Kwal̦o̦k Yokwe im Tũriam̦o ñan Ro Rej Jerawiwi

1. Ta eo emaroñ wal̦o̦k ãlikin an juon kõm̦m̦ane juon jerawiwi el̦ap?

ILO katak eo l̦o̦k, jaar lo wãween an kar rijjilõk Paul jipañ eklejia eo ilo Korint kõn apañ eo ikijjeen em̦m̦aan eo ear jerawiwi. Em̦m̦aan in ear jab ukel̦o̦k im kar aikuj jol̦o̦ke jãn eklejia eo. Bõtab, ãinwõt an eoon eo katak in ej pedped ioon kwal̦o̦k, Anij emaroñ jipañ juon eo ear kõm̦m̦ane juon jerawiwi el̦ap ñan ukel̦o̦k. (Rom 2:4) Ewi wãween an em̦m̦aan ro rej lale eklejia maroñ jipañ armej rot in ñan ukel̦o̦k?

2-3. Ta eo jej aikuj kõm̦m̦ane ñe jejel̦ã bwe juon jeid im jatid rũttõmak ear kõm̦m̦ane juon jerawiwi el̦ap, im etke?

² Em̦m̦aan ro rej lale eklejia rejjab maroñ jipañ juon eo ear kõm̦m̦an jerawiwi ñe rejjab jel̦ã kõn apañ eo ear wal̦o̦k. Kõn men in, ta eo jej aikuj kõm̦m̦ane ñe jejel̦ã bwe juon jeid im jatid ear kõm̦m̦ane juon jerawiwi el̦ap—juon jerawiwi me emaroñ kõm̦m̦an bwe en jako an m̦õttan eklejia eo? Jej aikuj rõjañ eo ear kõm̦m̦an jerawiwi ñan kepaake em̦m̦aan ro rej lale eklejia im kajjitõk jipañ ippãer.—Ais. 1:18; Jrb. 20:28; 1 Pit. 5:2.

³ Ak ta el̦aññe eo ear kõm̦m̦an jerawiwi em̦akoko in kõnono ippãn em̦m̦aan ro rej lale eklejia? Ñe ãindein, jemaroñ kepaake em̦m̦aan rein im kõnono ippãer. Ilo ad kõm̦m̦ane men in, jej jipañ armej eo ñan bõk jipañ eo ej aikuji. Ej juon menin yokwe ñan kõm̦m̦ane men in kõnke jejjab kõn̦aan luuji eo jeid im jatid. Ñe eo ear kõm̦m̦an jerawiwi ej wõnm̦aanl̦o̦k wõt ilo kõm̦m̦an ko an renana, enaaj l̦apl̦o̦k an ko̦kkure jem̦jerã eo an ippãn Jeova. Bareinwõt emaroñ ko̦kkure etan eklejia eo. Kõn men in, meñe emaroñ lukkuun pen, ak jej peran im kepaake em̦m̦aan ro rej lale eklejia im kõnono ippãer kõnke jej yokwe Jeova im eo jeid im jatid.—Sam 27:14.

WÃWEEN AN EM̦M̦AAN RO REJ LALE EKLEJIA JIPAÑ JUON EO EAR KÕM̦M̦ANE JUON JERAWIWI EL̦AP

4. Ta mejãnkajjik eo an em̦m̦aan ro rej lale eklejia ñe rej kweilo̦k ippãn eo ear kõm̦m̦ane juon jerawiwi el̦ap?

⁴ Ñe juon ilowaan eklejia eo ej kõm̦m̦ane juon jerawiwi el̦ap, kumi in em̦m̦aan ro rej lale eklejia eo rej kããlõt jilu iaaer me rekkar bwe ren jerbal ãinwõt juon kamiti.a Em̦m̦aan rein jilu rej aikuj ettã bũrueer im rejel̦ã bwe ewõr joñan maroñ ko ippãer. Ilo aer kajjioñ in jipañ eo ear kõm̦m̦an jerawiwi ñan ukel̦o̦k, rej kile bwe rejjab maroñ iuuni armej eo ñan kõm̦m̦an oktak. (Dut. 30:19) Em̦m̦aan rein rej kile bwe ejjab aolep ro rar kõm̦m̦an jerawiwi renaaj ukel̦o̦k ãinwõt kar Kiiñ Devid. (2 Sa. 12:13) Jet iaan rein remaroñ kããlõt ñan kõjekdo̦o̦n naanin kauwe ko an Jeova. (Jen. 4:​6-8, UBS) Meñe ãindein, ak mejãnkajjik eo an em̦m̦aan ro rej lale eklejia ej ñan jipañ eo ear kõm̦m̦an jerawiwi ñan ukel̦o̦k. Ta naanin kakapilõk ko em̦m̦aan rein rej l̦oori ilo iien eo rej kweilo̦k ippãn eo ear kõm̦m̦an jerawiwi?

5. Ta kadkad ko em̦m̦aan ro rej lale eklejia rej aikuj kwal̦o̦k ñe rej kweilo̦k ippãn eo ear kõm̦m̦an jerawiwi? (2 Timote 2:​24-26) (Bar lale pija eo.)

⁵ Em̦m̦aan ro rej lale eklejia rej watõk eo ear jerawiwi ãinwõt juon jiip eaorõk me ejebwãbwe. (Luk 15:​4, 6) Kõn men in, ñe rej kweilo̦k ippãn eo ear kõm̦m̦an jerawiwi, rejjab kwal̦o̦k naan ko reddo im ejjab nana aer kõm̦m̦an ñane. Bareinwõt, rejjab bõk l̦õmn̦ak eo bwe aer kweilo̦k ippãn armej eo ej baj juon laajrak wõt me rej aikuj l̦oore. Ijello̦kun aer ãindein, renãj kwal̦o̦k kadkad ko ilo 2 Timote 2:​24-26. (Riit.) Em̦m̦aan ro rej lale eklejia rej dãpij wõt aer meanwõd im jouj ilo aer kajjioñ tõpar bũruon eo ear kõm̦m̦an jerawiwi.

6. Ewi wãween an em̦m̦aan ro rej lale eklejia kõpooje bũrueer m̦okta jãn aer kweilo̦k ippãn eo ear kõm̦m̦an jerawiwi? (Rom 2:4)

⁶ Em̦m̦aan ro rej lale eklejia rej kõpooje bũrueer. Rej kate er ñan anõke joñak eo an Jeova ilo aolep kõm̦m̦an ko aer ñan eo ear jerawiwi. Rej keememej naan ko an Paul ke ear ba: “Ilo an [Anij] jouj ej kajjioñ in kõm̦m̦an bwe kwõn ukel̦o̦k.” (Riit Rom 2:4.) Em̦m̦aan ro rej lale eklejia rej aikuj keememej bwe rej pãd ium̦win tõl eo an Christ ilo aer jabõte bwij eo. (Ais. 11:​3, 4; Matu 18:​18-20) M̦okta jãn an kamiti eo kweilo̦k ippãn eo ear kõm̦m̦an jerawiwi, renaaj jar kake mejãnkajjik eo aer: ñan kajjioñ jipañ armej eo ear jerawiwi bwe en ukel̦o̦k. Renaaj etale eoon ko im kappok jipañ jãn bok ko an doulul in im renaaj jar kõn lol̦o̦kjen̦. Renaaj aikuj kõnono kake ta ko ilo mour eo an armej eo me remaroñ kar jelõte wãween an l̦õmn̦ak im kõm̦m̦an ko an.—JK. 20:5.

7-8. Ewi wãween an em̦m̦aan ro rej lale eklejia maroñ anõke Jeova ilo aer meanwõd ñe rej kweilo̦k ippãn eo ear kõm̦m̦an jerawiwi?

⁷ Em̦m̦aan ro rej lale eklejia rej anõke joñak eo an Jeova ilo aer kwal̦o̦k meanwõd. Rej keememej wãween an kar Jeova kõm̦m̦an ñan ro rar kõm̦m̦an jerawiwi ilo tõre ko etto. Ñan waanjoñak, Jeova ear kijenmej ilo an kar kajjioñ jipañ Kein. Ear kakkõl Kein kõn men ko renana renaaj wal̦o̦k el̦aññe enaaj jerawiwi im ear ba bwe enaaj kõjeraam̦m̦ane ñe enaaj pokake E. (Jen. 4:​6, 7) Jeova ear kauweik Devid ilo an kar kõjerbale Netan, eo ear kõjerbale juon waanjoñak me ear tõpar bũruon kiiñ in. (2 Sa. 12:​1-7) Im ikijjeen aelõñin Israel, elõñ alen an kar Jeova jilkinl̦o̦k ri-kanaan ro ñan jipañ er bwe ren ukel̦o̦k ilo iien ko rar jab pokake. (Jrm. 7:​24, 25) Jeova ear jab kõttar an armej ro an ukel̦o̦k m̦okta innem ej kab naaj jipañ er. Ijoke, ear bõk buñtõn ne eo m̦oktata ikijjeen an kar lukkuun rõjañ er bwe ren ukel̦o̦k.

⁸ Em̦m̦aan ro rej lale eklejia rej anõke joñak eo an Jeova ñe rej kajjioñ jipañ ro rar kõm̦m̦ani jerawiwi ko rel̦l̦ap. Ãinwõt an 2 Timote 4:2 ba, em̦m̦aan ro rej kwal̦o̦k “el̦ap meanwõd” ñe rej kajjioñ jipañ rein. Kõn men in, juon em̦m̦aan ej lale eklejia ej aikuj aolep iien kwal̦o̦k ineem̦m̦an im kijenmej bwe en maroñ jipañ eo ear jerawiwi ñan kõm̦m̦ane men eo ejim̦we. Ñe eo ej lale eklejia ej oktak im illu ak inepata, armej eo emaroñ jab roñjake naanin jiroñ ko an ak emaroñ m̦akoko in ukel̦o̦k.

9-10. Ewi wãween an em̦m̦aan ro rej lale eklejia maroñ jipañ eo ear jerawiwi ñan l̦õmn̦ak kõn pepe ko ear kõm̦m̦ani me rar tõll̦o̦ke ñan jerawiwi?

⁹ Em̦m̦aan ro rej lale eklejia rej kajjioñ lale ta ko rar wal̦o̦k me ear tõll̦o̦k armej eo ñan kõm̦m̦ane jerawiwi eo. Ñan waanjoñak, armej eo ear ke jino m̦õjn̦o̦l̦o̦k jidik kõn jidik kõnke ear jab niknik ilo an katak ippãn make ak kwal̦o̦k naan? Ear ke dikl̦o̦k an jar jãn bũruon ak ekkeini an jar ñan Jeova? Ear ke kajjioñ kabõjrake kõn̦aan ko an renana? Ear ke kõm̦m̦ani jokãlõt ko rem̦m̦an ikijjeen ro ej aetõl er im menin kam̦õn̦õn̦õ ko? Ewi wãween an kar jokãlõt kein jelõte bũruon? Ej ke kile wãween an kar jokãlõt ko an im kõm̦m̦an ko an jelõte eo Jemãn ilañ, Jeova?

¹⁰ Em̦m̦aan ro rej lale eklejia remaroñ kwal̦o̦k kajjitõk ko me remaroñ jipañ armej eo ñan an l̦õmn̦ak kõn men ko rar kam̦õjn̦o̦ik jem̦jerã eo an ippãn Jeova im tõll̦o̦ke ñan jerawiwi. Rej kõm̦m̦ane men in ilo juon wãween ejouj, im rejjab kajjitõk ippãn kõn mel̦el̦e ko rejjab aikuj jel̦ã kaki. (JK. 20:5) Kobal̦o̦k ippãn men in, remaroñ kõjerbale waanjoñak ko ñan jipañ armej eo ñan kile bõd ko ear kõm̦m̦ani, ãinwõt an kar Netan kõm̦m̦ane ñan jipañ Devid. Bõlen ilo kweilo̦k eo kein kajuon ippãn eo ear kõm̦m̦an jerawiwi, armej eo emaroñ kwal̦o̦k an lukkuun bũrom̦õj kõn pepe ko an im wãween an kar l̦õmn̦ak. Joñan, emaroñ ukel̦o̦k ilo iien n̦e.

11. Ewi wãween an kar Jesus kõm̦m̦an ñan ro rar kõm̦m̦an jerawiwi?

¹¹ Em̦m̦aan ro rej lale eklejia rej kate er joñan wõt aer maroñ ñan anõke joñak eo an Jesus. Jesus ear jipañ Saul jãn Tarsus ilo an kar kajjitõk ippãn im ba: “Saul, Saul, etke kwõj kaeñtaan eõ?” Ilo an kar Jesus kwal̦o̦k kajjitõk in, ear jipañ Saul ñan kile bwe men ko ej kõm̦m̦ani rebõd. (Jrb. 9:​3-6) Im ikijjeen “kõrã [eo] Jezebel,” Jesus ear ba: “Iar lel̦o̦k iien bwe en ukel̦o̦k.”—Rev. 2:​20, 21.

12-13. Ewi wãween an em̦m̦aan ro rej lale eklejia maroñ lel̦o̦k iien bwe eo ear kõm̦m̦an jerawiwi en ukel̦o̦k? (Bar lale pija eo.)

¹² Em̦m̦aan ro rej lale eklejia rej anõke joñak eo an Jesus im rejjab m̦õkaj im bõk l̦õmn̦ak eo bwe armej eo ear kõm̦m̦an jerawiwi eban ukel̦o̦k. Jet armej remaroñ kajju ukel̦o̦k ilo kweilo̦k eo aer jinointata ippãn em̦m̦aan ro, ak ewõr ro jet me emaroñ bõk iien. Kõn men in, em̦m̦aan ro remaroñ karõk ñan aer kweilo̦k ippãn armej eo elõñl̦o̦k jãn juon alen. Bõlen ãlikin kweilo̦k eo kein kajuon, eo ear kõm̦m̦an jerawiwi emaroñ lukkuun kõl̦mãnl̦o̦kjen̦ kõn men ko rar ba ñane. Emaroñ kwal̦o̦k ettã bõro im jar ñan Jeova im kajjitõk jeorl̦o̦k bõd. (Sam 32:​5, UBS; 38:18) Innem ñe em̦m̦aan ro rej bar kweilo̦k ippãn tokãlik, emaroñ oktak wãween an armej eo l̦õmn̦ak jãn iien eo jinointata rar kweilo̦k ippãn.

¹³ Ñan jipañ tõll̦o̦k eo ear kõm̦m̦an jerawiwi bwe en ukel̦o̦k, em̦m̦aan ro rej lale eklejia rej kwal̦o̦k tũriam̦o im jouj. Rej kõjatdikdik im jar bwe Jeova enaaj kõjeraam̦m̦ane aer kate er im bwe enaaj iañaktok an Kũrjin eo ear jerawiwi im enaaj ukel̦o̦k.—2 Tim. 2:​25, 26.

14. Wõn eo ej lukkuun jipañ juon eo ear jerawiwi ñan ukel̦o̦k, im etke jej ba men in?

¹⁴ El̦aññe eo ear kõm̦m̦an jerawiwi ej ukel̦o̦k, men in ej bõktok el̦ap lañlõñ! (Luk 15:​7, 10) Meñe em̦m̦aan ro rej kate er joñan wõt aer maroñ ñan jipañ ak kajim̦weik juon armej, ilo m̦ool wõn eo ej lukkuun jipañ eo ear jerawiwi ñan ukel̦o̦k? Lale ta eo Paul ear je kõn ro rej kõm̦m̦an jerawiwi, ear ba: “Bõlen Anij emaroñ kõtl̦o̦k bwe ren ukel̦o̦k.” (2 Tim. 2:25) Alikkar bwe ejjab armej ro, bõtab Jeova eo ej jipañ ro rej jerawiwi ñan kõm̦m̦an oktak ilo wãween aer l̦õmn̦ak im kõm̦m̦an ko aer. Paul ej kwal̦o̦k men ko rem̦m̦an rej itok jãn an juon armej ukel̦o̦k. Ej ba bwe emaroñ bõk jel̦ãl̦o̦kjen̦ eo ejim̦we kõn m̦ool eo, enaaj iañaktok an im kajim̦we l̦õmn̦ak eo an, im emaroñ rõl̦o̦k jãn aujiid ko an Setan.—2 Tim. 2:26.

15. Ewi wãween an em̦m̦aan ro rej lale eklejia maroñ wõnm̦aanl̦o̦k wõt im jipañ eo me ear kõm̦m̦an jerawiwi?

¹⁵ Ñe juon armej me ear kõm̦m̦ane juon jerawiwi el̦ap ej ukel̦o̦k, kamiti eo enaaj karõk ñan lol̦o̦k wõt armej in bwe en maroñ wõnm̦aanl̦o̦k wõt im bõk jipañ eo ej aikuji ñan tarin̦aeik aujiid ko an Setan im ñan “kõm̦m̦an bwe en jim̦we wõt ial̦ ko [an].” (Hib. 12:​12, 13) Aet, ejjel̦o̦k pere bwe em̦m̦aan ro rej lale eklejia rejjab kwal̦o̦k ñan ro jet ta eo armej in ear kõm̦m̦ane. Meñe ãindein, ak ta eo eklejia eo emaroñ aikuj jel̦ã kake?

“KAUWEIK . . . IM̦AAN MEJÃN RO JET”

16. Ekkar ñan 1 Timote 5:​20, wõn ro Paul ear kõnono kake ke ear ba “im̦aan mejãn ro jet”?

¹⁶ Riit 1 Timote 5:20. Paul ear je naan kein ñan Timote, juon eo me ej bar lale eklejia, ñan kwal̦o̦k kilen jipañe ro rar “wõnm̦aanl̦o̦k wõt im kõm̦m̦an jerawiwi.” Ta mel̦el̦ein an kar ba “im̦aan mejãn ro jet”? Ear jab mel̦el̦ein aolepen eklejia eo. Ijoke, ear jitõñl̦o̦k ñan ro me bõlen em̦õj aer kar jel̦ã kõn jerawiwi eo. Bõlen rein ekoba ro rar lo ta eo ear wal̦o̦k ak ro me armej eo ear kõm̦m̦ane juon jerawiwi ear kepaak im kõnono ippãer. Em̦m̦aan ro rej lale eklejia renaaj kõjjel̦ãik armej rein wõt bwe em̦õj kajim̦weik eo ear kõm̦m̦ane jerawiwi eo.

17. Ñe elõñ iaan ro ilo eklejia eo rejel̦ã bwe ewõr juon eo ear kõm̦m̦ane juon jerawiwi el̦ap ak renaaj baj jel̦ã wõt kake, ta kõjjel̦ã eo naaj kõm̦m̦ane, im etke?

¹⁷ Jet iien, elõñ iaan ro ilo eklejia eo remaroñ jel̦ã bwe ewõr juon eo ear kõm̦m̦ane juon jerawiwi el̦ap ak bõlen renaaj baj jel̦ã wõt kake. Ilo iien rot kein, “ro jet” emaroñ kitibuj aolepen eklejia eo. Innem juon iaan em̦m̦aan ro rej lale eklejia enaaj kõm̦m̦ane juon kõjjel̦ã bwe armej eo em̦õj an bõk kaje. Etke? Paul ej uwaak im ba: “Kõnke en juon kein kakkõl er” bwe ren jab po ilo jerawiwi.

18. Ta eo em̦m̦aan ro rej lale eklejia rej kõm̦m̦ane ñe eo ear kõm̦m̦ane juon jerawiwi el̦ap edik jãn 18 an iiõ? (Bar lale pija eo.)

¹⁸ Ak ta el̦aññe armej eo ear kõm̦m̦ane juon jerawiwi el̦ap edik jãn 18 an iiõ? Em̦m̦aan ro rej lale eklejia renaaj karõk bwe ruo iaaer ren kweilo̦k ippãn armej in ekoba jemãn im jinen me em̦õj aer peptaij.b Em̦m̦aan ro renaaj lale ta eo rũtto ro rar kõm̦m̦ane ñan jipañ eo nejier ñan kõm̦m̦an oktak im ukel̦o̦k. Ñe eo nejier ej roñjake im pokake er, em̦m̦aan ro remaroñ pepe bwe rũtto ro remaroñ wõnm̦aanl̦o̦k wõt im jipañe eo nejier. Em̦m̦aan ro rejel̦ã bwe ej an rũtto ro jemãn im jinen eddo jãn Anij ñan kajim̦weik ak kauweik eo nejier ilo yokwe. (Dut. 6:​6, 7; JK. 6:20; 22:6; Eps. 6:​2-4) Innem, jãn iien ñan iien em̦m̦aan ro renaaj lale ippãn rũtto ro ñe eo nejier ej bõk jipañ eo ej aikuji. Bõtab, ta el̦aññe eo nejier ejjab ukel̦o̦k im ej wõnm̦aanl̦o̦k wõt im kõm̦m̦ani men ko renana? Ñe ãindein, juon kamiti in em̦m̦aan ro rej lale eklejia renaaj kweilõk ippãn eo ear kõm̦m̦an jerawiwi ekoba jemãn im jinen me em̦õj aer peptaij.

“JEOVA ELUKKUUN L̦AP AN YOKWE IM ETŨRIAM̦O”

19. Ewi wãween an em̦m̦aan ro rej lale eklejia kajjioñ anõke Jeova ñe rej jipañ juon eo ear kõm̦m̦ane juon jerawiwi el̦ap?

¹⁹ Jeova ej kõtmãne bwe em̦m̦aan ro rej lale eklejia ren kõjparok erreo eo an eklejia eo. (1 Kor. 5:7) Bareinwõt em̦m̦aan rein relukkuun kõn̦aan bwe eo ear kõm̦m̦an jerawiwi en ukel̦o̦k. Im ilo aer jipañe armej in, rej wõnm̦aanl̦o̦k wõt im kõjatdikdik bwe armej in enaaj kõm̦m̦an oktak. Etke? Kõnke rekõn̦aan anõke Jeova, eo “elukkuun l̦ap an yokwe im etũriam̦o.” (Jem. 5:11) Lale ewi wãween an kar rijjilõk eo erũtto etan Jon ear kwal̦o̦k yokwe rot in. Ear je im ba: “Ajri ro nejũ, ij jejewaj ñan kom̦ men kein bwe kom̦win jab jerawiwi. Ijoke el̦aññe jabdewõt ej jerawiwi, ewõr juon ad rijjipañ ej pãd ippãn Jemãdwõj ilañ, im rijjipañ in ej Jesus Christ, eo ej juon ri-wãnõk.”—1 Jon 2:1.

20. Ta eo jenaaj etale ilo katak eo tok juon?

²⁰ Ekabũrom̦õjm̦õj bwe ewõr Kũrjin ro rem̦akoko in ukel̦o̦k. Ñe ãindein, enaaj menin aikuj ñan jol̦o̦ke jãn eklejia eo. Ta eo em̦m̦aan ro rej lale eklejia rej kõm̦m̦ane ñe men in ej wal̦o̦k? Jenaaj kõnono kake men in ilo katak eo ãliktata ilo magazine in.