Tõmak bwe Jeova Ej Yokwe Eok

1. Etke kwaar ajel̦o̦k mour eo am̦ ñan Jeova? (Bar lale pija eo.)

KWÕJ ke keememej iien eo kwaar ajel̦o̦k mour eo am̦ ñan Jeova? Kwaar kõm̦m̦ane pepe in kõnke ear l̦apl̦o̦k am̦ jel̦ã kajjien im yokwe E. Kwaar kallim̦ur ñane bwe kwõnaaj likũt ankilaan m̦oktata ilo mour eo am̦ im bwe kwõnaaj wõnm̦aanl̦o̦k wõt im yokwe E kõn aolepen bũruom̦, am̦ mour, am̦ l̦õmn̦ak, im am̦ kajoor. (Mark 12:30) Jãn kar iien en̦ tok ñan kiiõ, yokwe eo am̦ ñane ej eddekl̦o̦k wõt. Innem, en kar ewi wãween am̦ uwaak ñe juon ej kajjitõk ippam̦, “Kwõj ke lukkuun yokwe Jeova?” Ejjel̦o̦k kajjitõk kwõn kar kajju ba, “Aet, el̦ap aõ yokwe Jeova jãn jabdewõt armej ak jabdewõt men!”

2-3. Ta eo Jeova ekõn̦aan bwe jen tõmake, im ta ko jenaaj etali ilo katak in? (Jeremaia 31:3)

² Bõtab, en kar ewi wãween am̦ uwaak ñe juon ej kajjitõk ippam̦, “Kwõj ke lukkuun tõmak bwe Jeova ej yokwe kwe?” Kwõn kar ke jenliklik in uwaak, bõlen kõnke kwõj l̦õmn̦ak bwe ejjab tõllo̦kũm̦ bwe Jeova en yokwe kwe? Juon jeid im jatid kõrã me ear jab pidodo wãween an kar dik im rũttol̦o̦k, ej ba: “Ijel̦ã bwe ij yokwe Jeova. Ijjab pere men in ñan jidik. Men eo el̦ap aõ pere ej el̦aññe Jeova ej yokwe ña.” Ijoke, ta lukkuun eñjake eo an Jeova kõn kwe?

³ Jeova ekõn̦aan bwe kwõn lukkuun tõmak bwe ej yokwe eok. (Riit Jeremaia 31:3.) Ilo m̦ool, Jeova eo ear karuwaaktok kwe ñan E. Im ke kwaar ajel̦o̦k mour eo am̦ ñane im peptaij, ear lewaj ñan kwe juon men elukkuun aorõk—yokwe eo an em̦ool. Men in ej mel̦el̦ein bwe elukkuun yokwe eok im ejjãmin el̦l̦o̦k jãn eok. Yokwe in ej kõm̦akũt E ñan watõk ri-karejar ro an retiljek ãinwõt ‘m̦weiuk eaorõk,’ im men in ekitibuj kwe. (Mal. 3:17) Jeova ekõn̦aan bwe kwõn lukkuun tõmak bwe ej yokwe eok ãinwõt an kar rijjilõk Paul kar lukkuun tõmak bwe Jeova ej yokwe e. Joñan an Paul lukkuun tõmak men in, ear je im ba: “Ij lukkuun tõmak bwe ejjel̦o̦k iaan men kein ãinwõt mej ak mour ak enjel̦ ran̦ ak kien ko ak men ko kiiõ ak men ko tokãlik ak kajoor ko ak men ko ilañ ak men ko ilal̦ ak jabdewõt menin kõm̦anm̦an enaaj maroñ kõjepel kõj jãn yokwe eo an Anij.” (Rom 8:​38, 39) Ilo katak in, jenaaj etale unin ad aikuj kal̦apl̦o̦k ad tõmak bwe Jeova ej yokwe kõj im ta ko remaroñ jipañ kõj ñan kõm̦m̦ane men in.

UNIN JEJ AIKUJ TÕMAK BWE JEOVA EJ YOKWE KÕJ

4. Ewi wãween jemaroñ jum̦ae juon iaan jerbal ko retao an Setan?

⁴ Ñe jej tõmak bwe Jeova ej yokwe kõj, jemaroñ jum̦ae juon iaan “jerbal ko retao” an Setan. (Eps. 6:11) Setan ej kõmaat aolepen an maroñ ñan kajjioñ kabõjrak kõj jãn ad karejar ñan Jeova. Juon iaan jerbal ko retao an Setan ej ñan kajeeded riab eo bwe Jeova ejjab yokwe kõj. Jab mel̦o̦kl̦o̦k bwe aolep iien Setan ej pukot iien ko repel̦l̦o̦k ñan an kajjioñ ko̦kkure jem̦jerã eo ad ippãn Jeova. Ekkã an kõm̦m̦ane men in ilo iien ko jej m̦õjn̦o̦—emaroñ ilo iien ko jej eddodo kõn wãween ko reppen jaar iiooni m̦oktal̦o̦k, apañ ko jej iiooni kiiõ, ak ad inepata kõn ilju im jekl̦aj. (JK. 24:10) Setan ej ãinwõt juon l̦aiõn me ej pukot juon eo em̦õjn̦o̦ im epidodo ñan an ko̦kkure. Kõn men in, ej kajjioñ ko̦kkure kõj ilo iien ko jelukkuun m̦õjn̦o̦ bwe jen ebbweer im bõjrak jãn ad karejar ñan Jeova. Bõtab el̦aññe jej wõnm̦aanl̦o̦k wõt im kal̦apl̦o̦k ad tõmak bwe Jeova ej yokwe kõj, jenaaj maroñ “jutak pen im jum̦ae” Setan im jerbal ko an retao.—1 Pit. 5:​8, 9; Jem. 4:7.

5. Etke eaorõk bwe jen kile bwe Jeova ej yokwe im kaorõk kõj?

⁵ Ñe jej tõmak bwe Jeova ej yokwe kõj, jemaroñ epaakel̦o̦k E. Etke jemaroñ ba men in? Kõnke Jeova ear kõm̦anm̦an kõj ilo juon wãween me jej aikuj an ro jet yokwe kõj im jej aikuj kwal̦o̦k yokwe ñan ro jet. Ñe juon armej ej kwal̦o̦k yokwe ñan kõj, ej piktokid ñan bar kwal̦o̦k yokwe ñane. Kõn men in, ñe el̦apl̦o̦k ad kile bwe Jeova ej yokwe im kaorõk kõj, enaaj l̦apl̦o̦k ad yokwe E. (1 Jon 4:19) Im ñe enãj l̦apl̦o̦k ad yokwe E, eñaj l̦apl̦o̦k an yokwe kõj. Baibõl̦ ej lukkuun kaalikkar ñan kõj im ba: “Kom̦win kõm̦m̦an bwe kom̦win epaake Anij, im enaaj epaake waj kom̦.” (Jem. 4:8) Innem, ewi wãween jemaroñ kal̦apl̦o̦k ad tõmak bwe Jeova ej yokwe kõj?

TA KO REMAROÑ JIPAÑ KÕJ ÑAN TÕMAK BWE JEOVA EJ YOKWE KÕJ?

6. Bwe jen tõmak bwe Jeova ej yokwe kõj, ta ko jemaroñ jar kaki?

⁶ Wõnm̦aanl̦o̦k wõt im jar ñan Jeova bwe en jipañ eok ñan mel̦el̦e unin an yokwe eok. (Luk 18:1; Rom 12:12) Kwõmaroñ aikuj jar ñane elõñ alen kajjojo raan bwe en jipañ eok ñan jel̦ã wãween an l̦õmn̦ak kõn kwe. Jet iien, emaroñ lukkuun nana am̦ l̦õmn̦ak kõn kwe make, innem men in ekõm̦m̦an bwe en pen am̦ tõmak bwe Jeova ej yokwe eok. Bõtab keememej bwe Jeova el̦apl̦o̦k jãn bũruom̦. (1 Jon 3:​19, 20) El̦apl̦o̦k an jel̦ã kõn kwe jãn kwe make, im ej loi men ko rem̦m̦an ippam̦ me kwõmaroñ jab loi. (1 Sa. 16:7; 2 Kro. 6:30) Kõn men in, jab ãliklik in ‘kwal̦o̦k bũruom̦’ im eñjake ko am̦ ñane, im kajjitõk ippãn bwe en jipañ eok ñan tõmak bwe ej yokwe eok. (Sam 62:8) Innem, jerbale jar ko am̦ ikijjeen am̦ l̦oori naanin kakapilõk kein jej pojakin etali.

7-8. Ewi wãween an bokin Sam kaalikkar ñan kõj bwe Jeova ej yokwe kõj?

⁷ Lõke men ko Jeova ej ba. Ear kõm̦akũt ro rar je Baibõl̦ bwe ren lukkuun kwal̦o̦k kõn kain Anij rot E. L̦õmn̦ak kõn wãween an ri-jeje sam eo Devid kõmel̦el̦e kõn wãween an Jeova kea kõn kõj. Ej ba: “Jeova ej epaak ñan ro erup bũrueer, im Ej lo̦mo̦o̦ren ro rettã wõt ilo aer,” ak ro rebbweer. (Sam 34:18) Ñe kwõj lukkuun bũrom̦õj, kwõmaroñ l̦õmn̦ak bwe kwõj make iaam̦. Bõtab Jeova ej kallim̦ur bwe ilo iien rot kein, ej pãd iturum̦ kõnke ej lo bwe el̦ap am̦ aikuji. Ilo bar juon jebta ilo bokin Sam, Devid ear je: “Likũt dãnnin kõmjaal̦al̦ ko aõ ilo bato eo Am̦.” (Sam 56:8) Jeova ej lo ñe kwõj bũrom̦õj im metak. El̦ap an kea kake kwe im wãween ko reppen kwõj iiooni. Ãinwõt an juon ri-itoitak ilo juon ãne jem̦aden lukkuun kaorõke dãn eo nimen ilo bato eo an, ãindeinl̦o̦k wõt an Jeova lukkuun kaorõke dãnnin kõmjaal̦al̦ ko am̦ im ej keememej aolep iien ko kwõj bũrom̦õj im jañ. Ilo Sam 139:​3, Devid ear ba ñan Jeova: “Kwõjel̦ã ial̦ ko aõ otemjej.” Meñe Jeova ej lo men otemjej kwõj kõm̦m̦ani, ak ej kalimjek wõt men ko rem̦m̦an kwõj kõm̦m̦ani. (Hib. 6:10) Etke? Kõnke ej kaorõk aolep kate ko am̦ ñan kabuñbũruon.a

⁸ Ikijjeen eoon kein im eoon ko jet rekaenõm̦m̦an ilo Baibõl̦, ej ãinwõt ñe Jeova ej ba: “Ikõn̦aan bwe kwõn jel̦ã el̦ap aõ lukkuun yokwe eok im kea kake kwe.” Bõtab ãinwõt ad kar katak kake m̦oktal̦o̦k, Setan ej kajeeded riab eo bwe Jeova ejjab yokwe kõj. Innem, el̦aññe ewõr iien en̦ kwõj pere an Jeova yokwe eok, bõjrak im kajjitõk ippam̦ make, ‘Wõn eo inaaj tõmake—eo ej “jemãn aolep ri-riab” ke ak eo ej “Anij in m̦ool”?’—Jon 8:44; Sam 31:5.

9. Ta eo Jeova ej kallim̦ur ñan ro rej yokwe E? (Exodus 20:​5, 6)

⁹ Kõl̦mãnl̦o̦kjen̦ kõn wãween an Jeova eñjake kõn ro rej yokwe E. L̦õmn̦ak kõn ta eo Jeova ear ba ñan Moses im ri-Israel ro. (Riit Exodus 20:​5, 6, UBS.) Jeova ej kallim̦ur bwe enaaj wõnm̦aanl̦o̦k wõt im kwal̦o̦k yokwe ñan ro rej yokwe E. Kõnke Jeova ej juon Anij etiljek, jemaroñ lõke bwe enaaj aolep iien kwal̦o̦k yokwe ñan ro rej yokwe E. (Dut. 7:9) Kõn men in, ñe ewõr iien ko kwõj jino bõk l̦õmn̦ak eo bwe Jeova ejjab yokwe eok, bõjrak im kajjitõk ippam̦ make, ‘Ij ke yokwe Jeova?’ Ilo bar juon wãween ba: El̦aññe kwõj yokwe Jeova im kwõj kate eok joñan wõt am̦ maroñ ñan kabuñbũruon, eokwe kwõmaroñ lõke bwe ej lukkuun yokwe eok. (Dan. 9:​4, UBS; 1 Kor. 8:3) Ak jemaroñ ba, el̦aññe kwõjjab pere yokwe eo am̦ ñan Jeova, innem etke kwõj pere yokwe eo an ñan kwe? Kwõmaroñ lukkuun lõke bwe enaaj aolep iien yokwe eok im ejjãmin el̦l̦o̦k jãn eok.

10-11. Ewi wãween Jeova ekõn̦aan bwe kwõn watõk katok in pinmuur eo? (Galetia 2:20)

¹⁰ Kõl̦mãnl̦o̦kjen̦ kõn katok in pinmuur eo. Menin letok eo em̦m̦antata Jeova ear letok ñan armej ej katok in mour eo an Jesus Christ. (Jon 3:16) Bõtab, menin letok in ej ke ñan kwe? Aet! L̦õmn̦ak kõn joñak eo an rijjilõk Paul. Keememej bwe ear kõm̦m̦ani jet jerawiwi ko rel̦l̦ap m̦okta jãn an kar erom juon Kũrjin. Ejjab men in wõt, ak ear aikuj wõnm̦aanl̦o̦k wõt im tarin̦aeik m̦õjn̦o̦ ko ippãn. (Rom 7:​24, 25; 1 Tim. 1:​12-14) Meñe ãindein, ak ear maroñ watõk katok in pinmuur eo ãinwõt juon menin lel̦o̦k jãn Jeova ñan e. (Riit Galetia 2:20.) Keememej bwe Jeova ear kõm̦akũt Paul ñan je naan kein ilo Baibõl̦. Im aolep men ko ilo Baibõl̦ kar je ñan katakin kõj. (Rom 15:4) Naan kein an Paul rej kwal̦o̦k wãween eo Jeova ekõn̦aan bwe kwõn watõk katok in pinmuur eo—ãinwõt juon menin lewaj jãn E ñan kwe. Ñe eñin wãween eo kwõj watõk katok in pinmuur eo, enaaj l̦apl̦o̦k am̦ tõmak bwe Jeova ej yokwe eok.

¹¹ El̦ap ad kam̦m̦oolol Jeova kõn an kar jilkintok Jesus ñan lal̦ in bwe en mej kõn kõj. Bõtab, un eo juon unin an kar Jesus itok ñan lal̦ in ej ñan kwal̦o̦k ñan ro jet m̦ool eo kõn Anij. (Jon 18:37) Jesus ear bareinwõt katakin kõj m̦ool eo kõn an Jeova lukkuun yokwe kõj.

WÃWEEN AN JESUS JIPAÑ KÕJ ÑAN TÕMAK BWE JEOVA EJ YOKWE KÕJ

12. Etke jemaroñ lõke aolep men ko Jesus ear ba kõn Jeova?

¹² Ke Jesus ear pãd ijin ioon lal̦, ear m̦õn̦õn̦õ in kwal̦o̦k kain Anij rot Jeova. (Luk 10:22) Jemaroñ lõke aolep men ko Jesus ear ba kõn Jeova. Unin ej kõnke Jesus ear pãd ippãn Jeova ilañ ium̦win elõñ pilien iiõ ko m̦okta jãn an kar itok ñan lal̦ in. (Kol. 1:15) Jesus ear lukkuun jel̦ã joñan an Jeova yokwe ro nejin me retiljek kõnke ear lo wãween an Jeova kwal̦o̦k yokwe ñan e, enjel̦ ro, im ri-karejar ro An ijin ioon lal̦. Ewi wãween an Jesus jipañ kõj ñan tõmak bwe Jeova ej yokwe kõj?

13. Ewi wãween Jesus ekõn̦aan bwe jen watõk Jeova?

¹³ Jesus ekõn̦aan bwe jen watõk Jeova ãinwõt e. Ilo bokin Gospel ko, elõñl̦o̦k jãn 160 alen an kar Jesus ãñinñin Jeova, “Jema.” Im ke ear kõnono ñan ri-kal̦oor ro an, ear kõjerbale naan kein “Jememi” ak “Jememiwõj ilañ.” (Matu 5:16; 6:26) M̦okta jãn an kar Jesus itok ñan lal̦ in, ri-karejar ro retiljek an Jeova rekõn ãñinñini Jeova, ‘eo Ekajoor Bõtata,’ ‘eo Eutiejtata,’ ‘ri-Kõm̦anm̦an eo El̦ap,’ im taitõl̦ ko jet ãierl̦o̦kwõt. Bõtab ekkã an kar Jesus ãñinñini Jeova, ‘Jemãdwõj.’ Men in ej kwal̦o̦k bwe Jeova ekõn̦aan bwe ri-karejar ro an ren epaake E ãinwõt an juon ajri epaake eo jemãn me el̦ap yokwe ippãn. Alikkar bwe Jesus ekõn̦aan bwe jen watõk Jeova ãinwõt e—ãinwõt juon Jemãd me el̦ap an yokwe im kaorõk ajri ro nejin. Jen kiiõ etale ruo iien ko Jesus ear kõnono kõn Jeova ãinwõt “eo Jemãd.”

14. Ewi wãween an kar Jesus kwal̦o̦k bwe el̦ap an Jemãdwõj ilañ kaorõk kõj kajjojo? (Matu 10:​29-31) (Bar lale pija eo.)

¹⁴ Kein kajuon, l̦õmn̦ak kõn naan ko an Jesus ilo Matu 10:​29-31. (Riit.) Bao sparrow ko rej bao jidikdik ko me rejjãmin yokwe Jeova ak kabuñ ñane. Meñe ãindein, ak joñan an bao kein aorõk ippãn Jemãdwõj ilañ, ejel̦ã ñe juon iaaer ej wõtlo̦k ñan lal̦. Ejjel̦o̦k pere bwe el̦apl̦o̦k an Jeova kaorõk im kea kõn kajjojo iaan ri-karejar ro an retiljek me rej karejar ñane kõnke rej yokwe E! Jesus ear bareinwõt ba bwe Jemãdwõj ilañ ejel̦ã kõn oran aolep kool̦ ko ilo bõrad. Kõnke Jeova ejel̦ã men dikdik ko kõn kõj, jemaroñ lukkuun lõke bwe el̦ap an kea kõn kõj. Alikkar bwe Jesus ekõn̦aan bwe jen tõmak bwe el̦ap an Jemãdwõj ilañ kaorõk kõj kajjojo.

15. Ta eo kwõj katak kõn Jemãdwõj ilañ jãn naan ko an Jesus ilo Jon 6:44?

¹⁵ L̦õmn̦ak kõn iien eo kein karuo Jesus ear katakin kõj kõn eo Jemãd, Jeova. (Riit Jon 6:44.) Jemãdwõj ilañ ear karuwaaktok kwe ñan m̦ool eo. Etke ear karuwaaktok eok? Kõnke ear lo kadkad ko rem̦m̦an ewõr ippam̦. (Jrb. 13:48) Naan kein an Jesus ilo Jon 6:44 remaroñ kar jitõñl̦o̦k ñan naan ko an Jeova ilo eoon eo katak in ej pedped ioon. Ilo eoon in, Jeova ear ba ñan armej ro an: “Iar ipertok [ak karuwaaktok] eok kõn yokwe eo em̦ool.” (Jrm. 31:3; keidi Hoseia 11:4.) L̦õmn̦ak kõn men in. Eo Jemãdwõj ilañ me el̦ap yokwe ippãn ej aolep iien lo kadkad ko rem̦m̦an ewõr ippam̦ meñe kwõmaroñ jab loi.

16. (1) Ta eo Jesus ej kajjioñ in ba ñan kõj kõn Jeova, im etke jemaroñ tõmake? (2) Ewi wãween kwõmaroñ kal̦apl̦o̦k am̦ tõmak bwe Jeova ej eo Jem̦am̦ me em̦m̦antata? (Lale bo̦o̦k eo etan “Eo Jemãd me Em̦m̦antata.”)

¹⁶ Ilo an Jesus ba bwe Jeova ej Jemãdwõj, ej ãinwõt ñe Jesus ej ba ñan kõj: “Jeova ejjab baj Jema wõt, ak ej bareinwõt eo Jem̦am̦. Im ikõn̦aan bwe kwõn jel̦ã bwe el̦ap an yokwe eok im elukkuun kea kake eok.” Kõn men in, el̦aññe ewõr iien ko kwõj pere bwe Jeova ej yokwe kwe, bõjrak im kajjitõk ippam̦ make, ‘Etke epen aõ tõmak naan ko an Jesus, eo me aolep iien ej kõnono m̦ool im el̦apl̦o̦k an jel̦ã kajjien Jemãdwõj ilañ jãn jabdewõt?’—1 Pit. 2:22.

WÕNM̦AANL̦O̦K WÕT IM KAL̦APL̦O̦K AM̦ TÕMAK BWE JEOVA EJ YOKWE KWE

17. Etke jej aikuj wõnm̦aanl̦o̦k wõt im kal̦apl̦o̦k ad tõmak bwe Jeova ej yokwe kõj?

¹⁷ Jej aikuj wõnm̦aanl̦o̦k wõt im kal̦apl̦o̦k ad tõmak bwe Jeova ej yokwe kõj. Ãinwõt ad kar katak kake m̦oktal̦o̦k, ri-kõjdat eo ad, Setan, ej kõmaat aolepen an maroñ ñan kajjioñ kabõjrak kõj jãn ad karejar ñan Jeova. Setan ekõn̦aan kam̦õjn̦o̦ik kõj, innem ej wõnm̦aanl̦o̦k wõt im kajjioñ kõm̦m̦an bwe jen tõmak bwe Jeova ejjab yokwe kõj. Jen jab kõtl̦o̦k bwe Setan en lo tõprak!—Job 27:5.

18. Ewi wãween kwõmaroñ kal̦apl̦o̦k am̦ tõmak bwe Jeova ej yokwe eok?

¹⁸ Bwe kwõn maroñ kal̦apl̦o̦k am̦ tõmak bwe Jeova ej yokwe eok, wõnm̦aanl̦o̦k wõt ilo am̦ jar im kajjitõk ippãn bwe en jipañ eok ñan watõk kwe make ãinwõt an watõk eok. Kõl̦mãnl̦o̦kjen̦ kõn wãween an ro rar je Baibõl̦ kwal̦o̦k kõn joñan an Jeova yokwe kõj. L̦õmn̦ak kõn wãween an Jeova eñjake kõn ro rej yokwe E; enaaj aolep iien kwal̦o̦k yokwe ñan ro rej yokwe E. Kõl̦mãnl̦o̦kjen̦ kõn unin am̦ maroñ watõk katok in pinmuur eo ãinwõt juon menin lewaj ñan kwe. Lõke an kar Jesus ba bwe Jeova ej eo Jem̦am̦ ilañ. Innem ñe juon en kar kajjitõk ippam̦: “Kwõj ke lukkuun tõmak bwe Jeova ej yokwe kwe?” kwõnaaj uwaak ilo peran: “Aet, Jeova ej yokwe ña! Im ij kate eõ joñan wõt aõ maroñ kajjojo raan ñan kwal̦o̦k bwe ij yokwe E!”