Elukkuun Em̦m̦an ñan Kõj bwe Jen ‘Kepaake Anij’!

1-2. (1) Ta ko jej aikuj kõm̦m̦ani bwe jen lukkuun epaake juon armej? (2) Ta ko jenãj etali ilo katak in?

EWÕR ke juon m̦õttam̦ me kwõlukkuun epaake? Ta ko kwaar kõm̦m̦ani bwe kwõn maroñ epaake in m̦õttam̦? Bõlen kwaar jol̦o̦k iien ippãn, jino jel̦ã kõn wãween ko reppen ej iiooni, im katak kõn ta ko rem̦m̦an ippãn im ta ko rejjab em̦m̦an ippãn. Kwaar lo bwe ewõr ippãn kadkad ko relukkuun em̦m̦an, im kwaar kõn̦aan anõke. Tokjãn men kein, kwaar jino yokwe eo m̦õttam̦.

² Ebõk iien im jej aikuj kate kõj bwe jen maroñ lukkuun epaake juon armej. Ejja ãindeinl̦o̦k wõt ñe jekõn̦aan ejaak juon kõtaan elukkuun epaak ippãn Jeova Anij. Katak in enaaj kõnono kõn wãween ad maroñ epaakel̦o̦k Anij eo ad im tokjãn ko jej bũki ñe jej kõm̦m̦ane men in. M̦oktata, jen etale etke em̦m̦an bwe jen epaakel̦o̦k Jeova, eo M̦õttad me jepaaketata.

3. Etke jej aikuj kõl̦mãnl̦o̦kjen̦ kõn tokjãn ko jej bũki jãn ad epaakel̦o̦k Jeova? Kwal̦o̦k juon waanjoñak.

³ Ejjel̦o̦k pere kwõj errã bwe ad epaakel̦o̦k Jeova ej juon men em̦m̦an. Bõtab ñe jej kõl̦mãnl̦o̦kjen̦ kõn ewi joñan an lukkuun em̦m̦an ñe jej epaakel̦o̦k Jeova, men in emaroñ kõm̦akũt kõj ñan wõnm̦aanl̦o̦k wõt im epaakel̦o̦k E. (Sam 63:​6-8) Ñan waanjoñak, jejel̦ã bwe ej ñan em̦m̦an eo ad ñe jej kañi m̦õñã ko rõũne, exercise, ebwe iien ad kakkije, im el̦ap ad idaak aebõj. Meñe ãindein, ak elõñ rejjab lukkuun l̦õmn̦ak kake men kein im rejjab kõjparok ãjmour ko aer. Ijoke, el̦ak l̦apl̦o̦k ad kõl̦mãnl̦o̦kjen̦ kõn tokjãn ko jej bũki jãn ad kõjparok ãjmour ko ad, eokwe enãj l̦apl̦o̦k ad kajjioñ kõm̦m̦ane men kein. Ejja ãindeinl̦o̦k wõt, jejel̦ã bwe ad epaakel̦o̦k Jeova ej ñan em̦m̦an eo ad, bõtab ñe jej kõl̦mãnl̦o̦kjen̦ kõn tokjãn ko jej bũki jãn ad epaakel̦o̦k Jeova, men in emaroñ kõm̦akũt kõj ñan wõnm̦aanl̦o̦k wõt im epaakel̦o̦k eo M̦õttad.—Sam 119:​27-30.

4. Ãinwõt an Sam 73:28 kwal̦o̦k, ta eo ri-jeje sam eo ear ba?

⁴ Riit Sam 73:28. Ri-jeje eo an Sam 73 ear juon ri-Livai me kar jitõñe ñan jerbal ãinwõt juon ri-kõjañjañ ilo tampel̦ eo an Jeova. Ejjel̦o̦k pere bwe ear tiljek ilo an karejar ñan Jeova ium̦win elõñ iiõ ko. Meñe ãindein, ak ear kile bwe ej menin aikuj ñan kakeememej e make bwe an ‘kepaake Anij’ ej ñan em̦m̦an eo an, im ear kõn̦aan bwe ro jet ren bar kile bwe men in ej ñan em̦m̦an eo aer. Ta jet iaan tokjãn ko jej bũki ñe jej kõm̦m̦ane men in?

AD ‘KEPAAKE ANIJ’ EJ BÕKTOK M̦ÕN̦ÕN̦Õ

5. (1) Etke ad epaakel̦o̦k Jeova ej bõktok m̦õn̦õn̦õ? (2) Ekkar ñan Jabõn Kõnnaan 2:​6-16, kwal̦o̦k jet waanjoñak ko kõn wãween an mãlõtlõt eo an Jeova maroñ jipañ im kõjparok eok.

⁵ Ñe el̦apl̦o̦k ad epaake Jeova, enãj l̦apl̦o̦k ad m̦õn̦õn̦õ. (Sam 65:4) Elukkuun lõñ un ko unin jenãj m̦õn̦õn̦õ. Juon un, el̦ap ad bõk tokjãn ñe jej jerbale naanin kakapilõk ko an remãlõtlõt me rej pãd ilo Naan ko an, Baibõl̦ eo. Mãlõtlõt eo an Jeova ej kõjparok kõj jãn men ko remaroñ ko̦kkure kõj im jãn ad kõm̦m̦ani bõd ko rel̦l̦ap. (Riit Jabõn Kõnnaan 2:​6-16.) Eñin unin Baibõl̦ ej ba: “Em̦õn̦õn̦õ armej eo ej lo mãlõtlõt, im armej eo ej bõk jel̦ãl̦o̦kjen̦.”—JK. 3:13.

6. Etke ear jako an ri-jeje sam eo lañlõñ?

⁶ Em̦ool bwe ewõr iien ko ro m̦õttan Jeova rej bar bũrom̦õj. Ri-jeje eo an Sam 73 ear jako an lañlõñ kõnke ear jino bõk l̦õmn̦ak ko rekabbweerer. Ear jino kũtõtõiki im ebbanbane armej ro renana kõnke ear l̦õmn̦ak bwe em̦m̦anl̦o̦k mour ko aer meñe rar jab kea kõn Anij ak kien ko An. Ear l̦õmn̦ak bwe armej ro relãj im eutiej bũrueer rar m̦weiiel̦o̦k, em̦m̦anl̦o̦k ãjmour ko aer, im joñan, ear l̦õmn̦ak bwe rar jab iioon eñtaan ñan jidik. (Sam 73:​3-7, 12) Joñan an ri-jeje sam in lukkuun inepata, ear jino l̦õmn̦ak el̦aññe ewõr tokjãn an kate ilo an karejar ñan Jeova. Ear lukkuun bũrom̦õj im ba: ‘Ejjel̦o̦k tokjãn aõ kar kõjparok aõ erreo, im kõjparok peiũ jãn jerawiwi.’—Sam 73:​13, UBS.

7. Ñe jej bũrom̦õj, ta eo jemaroñ kõm̦m̦ane? (Bar lale pija eo.)

⁷ Meñe ri-jeje sam eo ear lukkuun bũrom̦õj, ak ear kõm̦m̦ane juon men ñan ukot l̦õmn̦ak eo an. Ear “del̦o̦ñe Tampel̦ eo [an Anij]” im Jeova ear kajim̦we l̦õmn̦ak eo an. (Sam 73:​17-19, UBS) Jeova, eo me jepaaketata, ejel̦ã kõn iien ko jej bũrom̦õj. Ñe jej jar ñane im kajjitõk bwe en tõl kõj, jenaaj bõk kajoor ñan kijenmej wõt ilo iien ko jej bũrom̦õj, ikijjeen Naan ko an im jipañ eo jãn ro jeid im jatid. Meñe el̦ap ad inepata im jejaje ta eo jen kõm̦m̦ane, ak Jeova enãj kaenõm̦m̦an kõj.—Sam 94:19.a

AD ‘KEPAAKE ANIJ’ EJ LETOK JUON MOUR EM̦M̦AN IM JUON KÕJATDIKDIK

8. Ta un ko jet unin an em̦m̦an ñan kõj ñe jej epaakel̦o̦k Anij?

⁸ Ebar wõr ruo un ko unin an em̦m̦an ñan kõj ñe jej epaakel̦o̦k Anij. Kein kajuon, ej letok juon mour em̦m̦an im el̦ap tokjãn. Kein karuo, ej letok juon kõjatdikdik em̦ool kõn ilju im jekl̦aj. (Jrm. 29:11) Jen kiiõ kal̦apl̦o̦k ad mel̦el̦e kõn tokjãn kein ruo jej bũki.

9. Ñe jej epaakel̦o̦k Jeova, ewi wãween an men in letok juon mour em̦m̦an im el̦ap tokjãn?

⁹ Ad epaakel̦o̦k Jeova ej letok juon mour em̦m̦an im el̦ap tokjãn. Elõñ armej rainin rejjab tõmak bwe Anij ej pãd im mour. Kõn men in, rej l̦õmn̦ak bwe ejjel̦o̦k tokjãn ad mour im bwe ej etal wõt ñan an ejjel̦o̦k armej ioon lal̦ in. Ijoke, jãn ad katak Naanin Anij, jej tõmak im lõke bwe Anij em̦ool an pãd im bwe “ej ri-kõjeraam̦m̦an ñan ro rej kanooj kappukote.” (Hib. 11:6) Ilo raan kein, jej lo el̦ap m̦õn̦õn̦õ ilo mour ko ad kõnke jej kõm̦m̦ane men eo Anij ear kõm̦anm̦an kõj ñan kõm̦m̦ane—karejar ñan eo Jemãdwõj ilañ, Jeova.—Dut. 10:​12, 13.

10. Ta eo Sam 37:29 ej kwal̦o̦k kõn ilju im jekl̦aj eo an ro rej likũt aer kõjatdikdik ilo Jeova?

¹⁰ Elukkuun lõñ armej ilo raan kein ejjel̦o̦k juon aer kõjatdikdik em̦ool kõn ilju im jekl̦aj—rej jerbal, m̦are, jino baam̦le, im kakkon̦ jããn ñan aer riittaer. Ejako Anij ilo mour ko aer. Ijo turãjet, ri-karejar ro an Jeova rej likũt aer kõjatdikdik ilo E. (Sam 25:​3-5; 1 Tim. 6:17) Jej lõke Anij eo ad me jej epaake im jej lõke kallim̦ur ko an ñan kõj. Kõjatdikdik eo ad kõn ilju im jekl̦aj ekitibuj ad karejar ñane ñan indeeo ilo Pedetaij.—Riit Sam 37:29.

11. Ñe jej epaakel̦o̦k Anij, ewi wãween an men in jelõt kõj im jelõt Jeova?

¹¹ Elõñ un ko jet unin an em̦m̦an ñan kõj ñe jej epaakel̦o̦k Anij. Ñan waanjoñak, Jeova ej kallim̦ur ñan jol̦o̦k jerawiwi ko an ro rej m̦oolin ukel̦o̦k me rej epaake e. (Ais. 1:18) Tokjãn men in, jejjab aikuj eddodo kõn juon bõklõkõt enana jãn wõt bõd ko jaar kõm̦m̦ani m̦oktal̦o̦k. (Sam 32:​1-5) Im ewõr ippãd jeraam̦m̦an eo ñan kam̦õn̦õn̦õik bũruon Jeova. (JK. 23:15) Ejjel̦o̦k pere kwõmaroñ l̦õmn̦ak kõn jeraam̦m̦an ko jet jej bũki jãn wõt ad epaake Jeova. Bõtab, ewi wãween kwõmaroñ wõnm̦aanl̦o̦k wõt im epaakel̦o̦k Anij?

WÃWEEN AD MAROÑ WÕNM̦AANL̦O̦K WÕT IM “KEPAAKE ANIJ”

12. Ta ko kwaar kõm̦m̦ani bwe kwõn maroñ epaakel̦o̦k Anij?

¹² El̦aññe kwõj juon Kũrjin em̦õj an peptaij, elõñ men ko kwaar kõm̦m̦ani bwe kwõn maroñ epaakel̦o̦k Jeova. Em̦õj am̦ katak m̦ool eo kõn Jeova Anij im Jesus Christ, ukel̦o̦k jãn jerawiwi ko am̦, kwal̦o̦k am̦ tõmak ilo Anij, im lukkuun kate eok ñan mour ekkar ñan ankilaan Anij. Bõtab, bwe jen maroñ epaakel̦o̦k Anij, jej aikuj wõnm̦aanl̦o̦k wõt im kõm̦m̦ani men kein.—Kol. 2:6.

13. Ta men ko jilu remaroñ jipañ kõj ñan wõnm̦aanl̦o̦k wõt im epaakel̦o̦k wõt Jeova?

¹³ Ta ko renãj jipañ kõj ñan wõnm̦aanl̦o̦k wõt im epaakel̦o̦k Jeova? (1) Jej aikuj wõnm̦aanl̦o̦k wõt ilo ad riit im katak Baibõl̦. Ñe jej kõm̦m̦ane men in, ejabwe ñan baj katak wõt kõn men ko repidodo kõn Anij. Ijello̦kun ad ãindein, jej aikuj kate kõj ñan jel̦ã ta ankilaan Anij ñan kõj im kõtl̦o̦k bwe naanin kakapilõk ko jãn Naan ko an ren tõl kõj ilo mour ko ad. (Eps. 5:​15-17) (2) Jej aikuj kõkajoore tõmak eo ad ikijjeen ad kõl̦mãnl̦o̦kjen̦ kõn aolep kein kam̦ool ko me rej kaalikkar yokwe eo an ñan kõj. (3) Jej aikuj wõnm̦aanl̦o̦k wõt im diki men ko rejjab kabuñbũruon Jeova im jab aetõl ro rej kõm̦m̦ani men kein renana.—Sam 1:1; 101:3.

14. Ekkejell̦o̦k ippãn 1 Korint 10:​31, ta jet iaan men ko jemaroñ kõm̦m̦ani ñan kabuñbũruon Jeova kajjojo raan? (Bar lale pija ko.)

¹⁴ Riit 1 Korint 10:31. Elukkuun aorõk bwe jen kõm̦m̦ani men ko rej kabuñbũruon Jeova. Ejabwe ñan ad baj kwal̦o̦k naan wõt im etal ñan iien kweilo̦k ko. Men ko jej kõm̦m̦ani kajjojo raan rej aikuj kabuñbũruon Jeova. Ñan waanjoñak, ñe jej kwal̦o̦k m̦ool ilo men otemjej im m̦õn̦õn̦õ in lel̦o̦k ñan ro jet men ko ewõr ippãd, jej kam̦õn̦õn̦õik bũruon Jeova. (2 Kor. 8:21; 9:7) Bareinwõt, ekõn̦aan bwe jen lukkuun kaorõk mour, eo me ej menin letok jãn e. Jej epaakel̦o̦k eo ear letok mour ikijjeen ad kõjparok joñan ad m̦õñã im idaak. Im ikijjeen ad kõm̦m̦ani men ko me renãj jipañ kõj ñan dãpij wõt ad ãjmour. Ñe Jeova ej lo ad kate kõj ñan kabuñbũruon ilo aolep men ko jej kõm̦m̦ani meñe ilo men ko reddik, eokwe enãj l̦apl̦o̦k an yokwe kõj.—Luk 16:10.

15. Ta eo Jeova ej kõtmãne bwe jen kõm̦m̦ane ñan ro jet?

¹⁵ Jeova ej kwal̦o̦k jouj ñan ro rewãnõk im ro rejjab wãnõk. (Matu 5:45) Ej kõtmãne bwe kõj bareinwõt jen kwal̦o̦k jouj ñan ro jet. Ñan waanjoñak, ekõn̦aan bwe jen “jab kõnanaik jabdewõt armej, im jab akwããl, . . . im kwal̦o̦k ineem̦m̦an ilo men otemjej ñan aolep armej.” (Tai. 3:2) Kõn men in, jejjab reilal̦l̦o̦k ñan ro jet kõn wõt an oktak tõmak ko aer. (2 Tim. 2:​23-25) Jej epaakel̦o̦k Jeova ikijjeen ad aolep iien kwal̦o̦k jouj ñe jej kõm̦m̦an ñan ro jet.

JEMAROÑ ‘KEPAAKE ANIJ’ MEÑE JAAR KÕM̦M̦AN BÕD

16. Ta eñjake eo ri-jeje eo an Sam 73 ear jino bõke ãlikin jet iien?

¹⁶ Bõtab, ta el̦aññe ãlikin jet iien kwõj jino bõk eñjake eo bwe ejjab tõllo̦kũm̦ ñan am̦ bõk yokwe eo an Jeova? Ãinwõt ad kar etale, ri-jeje eo an Sam 73 ear bõk juon eñjake me ej ãinl̦o̦kwõt men in. Ilo an inepata, ear ba: “Inañin kar buñ; enañin kar jirilo̦k neõ.” (Sam 73:​2, UBS) Ear make ba bwe ear “bũrom̦õj” im “bwebwe” ãinwõt juon “kidu awiia” im̦aan mejãn Jeova. (Sam 73:​21, 22) Ear ke l̦õmn̦ak bwe kõn wõt bõd ko ear kõm̦m̦ani, ejjab tõllo̦kũn an bõk yokwe eo an Jeova im bwe eban jeorl̦o̦k an bõd?

17. (1) Meñe ear iioon juon wãween elukkuun kabbweerer, ak ta eo ri-jeje sam eo ear kõm̦m̦ane? (2) Ta eo jemaroñ katak jãn bwebwenato in an? (Bar lale pija ko.)

¹⁷ El̦aññe ri-jeje sam eo ear bõk eñjake eo bwe Jeova ear kõjekdo̦o̦ne, eokwe emaroñ kar bõk eñjake in ium̦win jidik wõt iien. Meñe ear iioon wãween in elukkuun kabbweerer, ak ear kile aorõkin an aikuj kepaakel̦o̦k Anij. Im ear kaalikkar men in ke ear ba: “Mekarta ña ij ippam̦ [Jeova] iien otemjej; kwaar dãpij peiũ anmoon̦. Kwõnaaj tõl eõ kõn naanin kapilõk ko Am̦ im tokãlik bõk eõ ñan aiboojoj.” (Sam 73:​23, 24) Kõj bareinwõt jej aikuj reilo̦k ñan Jeova im kajjitõk bwe en kõkajoor kõj ñe jej eñjake ad m̦õjn̦o̦ ak ebbweer. (Sam 73:26; 94:18) Meñe jaar kõm̦m̦ani bõd ko rel̦l̦ap ak jemaroñ jepl̦aak ñan Jeova im lukkuun lõke bwe epojak im ‘ekõn̦aan jol̦o̦k ad bõd.’ (Sam 86:5) El̦aptata ilo iien eo jej iioon juon wãween elukkuun kabbweerer, jej aikuj epaakel̦o̦k Anij eo ad.—Sam 103:​13, 14.

JEMAROÑ ‘KEPAAKE ANIJ’ ÑAN INDEEO

18. Etke ejjel̦o̦k joñan ad maroñ kepaake Jeova?

¹⁸ Ejjel̦o̦k joñan ad maroñ kepaake Jeova. Ilo m̦ool, jemaroñ wõnm̦aanl̦o̦k wõt im epaakel̦o̦k e ñan indeeo. Im eban bõjrak ad katak kõn e. Baibõl̦ ej ba bwe “jejjab maroñ in mel̦el̦e” kõn mãlõtlõt eo an, jel̦ãl̦o̦kjen̦ eo an, im ial̦ ko an.—Rom 11:33.

19. Ta naanin kaenõm̦m̦an eo jej bõke jãn Sam 73?

¹⁹ Sam 79:13 ej ba: “Kõm ro doom̦, jiip ko an mel̦aaj eo Am̦, kõm naaj kam̦m̦oolol Eok ñan indeeo; kõm naaj kwal̦o̦k Am̦ nõbar ñan epepen ro otemjej.” Ilo am̦ wõnm̦aanl̦o̦k wõt im epaakel̦o̦k Jeova, kwe bareinwõt kwõmaroñ lõke bwe enaaj kõjeraam̦m̦an eok ñan indeeo, im kwõmaroñ ba: “Anij [ej aõ kajoor] . . . im aõ menin jolõt ñan indeeo.”—Sam 73:26.