Ãt eo Etan Jeova—Ewi Joñan an Aorõk Ippam̦?

1-2. Ewi wãween ad jel̦ã bwe etan Jeova elukkuun aorõk ippãn Jesus?

ETAN Jeova ej men eo aorõktata ippãn Jesus. E eo el̦aptata an kar kokkwõjarjare etan Jeova jãn jabdewõt armej. Ãinwõt ad kar kõnono kake ilo katak eo l̦o̦k, Jesus ear m̦õn̦õn̦õ in mej kõn etan Jeova im aolep men ko ãt eo Etan ej jutak kaki. (Mark 14:36; Hib. 10:​7-9) Im ãlikin Juon To̦ujin Iiõ ko in an Christ Irooj, Jesus enaaj m̦õn̦õn̦õ in karo̦o̦ll̦o̦k aolep maroñ ko ewõr ippãn ñan Jemãn kõnke ekõn̦aan bwe aolep nõbar en etal ñan Jeova. (1 Kor. 15:​26-28) Aolep men ko Jesus ear kõm̦m̦ani ñan Jemãn rej kam̦ool bwe elukkuun l̦ap an Jesus yokwe Jeova.

² Jesus ear itok ñan lal̦ in bwe en kõnono ñan armej ro ilo etan Jemãn. (Jon 5:43; 12:13) Ear kwal̦o̦k etan Jemãn ñan ri-kal̦oor ro an. (Jon 17:​6, 26) Im ear katakin armej ro im kõm̦m̦ani menin kabwilõñlõñ ko ilo etan Jeova. (Jon 10:25) Ilo m̦ool, Jesus ear kajjitõk ippãn Jeova bwe en lale ri-kal̦oor ro an “ikijjeen ãt eo [Etan].” (Jon 17:11) Alikkar bwe ejjel̦o̦k men en̦ aorõkl̦o̦k ippãn Jesus jãn etan Jeova. Kõn men in, juon armej emaroñ ke lukkuun ba bwe ej juon Kũrjin el̦aññe ejjab jel̦ã ak kõjerbale ãt eo etan Jeova?

3. Ta ko jenaaj etali ilo katak in?

³ Ãinwõt Kũrjin ro, jej kate kõj ñan anõke Jesus ikijjeen ad kaorõk ãt eo etan Jemãn. (1 Pit. 2:21) Ilo katak in, jenaaj lo etke Jeova ear lel̦o̦k ãt eo etan ñan ro rej kwal̦o̦k kõn “ennaan eo em̦m̦an kõn Aelõñ eo.” (Matu 24:14) Jenaaj bareinwõt kõnono kõn ewi joñan an aikuj aorõk etan Jeova ippãd kajjojo.

ARMEJ RO REJ “JUTAK KÕN ÃT EO ETAN”

4. (1) Ta eo Jesus ear ba ñan ri-kal̦oor ro an m̦okta jãn an kar jepl̦aak ñan lañ? (2) Ta kajjitõk ko rar wanlõñtak kõn men in Jesus ear ba ñan er?

⁴ M̦okta jãn an kar Jesus jepl̦aak ñan lañ, ear ba ñan ri-kal̦oor ro an: “Kom̦ naaj obrak kõn kajoor ñe jetõb kwõjarjar enaaj itok ioomi, im kom̦ naaj kwal̦o̦k kõn ña ilo Jerusalem, ilo aolepen Judia im Sameria, im ñan ãne ko rettol̦o̦ktata ilo lal̦.” (Jrb. 1:8) Mel̦el̦ein bwe ennaan eo em̦m̦an enaaj tõpar aelõñ ko ilikin Israel. Im jidik kõn jidik, armejin aolep aelõñ ko renaaj maroñ erom ri-kal̦ooran Christ. (Matu 28:​19, 20) Ijoke, Jesus ear ba: “Kom̦ naaj kwal̦o̦k kõn ña.” Ri-kal̦oor rein rekããl renaaj aikuj ke jel̦ã etan Jeova, ak renaaj ke kwal̦o̦k naan wõt kõn Jesus? Men ko rar wal̦o̦k ilo Jerbal jebta 15 rej jipañ kõj uwaake kajjitõk in.

5. Ewi wãween an kar rijjilõk ro im em̦m̦aan ro rerũtto ilo Jerusalem kwal̦o̦k bwe aolep armej rej aikuj jel̦ã kõn etan Jeova? (Bar lale pija eo.)

⁵ Ilo 49 C.E. eo, rijjilõk ro im em̦m̦aan ro rerũtto ilo Jerusalem rar kweilo̦k ippãn doon bwe ren kõnono kõn ta ko ri-aelõñ ko jet me rejjañin m̦wijm̦wij rar aikuj kõm̦m̦ani bwe ren maroñ erom Kũrjin. Ilo jem̦l̦o̦kin kweilo̦k eo aer, Jemes, l̦eo jatin Jesus, ear ba: “[Piter] ear lukkuun tipdikitok kõn iien eo jinointata Anij ear oktakl̦o̦k ñan ri-aelõñ ko im ebbõk armej jãn ibwiljier bwe ren jutak kõn ãt eo etan.” Etan wõn eo Jemes ear kõnono kake? Ear ãliji naan ko an ri-kanaan Amos im ba: “Bwe armej ro rej pãdwõt, ekoba aolep ri-aelõñ ko, ro im rej jutak kõn ãt eo eta, ren lukkuun pukot Jeova. Eñin men eo Jeova ej ba.” (Jrb. 15:​14-18) Ri-kal̦oor rein renaaj katak kõn Jeova im renaaj bareinwõt ‘jutak kõn etan.’ Mel̦el̦ein bwe renaaj kwal̦o̦k naan kõn etan Anij im ro jet renaaj kile bwe rej jutak kõn ãt in.

6-7. (1) Etke Jesus ear itok ñan lal̦ in? (2) Ta un eo juon eaorõkl̦o̦k unin an kar Jesus itok ñan lal̦ in?

⁶ Ãt eo etan Jesus ej mel̦el̦ein “Jeova ej Lo̦mo̦o̦r,” im Jeova ear kõjerbal Jesus ñan lo̦mo̦o̦ren aolep ro rej kwal̦o̦k aer tõmak ilo E im eo Nejin. Jesus ear itok ñan lal̦ in bwe en katok kõn mour eo an ñan lo̦mo̦o̦ren armej ro. (Matu 20:28) Tokjãn men in, ear kõpel̦l̦o̦k ial̦an an armej ro maroñ bõk jeorl̦o̦k bõd kõn jerawiwi ko aer im bõk mour indeeo.—Jon 3:16.

⁷ Bõtab etke armej rar aikuji an juon lo̦mo̦o̦ren er? Unin ej kõn men eo ear wal̦o̦k ilo jikin kallibin Iden. Ãinwõt ad kar etale ilo katak eo l̦o̦k, ro jemãd im jined jinointata, Adam im Iv, rar jum̦aik Jeova. Kõn men in, rar luuji jeraam̦m̦an eo ñan mour indeeo. (Jen. 3:​6, 24) Bõtab Jesus ear itok ñan lal̦ in bwe en kõm̦m̦ane juon men me eaorõkl̦o̦k jãn an lo̦mo̦o̦ren armej ro. Setan ear kattoone ãt eo etan Jeova. (Jen. 3:​4, 5) Kõn men in, an ro ineen Adam im Iv bõk lo̦mo̦o̦r ear ekkejell̦o̦k ñan juon men eaorõkl̦o̦k—kokkwõjarjar ãt eo etan Jeova. Im Jesus ear armej eo em̦m̦antata ñan kokkwõjarjar etan Jeova kõnke ear jutak kõn Etan im ear jejjet im jim̦we wãween an kar pokake Jemãn.

8. Ta eo aolep ro rej tõmak ilo Jesus rej aikuj kile?

⁸ Aolep ro rar likũt aer tõmak ilo Jesus, ekitibuj ri-Ju ro im ri-aelõñ ko jet, rar aikuj kile eo ej Wũnjãn aer nãj bõk lo̦mo̦o̦r, Jemãn Jesus—Jeova Anij. (Jon 17:3) Ejjab men in wõt, ak ãinwõt Jesus, renaaj jutak kõn etan Jeova. Renaaj bar aikuj kile aorõkin aer kokkwõjarjare ãt in. Rar aikuj kõm̦m̦ane men in el̦aññe rar kõn̦aan bõk lo̦mo̦o̦r. (Jrb. 2:​21, 22) Kõn men in, aolep ri-kal̦oor ro an Jesus me retiljek rar aikuj katak kõn Jeova im Jesus jim̦or. Jemaroñ lo unin an kar Jesus ba naan kein ilo jem̦l̦o̦kin jar eo an me Jon 17 ej kwal̦o̦k kake. Ear ba: “Iar kwal̦o̦k etam̦ ñan er im inaaj wõnm̦aanl̦o̦k wõt im kwal̦o̦ke bwe yokwe eo kwaar kwal̦o̦ke ñan ña en pãd ippãer im bwe in bõro wõt juon ippãer.”—Jon 17:26.

“KOM̦ RI-KÕNNAAN RO AÕ”

9. Ewi wãween jemaroñ kaalikkar bwe eaorõk etan Jeova ippãd?

⁹ Jãn men ko ej kab m̦õj ad etali, alikkar bwe el̦aññe jekõn̦aan l̦oore Jesus, jej aikuj kokkwõjarjare etan Jeova. (Matu 6:​9, 10) Jej aikuj watõk etan Jeova ãt eo me eutiejtata jãn jabdewõt ãt. Jej aikuj kaalikkare men in ilo kõm̦m̦an ko ad. Bõtab, ewi wãween jemaroñ bõk kun̦aad im kokkwõjarjare etan Jeova, ak karreoiki etan jãn an kar Setan kattoone?

10. Ta keej eo ilo kõkkar me Aiseia jebta 42 ñan 44 ej kõnono kake? (Aiseia 43:9; 44:​7-9) (Bar lale pija eo.)

¹⁰ Aiseia jebta 42 ñan 44 ej kaalikkar ta ko jej aikuj kõm̦m̦ani bwe jen maroñ kokkwõjarjare etan Jeova. Jebta kein rej kõmel̦el̦e kõn juon keej ilo kõkkar ikijjeen aitwerõk eo kõn wõn eo ejim̦we im ekkar ñan tõl. Ãinwõt juon keej ilo juon im̦õn ekajet, Jeova ej mãlejjoñe anij ko jet ñan kam̦ool el̦aññe er m̦oolin anij. Ej bareinwõt kajjitõk el̦aññe ewõr ri-kam̦ool ro me remaroñ kam̦ool el̦aññe em̦ool anij rein. Bõtab ejjel̦o̦k en̦ emaroñ kõm̦m̦ane men in!—Riit Aiseia 43:9; 44:​7-9.

11. Ta eo Jeova ej ba ñan armej ro an ilo Aiseia 43:​10-12?

¹¹ Riit Aiseia 43:​10-12. Jeova ej ba naan kein ñan armej ro an: “Kom̦ ri-kõnnaan ro Aõ, . . . im Ña Anij.” Jeova ej kajjitõk ippãer ñan uwaake kajjitõk in: “Ebar wõr anij jãn Ña ke?” (Ais. 44:8) Alikkar bwe ewõr ippãd jeraam̦m̦an eo ñan uwaake kajjitõk in. Ikijjeen naan im kõm̦m̦an ko ad, jej kam̦ool bwe Jeova wõt ej Anij eo em̦ool. Eutiejtata ãt eo etan jãn jabdewõt ãt. Jej kam̦ool bwe jej lukkuun yokwe Jeova im bwe jej tiljek ñane ikijjeen wãween ad mour—jekdo̦o̦n ta ijjiped ko Setan ej mãlejjoñe kõj kaki. Ilo wãween in, epel̦l̦o̦k juon iien ñan ad kokkwõjarjare Etan.

12. Ewi wãween an kar jejjet kũtien kanaan eo ilo Aiseia 40:​3, 5?

¹² Ñe jej rejetake etan Jeova, jej anõke Jesus Christ. Aiseia ear kanaan kõn juon eo enaaj “[kõpooj] . . . ial̦ eo an Jeova.” (Ais. 40:3) Ewi wãween an kar jejjet kũtien kanaan in? Jon ri-Peptaij ear kõpooj ial̦ eo ñan Jesus, eo ear itok ilo etan Jeova im ear kõnono ilo ãt eo Etan. (Matu 3:3; Mark 1:​2-4; Luk 3:​3-6) Kanaan in ear wõnm̦aanl̦o̦k wõt im ba: “Naaj kwal̦o̦k aiboojoj an Jeova.” (Ais. 40:5) Ewi wãween an kar jejjet kũtien naan kein? Ke Jesus ear itok ñan lal̦ in, joñan an kar jejjet im jim̦we wãween an kar jutak kõn Jeova ear ãinwõt ñe Jeova make ear itok ñan lal̦ in.—Jon 12:45.

13. Ewi wãween jemaroñ anõke Jesus?

¹³ Ãinwõt Jesus, jej ri-kõnnaan ro an Jeova. Jej jutak kõn etan Jeova im kwal̦o̦k ñan aolep ro jej iioon er kõn men ko rem̦m̦an ear kõm̦m̦ani. Bõtab, bwe en jejjet ad kõm̦m̦ane men in, jej aikuj bar kwal̦o̦k kõn aolep men ko Jesus ear kõm̦m̦ani ñan kokkwõjarjar etan Jeova. (Jrb. 1:8) Ejjel̦o̦k bar juon em̦m̦anl̦o̦k an kar kwal̦o̦k kõn Jeova ijello̦kun Jesus, kõn men in jej l̦oore joñak eo an. (Rev. 1:5) Bõtab ewi joñan an aikuj aorõk ãt eo etan Jeova ippãd kajjojo?

WÃWEEN JEJ KWAL̦O̦K AN AORÕK ETAN JEOVA IPPÃD

14. Ãinwõt an wal̦o̦k ilo Sam 105:​3, ewi wãween ad eñjake kõn etan Jeova?

¹⁴ Jelukkuun m̦õn̦õn̦õ im eutiej bũruod kõn etan Jeova. (Riit Sam 105:3.) Jeova elukkuun m̦õn̦õn̦õ ñe jej kõmjãje kõn etan. (Jrm. 9:​23, 24; 1 Kor. 1:31; 2 Kor. 10:17) Ñan “kõmjãje kõn Jeova” ej mel̦el̦ein bwe en utiej bũruod kõnke Jeova ej ad Anij. Jej watõk bwe ej juon jeraam̦m̦an ñan ba ñan ro jet bwe Jeova eokkwõjarjar im bwe aolep men ko ej kõm̦m̦ani rejim̦we. Jejjab aikuj jook in ba ñan ri-jerbal ro m̦õttad, ri-jikuul̦ ro m̦õttad, ro ri-turid, im ro jet bwe jej juon iaan Ri-Kõnnaan ro an Jeova! Tepil̦ eo ekõn̦aan kabõjrak kõj jãn ad kõnono kõn etan Jeova ñan ro jet. (Jrm. 11:​21, UBS; Rev. 12:17) Ilo m̦ool, Setan im ro rej kajeeded riab ko an rekõn̦aan kõm̦m̦an bwe armej ro ren mel̦o̦kl̦o̦ke etan Jeova. (Jrm. 23:​26, 27) Bõtab, kõnke jej yokwe etan Jeova, jekõn̦aan nõbare “ium̦win aolepen raan” ak aolep iien.—Sam 5:11; 89:16.

15. Ta mel̦el̦ein ñan kũr etan Jeova?

¹⁵ Jej wõnm̦aanl̦o̦k wõt im kũr etan Jeova. (Joel 2:32; Rom 10:​13, 14) Ñe jej kũr etan Jeova, elõñl̦o̦k men ko jej kõm̦m̦ani ijello̦kun ad baj jel̦ã wõt etan im kõjerbale ãt eo etan. Jej kal̦apl̦o̦k ad jel̦ã kajjien, lõke e, im reilo̦k ñane bwe en jipañ im tõl kõj. (Sam 20:7; 99:6; 116:4; 145:18) Ejjab men in wõt, ak jej bareinwõt kwal̦o̦k kõn etan im kadkad ko an ñan ro jet, im jej rõjañ er ñan ukel̦o̦k im em̦m̦akũt bwe ren maroñ kabuñbũruon Jeova.—Ais. 12:4; Jrb. 2:​21, 38.

16. Ewi wãween jemaroñ kam̦ool bwe Setan ej juon ri-riab?

¹⁶ Jem̦õn̦õn̦õ in eñtaan kõn etan Jeova. (Jem. 5:​10, 11) Ñe jej dãpij wõt ad tiljek ñan Jeova meñe jej iioon eñtaan, jej kam̦ool bwe Setan ej juon ri-riab. Ilo tõre eo an Job, Setan ear ba men in kõn ro rej karejar ñan Jeova: “Men otemjej ippãn juon armej enaaj lel̦o̦k kõn an mour.” (Job 2:4) Setan ear ba bwe armej rej karejar ñan Jeova ilo iien ko rem̦m̦an wõt im bwe renaaj kõjekdo̦o̦ne Jeova ñe renaaj iioon wãween ko reppen. Job ear kam̦ool bwe eriab naan kein an Setan ke ear dãpij wõt an tiljek. Kõj bareinwõt ewõr ippãd jeraam̦m̦an eo ñan kam̦ool bwe jejjãmin kõjekdo̦o̦ne Jeova jekdo̦o̦n ta ko Setan ej mãlejjoñe kõj kaki. Jemaroñ lukkuun lõke bwe Jeova enaaj lale kõj ikijjeen ãt eo etan.—Jon 17:11.

17. Ta wãween eo juon jemaroñ kaiboojoj etan Jeova, ãinwõt an 1 Piter 2:12 kwal̦o̦k kake?

¹⁷ Jej kwal̦o̦k ad kautiej etan Jeova. (JK. 30:​9, UBS; Jrm. 7:​8-11) Kõnke jej jutak kõn etan Jeova im jej kwal̦o̦k kõn etan, men ko jej kõm̦m̦ani remaroñ bõktok nõbar ak jook ñan etan. (Riit 1 Piter 2:12.) Kõn men in, jekõn̦aan kate kõj joñan wõt ad maroñ ñan nõbar Jeova ikijjeen naan im kõm̦m̦an ko ad. Ilo ad ãindein, jenaaj maroñ kaiboojoje etan Jeova meñe jejjab weeppãn.

18. Ta wãween eo juon jemaroñ kam̦ool bwe eaorõk etan Jeova ippãd? (Bar lale footnote eo.)

¹⁸ Eaorõkl̦o̦k ippãd ñan kõjparoke etan Jeova jãn ãt eo etad make. (Sam 138:2) Etke elukkuun aorõk men in? Kõnke ñe jej kõm̦m̦ani men ko rej kabuñbũruon Jeova, ekkã an armej ro jab m̦õn̦õn̦õ ippãd im remaroñ kõnanaik kõj.a Jesus ear m̦õn̦õn̦õ in mej ilo juon wãween ekajjookok ãinwõt juon ri-nana bwe en maroñ kaiboojoje etan Jeova. “Jekdo̦o̦n ñe men in ear menin kajjookok,” ak ear jab nana an mour ak l̦ap an inepata kõn wãween an ro jet watõke. (Hib. 12:​2-4) Men eo el̦aptata an kar aorõk ippãn ej ñan kõm̦anm̦an ankilaan Anij.—Matu 26:39.

19. Ewi wãween am̦ eñjake kõn ãt eo etan Jeova, im etke?

¹⁹ El̦ap ad m̦õn̦õn̦õ im eutiej bũruod kõn etan Jeova im jej watõk bwe ej juon jeraam̦m̦an ñan bõk ãt in, Ri-Kõnnaan ro an Jeova. Kõn men in, jem̦õn̦õn̦õ in kijenmej wõt meñe ro jet rej kajook ak kõnanaik kõj. Eaorõkl̦o̦k ippãd ñan kõjparoke etan Jeova jãn ãt eo etad make. Innem, jen jek ippãd make ñan wõnm̦aanl̦o̦k wõt im nõbar etan Jeova jekdo̦o̦n ta ko Setan enaaj mãlejjoñe kõj kaki. Ilo ad ãindein, jenaaj maroñ kam̦ool bwe etan Jeova ej men eo eaorõktata ippãd, ãinwõt an aorõk ippãn Jesus Christ.