KATAK 26
AL 123 Kõttãik Wõt Kõj ñan Laajrak Ko
Jen Kõttãik Bũruod ñe Ewõr Men ko Jejaje Kaki
“Eo ekajoor Bõtata, jeban lo E!”—JOB 37:23.
UNIN KATAK IN
Meñe jejjab jel̦ã aolep men ko renaaj wal̦o̦k ilju im jekl̦aj, ak jemaroñ kijenmej ium̦win apañ ko jej iiooni el̦aññe jej lõke Jeova im l̦õmn̦ak wõt kõn men ko jejel̦ã kaki.
1. Jeova ear kõm̦anm̦an kõj bwe en wõr ad maroñ ñan ta, im etke?
JEOVA ear kõm̦anm̦an kõj bwe en wõr ad maroñ ñan kõl̦mãnl̦o̦kjen̦, bõk mel̦el̦e, kal̦apl̦o̦k ad jel̦ãl̦o̦kjen̦, im kwal̦o̦k mãlõtlõt. Etke ear kõm̦anm̦an kõj ilo wãween in? Kõnke ekõn̦aan bwe jen “lo jel̦ãl̦o̦kjen̦ kõn Anij” im kõm̦m̦ani jokãlõt ko remãlõtlõt ilo ad karejar ñane.—JK. 2:1-5; Rom 12:1.
2. (1) Ta eo jej kile ikijjeen joñan maroñ ko ippãd? (Job 37:23, 24) (Bar lale pija eo.) (2) Ewi wãween ad bõk tokjãn ñe jej kõttãik bũruod im kile bwe ewõr joñan maroñ ko ippãd?
2 Meñe ewõr ad maroñ ñan katak, ak ewõr joñan men ko jemaroñ jel̦ã kaki. (Riit Job 37:23, 24, UBS.) Kõl̦mãnl̦o̦kjen̦ kõn joñak eo an Job. Elõñ kajjitõk ko Jeova ear lil̦o̦k ñane me rar kaalikkar bwe elõñ men ko ejaje kake. Men in ear jipañe kõttãik bũruon im jipañ kajim̦we l̦õmn̦ak eo an. (Job 42:3-6, UBS) Ebar em̦m̦an ñan kõj ñe jej kile bwe jejjab jel̦ã men otemjej. Ñe jej ãindein, enaaj jipañ kõj ñan kõttãik bũruod im lõke bwe aolep iien Jeova enaaj kwal̦o̦k ñan kõj ta ko jej aikuj in lukkuun jel̦ã kaki bwe jen maroñ kõm̦m̦ani pepe ko remãlõtlõt.—JK. 2:6.
Ãinwõt kar Job, jemaroñ bõk tokjãn ñe jej kwal̦o̦k bwe ewõr men ko jejaje kake (Lale pãrokõrããp 2)
3. Ta ko jenaaj etali ilo katak in?
3 Ilo katak in, jenaaj kõnono kõn jet men ko jejjab jel̦ã kaki, im jet iaan apañ ko jemaroñ iiooni kõn wõt men in. Im jenaaj bareinwõt kõnono kõn etke em̦m̦an ñe jejjab jel̦ã kõn jet men. Ilo ad etale boin kein, enaaj kal̦apl̦o̦k ad lõke bwe Jeova, “Eo eweeppãn ilo jel̦ãl̦o̦kjen̦,” ej kaalikkartok ta ko jej aikuj lukkuun jel̦ã kaki.—Job 37:16.
JEJJAB JEL̦Ã ÑÃÃT EO ENAAJ ITOK JEM̦L̦O̦KIN JUKJUKUN PÃD IN
4. Ekkar ñan Matu 24:36, ta eo jejjab jel̦ã kake?
4 Riit Matu 24:36. Jejjab jel̦ã ñããt eo enaaj itok jem̦l̦o̦kin jukjukun pãd in. Joñan, ke Jesus ear pãd ijin ioon lal̦, ear jaje “raan eo im awa eo.”a Ear tokãlik ba ñan rijjilõk ro an bwe Jeova, eo ej aolep iien kõm̦m̦ani men ko ilo iien eo ejejjet, ej loloodjaki ñããt eo enaaj wal̦o̦k jet iaan m̦akũtkũt ko me “ewõr an maroñ ñan karõki.” (Jrb. 1:6, 7) Em̦õj an Jeova karõk iien eo enaaj jem̦l̦o̦k jukjukun pãd in, ijoke ejjel̦o̦k ad maroñ ñan jel̦ã jejjetin ñããt eo enaaj wal̦o̦k men in.
5. Kõnke jejjab jel̦ã ñããt eo enaaj itok jem̦l̦o̦kin jukjukun pãd in, ewi wãween men in emaroñ jelõt kõj?
5 Ekkar ñan ta eo Jesus ear ba, jejjab jel̦ã ewi toon ad nãj aikuj kõttar m̦ae iien eitok jem̦l̦o̦kin jukjukun pãd in. Kõn men in, jemaroñ jino ebbweer ak jaje kijenmej, el̦aptata ñe eto ad kõttar an itok raan eo an Jeova. Ak jemaroñ loe bwe epen ad kijenmej ñe baam̦le eo ad ak ro jet rej kajjirere kake kõj. (2 Pit. 3:3, 4) Bõlen jemaroñ l̦õmn̦ak bwe ñe jen kar jel̦ã raan ta eo enaaj itok jem̦l̦o̦kin jukjukun pãd in, en kar pidodol̦o̦k ad kõttare tok raan eo im kijenmej ñe ro jet rej kajjirere kake kõj.
6. Etke em̦m̦an bwe jejjab jel̦ã ñããt eo enaaj itok jem̦l̦o̦kin jukjukun pãd in?
6 Ilo m̦ool, ilo an Jeova jab kaalikkartok raan ta eo enaaj itok jem̦l̦o̦kin jukjukun pãd in, epel̦l̦o̦k juon iien ñan ad kwal̦o̦k bwe jej karejar ñane kõnke jej yokwe im lõke e. Jekõn̦aan karejar ñan Jeova ñan indeeo, ejjab ñan iien eo wõt enaaj itok jem̦l̦o̦kin jukjukun pãd in. Ijello̦kun ad l̦õmn̦ak wõt kõn ñããt eo enaaj itok “raan eo an Jeova,” em̦m̦an ñe jej l̦õmn̦ak kõn men ko Jeova enaaj kajejjeti ilo raan en̦. Ilo ad ãindein, jenaaj maroñ ruwaakl̦o̦k ñan Jeova, kal̦apl̦o̦k ad lõke e, im kate kõj joñan wõt ad maroñ ñan kabuñbũruon.—2 Pit. 3:11, 12.
7. Ta eo jejel̦ã?
7 Jekõn̦aan l̦õmn̦ak wõt kõn men ko jejel̦ã kake. Jejel̦ã bwe raan ko ãliktata ear jinoe ilo 1914 eo. Jeova ear letok kanaan ko ilo Baibõl̦ me rejjab baj kaalikkar wõt iiõ in ak rej bareinwõt kwal̦o̦k kõn men ko renaaj wal̦o̦k ãlikin iiõ in. Tokjãn men in, jej tõmak bwe “raan eo el̦ap an Jeova epaak.” (Zep. 1:14) Jebar jel̦ã kõn jerbal eo Jeova ekõn̦aan bwe jen kõm̦m̦ane, eñin bwe jen kwal̦o̦k naan kõn “ennaan eo em̦m̦an kõn Aelõñ eo” ñan elõñ armej joñan wõt ad maroñ. (Matu 24:14) Ennaan in em̦õj an ajeeded ilo elõñl̦o̦k jãn 240 aelõñ ko im ilo elõñl̦o̦k jãn 1,000 kajin ko. Jejjab aikuj jel̦ã “raan eo im awa eo” bwe jen kijejeto ilo jerbalin kwal̦o̦k naan.
JEJJAB JEL̦Ã EWI WÃWEEN AN NAAJ JEOVA EM̦M̦AKŨT
8. “Jerbal an Anij” ej jitõñl̦o̦k ñan ta? (Ekklisiastis 11:5)
8 Ejjab aolep iien jejel̦ã “jerbal an Anij.” (Riit Ekklisiastis 11:5.) Naan kein jãn eoon in rej jitõñl̦o̦k ñan men ko Jeova ear kõm̦m̦an bwe ren wal̦o̦k ak men ko ear kõtl̦o̦k bwe ren wal̦o̦k bwe en maroñ jejjet ankilaan. Jejjab maroñ lukkuun jel̦ã unin an Jeova kõtl̦o̦k an jet men wal̦o̦k ak ewi wãween an naaj jipañ kõj. (Sam 37:5, UBS) Jejjab maroñ lukkuun mel̦el̦e kõn jerbal ko an Anij ãinwõt ad jab lukkuun mel̦el̦e wãween an juon niñniñ ejaak ilowaan lo̦jien jinen, juon men me jaintiij ro rejjab maroñ lukkuun mel̦el̦e kake tok ñan raan kein.
9. Kõnke jejjab jel̦ã wãween an naaj Jeova jipañ kõj, ta mãlejjoñ ko jemaroñ iiooni?
9 Ñe jejjab jel̦ã wãween an naaj Jeova jipañ kõj, jemaroñ jenliklik in kõm̦m̦ani jet jokãlõt ko. Jemaroñ jenliklik in kaarmejjeteik jet men bwe jen maroñ kal̦apl̦o̦k ijo kun̦aad ñan Jeova, ãinwõt mour ilo juon wãween el̦amwaan ak em̦m̦akũt ñan juon jikin el̦apl̦o̦k aer aikuj ri-kwal̦o̦k naan ie. Ak jemaroñ pere el̦aññe ebuñbũruon Anij ippãd kõnke jaar jab maroñ kõttõpare mejãnkajjik ko ad ñane, jejjab lo el̦ap tõprak ilo ad jerbalin kwal̦o̦k naan, ak jej iioon mãlejjoñ ko ilo juon iaan jerbal ko ad ñan Jeova.
10. Ta kadkad ko raorõk jej ejaaki kõnke jejjab jel̦ã wãween an naaj Jeova jipañ kõj?
10 Kõnke jejjab jel̦ã wãween an naaj Jeova jipañ kõj, men in ej jipañ kõj ejaak jet kadkad ko ãinwõt ettã bõro. Ej jipañ kõj kile bwe l̦õmn̦ak ko an Jeova reutiejl̦o̦k jãn l̦õmn̦ak ko ad. (Ais. 55:8, 9) Jej bareinwõt katak ñan kal̦apl̦o̦k ad lõke Jeova im atartar ioon ñan jipañ kõj. Ñe ewõr tõprak ko rem̦m̦an ilo jerbalin kwal̦o̦k naan eo ad ak ilo juon iaan jerbal ko ad ñane, ej tõllo̦kũn ad nõbare. (Sam 127:1; 1 Kor. 3:7) Ñe ewõr men ko rej wal̦o̦k ilo ad jab kõtmãne, jej aikuj keememej bwe Jeova ej kõjbwebweik men otemjej. (Ais. 26:12, UBS) Jej kõm̦m̦ane ijo kun̦aad, im jej wõnm̦aanl̦o̦k wõt im lõke bwe Jeova enaaj kõm̦m̦ane ijo kun̦aan. Jej lõke bwe enaaj letok naanin tõl ko jej aikuji, meñe emaroñ jab ilo juon wãween ekabwilõñlõñ ãinwõt an kar kõm̦m̦ane ilo tõre ko etto.—Jrb. 16:6-10.
11. Ta ko jejel̦ã kaki me remaroñ jipañ kõj?
11 Kõl̦mãnl̦o̦kjen̦ kõn an Jeova aolep iien kwal̦o̦k yokwe, ekajet jim̦we, im mãlõtlõt. Jejel̦ã bwe el̦ap an kaorõk aolep men ko jej kõm̦m̦ani ñan E im ñan rũttõmak ro jeid im jatid. Im jejel̦ã bwe aolep iien Jeova ej kõjeraam̦m̦ane ro rej tiljek ñane.—Hib. 11:6.
JEJJAB JEL̦Ã TA KO RENAAJ WAL̦O̦K ILJU IM JEKL̦AJ
12. Ekkar ñan Jemes 4:13, 14, ta eo jejjab jel̦ã kake?
12 Riit Jemes 4:13, 14. Jejjab jel̦ã ewi wãween naaj mour ko ad ilju im jekl̦aj. Ilo jukjukun pãd in, “jerata ej wal̦o̦k ñan jabdewõt armej.” (Ekl. 9:11, UBS) Kõn men in, jejjab jel̦ã el̦aññe enãj tõprak aolep bũl̦ããn ko ad ak el̦aññe jenaaj mour wõt bwe jen maroñ katõpraki.
13. Ta eñjake ko jemaroñ bũki kõn ad jab jel̦ã ta ko renaaj wal̦o̦k ilju im jekl̦aj?
13 Emaroñ lukkuun pen ñan kõj ñe jejaje ta ko renaaj wal̦o̦k ilju im jekl̦aj. Etke? Kõnke jemaroñ inepata kõn ta ko remaroñ wal̦o̦k, im men in emaroñ kõm̦m̦an bwe en jako ad lañlõñ. Bareinwõt, ñe jej iioon wãween ko jaar jab kõtmãni ak ewõr men ko relukkuun nana rej wal̦o̦k ñan kõj ilo idiñ, jemaroñ lukkuun bũrom̦õj ak illu. Im ñe ejjab tõprak men ko jaar kõtmãne bwe reñaj wal̦o̦k, jemaroñ bũrom̦õj im ebbweer.—JK. 13:12.
14. Ad lo m̦õn̦õn̦õ eo em̦ool ej pedped ioon ta? (Bar lale pija ko.)
14 Ñe jej kijenmej wõt ium̦win apañ ko jej iiooni, jej kam̦ool bwe jekdo̦o̦n ta ko rej wal̦o̦k, ak jej karejar ñan Jemãdwõj ilañ kõnke jej yokwe E im ejjab kõnke ewõr men ko rem̦m̦an jemaroñ bõke jãne. Bwebwenato ko ilo Baibõl̦ rej kaalikkar bwe jejjab aikuj kõtmãne bwe aolep iien Jeova enaaj kõjparok kõj jãn ad iioon wãween ko reppen. Bareinwõt, jej katak bwe ejjab karõkl̦o̦k im̦aan men ko renãj wal̦o̦k ilo mour ko ad. Jeova ejel̦ã bwe ad lo m̦õn̦õn̦õ eo em̦ool ejjab pedped ioon ad jel̦ã ta ko renãj wal̦o̦k ilju im jekl̦aj. Ijoke, ej pedped ioon ad kajjitõk tõl eo an im pokake E. (Jrm. 10:23) Ñe jej reilo̦k wõt ñane ilo iien ko jej kõm̦m̦ani pepe ko, ej ãinwõt ñe jej ba: “Ñe ej ankilaan Jeova, kõm naaj mour im kõm̦m̦ane men in ak men uweo.”—Jem. 4:15.
Jenaaj lukkuun bõk kõjparok ñe jej kajjitõk tõl eo an Jeova im pokake E (Lale pãrokõrããp 14-15)b
15. Ta ko jejel̦ã kõn ilju im jekl̦aj?
15 Meñe jejjab jel̦ã ta ko jenãj iiooni kajjojo raan, ak jejel̦ã bwe em̦õj an Jeova kallim̦ur bwe enãj letok mour indeeo—emaroñ ilañ ak ijin ioon lal̦. Jejel̦ã bwe eban riab im bwe ejjel̦o̦k men en̦ emaroñ bõbraiki jãn an kajejjet aolep kallim̦ur ko an. (Tai. 1:2) E wõt emaroñ “kwal̦o̦k jem̦l̦o̦kin jãn jinoin, im jãn iien m̦oktata, men ko jañin kõm̦m̦ane.” Ear jejjet men ko ear kanaan kaki ilo iien ko etto, im enaaj bar jejjet kũtien kanaan ko an ilju im jekl̦aj. (Ais. 46:10) Jekanooj in jel̦ã bwe ejjel̦o̦k men en̦ emaroñ bõbraik Jeova jãn an yokwe kõj. (Rom 8:35-39) Enaaj kaenõm̦m̦an kõj im letok mãlõtlõt im kajoor eo jej aikuji ñan kijenmej wõt ium̦win jabdewõt apañ jenãj iiooni ilo mour eo ad. Jemaroñ lõke bwe Jeova enaaj jipañ im kõjeraam̦m̦ane kõj.—Jrm. 17:7, 8.
JEJJAB MAROÑ MEL̦EL̦E KÕN EWI JOÑAN AN JEOVA LUKKUUN JEL̦Ã KÕN KÕJ
16. Ta eo Jeova ejel̦ã kõn kõj, im ewi wãween am̦ eñjake kõn men in? (Sam 139:1-6)
16 Riit Sam 139:1-6, UBS. Ri-Kõm̦anm̦an eo ad ejel̦ã men otemjej kõn kõj. Ejel̦ã wãween ad l̦õmn̦ak im unin ad bõk jet kain eñjake ko. Ejel̦ã kõn men ko jej ba im men ko rej pãd ilo bũruod. Ej bareinwõt jel̦ã kõn men otemjej jej kõm̦m̦ani im unin ad em̦m̦akũt im kõm̦m̦ani men kein. Ãinwõt an kar Kiiñ Devid kaalikkar, Jeova ej pãd ipel̦aakid ikijjeen an lale im kõjparok kõj im aolep iien epojakin jipañ kõj. Ejjab ke juon men ekabwilõñlõñ bwe ri-Tõl eo ad Eutiejtata ipel̦aakin lañ im lal̦ im ri-Kõm̦anm̦an eo an men otemjej, ej lukkuun kea im itoklimo kõn kõj? Devid ear ba: “El̦ap aõ bwilõñ kõn am̦ kanooj jel̦ã kake eõ; kõn an kanooj m̦wilal̦ men in, ijjab maroñ mel̦el̦e kake.”—Sam 139:6, UBS.
17. Etke emaroñ pen ad tõmak bwe Jeova elukkuun jel̦ã kõn kõj?
17 Bõlen kõn wõt wãween ad kar dik im rũttol̦o̦k, m̦anit eo ad, ak men ko jaar tõmaki m̦okta jãn ad kar jel̦ã m̦ool eo, emaroñ pen ad watõk Jeova ãinwõt juon Jemãd me el̦ap an kea kõn kõj. Ak bõlen jemaroñ l̦õmn̦ak bwe Jeova eban kõn̦aan jel̦ã kajjied im bwe elukkuun ettol̦o̦k jãn kõj kõn an kar lukkuun nana men ko jaar kõm̦m̦ani m̦oktal̦o̦k. Joñan, ewõr iien ko Devid ear bar bõk ejja eñjake kein. (Sam 38:18, 21) Bareinwõt, bõlen juon armej me ej lukkuun kate ñan ukot mour eo an im mour ekkar ñan kien ko rewãnõk an Jeova, emaroñ l̦õmn̦ak im ba, ‘El̦aññe Anij elukkuun jel̦ã kõn ña, innem etke ej kõtmãne bwe in ukot mour e aõ ijello̦kun an mel̦el̦e bwe eñin baj kain armej rot ña?’
18. Ewi wãween ad bõk tokjãn ñe jej tõmak bwe el̦apl̦o̦k an Jeova jel̦ã kõn kõj jãn kõj make? (Bar lale pija ko.)
18 Jemaroñ katak ñan tõmak bwe el̦apl̦o̦k an Jeova jel̦ã kajjied jãn kõj make im bwe ej lo men ko rem̦m̦an ippãd me jejjab maroñ loi. Meñe ej loe likjab ko ad im emel̦el̦e kõn unin ad bõk jet kain eñjake ko im kõm̦m̦ani jet men ko, ak Jeova ejel̦ã bwe jemaroñ kõm̦m̦an oktak im ilo yokwe, ej jipañ kõj ñan kõm̦m̦ane men in. (Rom 7:15) Ñe jej kile bwe aolep iien Jeova ej loe armej rot eo jemaroñ erom, men in enaaj kõkajoore kõj bwe jen maroñ tiljek wõt im lo lañlõñ ilo ad karejar ñane.
Jeova ej jipañ kõj ñan jelm̦aik men ko jejjab jel̦ã kaki ilo mour in ikijjeen an jipañ kõj ñan kal̦apl̦o̦k ad lõke bwe jenaaj lo juon mour elañlõñ ilo lal̦ eo ekããl (Lale pãrokõrããp 18-19)c
19. Ta eo jelukkuun jel̦ã kõn Jeova?
19 Jejel̦ã bwe Jeova ej yokwe. Ejjel̦o̦k kajjitõk kõn men in. (1 Jon 4:8) Jejel̦ã bwe kien ko an rewãnõk rej kaalikkar an yokwe kõj im bwe aolep iien ekõn̦aan men eo em̦m̦antata ñan kõj. Jejel̦ã bwe Jeova ekõn̦aan bwe jen bõk mour indeeo. Ear letok pinmuur eo bwe en maroñ tõprak men in. Menin letok in ej kaalikkar ñan kõj bwe jemaroñ karejar ñane ilo juon wãween ej kabuñbũruon meñe jejjab weeppãn. (Rom 7:24, 25) Im jejel̦ã bwe “Anij el̦apl̦o̦k jãn bũruod.” (1 Jon 3:19, 20) Jeova ej lo aolep men ko kõn kõj, im ej lõke bwe jemaroñ lo tõprak ilo ad kõm̦anm̦an ankilaan.
20. Ta eo enaaj jipañ kõj bwe jen jab lukkuun inepata?
20 Jeova ejjab n̦ooj jabdewõt mel̦el̦e me eaorõk bwe jen jel̦ã kake. Ñe jej tõmake men in, jej kõjparok kõj jãn ad lukkuun inepata kõn men ko ejjel̦o̦k ad maroñ ioer im jej l̦õmn̦ak wõt kõn men ko relukkuun aorõk. Ilo ad ãindein, jej kwal̦o̦k ad lukkuun lõke Jeova, “eo me eweeppãn an jel̦ã.” (Job 36:4) Meñe ewõr men ko jejjab mel̦el̦e kaki kiiõ, ak jej reim̦aanl̦o̦k ñan iien eo jenaaj katak ñan indeeo elõñ men ko rekããl jãn Anij eo ad im kõn E.—Ekl. 3:11.
AL 104 Jetõb Kwõjarjar, Menin Letok eo An Anij
b KÕMEL̦EL̦E KO KÕN PIJA EO: Juon jemãn im l̦adik eo nejin rej kõpooje juon iep in ko bwe baam̦le eo en maroñ pojak ñe ewal̦o̦k juon jorrããn ilo idiñ.
c KÕMEL̦EL̦E KO KÕN PIJA EO: Juon jeid im jatid em̦m̦aan me ej iioon apañ ko ej reim̦aanl̦o̦k ñan an nãj lo lañlõñ ilo lal̦ eo ekããl.