Juõn Letter Jen Governing Body Eo

Yokwe Ro Jeid im Jatid Maan im Kõrã:

“JOIJ ñõn kom im ainemõn jen Anij Jemer im Iroij Jisõs Kraist.” (1 Kor. 1:3) Elap ad kijororetok ien eo ñe men otemjej ewõr air menono renaj lelok ñan Jehovah nebar eo ej tellokin bõke! (Sam 150:6) Ke jej kõttar tok ran in elap, jej wõnmanlok im keañ kake news eo emõn kin Ailiñ eo an Anij im kõmman ri kalor ro.

Jerbal in evanjel ej men eo jej lemnak kake kiõ ian jerbal ko an Jehovah ion lal. (Mark 13:10) Kin ad jelã bwe Jehovah ej itoklimo kin jerbal in, jej jar bwe en jibañ kij ñan kajejjet jerbal in, ilo ad kile bwe kajjojo armij ewõr ien emõn ibbeir ñan air bõk tokjen jen karõk in binmour eo. (Rev. 14:6, 7, 14, 15) Emol, jej iion wãwen ko rebin, ak elap ad kamolol bwe “kajur jen lõñ ej imwe [kij]” ñan kõtõbrak jerbal in!​—Luk 24:49.

Ej kajuburu ñan etale yiõ in jerbal eo lok im lemnak kin ta eo Jehovah ear kõtõbrake ikijen ri karejar ro an retiljek. Ilo air bõk kajur jen jitõb kwojarjar, armij ro an Anij rar kwalok yokwe an Christ, im anjo ion kijirãte don eo ej jededlok ibelakin lal. Yokwe rot in ear alikar ilo convention ko ad. Jen June ñan December 2003, delegate ro jen elõñlok jen jibuki ailiñ ko rar ito-itak ñan 32 international convention ko ilo jiljino ailiñ ko relap. Rar interview missionary ro, international servant ro, im ri jerbal ro ilo Bethel ilo ailiñ ko jet ilo district im international convention ko.

Jibañ eo an Anij im joij eo an armij rar kõmman bwe ren maroñ kalek elõñ Kingdom Hall ko, elaptata ilo ailiñ ko rejeramel. Kin aikwij eo ej laplok wõt ibelakin lal kin ekan ko lor jitõb, jerbal in kalaplok ra ko rej walok ilo elõñ ailiñ ko. Brochure eo Mõnõnõ Kin Mour In Drio ion Lõl! ej walok kiõ ilo 299 kajin ko, im oran eo rar kõmmane kar 139 million copy ko; Jelãlokjen Eo Ej Tellok ñan Mour Indio ear elle jen 93 million copy ko ilo 161 kajin ko; im elõñlok jen 200 million copy ko kin brochure eo Ta Eo Anij Ekõnan bwe Jen Kõmmõne? kar kõmmane ilo 267 kajin ko.

Kimij lewõj nan in karuwainene eo emãnãn ñan 258,845 ro rar kakõlleik wujleplok eo air ilo air baptais ilo den ilo yiõ in jerbal eo lok! Meñe komij kein kõjjeroro eo elaptata an kijirãt eo an Satan kin ami jurake Ailiñ eo an Anij, ear bareinwõt kõmmane bwe komin ro elaptata air bõk kajerammõn im kejbãrok ilo jitõb eo an Jehovah ke komij ettõr ilo iaikwij eo ej bed imami. (Hib. 12:1, 2; Rev. 12:17) Aet, kwon jelã bwe “Eo ej kejbãrok yuk E jamin kiki.”​—Sam 121:3.

Unin tel ilo yiõ in 2004, “Komin ekil . . . Komin bareinwõt pojõk,” elap an jejjet. (Mat. 24:42, 44) Nan eo an Anij ej kwalok kin Ri Christian ro einwõt ri ito-itak ro ilo jukjuk im bed in ej mijlok. (1 Pit. 2:11; 4:7) Kin men in, jej aikwij lemnak wõt kin men ko lor jitõb, kõmmane bwe en lamwan wãwen mour eo ad, im ñan lukkun etale buruõd. “Drakon eo elap” ekõnan kañ kij, im bõk kij ñan loan jukjuk im bed eo an.​—Rev. 12:9.

Men eo eaorõk ñan kejbãrok ad ekkõl ej ñan read Bible ran otemjej. Emaroñ jibañ kij ñan kõmman bwe ‘ad Aet en Aet wõt’ ikijen ad kajejjet kitien wujleplok eo ad im ñan “debij wõt aruij liki ñõn jemlokõn einwõt ilo jinoin.” (Jem. 5:12; Hib. 3:14) Read Bible aolep ran emaroñ jibañ kij ñan kememej ewi joñan an lal in ilok jen kien ko an Anij me rejjab oktak. (Mal. 3:6, NW; 2 Tim. 3:1, 13) Jelãlokjen eo jen Bible emaroñ jibañ kij ñan bõprae “bwebwenato wan ko an dri kabel” im ñan kejbãrok ad tiljek ñan Jehovah.​—2 Pit. 1:16; 3:11.

Ro jemen im jinen, ke komij kakajiririk ro nejimi ilo kaje im kauwe an Jehovah, komij jibañ ir ke ñan likit mejenkajjik ko ilo jitõb im ñan air “ekil”? (Ep. 6:4) Komij kamineneik ir ke ñan lemnak kin ilju im jeklaj eo air einwõt an kar armij eo elaptata eo ear mour ion lal lemnak kin ilju im jeklaj eo an? Jesus emaroñ kar carpenter, ri kõmman men in ellolo ko, ak doctor eo elaptata ear mour, ak jen an eindein ear jibadõk jerbal in kwalok nan full-time. Kimij kejatdikdik bwe joñok eo an enaj kamakit yuk ñan jibañ ro nejimi ñan likit bwe men ko an Ailiñ eo en moktata ilo air mour.

Class in ri karejar eo etiljek, eo ej jutak ikijen Governing Body eo, eobrak kin kamolol jen buru ñan “jar eo elap” kin air jibañ kim ñan kajejjet eddo eo am ñan ‘kwalok kin news eo emõn kin Ailiñ eo iaolepen lal kin men in kennan ñan ailiñ otemjelok.’ (Rev. 7:9; Mat. 24:14, 45) Kom ro jitenburu ewõr ibbemi kein kamol bwe Jehovah ej kememej “jerbal im yokwe, eo kom ar kwalok kin etan, kin ami jibõñ ro remõn mokta im kiõ.” (Hib. 6:10) Ke komij readi experience ko rekairujruj im lo tokjen ko jen jibadbad ko ami reburukuk ilo peij ko ilo 2004 Yearbook of Jehovah’s Witnesses, komin jelã bwe ear wõr kunami ilo kennan in ibelakin lal.

Komin jelmaik ilju im jeklaj kin beran ke komij wõnmanlok im ‘lemnok kin jinekjij eo,’ im jab kõtlok bwe jabdewõt armij ak demon en bõke jen kom. (Hib. 11:26; Kol. 2:18) Aet, komin liki Jehovah, im jelã bwe enaj jibañ aolep ro rej yokwe e ñan bõk mour indio.​—Jon 6:48-54.

Kimij mõnõnõ in jerbal ibbemi ñan aibujuij eo an Jehovah.

Ro jeim im jatim,

Governing Body eo an Ri Kennan ro an Jehovah