Tõmak bwe Em̦õj an Jeova Jol̦o̦k Am̦ Bõd

1-2. Ta eñjake eo an ro rej m̦oolin ukel̦o̦k ñe Jeova ej jol̦o̦k aer bõd? (Bar lale pija eo.)

KIIÑ Devid ear mel̦el̦e kõn eñjake ko juon armej ej bũki ñe ej eddodo kõn bõd ko ear kõm̦m̦ani m̦okta, kõnke e bareinwõt ear kõm̦m̦ani bõd ko rel̦l̦ap ilo mour eo an. (Sam 40:12; 51:3; lale kõmel̦el̦e eo itulõñin jebta in.) Meñe ãindein, ak ear kwal̦o̦k bwe ej m̦oolin ukel̦o̦k im Jeova ear jol̦o̦k an bõd. (2 Sa. 12:13) Tokjãn men in, Devid ear bareinwõt mel̦el̦e kõn eñjake eo an juon armej me ejako an eddodo kõnke em̦õj an Jeova jol̦o̦k an bõd.—Sam 32:1.

² Ãinwõt Devid, emaroñ jako ad eddodo kõn bõd ko jaar kõm̦m̦ani jãn wõt an Jeova kwal̦o̦k tũriam̦o ñan kõj. El̦ap ad bõk kaenõm̦m̦an kõn ad jel̦ã bwe Jeova em̦õn̦õn̦õ in jol̦o̦k jerawiwi ko ad—ekoba jerawiwi ko rel̦l̦ap. Ej kõm̦m̦ane men in el̦aññe jej m̦oolin ukel̦o̦k, kwal̦o̦k jerawiwi ko ad ñan E im em̦m̦aan ro rej lale eklejia, im jej kate kõj joñan wõt ad maroñ ñan jab ãliji ejja bõd ko wõt! (JK. 28:13; Jrb. 26:20; 1 Jon 1:9) El̦ap ad bareinwõt bõk kaenõm̦m̦an kõn ad jel̦ã bwe ñe Jeova ej jol̦o̦k an juon armej bõd, ej ãinwõt ñe armej eo ear jab jerawiwi ñan jidik!—Ezk. 33:​16, UBS.

3-4. Ta eñjake eo an juon jeid im jatid kõrã ãlikin an kar peptaij, im ta ko jenãj kõnono kaki ilo katak in?

³ Ijoke, ewõr iien ko epen an jet tõmak bwe em̦õj Jeova jol̦o̦k aer bõd. L̦õmn̦ak kõn bwebwenato eo an Jennifer, eo me ear dik im rettol̦o̦k ilo m̦ool eo. Ke ear juon jo̦dikdik, ear jino kõm̦m̦ani men ko renana im n̦ooji jãn jinen im jemãn. Bõtab jejjo iiõ ko tokãlik, ear kõm̦m̦an oktak ko, ajel̦o̦k mour eo an ñan Jeova, im peptaij. Ej ba: “Ilo mour eo aõ m̦okta ikõn kadek, mourin l̦õñ, illulu, im kõm̦m̦an jããn ear men eo aorõktata ilo mour eo aõ. Iar jel̦ã bwe ãlikin aõ kar akwel̦ap bwe Jeova en jol̦o̦k aõ bõd im ukel̦o̦k, katok in mour eo an Jesus ear karreoik eõ jãn jerawiwi ko aõ. Bõtab ear pen aõ tõmak kõn aolepen bũruõ bwe em̦õj an jol̦o̦k aõ bõd.”

⁴ Ewõr ke iien ko kwõj lo bwe epen am̦ tõmak bwe em̦õj an Jeova jol̦o̦k am̦ bõd kõn jerawiwi ko kwaar kõm̦m̦ani m̦okta? Jeova ekõn̦aan bwe jen ãinwõt Devid ilo ad tõmak bwe ej tũriam̦okake kõj im em̦õj an jol̦o̦k ad bõd. Ilo katak in, jenãj kõnono kõn unin ad aikuj tõmak bwe em̦õj an jol̦o̦k ad bõd im ta ko remaroñ jipañ kõj ñan tõmak men in.

UNIN JEJ AIKUJ TÕMAK BWE EM̦ÕJ AN JEOVA JOL̦O̦K AD BÕD

5. Ta eo Setan ekõn̦aan bwe jen tõmake? Kwal̦o̦k juon waanjoñak.

⁵ Ñe jej tõmak bwe em̦õj an Jeova jol̦o̦k ad bõd, jemaroñ kõjparok kõj make jãn ad po ilo juon iaan aujiid ko an Setan. Keememej bwe Setan ej kõmaat aolepen an maroñ ñan kajjioñ kabõjrak kõj jãn ad karejar ñan Jeova. Bwe Setan en maroñ kajejjet kõttõpar in an, emaroñ kajjioñ kõm̦m̦an bwe jen tõmak bwe Jeova ejjãmin jol̦o̦k ad bõd. L̦õmn̦ak kõn bwebwenato eo an em̦m̦aan eo ilo Korint me kar jol̦o̦ke jãn eklejia eo kõn an kar mourin l̦õñ. (1 Kor. 5:​1, 5, 13) Tokãlik ke ear ukel̦o̦k, Setan ear kõn̦aan bwe ro ilo eklejia eo ren jab jol̦o̦k an bõd—im jab karwaineneiki ñan eklejia eo. Ilo ejja iien eo wõt, Setan ear kõn̦aan bwe em̦m̦aan eo en l̦õmn̦ak bwe Jeova ejjãmin jol̦o̦k an bõd. Setan ear kõn̦aan bwe em̦m̦aan in en ebbweer im bõjrak jãn an karejar ñan Jeova. Ejjañin oktak kõttõpar in an Setan im wãween ko ej kõjerbali ñan kajejjet kõttõpar in an. Meñe ãindein, ak “jejel̦ã kõn wãween [kein] ej kõjerbali.”—2 Kor. 2:​5-11.

6. Ta eo emaroñ jipañ kõj bwe en jako ad eddodo kõn jerawiwi ko em̦õj ad ukel̦o̦k jãni?

⁶ Ñe jej tõmak bwe em̦õj an Jeova jol̦o̦k ad bõd, emaroñ jako ad eddodo kõn jerawiwi ko jaar kõm̦m̦ani. Ñe jej jerawiwi, eitok wõt bwe jen bũrom̦õj kõn men ko jaar kõm̦m̦ani. (Sam 51:17) Ilo m̦ool, men in ej juon men em̦m̦an. Bõklõkõt eo ad emaroñ kõm̦akũt kõj ñan kõm̦m̦an oktak ko im kõm̦m̦ani men ko rejim̦we. (2 Kor. 7:​10, 11) Ijoke, el̦aññe jej wõnm̦aanl̦o̦k wõt im eddodo kõn jerawiwi ko em̦õj ad ukel̦o̦k jãni, jemaroñ oktak im ebbweer im bõjrak jãn ad karejar ñan Jeova. Ñe jej tõmak bwe em̦õj an Jeova jol̦o̦k ad bõd, emaroñ jako ad eddodo im bũrom̦õj. Innem jemaroñ karejar ñan Jeova ilo wãween eo ekõn̦aan bwe jen karejar ñane—kõn juon bõklõkõt erreo im el̦ap lañlõñ. (Kol. 1:​10, 11; 2 Tim. 1:3) Bõtab, ewi wãween jemaroñ tõmak kõn aolepen bũruod bwe em̦õj an Jeova jol̦o̦k ad bõd?

TA KO REMAROÑ JIPAÑ KÕJ ÑAN TÕMAK BWE EM̦ÕJ AN JEOVA JOL̦O̦K AD BÕD?

7-8. Ta eo Jeova ear ba ñan Moses kõn E make, im ta eo jemaroñ lõke? (Exodus 34:​6, 7)

⁷ Kõl̦mãnl̦o̦kjen̦ kõn wãween an Jeova kwal̦o̦k kõn E make. Ñan waanjoñak, L̦õmn̦ak kõn ta eo Jeova ear ba ñan Moses ilo Tõl Sainai.a (Riit Exodus 34:​6, 7.) Iaan aolep men ko Jeova emaroñ kar ba kõn E make im kadkad ko kadkadin, ear kwal̦o̦k bwe ej “juon Anij ej tũriam̦okake, im Ejouj.” Kwõl̦ak lale, kain Anij rot in enãj ke m̦akoko in jol̦o̦k bõd eo an juon ri-karejeran me ej m̦oolin ukel̦o̦k jãn jerawiwi ko an? Alikkar eban! Men in elukkuun nana im ejjel̦o̦k tũriam̦o ie. Jeova ejjãmin kwal̦o̦k kadkad kein ñan jidik.

⁸ Jemaroñ lõke bwe Jeova elukkuun ban riab kõn kain Anij rot E kõnke ej juon Anij in m̦ool. (Sam 31:5) Kõn men in, jemaroñ lõke men ko ej ba. Ñe kwõj lo bwe epen am̦ jol̦o̦k am̦ eddodo kõn jerawiwi ko kwaar kõm̦m̦ani m̦okta, kajjitõk ippam̦ make: ‘Ij ke tõmak bwe Jeova ej juon Anij etũriam̦o im ejouj im aolep iien ej jol̦o̦k bõd ko an jabdewõt armej me ej ukel̦o̦k jãn jerawiwi ko an? Innem, etke epen aõ tõmak bwe em̦õj an Jeova jol̦o̦k aõ bõd?’

9. Ta mel̦el̦ein ñe Jeova ej jol̦o̦k ad bõd? (Sam 32:5)

⁹ Kõl̦mãnl̦o̦kjen̦ kõn men ko Jeova ej katakin kõj ilo Baibõl̦ ikijjeen wãween an jol̦o̦k ad bõd. Ñan waanjoñak, l̦õmn̦ak kõn wãween an kar ri-jeje Baibõl̦ eo Devid kwal̦o̦k kõn an Jeova jol̦o̦k bõd. (Riit Sam 32:5.) Devid ear ba: “Kwaar jol̦o̦k . . . aõ bõd.” Ilo kajin Hibru, naan in “jol̦o̦k” emaroñ mel̦el̦ein “kotake,” “bõke,” ak “ineeke.” Ke Jeova ear jol̦o̦k an Devid bõd, ear ãinwõt ñe Jeova ear kotak jerawiwi ko an im bõke jãne. Tokjãn men in, ear jako an Devid eddodo kõn jerawiwi ko ear kõm̦m̦ani. (Sam 32:​2-4) Kõj bareinwõt emaroñ bar jako ad eddodo. Ñe jej m̦oolin ukel̦o̦k jãn jerawiwi ko ad, jejjab aikuj wõnm̦aanl̦o̦k wõt im eddodo kõn jerawiwi ko me em̦õj an Jeova kotaki im bũki jãn kõj.

10-11. Ta eo jej katak kõn Jeova jãn naan kein ‘ekõn̦aan jol̦o̦k ad bõd’? (Sam 86:5)

¹⁰ Riit Sam 86:5. Ilo eoon in, Devid ej ba bwe Jeova ‘ekõn̦aan jol̦o̦k ad bõd.’ Ikijjeen naan kein, juon bokin kõmel̦el̦e kõn Baibõl̦ ej ba: “Ej piktokin [Jeova] ñan jol̦o̦k ad bõd.” Etke ej piktokin ñan kõm̦m̦ane men in? M̦õttan eo kein karuo ilo eoon in ej kõmel̦el̦e im ba: “Kwõj kalõñl̦o̦k [yokwe, UBS] ñan ro otemjej rej kũr ñan Kwe.” Ãinwõt ad kar katak ilo katak eo l̦o̦k, Jeova ej kallim̦ur bwe enaaj kwal̦o̦k yokwe eo em̦ool ñan ro rej yokwe E im ejjãmin el̦l̦o̦k jãn er. Yokwe in an ej kõm̦akũt E ñan “kanooj wũjlep in jol̦o̦k bõd ko an” ro rej ukel̦o̦k jãn jerawiwi ko rar kõm̦m̦ani. (Ais 55:7) El̦aññe epen am̦ tõmak bwe em̦õj an Jeova jol̦o̦k am̦ bõd, kwõmaroñ kajjitõk ippam̦ make: ‘Ij ke tõmak bwe Jeova ekõn̦aan jol̦o̦k bõd ko an aolep ro rej ukel̦o̦k me rej jar im kajjitõk bwe en kwal̦o̦k tũriam̦o ñan er? Innem, etke epen aõ tõmak bwe em̦õj an Jeova jol̦o̦k aõ bõd ke iar jar im kajjitõk bwe en kwal̦o̦k tũriam̦o ñan eõ?’

¹¹ Jemaroñ bõk kaenõm̦m̦an jãn ad jel̦ã bwe Jeova elukkuun mel̦el̦e bwe kõj rijjerawiwi. (Sam 139:​1, 2, UBS) Jen kiiõ etale naan ko jet an Devid ilo bokin Sam me remaroñ bareinwõt jipañ kõj ñan tõmak bwe em̦õj an Jeova jol̦o̦k ad bõd.

JAB MEL̦O̦KL̦O̦K MEN EO JEOVA EJ KEEMEMEJ

12-13. Ekkar ñan Sam 103:​14, ta eo Jeova ej keememej kõn kõj, im ta eo men in ej kõm̦akũt E ñan kõm̦m̦ane?

¹² Riit Sam 103:14. Devid ej ba bwe Jeova ej “keememej bwe [kõj] bũñal.” Ikijjeen naan kein, Devid ej kwal̦o̦k juon iaan un ko unin an Jeova kõn̦aan jol̦o̦k bõd ko an ro rej ukel̦o̦k jãn jerawiwi ko aer: Emel̦el̦e bwe kõj rijjerawiwi. Bwe jen kal̦apl̦o̦k ad mel̦el̦e kõn men in, jen lukkuun etale naan kein an Devid.

¹³ Devid ear ba bwe Jeova “ejel̦ã wãween kõm̦anm̦an [kõj].” Ear kõm̦anm̦an Adam “jãn bũñal” im elukkuun jel̦ã bwe ewõr joñan maroñ ko ippãn armej ro reweeppãn. Ñan waanjoñak, rej aikuj m̦õñã, kiki, im menono. (Jen. 2:7) Bõtab kõnke Adam im Iv rar jerawiwi, naan kein “kõj bũñal” emaroñ bar mel̦el̦ein bwe jaar l̦otak im jolõt jerawiwi im ej piktokid ñan kõn̦aan kõm̦m̦ani men ko renana. Devid ear ba bwe Jeova ejjab baj jel̦ã bwe kõj rijjerawiwi, ak ej bareinwõt “keememej” men in. Ilo kajin Hibru, naan in emaroñ mel̦el̦ein bwe Jeova ej em̦m̦akũt im kwal̦o̦k tũriam̦o. Ilo tukadu, jemaroñ ba bwe eñin ej mel̦el̦ein naan ko an Devid: Jeova emel̦el̦e bwe ewõr iien ko jenãj kõm̦m̦an bõd, bõtab ñe jej m̦oolin ukel̦o̦k enãj kwal̦o̦k tũriam̦o ñan kõj im jol̦o̦k ad bõd.—Sam 78:​38, 39.

14. (1) Ta eo juon Devid ear ba kõn wãween an Jeova jol̦o̦k ad bõd? (Sam 103:12) (2) Ewi wãween an waanjoñak eo an Devid kwal̦o̦k kõn wãween an Jeova jol̦o̦k ad bõd? (Lale bo̦o̦k eo etan “Wãween an Jeova Jol̦o̦k Bõd ko Ad im Mel̦o̦kl̦o̦ki.”)

¹⁴ Ta eo juon jemaroñ katak kõn wãween an Jeova jol̦o̦k ad bõd? (Riit Sam 103:12.) Devid ear ba bwe ñe Jeova ej jol̦o̦k ad bõd, Ej kattol̦o̦k jerawiwi ko ad jãn kõj “ãinwõt [an] rear ettol̦o̦k jãn kapilõñ.” Rear ej jikin eo ettol̦o̦k tata jãn kapilõñ, ak rilik. Ilo m̦ool, jikin kein ruo rejjab maroñ iioon doon. Ta eo men in ej katakin kõj kõn jerawiwi ko ad ãlikin an Jeova jol̦o̦k ad bõd? Ej mel̦el̦ein bwe ñe Jeova ej jol̦o̦k ad bõd, ej ãinwõt ñe ej bõk jerawiwi ko ad ñan juon jikin elukkuun ettol̦o̦k jãn kõj. Joñan aer ettol̦o̦k, ejjel̦o̦k men en̦ enãj kõm̦m̦an an Jeova bar keememejtok jerawiwi ko ad ak kaje kõj kõn ejja jerawiwi eo wõt.—Ezk. 18:​21, 22; Jrb. 3:19.

15. Ta eo jemaroñ kõm̦m̦ane ñe ej nana wõt ad mour kõn jerawiwi ko jaar kõm̦m̦ani m̦okta?

¹⁵ Ewi wãween an naan ko an Devid ilo Sam 103 maroñ jipañ kõj ñan tõmak bwe em̦õj an Jeova jol̦o̦k ad bõd? El̦aññe ej nana wõt ad mour kõn bõd ko jaar kõm̦m̦ani m̦okta, jemaroñ kajjitõk ippãd make: ‘Ij ke mel̦o̦kl̦o̦k men eo Jeova ej keememeje—mel̦el̦ein, ij ke mel̦o̦kl̦o̦k bwe Jeova ej mel̦el̦e bwe ij juon rijjerawiwi im enãj jol̦o̦k aõ bõd kõnke em̦õj aõ ukel̦o̦k jãn jerawiwi ko iar kõm̦m̦ani? Im ij ke keememej men eo em̦õj an Jeova kããlõt ñan mel̦o̦kl̦o̦ke—mel̦el̦ein, ij ke l̦õmn̦ak wõt kõn jerawiwi ko me em̦õj an Jeova jol̦o̦k aõ bõd kaki im ejjãmin kaje eõ kaki?’ Jeova ejjab wõnm̦aanl̦o̦k wõt im l̦õmn̦ak kõn jerawiwi ko jaar kõm̦m̦ani m̦okta. Kõn men in, kõj bareinwõt jen jab kõm̦m̦ane men in. (Sam 130:​3, UBS) Ñe jej tõmak bwe em̦õj an Jeova jol̦o̦k ad bõd, enãj jako an nana ad mour kõn jerawiwi ko jaar kõm̦m̦ani m̦oktal̦o̦k im jenãj wõnm̦aanl̦o̦k wõt im karejar ñan Jeova ilo lañlõñ.

16. Kwal̦o̦k juon waanjoñak kõn unin an kauwõtata ñe ej nana wõt ad mour kõn bõd ko jaar kõm̦m̦ani m̦okta. (Bar lale pija eo.)

¹⁶ L̦õmn̦ak kõn juon waanjoñak. Ñe ej nana wõt ad mour kõn bõd ko jaar kõm̦m̦ani m̦okta, men in ej ãinwõt ñe jej kattõre juon wa im ejjab bõjrak ad lale kilaaj in reilikl̦o̦k eo. Ejjel̦o̦k jorrããn ñe jej lale kilaaj eo jãn iien ñan iien kõnke jemaroñ lale el̦aññe ewõr jorrããn ko remaroñ wal̦o̦k itulik. Bõtab bwe jen maroñ kattõr im ejjel̦o̦k jorrããn, jej aikuj reim̦aanl̦o̦k im kalimjek m̦aan ad ial̦. Ejja ãindeinl̦o̦k wõt, ej juon men em̦m̦an ñe jãn iien ñan iien jej reilikl̦o̦k im l̦õmn̦ak kõn bõd ko jaar kõm̦m̦ani m̦okta. Ilo ad ãindein, men in emaroñ jipañ kõj ñan jab bar kõm̦m̦ani ejja bõd ko wõt. Bõtab ñe el̦ap wõt ad l̦õmn̦ak kõn bõd ko jaar kõm̦m̦ani m̦okta, men in emaroñ kõm̦m̦an bwe jen eddodo im bõbrae ad kal̦apl̦o̦k ijo kun̦aad ilo ad karejar ñan Jeova. Ijello̦kun ad ãindein, jen wõnm̦aanl̦o̦k wõt im reim̦aanl̦o̦k ñan ial̦ eo im̦aad. Jej pãd ilo ial̦ eo me ej tõll̦o̦k ñan mour ilo lal̦ eo ekããl me Anij ear kallim̦ur kake, ijo ‘jejjãmin keememej’ men ko renana rar wal̦o̦k ilo mour ko ad.—Ais. 65:17; JK. 4:25.

KATE EOK BWE KWÕN TÕMAK KÕN AOLEPEN BŨRUOM̦

17. Etke jej aikuj kate wõt kõj bwe jen tõmak kõn aolepen bũruod bwe Jeova ej yokwe kõj im em̦õj an jol̦o̦k ad bõd?

¹⁷ Jej aikuj kate wõt kõj bwe jen tõmak kõn aolepen bũruod bwe Jeova ej yokwe kõj im em̦õj an jol̦o̦k ad bõd. (1 Jon 3:​19, ftn.) Etke? Kõnke Setan eban bõjrak jãn an kajjioñ kõm̦m̦an bwe jen tõmak bwe Jeova ejjab yokwe kõj im ejjãmin jol̦o̦k ad bõd. Ilo jem̦l̦o̦kin, juon wõt an kõttõpar—ñan kabõjrak kõj jãn ad karejar ñan Jeova. Jemaroñ kõtmãne bwe enãj l̦apl̦o̦k wõt an Setan kate kõnke ejel̦ã bwe jidik wõt iien ippãn. (Rev. 12:12) Jen jab kõtl̦o̦k bwe en lo tõprak!

18. Ta ko kwõmaroñ kõm̦m̦ani bwe kwõn tõmak kõn aolepen bũruom̦ bwe Jeova ej yokwe eok im em̦õj an jol̦o̦k am̦ bõd?

¹⁸ Ñan kal̦apl̦o̦k am̦ tõmak bwe Jeova ej yokwe eok, kajjioñ jerbali naanin kakapilõk ko jãn katak eo l̦o̦k. Bwe kwõn tõmak kõn aolepen bũruom̦ bwe em̦õj an Jeova jol̦o̦k am̦ bõd, kõl̦mãnl̦o̦kjen̦ kõn wãween an Jeova kwal̦o̦k kõn E make. Lukkuun l̦õmn̦ak kõn ta eo Baibõl̦ ej ba kõn wãween an Jeova jol̦o̦k bõd. Jab mel̦o̦kl̦o̦k bwe Jeova elukkuun jel̦ã kõn am̦ jab weeppãn im enaaj kwal̦o̦k tũriam̦o ñan kwe. Im keememej bwe ñe ej jol̦o̦k ad bõd, em̦õj an lukkuun jol̦o̦ke. Innem, ãinwõt Devid, jenaaj lukkuun lõke bwe Jeova ej kwal̦o̦k tũriam̦o ñan kõj im jenaaj maroñ ba, “Kom̦m̦ool Jeova kõn am̦ ‘jol̦o̦k aõ bõd’!”—Sam 32:5.