Watchtower ONLINE L̦ÃIBRÃRE
Watchtower
ONLINE L̦ÃIBRÃRE
Kajin M̦ajel̦
O̦
  • N̦
  • n̦
  • M̦
  • m̦
  • L̦
  • l̦
  • O̦
  • o̦
  • BAIBÕL̦
  • BOK IM KEIN KATAK
  • KWEILO̦K KO
  • w25 Jeptõmba p. 2-7
  • “Kũrtok Em̦m̦aan ro Rej Lale Eklejia”

Ejjañin wõr pija in ilo tõre in.

Jol̦o̦k bõd, ewõr juon problem ej kõm̦m̦an an jab jo̦ pija in.

  • “Kũrtok Em̦m̦aan ro Rej Lale Eklejia”
  • Naan in Keeañ Kõn Aelõñ eo an Jeova (Kein Katak)—2025
  • Unin Tõl Jidikdik Ko
  • Katak ko Jet
  • ÑÃÃT EO JEJ AIKUJ “KŨRTOK EM̦M̦AAN RO REJ LALE EKLEJIA”?
  • ETKE JEJ AIKUJ KŨRTOK EM̦M̦AAN RO REJ LALE EKLEJIA?
  • EWI WÃWEEN AN EM̦M̦AAN RO REJ LALE EKLEJIA JIPAÑ KÕJ?
  • EDDO EO AD KAJJOJO
  • Kwal̦o̦k Yokwe im Tũriam̦o ñan Ro Rej Jerawiwi
    Naan in Keeañ Kõn Aelõñ eo an Jeova (Kein Katak)—2024
  • Laajrak eo an Eklejia Eo
    M̦õn̦õn̦õ kõn Mour ñan Indeeo!​—Kein Katak Baibõl̦
  • Em̦m̦aan im Likao Ro​—Kom̦ij Ke Kate Kom̦ ñan Erom Juon Eo Ej Lale Eklejia?
    Naan in Keeañ Kõn Aelõñ eo an Jeova (Kein Katak)—2024
  • Jabõt ro me Rej Kate Er Joñan Wõt Aer Maroñ ñan Jipañ Armej ro an Jeova
    Jerbal eo Ad im Wãween Ad Mour—Kein Katak—2023
Ebar Wõr
Naan in Keeañ Kõn Aelõñ eo an Jeova (Kein Katak)—2025
w25 Jeptõmba p. 2-7

KATAK 36

AL 103 Em̦m̦aan Ro Rej Tõl—Menin Letok Jãn Anij

“Kũrtok Em̦m̦aan ro Rej Lale Eklejia”

“En kũrtok em̦m̦aan ro rej lale eklejia eo.”—JEM. 5:14.

UNIN KATAK IN

Bõk jipañ jãn em̦m̦aan ro rej lale eklejia ilo iien eo kwõj aikuji.

1. Ewi wãween an Jeova kwal̦o̦k bwe ej kaorõk jiip ro an?

EL̦AP an Jeova kaorõk jiip ro an. Ear wiaik er kõn bõtõktõkin Jesus im ear jitõñ em̦m̦aan ro rej lale eklejia ñan lale im kõjparok bwij eo an. (Jrb. 20:28) Anij ekõn̦aan bwe em̦m̦aan rein ren jouj ñan jiip ro an. Em̦m̦aan ro rej lale eklejia rej l̦oore tõl eo an Christ ikijjeen aer kõketak jiip ro im kõjparok er jãn men ko remaroñ ko̦kkure mourin jetõb eo aer.—Ais. 32:​1, 2.

2. Wõn ro el̦apl̦o̦k an Jeova kõn̦aan jipañ er? (Ezekiel 34:​15, 16)

2 El̦ap an Jeova kaorõk aolep jiip ro an. Ijoke, el̦apl̦o̦k an kõn̦aan jipañ ro rej eñtaan. Jet remaroñ eñtaan kõn bõd ko rar kõm̦m̦ani, im Jeova ej kõjerbal em̦m̦aan ro rej lale eklejia ñan jipañ er. (Riit Ezekiel 34:​15, 16.) Meñe ãindein, ak ekõn̦aan bwe jen kappok jipañ ilo iien ko jej aikuji. Jeova ejjab baj kõn̦aan bwe jen jar wõt ñane, bõtab ebar kõn̦aan bwe jen kappok jipañ jãn ro rej ‘jabõt im katakin’ ilo eklejia eo.—Eps. 4:​11, 12.

3. Ewi wãween jemaroñ bõk tokjãn jãn jerbal eo an em̦m̦aan ro rej lale eklejia?

3 Ilo katak in, jenaaj etale wãween an Jeova kõjerbal em̦m̦aan ro rej lale eklejia ñan jipañ kõj ñe jej nañinmej ilo jetõb. Jenaaj uwaake kajjitõk kein: Ñããt eo jej aikuj kajjitõk jipañ jãn em̦m̦aan ro rej lale eklejia? Etke jej aikuj kajjitõk jipañ jãn er? Im ewi wãween aer jipañ kõj? Meñe emaroñ em̦m̦an mourin jetõb eo ad kiiõ, ak uwaak ko ñan kajjitõk kein renaaj jipañ kõj ñan kal̦apl̦o̦k ad kaorõk karõk in an Anij im emaroñ jipañ kõj ilju im jekl̦aj ñe ebaj m̦õjn̦o̦ mourin jetõb eo ad.

ÑÃÃT EO JEJ AIKUJ “KŨRTOK EM̦M̦AAN RO REJ LALE EKLEJIA”?

4. Etke jejel̦ã bwe Jemes 5:​14-16, 19, 20 ej kõnono kõn juon eo enañinmej ilo jetõb? (Bar lale pija ko.)

4 Ri-kal̦oor eo Jemes ear kwal̦o̦k ta karõk eo an Anij ñe jej aikuj jipañ ikijjeen mourin jetõb eo ad. Ear ba: “Ewõr ke jabdewõt jãn ibwiljimi enañinmej? En kũrtok em̦m̦aan ro rej lale eklejia eo.” (Riit Jemes 5:​14-16, 19, 20.) Naan kein an Jemes rej kwal̦o̦k bwe ear kõnono kõn an juon nañinmej ilo jetõb. Ñan waanjoñak, Jemes ej rõjañ juon eo enañinmej bwe en kũrtok, ejjab juon taktõ, ak em̦m̦aan ro rej lale eklejia. Bareinwõt, Jemes ej ba bwe juon eo enañinmej emaroñ ãjmour ñe naaj jol̦o̦k an bõd kõn jerawiwi ko ear kõm̦m̦ani. Ñe juon ej nañinmej ilo jetõb, buñtõn ne ko ej aikuj bũki bwe en bar ãjmour rej ãinl̦o̦kwõt buñtõn ne ko juon ej aikuj bũki ñe ej nañinmej ilo kanniõk. Ñe jej nañinmej, jej lol̦o̦k juon taktõ, kõmel̦el̦eiki kõn nañinmej eo ad, im l̦oori men ko ej ba jen kõm̦m̦ani. Ãindeinl̦o̦k wõt ñe jej nañinmej ilo jetõb, jej aikuj kepaake juon em̦m̦aan ej lale eklejia, kõmel̦el̦eiki kõn wãween eo jej iioone, im l̦oori naanin kakapilõk ko ej litoki jãn Baibõl̦.

Pija ko: 1. Juon em̦m̦aan ej kõmel̦el̦e ñan juon taktõ kõn an metak aeran. 2. Juon jeid im jatid em̦m̦aan ej kõmel̦el̦e apañ eo ej iioone ñan juon em̦m̦aan ej lale eklejia ke erro ej pãd inabõj im jijet ioon juon jikin jijet.

Ñe jej nañinmej, jej lol̦o̦k juon taktõ; ñe jej nañinmej ilo jetõb, jej aikuj kepaake em̦m̦aan ro rej lale eklejia (Lale pãrokõrããp 4)


5. Ewi wãween ad maroñ jel̦ã bwe em̦õj ad jino nañinmej ilo jetõb?

5 Ilo Jemes jebta 5, Jemes ej rõjañ kõj bwe jen kepaake em̦m̦aan ro rej lale eklejia ñe jej lo bwe em̦õjn̦o̦ mourin jetõb eo ad. Ej juon men emãlõtlõt ñan kajjitõk jipañ jãn em̦m̦aan rein m̦okta jãn an lukkuun jorrããn jem̦jerã eo ad ippãn Jeova! Jej aikuj m̦ool ilo ad etale kõj make. Baibõl̦ ej kakkõl kõj bwe jemaroñ m̦on̦e kõj make im l̦õmn̦ak bwe em̦m̦an wõt mourin jetõb eo ad. (Jem. 1:22) Jet Kũrjin ro ilo Sardis rar kõm̦m̦ane ejja bõd in wõt, im Jesus ear kakkõl er im ba bwe renañinmej ilo jetõb. (Rev. 3:​1, 2) Juon wãween jemaroñ lale el̦aññe ej em̦m̦an wõt mourin jetõb eo ad, ej ikijjeen ad keidi joñan ad kijejeto ilo ad karejar ñan Jeova kiiõ ñan iien eo jaar peptaij. (Rev. 2:​4, 5) Jemaroñ kajjitõk ippãd make: ‘Ejakol̦o̦k ke aõ m̦õn̦õn̦õ in riit Baibõl̦ im kõl̦mãnl̦o̦kjen̦ kake? Edikl̦o̦k ke aõ etal ñan iien kweilo̦k ko im ñe ij etal, iar ke kõppojakl̦o̦k im̦aan ñan iien kweilo̦k kein? Edikl̦o̦k ke aõ kijejeto ilo jerbalin kwal̦o̦k naan? El̦ap wõt ke aõ l̦õmn̦ak im jol̦o̦k iien ko aõ kõn wõt m̦weiuk ko ak kein kam̦õn̦õn̦õ ko?’ Ñe kwõj uwaak aet ñan jabdewõt iaan kajjitõk kein, men in emaroñ kaalikkar bwe em̦õj an m̦õjn̦o̦l̦o̦k jem̦jerã eo am̦ ippãn Jeova. Im el̦aññe jejjab kõm̦m̦an jabdewõt, emaroñ nanal̦o̦k wõt. Ñe jejjab maroñ kõkajoorl̦o̦k jem̦jerã eo ad ippãn Jeova ak jaar kõm̦m̦an juon men me ejjab kabuñbũruon, eokwe jej aikuj kajjitõk jipañ jãn em̦m̦aan ro rej lale eklejia.

6. Ta eo ro rar kõm̦m̦ane juon jerawiwi el̦ap rej aikuj kõm̦m̦ane?

6 El̦aññe ewõr juon ear kõm̦m̦ane juon jerawiwi el̦ap—joñan an l̦ap jerawiwi in remaroñ aikuj jol̦o̦ke jãn eklejia eo—eokwe armej in ej aikuj kepaak em̦m̦aan ro rej lale eklejia. (1 Kor. 5:​11-13) Ñe juon armej ej kõm̦m̦ane juon jerawiwi el̦ap, ej aikuj jipañ bwe en bar em̦m̦an jem̦jerã eo an ippãn Jeova. Jeova emaroñ jol̦o̦k ad bõd ikijjeen katok in pinmuur eo ñe jej “kaalikkar ilo kõm̦m̦an ko [ad] bwe jej ukel̦o̦k.” (Jrb. 26:20) Juon iaan men ko jemaroñ kõm̦m̦ani ñe em̦õj ad kõm̦m̦ane juon jerawiwi el̦ap ej kepaake em̦m̦aan ro rej lale eklejia.

7. Wõn ro jet rej aikuj kajjitõk jipañ jãn em̦m̦aan ro rej lale eklejia?

7 Em̦m̦aan ro rej lale eklejia rejjab baj jipañ ro wõt rar kõm̦m̦ani jerawiwi ko rel̦l̦ap, ak rej bareinwõt jipañ ro rem̦õjn̦o̦ ilo jetõb. (Jrb. 20:35) Ñan waanjoñak, kwõmaroñ inepata im l̦õmn̦ak bwe elukkuun pen am̦ tarin̦aeik kõn̦aan ko renana. Emaroñ l̦apl̦o̦k an pen men in el̦aññe m̦okta jãn am̦ kar jel̦ã m̦ool eo kwaar bõk uno ko rekkajjoor, alwõji pijain keelwaan ko, ak mourin l̦õñ. Kwõjjab aikuj jelm̦ae apañ kein make iaam̦. Kwõmaroñ kõnono ippãn juon iaan em̦m̦aan ro rej lale eklejia im enaaj roñjake am̦ kwal̦o̦k kõn inepata ko am̦, lewaj naanin kakapilõk ko rem̦m̦an, im kaenõm̦m̦an eok im ba bwe kwõmaroñ kabuñbũruon Jeova ikijjeen am̦ jab kõm̦m̦ani kõn̦aan ko am̦ renana. (Ekl. 4:12) El̦aññe kwõj ebbweer kõn apañ in kwõj iioone, em̦m̦aan ro remaroñ kakeememej eok bwe men in ej kwal̦o̦k bwe el̦ap am̦ kaorõk jem̦jerã eo am̦ ippãn Jeova im kwõjjab lõke eok make.—1 Kor. 10:12.

8. Jej aikuj ke kepaak em̦m̦aan ro rej lale eklejia kõn aolep bõd ko jej kõm̦m̦ani? Jouj im kõmel̦el̦e.

8 Jejjab aikuj kepaak em̦m̦aan ro rej lale eklejia kõn aolep bõd ko jej kõm̦m̦ani. Ñan waanjoñak, jen ba bwe kwaar ba juon men ekõmmetak ñan juon iaan ro jeim̦ im jatũm̦, joñan kwaar kwal̦o̦k am̦ illu ippãer. Ijello̦kun am̦ kepaake juon iaan em̦m̦aan ro rej lale eklejia, kwõmaroñ jerbale naanin kakapilõk eo an Jesus im kõm̦m̦an aenõm̦m̦an ippãn eo jeim̦ ak jatũm̦. (Matu 5:​23, 24) Kwõmaroñ kõm̦m̦an etale ko ilo bok ko ad kõn kadkadin ineem̦m̦an, meanwõd, im jel̦ã irooj iood make bwe en em̦m̦anl̦o̦k am̦ kwal̦o̦k kadkad kein ilju im jekl̦aj. Ijoke, el̦aññe apañ eo ej wõnm̦aanl̦o̦k wõt im kwõjjab maroñ kõm̦adm̦õde, kwõmaroñ kajjitõk jipañ jãn juon iaan em̦m̦aan ro rej lale eklejia. Ilo lõta eo an rijjilõk Paul ñan ro ilo Pilippai, ear kajjitõk ippãn juon iaan em̦m̦aan ro ilo eklejia eo bwe en jipañ Euodia im Sintike ñan kõm̦adm̦õde apañ eo ikõtaaerro. Ejja ãindeinl̦o̦k wõt, juon iaan em̦m̦aan ro ilo eklejia eo am̦ emaroñ jipañ eok ñan kõm̦adm̦õde apañ eo kwõj iioone.—Pil. 4:​2, 3.

ETKE JEJ AIKUJ KŨRTOK EM̦M̦AAN RO REJ LALE EKLEJIA?

9. Etke jejjab aikuj kõtl̦o̦k bwe ad jook en bõbraik kõj jãn ad kajjitõk jipañ jãn em̦m̦aan ro rej lale eklejia? (Jabõn Kõnnaan 28:13)

9 Ej aikuj wõr ad tõmak im jej aikuj kwal̦o̦k peran bwe jen maroñ kajjitõk jipañ ñe jaar kõm̦m̦ane juon jerawiwi el̦ap ak ñe epen ad tarin̦aeik kõn̦aan ko renana. Meñe jemaroñ jook, ak jen jab kõtl̦o̦k bwe men in en bõbraik kõj jãn ad kajjitõk jipañ jãn em̦m̦aan ro rej lale eklejia. Etke? Ñe jej l̦oore karõk in an Jeova, jej kwal̦o̦k bwe jej lõke e im naanin tõl ko an me rej jipañ kõj bwe en kajoor wõr mourin jetõb eo ad. Jej kile bwe jej aikuji jipañ eo an bwe jen maroñ wõnm̦aanl̦o̦k wõt im kõm̦m̦ani men ko rejim̦we. (Sam 94:18) Im ñe jaar kõm̦m̦ane juon jerawiwi el̦ap, Jeova enaaj kwal̦o̦k tũriam̦o ñan kõj el̦aññe jenaaj kwal̦o̦k bõd ko ad ñan em̦m̦aan ro rej lale eklejia im bõjrak jãn ad kõm̦m̦ani men ko renana.—Riit Jabõn Kõnnaan 28:13.

10. Ta eo emaroñ wal̦o̦k ñe jej kajjioñ in n̦ooje jerawiwi ko ad?

10 Ñe jej kwal̦o̦k kõn jerawiwi ko jaar kõm̦m̦ani ñan em̦m̦aan ro rej lale eklejia, Jeova emaroñ jeorl̦o̦k ad bõd im emaroñ bar em̦m̦an jem̦jerã eo ad ippãn. Bõtab, ñe jejjab kõnnaan ippãn em̦m̦aan rein, enaaj nanal̦o̦k wãween eo jej iioone. Ke Kiiñ Devid ear kajjioñ n̦ooje jerawiwi ko an, ear eñtaan. Joñan, ear l̦ap an jelõt mourin jetõb eo an, eñjake ko an, im ãjmour eo an. (Sam 32:​3-5) Ñe juon armej ej bõk juon nañinmej ak ejorrããn juon jikin ilo ãnbwinnin bõtab ejjab kõm̦adm̦õde, eokwe enaaj nanal̦o̦k wõt. Ejja ãindeinl̦o̦k wõt, ñe jej nañinmej ilo jetõb ak jejjab kepaake em̦m̦aan ro rej lale eklejia ñan jipañ kõj, enaaj l̦apl̦o̦k ad eñtaan. Jeova emel̦el̦e kõn men in, eñin unin ej kũr kõj ñan ippãn ñan “etale” ak kõm̦adm̦õde apañ eo jej iioone ikijjeen ad bõk jipañ jãn em̦m̦aan ro rej lale eklejia, ro me ear jitõñ er bwe ren jipañ kõj bwe en bar em̦m̦an mourin jetõb eo ad.—Ais. 1:​5, 6, 18, UBS.

11. Ta ko renaaj wal̦o̦k ñe jejjab kwal̦o̦k kõn jerawiwi ko rel̦l̦ap ñan em̦m̦aan ro rej lale eklejia?

11 Ñe jej kajjioñ n̦ooje jerawiwi eo el̦ap jaar kõm̦m̦ane, men in emaroñ jelõt ro jet. Jemaroñ bõbrae an del̦o̦ñtok jetõb kwõjarjar eo an Anij ilowaan eklejia eo im ko̦kkure aenõm̦m̦an eo an ro jeid im jatid. (Eps. 4:30) Ejja ãindeinl̦o̦k wõt, ñe jejel̦ã bwe juon ilo eklejia eo ear kõm̦m̦ane juon jerawiwi el̦ap, jej aikuj lukkuun rõjañ armej in bwe en kõnono ippãn em̦m̦aan ro rej lale eklejia kõn men eo ear kõm̦m̦ane.a Ñe jej n̦ooje jerawiwi eo el̦ap ear kõm̦m̦ane, enaaj wõr ruod im̦aan mejãn Jeova. (Liv. 5:1) Yokwe eo ad ñan Jeova enaaj kõm̦akũt kõj ñan kepaake em̦m̦aan ro rej lale eklejia ñe juon ilo eklejia eo ear kõm̦m̦ane juon jerawiwi el̦ap. Ñe jenaaj ãindein, jej jipañ kõm̦m̦an bwe en erreo wõt eklejia eo im jej bareinwõt jipañ ro rar kõm̦m̦an jerawiwi bwe en bar em̦m̦an jem̦jerã eo aer ippãn Jeova.

EWI WÃWEEN AN EM̦M̦AAN RO REJ LALE EKLEJIA JIPAÑ KÕJ?

12. Ewi wãween an em̦m̦aan ro rej lale eklejia jipañ ro rem̦õjn̦o̦ ilo tõmak?

12 Baibõl̦ eo ej jiroñ em̦m̦aan ro rej lale eklejia ñan jipañ ro rem̦õjn̦o̦ ilo tõmak. (1 Tes. 5:14) El̦aññe kwaar kõm̦m̦ane juon jerawiwi, em̦m̦aan ro remaroñ kwal̦o̦k kajjitõk ko ñan kajjioñ “tuuri” bũruom̦ im lale ta ko rej pãd ilo l̦õmn̦ak eo am̦. (JK. 20:5) Kwõmaroñ jipañ er ikijjeen am̦ kwal̦o̦k bũruom̦ ñan er meñe emaroñ pen ñan kwe kõn wõt m̦anit eo am̦, kain armej rot kwe, ak kõnke kwõjook kõn apañ eo kwõj iioone. Jab mijak ñe kwõnaaj kwal̦o̦k “naanin jajel̦o̦kjen̦.” (Job 6:3) Ijello̦kun an em̦m̦aan ro m̦õkaj im ekajete eok, renaaj kate er ñan lukkuun roñjake eok im kajjioñ bõk aolep mel̦el̦e ko m̦okta jãn aer lewaj naanin kakapilõk. (JK. 18:13) Em̦m̦aan ro rej lale eklejia rejel̦ã bwe ej bõk iien ñan jabõte bwij eo, kõn men in rejjab kõtmãne bwe renaaj maroñ kõm̦adm̦õde apañ ko rel̦l̦ap ãlikin aer kõnono juon wõt kõttan ippãn juon jiip.

13. Ewi wãween an em̦m̦aan ro rej lale eklejia maroñ jipañ kõj ikijjeen aer jar ippãd im letok naanin kakapilõk jãn Baibõl̦? (Bar lale pija ko.)

13 Em̦m̦aan ro rej lale eklejia rejjab kõn̦aan bwe en nanal̦o̦k am̦ mour kõn bõd eo kwaar kõm̦m̦ane. Kõn men in, renaaj jar ippam̦. Kwõnaaj lo an ‘kanooj in kajoor im l̦ap tokjãn’ jar ko aer. Kwõmaroñ bõk kaenõm̦m̦an im kõkajoor el̦ap jãn joñan eo kwaar kõtmãne. Ñe rej jipañ eok renaaj bareinwõt “kapiti [eok] kõn weil̦ ilo etan Jeova.” (Jem. 5:​14-16) “Weil̦” in ej jitõñl̦o̦k ñan naanin Anij. Ilo aer kõjerbale eoon ko rejejjet im rekkar, em̦m̦aan ro remaroñ kaenõm̦m̦an eok im jipañ eok bwe en bar em̦m̦an jem̦jerã eo am̦ ippãn Jeova. (Ais. 57:​18, UBS) Naanin kakapilõk ko rej lewaj jãn Baibõl̦ remaroñ jipañ kal̦apl̦o̦k kõn̦aan eo am̦ ñan wõnm̦aanl̦o̦k wõt im kõm̦m̦ani men ko rejim̦we. Ikijjeen em̦m̦aan ro rej lale eklejia, kwõmaroñ roñ an Jeova ba ñan kwe: ‘Eñin ial̦ eo, kwõn etetal ie.’—Ais. 30:21.

Pija ko: 1. Taktõ eo ilo pija eo l̦o̦k juon ej lale aeran em̦m̦aan eo. Ilo kiin m̦weo, epãd juon pijain X-ray in aeran em̦m̦aan eo. 2. Em̦m̦aan eo ej lale eklejia jãn pija eo l̦o̦k juon ekoba bar juon em̦m̦aan ej lale eklejia rej kõjerbale Baibõl̦ eo ñan kõkajoore em̦m̦aan eo jeid im jatid ilo m̦weo im̦õn. Em̦m̦aan eo jeid im jatid ej mejãn m̦õn̦õn̦õ ke ej roñjake em̦m̦aan ro rej lale eklejia.

Em̦m̦aan ro rej lale eklejia rej kõjerbale Baibõl̦ eo ñan kaenõm̦m̦an ro renañinmej ilo jetõb (Lale pãrokõrããp 13-14)


14. Ekkar ñan Galetia 6:​1, ewi wãween an em̦m̦aan ro rej lale eklejia jipañ ro rar “kõm̦m̦an bõd”? (Bar lale pija ko.)

14 Riit Galetia 6:1. Ñe juon Kũrjin ej “kõm̦m̦an bõd,” ejjab mour ekkar ñan kien ko rewãnõk an Anij. Ilo eoon in, naan ko “kõm̦m̦an bõd” remaroñ jitõñl̦o̦k ñan juon pepe ejjab mãlõtlõt ak juon jerawiwi el̦ap. Yokwe ej kõm̦akũt em̦m̦aan ro rej lale eklejia ñan kajjioñ “kajim̦we ilo jouj.” Ilo kajin Grik, naan eo “kajim̦we” ej kõmel̦el̦e kõn wãween an juon taktõ kajim̦we juon di me ear bwilo̦k bwe en em̦m̦an an mo. Juon taktõ ekapeel ej lukkuun kate joñan wõt an maroñ bwe en jab lukkuun kõmmetak wãween an kajim̦we juon di me ebwilo̦k. Ejja ãindeinl̦o̦k wõt, ñe em̦m̦aan ro rej lale eklejia rej kajim̦we juon jiip, rej kate er joñan wõt aer maroñ ñan kõm̦m̦ane men in ilo juon wãween ejouj im eban kal̦apl̦o̦k an armej eo metak. Baibõl̦ ej bareinwõt rõjañ er ñan “kõjparok [er] make.” Ilo an em̦m̦aan ro jipañ juon ñan kajim̦we ial̦ eo an, rej keememej bwe er bareinwõt rejjab weeppãn im rej bar kõm̦m̦an bõd. Em̦m̦aan ro rej kate er ñan kajjioñ mel̦el̦e kõn eñjake ko an armej eo ijello̦kun aer m̦õkaj im ekajete ak l̦õmn̦ak bwe rem̦m̦anl̦o̦k jãne.—1 Pit. 3:8.

15. Ta eo jemaroñ kõm̦m̦ane ñe ewõr juon apañ jej iioone?

15 Jemaroñ lõke em̦m̦aan ro rej lale eklejia. Em̦õj aer katak im bõk kamminene ñan jab kwal̦o̦k ñan ro jet kõn apañ ko jej iiooni me jejjab kõn̦aan bwe ro jet ren jel̦ã kaki, ñan letok naanin kakapilõk ko jãn Baibõl̦ im jab jãn er make, im ñan wõnm̦aanl̦o̦k wõt im jipañ kõj ineek men ko jej eddodo kaki. (JK. 11:13; Gal. 6:2) Meñe eokkõtaktak kadkad ko im imminene ko aer jãn doon, ak jen jab ãliklik in kepaake jabdewõt iaan em̦m̦aan ro im kwal̦o̦k ñan er kõn juon apañ jej iioone. Alikkar bwe jeban etal ippãn kajjojo iaan em̦m̦aan ro rej lale eklejia im kappok naanin kakapilõk m̦ae iien juon iaaer ejiroñtok men eo jekõn̦aan roñ. Ñe jen kar ãindein, jenaaj ãinwõt ro me rekõn̦aan roñ “men ko em̦m̦an ñan an lo̦jilñier roñ” ijello̦kun aer eo̦roñ “katak ko rejim̦we” jãn Naanin Anij. (2 Tim. 4:3) Ñe jej kepaake juon em̦m̦aan ej lale eklejia kõn juon apañ, emaroñ kajjitõk el̦aññe jaar kõnono ippãn em̦m̦aan ro jet im ta naanin kakapilõk ko rar litok. Im kõnke em̦m̦aan in ejel̦ã joñan maroñ ko ippãn, emaroñ kajjitõk naanin jipañ jãn bar juon em̦m̦aan ej lale eklejia.—JK. 13:​10, UBS.

EDDO EO AD KAJJOJO

16. Ta eddo eo ewõr ippãd kajjojo?

16 Meñe em̦m̦aan ro rej lale eklejia rej lale im kõjparok kõj ãinwõt jiip ro an Anij, ak rejjab jiroñ kõj ta ko jej aikuj kõm̦m̦ani. Ej ad kajjojo eddo ñan mour ilo juon wãween me ej kaalikkar ad tiljek ñan Anij. Kajjojo iaad jenaaj aikuj uwaak ñan Anij kõn men ko jej ba im kõm̦m̦ani. Ikijjeen jipañ eo an Jeova, jemaroñ kõm̦m̦ane pepe ko remãlõtlõt im dãpij wõt ad tiljek ñane. (Rom 14:12) Kõn men in, ijello̦kun an em̦m̦aan ro rej lale eklejia jiroñ kõj ta eo jej aikuj kõm̦m̦ane, rej kõjerbal Baibõl̦ eo ñan jipañ kõj jel̦ã l̦õmn̦ak eo an Jeova. Ñe jej l̦oore naanin kakapilõk ko aer me rej pedped ioon Baibõl̦, jemaroñ kammineneik “maroñ eo [ad] ñan kõl̦mãnl̦o̦kjen̦” bwe jen maroñ kõm̦m̦ani pepe ko remãlõtlõt.—Hib. 5:14.

17. Ta eo jej aikuj jek ippãd make ñan kõm̦m̦ane?

17 Jelukkuun jeraam̦m̦an bwe jej uwaan jiip ro an Jeova! Jeova ear jilkintok Jesus, “jabõt eo em̦m̦an,” bwe en katok kõn mour eo an bwe jen maroñ mour indeeo. (Jon 10:11) Im ikijjeen em̦m̦aan ro rej lale eklejia, Jeova ear kajejjet kallim̦ur eo an ke ear ba: “Inaaj lewaj jabõt ro ekkar ñan bũruõ. Im renaaj naajdik kom̦ ilo jel̦ãl̦o̦kjen̦ im mãlõtlõt.” (Jrm. 3:15) Ñe jej m̦õjn̦o̦ ak nañinmej ilo jetõb, jen jab jenliklik in kũrtok em̦m̦aan ro rej lale eklejia bwe ren jipañ kõj. Innem jen jek ippãd make ñan lukkuun kortokjãn menin letok in jãn Jeova—em̦m̦aan ro rej lale eklejia.

ENAAJ KAR TA UWAAK EO AM̦?

  • Ñããt eo jej aikuj “kũrtok em̦m̦aan ro rej lale eklejia” bwe ren jipañ kõj?

  • Etke jej aikuj kũrtok em̦m̦aan ro rej lale eklejia?

  • Ewi wãween an em̦m̦aan ro rej lale eklejia jipañ kõj?

AL 31 O Etetal Ippãn Anij!

a Ñe eo ear jerawiwi eto an kepaake em̦m̦aan ro rej lale eklejia, am̦ kõn̦aan tiljek ñan Jeova enaaj kõm̦akũt eok ñan kepaak em̦m̦aan ro im kwal̦o̦k men eo ear kõm̦m̦ane.

    Bok im Kein Katak ilo Kajin M̦ajel̦ (1983-2026)
    Log Out
    Log In
    • Kajin M̦ajel̦
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Kilen Kõjerbale
    • Privacy Policy
    • Privacy Settings
    • JW.ORG
    • Log In
    Share