko an. (Rom 12:2; Eps 4:23) Ej aikuj jek ilo bũruon ñan etal jãn l̦õmn̦ak im kõm̦m̦an ko an renana. (Kol. 3:7-10) Ilo m̦ool, ad tõmak ilo katok in mour eo an Jesus, men eo in me ej lukkuun pedpedin an Jeova jeorl̦o̦k ad bõd im karreoik kõj jãn jerawiwi. Jeova enaaj jeorl̦o̦k ad bõd pedped ioon katok in mour eo el̦aññe ej lo bwe jej lukkuun m̦oolin kate kõj ñan ukot kõm̦m̦an ko ad.​—1 Jon 1:7.

TÕMAK IM LÕKE BWE JEOVA ENAAJ JEORL̦O̦K AM̦ BÕD

18. Ta ko jaar etali kõn wãween an Jeova jeorl̦o̦k bõd?

¹⁸ Jen ãliji ilo tukadu jet iaan men ko raorõk jaar kõnono kaki. Jeova eo ej make wõt l̦aptata an jeorl̦o̦k bõd ilo aolepen pel̦aakin lañ im lal̦. Etke jemaroñ ba men in? M̦oktata, kõnke aolep iien ej pojakin jeorl̦o̦k bõd. Kein karuo, elukkuun jel̦ã aolep men ko kõn kõj. El̦ap an jel̦ã kõn kõj im wãween ko ippãd, im e eo ekkartata ñan lale el̦aññe jej lukkuun m̦oolin ukel̦o̦k. Im kein kajilu, ñe Jeova ej jeorl̦o̦k ad bõd, ej lukkuun jeorel̦o̦k bõd eo im ej ãinwõt ñe jaar jab bõd ñan jidik. Im men in ej kõm̦m̦an bwe en maroñ erreo bõklõkõt eo ad im bwe en buñbũruon ippãd.

19. Meñe jejjab weeppãn im jej nãj baj kõm̦m̦an wõt jerawiwi, ak etke jemaroñ lo lañlõñ?

¹⁹ Em̦ool bwe toon wõt ad jab weeppãn, jej nãj baj kõm̦m̦an wõt jerawiwi. Bõtab, jemaroñ bõk kaenõm̦m̦an jãn naan ko ilo bok eo Insight on the Scriptures, Volume 2, peij 771, me ej ba: “Jeova el̦ap an tũriam̦o im ejel̦ã kõn m̦õjn̦o̦ ko an ri-karejar ro an. Kõn men in rejjab aikuj bũrom̦õj aolep iien kõn wõt aer jab weeppãn im aer kõm̦m̦an likjab. (Sam 103:8-14; 130:3) Ñe rej kate er joñan wõt aer maroñ ñan mour ekkar ñan wãween ko an Jeova, remaroñ lo lañlõñ. (Pil 4:4-6; 1Jo 3:19-22).” Juon l̦õmn̦ak ekanooj in kõketak!

20. Ta ko jenaaj etali ilo katak eo tok juon?

²⁰ El̦ap ad kam̦m̦oolol bwe Jeova epojakin jeorl̦o̦k ad bõd ñe jej m̦oolin bũrom̦õj kõn jerawiwi ko jekar kõm̦m̦ani. Ak ewi wãween jemaroñ anõke wãween an Jeova jeorl̦o̦k bõd? Wãween et ko me ad jeorl̦o̦k bõd ej ãinl̦o̦kwõt an Jeova jeorl̦o̦k bõd, ak wãween et ko me reoktak? Etke aorõk bwe jen mel̦el̦e kõn oktakin an Jeova jeorl̦o̦k bõd jãn oktakin an armej jeorl̦o̦k bõd? Katak eo tok juon enaaj uwaaki kajjitõk kein.