Ãt eo Etan Jeova—Ewi Joñan an Aorõk Ippãn Jesus?

1-2. (1) Ta eo Jesus ear kõm̦m̦ane ilo boñõn eo m̦okta jãn an kar mej? (2) Ta kajjitõk ko jenaaj etali ilo katak in?

ILO jo̦teenin Taije, Nisan 14, 33 C.E. eo, Jesus ear kõm̦m̦ane Kõjota eo an Irooj ippãn rijjilõk ro an retiljek. Ear jel̦ã bwe m̦õttan jidik, Judas enaaj ketake im bwe ri-kõjdat ro an renaaj liaakel̦o̦k, kaeñtaane, innem m̦ane ñan mej. Kõn men in, ãlikin aer kar kõjota ippãn doon, Jesus ear lel̦o̦k elõñ naanin kõketak ko ñan rijjilõk ro an. Innem m̦okta wõt jãn aer etal jãn ruum̦ eo, Jesus ear jar ippãer im naan ko an ilo jar in relukkuun aorõk. Rijjilõk Jon ear je jar in ilo Jon jebta 17.

² Ta eo jar in an Jesus ej kwal̦o̦k kõn ta eo ear inepata kake m̦okta jãn an kar mej? Ewi wãween an jar in kaalikkar ta eo ear kaorõke ke ear jerbal ijin ioon lal̦? Jen etale uwaakin kajjitõk kein.

“IAR KWAL̦O̦K ETAM̦ ÑAN ER”

3. Ta eo Jesus ear ba kõn etan Jeova, im ta mel̦el̦ein an kar ba men in? (Jon 17:​6, 26)

³ Ilo jar eo an Jesus, ear ba: “Iar kwal̦o̦k etam̦ ñan er.” Ilo m̦ool, ruo alen an kar Jesus ba bwe ear kwal̦o̦k kõn etan Jeova ñan ri-kal̦oor ro an. (Riit Jon 17:​6, 26.) Ta mel̦el̦ein an kar ba men in? Ear ke aikuj kõmel̦el̦eik ri-kal̦oor ro an bwe etan Anij ej Jeova? Jaab, ri-kal̦oor ro an Jesus rar ri-Ju, innem em̦õj aer jel̦ã kadede bwe etan Anij ej Jeova. Ewal̦o̦k ãt in elõñ to̦ujin alen ilo Jeje ko jãn Kajin Hibru. Kõn men in, Jesus ear jab kõnono kõn ãt eo etan Anij, ijoke ear kõnono kõn kain Anij rot Jeova. Jesus ear jipañ ri-kal̦oor ro an bwe en l̦apl̦o̦k aer jel̦ã kajjien Jeova, ekitibuj karõk ko An, men ko Enaaj kõm̦m̦ani, im kadkad ko An. Ejjel̦o̦k bar juon elukkuun jel̦ã kajjien Jeova ijello̦kun Jesus.

4-5. (1) Ewi wãween an etan juon armej maroñ aorõkl̦o̦k ippãd? Kwal̦o̦k juon waanjoñak. (2) Ewi wãween an kar ri-kal̦oor ro an Jesus maroñ kal̦apl̦o̦k aer jel̦ã kajjien Jeova?

⁴ Ñan waanjoñak, jen ba bwe juon iaan em̦m̦aan ro rej lale eklejia eo am̦ etan David, ej juon taktõ me ejel̦ã m̦wijm̦wij. Im eto am̦ jel̦ã kajjien. Juon raan, mour eo am̦ ej pãd ilo kauwõtata im kwõj aikuj jipañ jãn juon taktõ. Rej bõkl̦o̦k eok ñan aujpitõl̦ en̦ David ej jerbal ie, im ej kõjerbale kapeel eo an ñan lo̦mo̦o̦rene mour n̦e am̦. Kiiõ, el̦apl̦o̦k am̦ yokwe em̦m̦aan in jeim̦ im jatũm̦ jãn kar m̦okta, im aolep iien kwõj roñ etan, kwõj l̦õmn̦ak kõn men eo ear kõm̦m̦ane ñan kwe. Ejako an baj David juon iaan em̦m̦aan ro rej lale eklejia eo am̦ wõt, ak kiiõ ej taktõ eo ear lo̦mo̦o̦rene mour eo am̦.

⁵ Ejja ãindeinl̦o̦k wõt, ri-kal̦oor ro an Jesus rar jel̦ã kadede etan Jeova. Bõtab kõn wõt jerbalin kwal̦o̦k naan eo an Jesus, ear l̦apl̦o̦k an aorõk ãt in ippãer. Etke jemaroñ ba men in? Kõnke Jesus ear kwal̦o̦k kadkadin Jemãn ilo aolep men ko ear ba im kõm̦m̦ani. Kõn men in, rijjilõk ro an rar maroñ kal̦apl̦o̦k aer “jel̦ã” kajjien Jeova ikijjeen aer roñjake katak ko an Jesus im etale wãween an kar kõm̦m̦an ñan armej ro.—Jon 14:9; 17:3.

“ÃT EO ETAM̦, EO KWAAR LETOK ÑAN ÑA BWE IN JUTAK IKIJJEEN”

6. Ilo wãween et Jeova ear lel̦o̦k etan ñan Jesus? (Jon 17:​11, 12)

⁶ Ilo jar eo an Jesus, ear jar kõn ri-kal̦oor ro an im ba: “Kwõn lale er ikijjeen ãt eo etam̦, eo kwaar letok ñan ña bwe in jutak ikijjeen.” (Riit Jon 17:​11, 12.) Ke Jesus ear kõnono kõn ãt eo etan Jeova, ear ba “ãt eo etam̦.” Men in ej kaalikkar bwe Jesus eban oktak im bõk etan Jeova. Innem, ta mel̦el̦ein an kar Jesus ba bwe Anij ear lel̦o̦k Etan ñane? Kein kajuon, Jesus ear jerbal ikijjeen Jeova im ear juon ri-Kõnono ñane. Ear itok ilo etan Jemãn im ear kõm̦m̦ani menin bwilõñ ko ilo ãt eo Etan. (Jon 5:43; 10:25) Kein karuo, ãt in Jesus ej mel̦el̦ein “Jeova ej Lo̦mo̦o̦r.” Aet, etan Jeova ej pãd ilo mel̦el̦ein etan Jesus.

7. Kwal̦o̦k juon waanjoñak kõn wãween an Jesus maroñ kõnono ilo etan Jeova.

⁷ Ñan waanjoñak, juon ambassador ej jutak ikijjeen juon ri-tõl, im emaroñ kõnono ilo etan ri-tõl in. Kõn men in, ñe ambassador eo ej kõnono, ewõr an maroñ ãinwõt ri-tõl eo an. Ejja ãindeinl̦o̦k wõt, Jesus ear jutak ikijjeen Jeova im ear kõnono ñan armej ro ilo Etan.—Matu 21:9; Luk 13:35.

8. Ewi wãween an kar etan Jeova “ilo” Jesus m̦okta jãn an kar itok ñan lal̦ in? (Exodus 23:​20, 21)

⁸ Baibõl̦ ej n̦aetan Jesus “Naan eo” kõnke ear jerbal ãinwõt ri-Kõnono eo an Jeova. Ear kõm̦m̦ane men in ikijjeen an kar kwal̦o̦k mel̦el̦e ko im naanin tõl ko ñan enjel̦ ro jet im armej ro. (Jon 1:​1-3) Jesus emaroñ kar enjel̦ eo me Jeova ear jilkinl̦o̦k ñan kõjparoke ri-Israel ro ilo tõre eo rar pãd ilo ãne jem̦aden. Ke Jeova ear jiroñ ri-Israel ro ñan pokake enjel̦ eo, ear ba: “Eta [ej] ilo e.”a (Riit Exodus 23:​20, 21.) Etan Jeova ear “ilo” Jesus, mel̦el̦ein bwe Jesus ear jutak ikijjeen Jeova im e eo el̦aptata an jojomare im kokkwõjarjare etan Jemãn.

“JEMA, KWÕN KAIBOOJOJ ETAM̦”

9. Ewi joñan an kar aorõk etan Jeova ippãn Jesus? Jouj im kõmel̦el̦e.

⁹ Ãinwõt ad kar kõnono kake, m̦okta jãn an kar Jesus itok ñan lal̦ in, etan Jeova ear men eo eaorõktata ippãn. Ejjel̦o̦k pere eñin unin aolep men ko Jesus ear kõm̦m̦ani ke ear pãd ijin ioon lal̦ rar kaalikkar joñan an aorõk etan Jeova ippãn! Ilo jem̦l̦o̦kinl̦o̦k jerbalin kwal̦o̦k naan eo an, Jesus ear lam̦õj im ba: “Jema, kwõn kaiboojoj etam̦.” Im ilo m̦õkaj, Jemãn ear uwaake jãn lañ im ba ilo juon ainikien el̦l̦aaj: “Iar kaiboojoje im inaaj bar kaiboojoje.”—Jon 12:28.

10-11. (1) Ewi wãween an kar Jesus kaiboojoj etan Jeova? (Bar lale pija eo.) (2) Etke ej menin aikuj ñan kokkwõjarjar im jojomare etan Jeova?

¹⁰ Jesus ear bareinwõt kaiboojoje etan Jemãn. Ewi wãween? Juon wãween ej ikijjeen an kar kwal̦o̦k ñan ro jet kõn kadkad ko raiboojoj an Jemãn im men ko rekabwilõñlõñ Ear kõm̦m̦ani. Ijoke, ebar wõr men ko jet Jesus ear aikuj kõm̦m̦ani. Ear aikuj kokkwõjarjar im jojomare etan Jeova.b Jesus ear kaalikkar joñan an aorõk men kein ke ear katakin ri-kal̦oor ro an kilen jar. Ear ba: “Jememwõj ilañ, en kwõjarjar etam̦.”—Matu 6:9.

¹¹ Etke ej menin aikuj ñan kokkwõjarjar im jojomare etan Jeova? Kõnke ilo kar jikin kallibin Iden, Setan Tepil̦ eo ear kattoone etan Jeova Anij im riab n̦ae E. Setan ear ba bwe Jeova ej riab im bwe Ej dãpij juon men em̦m̦an jãn Adam im Iv. (Jen. 3:​1-5) Ear ãinwõt ñe Setan ear ba bwe ejjab jim̦we wãween an Jeova jerbal. Naanin riab kein an Setan rar ko̦kkure etan Jeova. Tokãlik, ilo raan ko an Job, Setan ear ba bwe armej rej karejar ñan Jeova kõn wõt aer bõk jeraam̦m̦an jãn E. Ri-riab in ear bar ba bwe armej renãj bõjrak jãn aer karejar ñan Jeova ñe rej iioon apañ ko kõnke rejjab lukkuun yokwe E. (Job 1:​9-11; 2:4) Alikkar bwe kar aikuj kõtl̦o̦k iien ñan lukkuun kaalikkar wõn eo ej riab, Jeova ke ak Setan.

“IJ LEL̦O̦K AÕ MOUR”

12. Ta eo Jesus ear m̦õn̦õn̦õ in kõm̦m̦ane kõn wõt an yokwe etan Jeova?

¹² Kõn wõt yokwe eo an ñan Jeova, Jesus ear kõn̦aan kate joñan wõt an maroñ ñan kokkwõjarjar im jojomare etan Jeova. Jesus ear ba: “Ij lel̦o̦k aõ mour.” (Jon 10:​17, 18) Aet, joñan ear m̦õn̦õn̦õ in mej kõn etan Jeova.c Armej ro ruo jinointata me rar weeppãn, Adam im Iv, rar jum̦aik Jeova im jait ippãn Setan. Ijoke, Jesus ear oktak kõnke ear m̦õn̦õn̦õ in itok ñan lal̦ in im kam̦ool yokwe eo an ñan Jeova. Jesus ear kõm̦m̦ane men in ikijjeen an kar pokake Jeova ilo aolep men ko ear ba im kõm̦m̦ani. (Hib. 4:15; 5:​7-10) Ear dãpij wõt an tiljek ilo aolepen mour eo an, m̦ae iien ear mej ioon al̦al̦in eñtaan eo. (Hib. 12:2) Ilo an ãindein, ear kam̦ool yokwe eo an ñan Jeova im ãt eo Etan.

13. Etke Jesus ear armej eo em̦m̦antata ñan kam̦ool bwe Setan ej juon ri-riab? (Bar lale pija eo.)

¹³ Ilo mour eo an, Jesus ear kam̦ool bwe Setan ej juon ri-riab, jab Jeova! (Jon 8:44) Jesus eo el̦aptata an kar jel̦ã kajjien Jeova jãn jabdewõt eo em̦õj an pãd im mour. Ñe en kar m̦ool jabdewõt men Setan ear ba n̦ae Jeova, Jesus en kar jel̦ã el̦aññe rem̦ool ak jaab. Bõtab Jesus ear jutak pen ilo an jojomare etan Jeova. Meñe ear ãinwõt ñe Jeova ear kõjekdo̦o̦ne, ak Jesus ear pojakin mej ijello̦kun an el̦l̦o̦k jãn Jemãn me el̦ap yokwe ippãn.—Matu 27:46.d

“IAR . . . KADEDEL̦O̦K JERBAL EO KWAAR LETOK”

14. Ewi wãween an kar Jeova kõjeraam̦m̦ane Jesus kõn an kar dãpij wõt an tiljek?

¹⁴ Ilo boñõn eo m̦okta jãn an Jesus mej, ear maroñ jar im ba: “Iar . . . kadedel̦o̦k jerbal eo kwaar letok bwe in kõm̦m̦ane.” Ear lõke bwe Jeova enaaj kõjeraam̦m̦ane kõn an kar dãpij wõt an tiljek. (Jon 17:​4, 5) Im ejim̦we an kar Jesus lõke Jemãn. Jeova ear jab kõtl̦o̦k an pãdwõt ilo lõb eo. (Jrb. 2:​23, 24) Ear kõjerkakpejeik Jesus im kõm̦m̦an bwe en juon eo elukkuun utiej ilañ. (Pil. 2:​8, 9) Tokãlik, Jesus ear jino irooj ãinwõt Kiiñ eo an Aelõñin Anij. Ta eo Aelõñ eo enaaj katõprake? Jesus ear uwaake men in ke ear katakin ri-kal̦oor ro an ñan jar im ba: “En itok am̦ Aelõñ. En jejjet ankilaam̦ [Jeova] ilo lal̦ in ãinwõt an jejjet ilo lañ.”—Matu 6:10.

15. Ta ko Jesus enaaj katõpraki?

¹⁵ Ilo ilju im jekl̦aj, Jesus enaaj tarin̦ae n̦ae ri-kõjdat ro an Anij im ko̦kkure ro renana ilo Armagedon. (Rev. 16:​14, 16; 19:​11-16) Ejjabto tokãlik, enaaj jol̦o̦k Setan “ilo abyss eo,” ijo enaaj kalbuuj im eban kõm̦m̦an jabdewõt. (Rev. 20:​1-3) Jesus enaaj bar bõktok aenõm̦m̦an im armej renãj bar weeppãn ilo naaj Juon To̦ujin Iiõ ko in an Christ Irooj. Enaaj kõjerkakpejeik ro remej. Enaaj kõm̦m̦an bwe aolepen lal̦ in en juon pedetaij. Im enaaj jejjet ankilaan Jeova!—Rev. 21:​1-4.

16. Ta ko renaaj wal̦o̦k ilo jem̦l̦o̦kin Juon To̦ujin Iiõ ko in an Christ Irooj?

¹⁶ Ta ko jemaroñ kõtmãni bwe renaaj wal̦o̦k ilo jem̦l̦o̦kin Juon To̦ujin Iiõ ko in an Christ Irooj? Jerawiwi im jab weeppãn renaaj jako. Enaaj jako an armej aikuj kajjitõk jeorl̦o̦k bõd kõn jerawiwi ko aer ikijjeen pinmuur eo; im reban aikuji juon kumi in bũrij ro me 144,000 uwaaer ekoba Jesus bwe en aer Bũrij L̦apl̦ap bwe en maroñ wõr juon aer jem̦jerã ippãn Jeova. Im “naaj kajeepepl̦o̦ke ri-kõjdat eo ãliktata, . . . mej.” Enaaj ejjel̦o̦k kobban lõb ko. Ro remej renaaj bar mour. Im aolep armej ioon lal̦ in renaaj weeppãn.—1 Kor. 15:​25, 26.

17-18. (1) Ta eo enaaj wal̦o̦k ilo jem̦l̦o̦kin Juon To̦ujin Iiõ ko in an Christ Irooj? (2) Ta eo Jesus enaaj kõm̦m̦ane ilo iien eo ejem̦l̦o̦k an tõl? (1 Korint 15:​24, 28) (Bar lale pija eo.)

¹⁷ Ta men eo juon enãj wal̦o̦k ilo jem̦l̦o̦kin Juon To̦ujin Iiõ ko in an Christ Irooj? Ilo naaj iien en̦, enaaj wal̦o̦k juon men ejejuwaan. Ejjel̦o̦k en̦ enaaj bar pere bwe Jeova ej juon Anij in ekajet jim̦we im eokkwõjarjar. Etke? Eokwe ilo jikin kallibin Iden, Setan ear ba bwe Jeova ej juon ri-riab im bwe ejjab tõl armej ro ilo yokwe. Jãn kar tõre in tok ñan kiiõ, elõñ alen an armej ro me rej kautiej Jeova kokkwõjarjare etan. Kõn men in, ilo jem̦l̦o̦kin Juon To̦ujin Iiõ ko in an Christ Irooj, enaaj kanooj erreo etan Jeova. Ilo tõre en̦, enaaj m̦õj an Jeova kam̦ool bwe ej juon Jemãn me el̦ap yokwe ippãn.

¹⁸ Ilo jem̦l̦o̦kin Juon To̦ujin Iiõ ko in an Christ Irooj, aolep renaaj jel̦ã bwe aolep men ko Setan ear ba kõn Jeova reriab. Ta eo Jesus enaaj kõm̦m̦ane ilo iien eo ejem̦l̦o̦k an tõl? Enaaj ke anõke Setan im jum̦aik Jeova? Eban! (Riit 1 Korint 15:​24, 28.) Jesus enaaj karo̦o̦ll̦o̦k Aelõñ eo ñan Jemãn. Enaaj kõttãik e make ñan Jeova im tõl eo An. Aet, Jesus eoktak jãn Setan kõnke em̦õn̦õn̦õ in kaarmejjeteik aolep men kõnke ej yokwe Jeova.

19. Ewi joñan an aorõk etan Jeova ippãn Jesus?

¹⁹ Elukkuun alikkar unin an kar Jeova m̦õn̦õn̦õ in lel̦o̦k ãt eo etan ñan Jesus! Jesus ear kam̦ool bwe ear jejjet im jim̦we wãween an kar jutak kõn Jemãn. Kõn men in, ewi joñan an aorõk etan Jeova ippãn Jesus? Elukkuun l̦ap an aorõk jãn jabdewõt men. Ear m̦õn̦õn̦õ in mej kõn etan Jeova, im enaaj m̦õn̦õn̦õ in karo̦o̦ll̦o̦k aolep men ñan Jeova ilo jem̦l̦o̦kin Juon To̦ujin Iiõ ko in an Irooj. Ewi wãween jemaroñ anõke joñak eo an Jesus? Jenaaj etale uwaakin kajjitõk in ilo katak eo tok juon.