Pein Jeova Ejjab Kadu

1. Ewi wãween an kar Moses kwal̦o̦k an lõke Jeova ke ear tõl ri-Israel ro jãn Ijipt?

BOKIN Hibru, ej kwal̦o̦k bwe elõñ armej rar tõmak ilo Jeova. Juon iaaer kar Moses, eo me ear lukkuun kajoor tõmak eo an. (Hib. 3:​2-5; 11:​23-25) Ear kwal̦o̦k an kajoor tõmak eo an ke ear tõl ri-Israel ro jãn Ijipt. Ear jab kõtl̦o̦k bwe Pero im rũttarin̦ae ro an ren kaamijak im kabõjrake. Ear lukkuun lõke Jeova, im tõl armej ro ilujen Lom̦al̦o Ekilmir im tokãlik ilo ãne jem̦aden. (Hib. 11:​27-29) Enañin aolepen ri-Israel ro rar luuji aer lõke Jeova ñan kabwe aikuj ko aer, ak Moses ear wõnm̦aanl̦o̦k wõt im lõke Anij eo an. Tõmak eo an Moses ear jab dikl̦o̦k, kõnke ilo kabwilõñlõñ Anij ear lel̦o̦k dãn im m̦õñã ilo ãne jem̦aden eo.a—Ex. 15:​22-25; Sam 78:​23-25.

2. Etke Anij ear kajjitõk ippãn Moses: “Ekadul̦o̦k pein Jeova ke”? (Bõnbõn 11:​21-23)

² Meñe ear kajoor tõmak eo an Moses, bõtab tarrin juon iiõ ãlikin an ri-Israel ro rõl̦o̦k ilo kabwilõñlõñ jãn Ijipt, ear pere el̦aññe Jeova emaroñ naajdik armej ro An. Moses ear jab mel̦el̦e kõn wãween an Jeova naaj maroñ naajdik elõñ milien em̦m̦aan im kõrã kab ajri ro nejier ilo ãne jem̦aden kõnke ear jabwe m̦õñã ko kijeer. Ñan uwaake Moses, Jeova ear kajjitõk: “Ekadul̦o̦k pein Jeova ke?” (Riit Bõnbõn 11:​21-23.) Ilo eoon in, “pein Jeova” ej jitõñl̦o̦k ñan jetõb kwõjarjar eo an Anij, ak kajoor eo an ej kõjerbale ñan kõm̦anm̦an ankilaan. Mel̦el̦ein men in bwe Jeova ear kajjitõk ippãn Moses im ba, ‘Kwõj lukkuun l̦õmn̦ak ke bwe ijjab maroñ kõm̦m̦ane men eo iar ba bwe inaaj kõm̦m̦ane?’

3. Etke elukkuun aorõk bwe jen l̦õmn̦ak kõn bwebwenato eo an Moses im ri-Israel ro?

³ Kwõnañin ke kar l̦õmn̦ak el̦aññe Jeova enaaj kabwe aikuj ko am̦ ak aikuj ko an baam̦le eo am̦? Meñe kwaar ak jaab, jen etale bwebwenato eo an Moses im ri-Israel ro me rar pere bwe Anij emaroñ kar kabwe aikuj ko aer. Jenaaj etali jet naanin kakapilõk ko ilo Baibõl̦ ñan jipañ kõj ñan kal̦apl̦o̦k ad lõke bwe pein Jeova ejjab kadu.

KATAK JÃN MOSES IM RI-ISRAEL RO

4. Etke elõñ ri-Israel ro rar jino pere bwe Jeova emaroñ kar kabwe aikuj ko aer ilo kanniõk?

⁴ Etke elõñ iaan ri-Israel ro im armej ro jet rar jino pere bwe Jeova emaroñ kabwe aikuj ko aer? Kõnke eto aer kar itoitak ilo ane jem̦aden. (Ex. 12:38; Dut. 8:15) Armej ro rejjab ri-Israel rar m̦õk in m̦õñã manna im elõñ ri-Israel ro rar bar kobal̦o̦k ippãer im abn̦õn̦õ kõn men in. (Bõn. 11:​4-6) Armej rein rar jino oñ kake ekkan ko me rar m̦õñã ilo Ijipt. Kõnke armej ro rar bõkl̦o̦k abn̦õn̦õ ko aer ñan Moses, ear l̦õmn̦ak bwe ear aikuj make kabwe aikuj kein ñan er.—Bõn. 11:​13, 14.

5-6. Ta eo jemaroñ katak jãn wãween an armej ro me rejjab ri-Israel kar jelõt elõñ ri-Israel ro?

⁵ Ke armej ro jet me rejjab ri-Israel rar jab kwal̦o̦k aer kam̦m̦oolol kõn aolep men ko Jeova ear lil̦o̦k ñan er, ri-Israel ro rar bareinwõt jino l̦õmn̦ak ãinwõt er. Ñe armej ro jet rejjab kwal̦o̦k aer kam̦m̦oolol, jemaroñ bar ãinwõt er im jino ad jab kwal̦o̦k ad kam̦m̦oolol im m̦õn̦õn̦õ kõn men ko Jeova ej litok ñan kõj. Men in emaroñ wal̦o̦k ñe jej l̦õmn̦akel̦o̦k men ko ear wõr ippãd m̦okta ak ebbanbane men ko ewõr ippãn armej ro jet. Bõtab, enaaj l̦apl̦o̦k ad m̦õn̦õn̦õ el̦aññe jej jubõro wõt kõn men ko ewõr ippãd.

⁶ Ri-Israel ro ren kar aikuj keememej bwe Anij ear kaalikkar bwe ñe renaaj tõparl̦o̦k ijo jikier ekããl, renaaj lukkuun m̦õn̦õn̦õ kõn an naaj kabwe aikuj ko aer ilo kanniõk. Kallim̦ur in enaaj kar jejjet kũtien ilo Ãneen Kallim̦ur eo, jab ilo iien eo rar ito-itak ilo ãne jem̦aden. Ejja ãindeinl̦o̦k wõt, ijello̦kun ad l̦õmn̦ak kõn ta ko ejjel̦o̦k ippãd ilo jukjukun pãd in, em̦m̦anl̦o̦k bwe jen l̦õmn̦ak kõn ta ko Jeova ear kallim̦ur bwe enaaj litok ñan kõj ilo lal̦ eo ekããl. Jemaroñ bareinwõt l̦õmn̦ak kõn jet iaan eoon ko me remaroñ kal̦apl̦o̦k wõt ad lõke Jeova.

7. Etke jemaroñ lõke bwe ejjab kadu pein Jeova?

⁷ Meñe ãindein, kwõmaroñ l̦õmn̦ak kõn unin an Anij kajjitõk ippãn Moses im ba: ‘Ekadu pein Jeova ke?’ Ke Jeova ear kwal̦o̦k kajjitõk in ñan Moses, ear kõn̦aan bwe Moses en l̦õmn̦ak kõn ruo men ko: (1) Ejjel̦o̦k joñan kajoor eo an. (2) Emaroñ kõjerbal kajoor eo an ilo jabdewõt jikin meñe ettol̦o̦k. Meñe ri-Israel ro rar pãd ilujen ane jem̦aden, ak ear wõr wõt an Jeova maroñ ñan lel̦o̦k kijeer kanniõk. Kõn an kar Anij ‘erl̦o̦ke pein ekajoor’ im jipañ armej rein, ear kwal̦o̦k kajoor eo an bwe emaroñ jipañ armej ro an ilo jikin ko otemjej. (Sam 136:​11, 12) Innem ñe jej pãd ilo wãween ko reppen, jemaroñ lõke bwe pein Jeova enaaj jipañ kõj kajjojo ilo jabdewõt jikin ko jej pãd ie.—Sam 138:​6, 7. 

8. Ewi wãween ad maroñ kõjparok kõj jãn ad kõm̦m̦an ejja bõd eo wõt armej ro ilo ãne jem̦aden rar kõm̦m̦ane? (Lale pija eo.)

⁸ Jeova ear kajejjet kallim̦ur eo an im jilkinl̦o̦k elõñ bao quail ko ñan naajdik er. Ak ri-Israel ro rar jab kam̦m̦oolol Anij kõn menin kabwilõñlõñ in. Ijello̦kun, elõñ rar tarjen joñan aer aini bao ko kijeer. Raan im boñ rar ae bao quail ko kijeer el̦e jãn joñan. Jeova ear kanooj illu ippãn armej ro me rar l̦õmn̦ak wõt kõn aer ijol̦ bao quail im ear kajeik er. (Bõn. 11:​31-34) Jemaroñ katak jãn waanjoñak in. Jej aikuj kõjparok kõj jãn aujiid eo ñan ainel̦ap ak tõr. Jekdo̦o̦n ñe jej m̦weiie ak jeram̦õl, men eo eaorõktata ippãd ej bwe jen koorl̦o̦k “m̦weiuk ko ilañ” ilo ad ejaak juon jem̦jerã epaak ippãn Jeova im Jesus. (Matu 6:​19, 20; Luk 16:9) Ñe jej kõm̦m̦an ãindein, jemaroñ lõke bwe Jeova enaaj kabwe aikuj ko ad.

9. Ta eo jemaroñ lukkuun lõke kake kõn jipañ eo jãn Anij?

⁹ Jeova ej bareinwõt pojak in jipañ armej ro an ilo raan kein. Bõtab, ejjab mel̦el̦ein bwe jeban iioon apañ ko kõn m̦weiuk ak an jabwe m̦õñã ko kijed.b Meñe ãindein ak Jeova ejjãmin ilo̦k jãn kõj. Enaaj kakajoor kõj aolep iien, jekdo̦o̦n ta apañ eo jej iioone. Jemaroñ kwal̦o̦k an men in m̦ool ikijjeen ruo waanjoñak ko me rej kwal̦o̦k ad lõke bwe Jeova ej erl̦o̦ke pein im kabwe aikuj ko ad ilo kanniõk: (1) ñe jej jelm̦ae apañ ikijjeen jããn im (2) ñe jej karõk l̦o̦k im̦aan ñan kabwe aikuj ko ad ilo kanniõk.

ÑE JEJ JELM̦AE APAÑ KO IKIJJEEN JÃÃN

10. Kain apañ rot ko jemaroñ jelm̦ae kõn jããn?

¹⁰ Ke ej epaaktok jem̦l̦o̦kin jukjukun pãd in, jej aikuj kõtmãne bwe on̦ããn aikuj ko ad ilo kanniõk renaaj l̦apl̦o̦k wõt. Poktak ko an kien, tarin̦ae ko, jorrããn ko rel̦l̦ap, nañinmej ko rekããl im rekapopo remaroñ kõm̦m̦an bwe en l̦apl̦o̦k on̦ããn m̦weiuk ilo ad jab kõtmãne kake, ak kõm̦m̦an bwe jen luuji jerbal ko ad, men ko m̦weied, ak m̦õko im̦õd. Jenaaj aikuj kappok jerbal ko rekããl ilo jo jikid ak kõm̦akũt baam̦le eo ad ñan bar juon jikin bwe jen maroñ kabwe aikuj ko aer. Ta eo enaaj jipañ kõj kõm̦m̦ane pepe ko me rej kwal̦o̦k ad lõke Jeova?

11. Ta eo emaroñ jipañ eok ñan kõm̦adm̦õdi apañ ko ikijjeen jããn? (Luk 12:​29-31)

¹¹ Juon buñtõn ne epol̦õmãn ej ñan lel̦o̦k inepata ko am̦ ñan Jeova. (JK. 16:3) Kajjitõk ippãn kõn mãlõtlõt eo kwõnaaj aikuji ñan kõm̦m̦an pepe ko rem̦m̦an im dãpij juon bõro aenõm̦m̦an ñe kwõj jelm̦ae inepata ko kõn apañ ko kwõj iiooni. (Riit Luk 12:​29-31.) Akwel̦ap ñan e bwe en jipañ eok ñan jokwane wõt im jab inepata kõn jabdewõt apañ ko am̦ ilo kanniõk. (1 Tim. 6:​7, 8) Kappok mel̦el̦e ko ilo bok ko ad kõn wãween am̦ maroñ kõm̦adm̦õdi apañ ko ikijjeen jããn. Elõñ rar lo tokjãn jãn katak ko rar loi ilo weepjait eo jw.org ñan kõm̦adm̦õdi apañ ko aer ikijjeen jããn.

12. Ta kajjitõk ko remaroñ jipañ juon Kũrjin ñan kõm̦m̦an pepe eo em̦m̦antata kõn baam̦le eo an?

¹² Jet rar ebbõk jerbal ko ilo jikin ko rettol̦o̦k jãn baam̦le ko aer, ak tokãlik rar kile bwe ear jab juon pepe ejim̦we. M̦okta jãn am̦ kãlet juon jerbal ekããl, kwõjjab aikuj l̦õmn̦ak wõt kõn jeraam̦m̦an ko ilo kanniõk ak bareinwõt kõn aikuj ko am̦ ilo jetõb. (Luk 14:28) Kajjitõk ippam̦ make: ‘El̦aññe ij pãd ilo juon jikin ettol̦o̦k jãn eo pãleõ, ewi wãween an men in maroñ jelõt mourin m̦are eo am̦ro? El̦aññe ij em̦m̦akũt ñan jikin eo ettol̦o̦k, ewi wãween an pepe in maroñ jelõt iien aõ aetõl ippãn Kũrjin ro m̦õtta im aõ jerbalin kwal̦o̦k naan?’ El̦aññe ewõr ajri ro nejim, kwõj aikuj bareinwõt kajjitõk ippam̦ make kajjitõk in eaorõk: ‘Ewi wãween aõ maroñ kakajiririk ajri ro nejũ “ilo kauwe im kõn naanin kakapilõk ko an Jeova” ñe ijjab pãd ippãer?’ (Eps. 6:4) Kwõj aikuj kõm̦m̦an bwe l̦õmn̦ak eo an Anij en tõl pepe eo am̦, im jab kõtl̦o̦k bwe ro uwaan baam̦le eo am̦ ak ro jeram̦ me rejjab kautiej im l̦oore kien ko an Baibõl̦ ren jelõt l̦õmn̦ak eo am̦.c Tony, eo me ej jokwe ilo turilikin Asia, ear maroñ bõk jerbal ko el̦ap on̦ãer ilo aelõñ ko jet. Bõtab, ãlikin an kar jar kõn men in im bwebwenato kake ippãn lio pãleen, rar pepe bwe en jab bõk jerbal kein ak ijello̦kun rar pepe kõn wãween aer maroñ mour ilo l̦amwaan. Ãlikin an reilikl̦o̦k im kõl̦mãnl̦o̦kjen̦ kake, Tony ej ba: “Em̦õj aõ bõk jeraam̦m̦an eo ñan jipañ elõñ armej ñan jel̦ã kõn Jeova, im ajri ro nejũm̦ro el̦ap aer m̦õn̦õn̦õ kõn m̦ool eo. Em̦õj an baam̦le eo am̦ro katak bwe toon wõt am mour ekkar ñan naan ko ilo Matu 6:​33, Jeova enaaj kabwe aikuj ko am.”

KÕPPOJAKL̦O̦K IM̦AAN KÕN AIKUJ KO AD ILO KANNIÕK

13. Ta jet iaan men ko jej aikuj kõm̦m̦ani kiiõ ñan kabwe aikuj ko ad ñe jenaaj rũttol̦o̦k?

¹³ Ñe jej inepata kõn wãween ad naaj aikuj kabwe aikuj ko ad ñe jej rũttol̦o̦k, men in emaroñ mãlejjoñe ad lõke Jeova. Baibõl̦ eo ej rõjañ kõj ñan kate kõj jerbal bwe jen maroñ kabwe aikuj ko ad ilo kanniõk ilju im jekl̦aj. (JK. 6:​6-11) Emaroñ juon men ekkar bwe jen kõm̦m̦an joortoklik ñan ilju im jekl̦aj. M̦ani ewõr joñan ñan kõjparok kõj. (Ekl. 7:12) Bõtab, jejjab kõn̦aan bwe m̦ani en men eo eaorõktata ilo mour eo ad.

14. Ewi wãween Hibru 13:5 ej jipañ kõj bwe jen jab lukkuun inepata ñan kabwe aikuj ko ad ilo ilju im jekl̦aj?

¹⁴ Jesus ear kwal̦o̦k bwe ñe juon armej ej m̦weiie ilo kanniõk ak ejjab “m̦weiie im̦aan mejãn Anij” ej ãinwõt juon armej ejajel̦o̦kjen̦. (Luk 12:​16-21) Ejjel̦o̦k juon armej ejel̦ã kõn ta eo ilju im jekl̦aj enaaj bõktok. (JK. 23:​4, 5; Jem. 4:​13-15) Jej jelm̦ae juon mãlejjoñ ãinjuon ãinwõt ri-kal̦oor ro an Christ. Jesus ear ba bwe jej aikuj pojak in “kaarmejjeteik” aolep men ko m̦weied, bwe jen erom ri-kal̦oor ro an. (Luk 14:​33, ftn.) Kũrjin ro ilo epepen eo kein kajuon ilo Judia rar jol̦o̦k men kein ilo lañlõñ. (Hib. 10:34) Ilo raan kein ad, elõñ ro jeid im jatid rar luuji men ko m̦weieer im jerbal ko aer kõnke rar jab bõk kun̦aaer ilo m̦akũtkũt ko an kien. (Rev. 13:​16, 17) Ta eo ear jipañ er ñan kõm̦m̦an men in? Rar lukkuun tõmak ilo kallim̦ur eo an Jeova: “Ijjãmin el̦l̦o̦k jãn eok im ijjãmin kõjekdo̦o̦n eok.” (Riit Hibru 13:5.) Jej kate kõj ñan kepoji men ko jenaaj aikuji ñan ilju im jekl̦aj, im ñe men ko jejjab kõtmãne kaki rej wal̦o̦k, jej lõke bwe Jeova enaaj rejetake kõj.

15. Ta l̦õmn̦ak eo ejim̦we Kũrjin jinen im jemãn ajri ro rej aikuji kõn ro nejier? (Bar lale pija eo.)

¹⁵ Ilo jet aelõñ ko, un eo el̦aptata unin an rippãlele ro kõn̦aan bwe en wõr nejier ej bwe ajri ro ren jipañ er ñe rej rũttol̦o̦k. Ak Baibõl̦ eo ej ba bwe ro jinen im jemãn rej aikuj kabwe aikuj ko an ajri ro nejier. (2 Kor. 12:14) Em̦ool bwe jinen im jemãn ajri ro rej aikuj jipañ ñe rej rũttol̦o̦k, im elõñ ajri ro rej m̦õn̦õn̦õ in kõm̦m̦ane men in. (1 Tim. 5:4) Bõtab, jinen im jemãn ajri ro rej kile bwe unin an l̦ap aer lañlõñ ej kõn aer jipañ ro nejier bwe ren erom ri-karejar ro an Jeova im jab kõn an ro nejier maroñ kabwe men ko aer ilo kanniõk.—3 Jon 4.

16. Ewi wãween an jinen im jemãn ajri ro maroñ kepoji er ñan lale er make im kabwe aikuj ko aer? (Epesõs 4:28)

¹⁶ Ikijjeen joñak eo am̦, kwõmaroñ katakin ajri ro nejũm̦ ñan lõke Jeova, im pojak ñan lale er make ñe rej rũttol̦o̦k. Jãn ke rej dik, kwal̦o̦k ñan er aorõkin aer niknik ilo jerbal. (JK. 29:21; riit Epesõs 4:28.) Ñe rej rũttol̦o̦k wõt, jipañ er ñan lukkuun kate wõt ilo jikuul̦. Kũrjin jinen im jemãn ajri ro rej aikuj etale naanin kakapilõk ko ilo Baibõl̦ im jipañ ajri ro ñan kõm̦m̦an pepe ko rem̦m̦an ñan kããlõt katak ko renaaj bũki. Mejãnkajjik eo an jineer im jemãer ej bwe ajri ro nejier ren maroñ kabwe aikuj ko aer make im kal̦apl̦o̦k aer iien ñan kwal̦o̦k naan, ak ñan bainier.

17. Ta eo jemaroñ lõke kake?

¹⁷ Ri-karejar ro retiljek an Jeova remaroñ lõke bwe ewõr an maroñ im kõn̦aan ñan kabwe aikuj ko aer. Ñe jej epaakel̦o̦k jem̦l̦o̦kin jukjukun pãd in, jemaroñ kõtmãne bwe ri-jum̦ae ro renaaj mãlejjoñe tõmak eo ad ilo Jeova. Bõtab, jekdo̦o̦n ta eo enaaj wal̦o̦k, jej aikuj jek ilo bũruod bwe Jeova enaaj kõjerbale kajoor eo an ñan kabwe aikuj ko ad ilo kanniõk. Jemaroñ tõmak bwe Jeova emaroñ jipañ kõj ilo jabdewõt jikin ko jej pãd ie.