Watchtower ONLINE L̦ÃIBRÃRE
Watchtower
ONLINE L̦ÃIBRÃRE
Kajin M̦ajel̦
O̦
  • N̦
  • n̦
  • M̦
  • m̦
  • L̦
  • l̦
  • O̦
  • o̦
  • BAIBÕL̦
  • BOK IM KEIN KATAK
  • KWEILO̦K KO
  • w23 Nobõm̦ba p. 2-7
  • Wãween an Jeova Kam̦ool bwe Enaaj Kajejjet Kallim̦ur eo An kõn Pedetaij

Ejjañin wõr pija in ilo tõre in.

Jol̦o̦k bõd, ewõr juon problem ej kõm̦m̦an an jab jo̦ pija in.

  • Wãween an Jeova Kam̦ool bwe Enaaj Kajejjet Kallim̦ur eo An kõn Pedetaij
  • Naan in Keeañ Kõn Aelõñ eo an Jeova (Kein Katak)—2023
  • Unin Tõl Jidikdik Ko
  • Katak ko Jet
  • TA EO JEOVA EAR KALLIM̦UR KAKE?
  • JEOVA EJ KAALIKKAR ÑAN KÕJ BWE KALLIM̦UR EO AN ENAAJ JEJJET IM M̦OOL
  • “ROÑJAKE! IJ KÕM̦M̦AN MEN OTEMJEJ BWE REN KÃÃL”
  • “NAAN KEIN REM̦OOL IM ARMEJ REMAROÑ LÕKI. . . . EM̦ÕJ AN NAAN KEIN JEJJET!”
  • “ÑA ALPHA IM OMEGA”
  • WÃWEEN AD KAL̦APL̦O̦K AD LÕKE KALLIM̦UR EO AN JEOVA KÕN PEDETAIJ
  • Ta Ankilaan Anij kõn Lal̦ in?
    Ta eo Baibõl̦ Ej Lukkuun Katakin Kõj?
  • “Lo Kom̦ ilo Pedetaij!”
    Naan in Keeañ Kõn Aelõñ eo an Jeova (Kein Katak)—2018
  • Karõk eo an Jeova Enaaj Jejjet Kũtien!
    Naan in Keeañ Kõn Aelõñ eo an Jeova (Kein Katak)—2017
  • Ta Karõk eo an Anij kin Lõl in?
    Ta Eo Anij Ekonan Bwe Jen Kõmmõne?
Naan in Keeañ Kõn Aelõñ eo an Jeova (Kein Katak)—2023
w23 Nobõm̦ba p. 2-7

KATAK 46

Wãween an Jeova Kam̦ool bwe Enaaj Kajejjet Kallim̦ur eo An kõn Pedetaij

“Eo ej make kõjeraam̦m̦an e ilo lal̦, [Anij in m̦ool, NW] enaaj kõjeraam̦m̦an e.”—AIS. 65:16.

AL 3 Kwõj Kaperan im Kõkajoor Kõm

KÕMEL̦EL̦E EO ÑAN KATAK INa

1. Ta kar ennaan eo an ri-kanaan Aiseia ñan ri-Israel ro m̦õttan?

RI-KANAAN Aiseia ear ba bwe Jeova ej “Anij in m̦ool.” Naan eo me kar ukote ñan “m̦ool” ej mel̦el̦ein “amen.” (Ais. 65:16) “Amen” ej mel̦el̦ein “en ãindein,” ak “em̦ool.” Ñe Baibõl̦ eo ej kõjerbale naan eo “amen” im ej kõnono kõn Jeova im Jesus, ej lukkuun kaalikkar bwe ej juon men em̦ool. Innem, ennaan eo an Aiseia ñan ri-Israel ro m̦õttan ear alikkar: Jemaroñ lõke aolep kanaan ko an Jeova. Jeova ear kam̦oole men in ilo an kar kajejjete aolep kallim̦ur ko an.

2. Etke jemaroñ lõke kallim̦ur ko an Jeova ikijjeen ilju im jekl̦aj eo ad, im ta kajjitõk ko jenaaj etali?

2 Jemaroñ ke lõke bwe kallim̦ur ko an Jeova kõn ilju im jekl̦aj eo ad renaaj bareinwõt jejjet kũtieer? Enañin 800 iiõ ko ãlikin tõre ko an Aiseia, rijjilõk Paul ear kõmel̦el̦e etke kallim̦ur ko an Anij rej aolep iien jejjet im m̦ool. Paul ear ba: “Anij eban riab.” (Hib. 6:18) Ãinwõt an dãn aebõj im dãn jo̦o̦l̦ jab maroñ to̦o̦rtok jãn juon wõt unin dãn, ãindeinl̦o̦k wõt Jeova, eo ej Wũnjãn m̦ool, ejjab maroñ riab. Eñin unin jemaroñ lukkuun lõke aolep men ko Jeova ej ba, ekoba aolep kallim̦ur ko an kõn ilju im jekl̦aj eo ad. Ilo katak in, jenaaj etali kajjitõk kein: Ta eo Jeova ear kallim̦ur bwe enaaj letok ñan kõj ilju im jekl̦aj? Im ewi wãween an kar Jeova kaalikkar ñan kõj bwe enaaj kajejjete kallim̦ur eo an?

TA EO JEOVA EAR KALLIM̦UR KAKE?

3. (1) Kallim̦ur ta eo armej ro an Anij rej kaorõke? (Revelesõn 21:​3, 4) (2) Ta eo jet remaroñ ba ñe jej kwal̦o̦k kallim̦ur in ñan er?

3 Kallim̦ur in me jenaaj etale ej juon kallim̦ur me eaorõk ippãn aolep armej ro an Anij ipel̦aakin lal̦ in. (Riit Revelesõn 21:​3, 4.) Jeova ej kallim̦ur bwe enaaj wõr juon iien me “enaaj ejjel̦o̦k bar mej, bũrom̦õj, lim̦õ im eñtaan.” Elõñ iaad jej kõjerbali eoon kein ñe jej kwal̦o̦k naan ñan armej ro ñan kaenõm̦m̦an er im kwal̦o̦k ñan er kõn naaj ewi wãween mour ilo Pedetaij. Ta eo jet remaroñ ba ñe jej kwal̦o̦k kallim̦ur in ñan er? Remaroñ ba, “Ãinwõt epen aõ tõmake men in.”

4. (1) Ta ko Jeova ear jel̦ã bwe renaaj wal̦o̦k ilo raan kein? (2) Ijello̦kun an baj kwal̦o̦k wõt kallim̦ur eo an, ta men eo juon Jeova ear kõm̦m̦ane?

4 Ke Jeova ear kõm̦akũt rijjilõk Jon ñan jeiki kallim̦ur in kõn Pedetaij eo, Ear jel̦ã bwe kõj ilo raan kein jenaaj kwal̦o̦k kõn kõjatdikdik in ñe jej kwal̦o̦k naan ñan ro jet kõn ennaan eo kõn Aelõñ eo. Jeova ear bar jel̦ã bwe enaaj pen an elõñ iaan armej ro tõmake kallim̦ur in me ej kwal̦o̦k kõn “men ko rekããl.” (Ais. 42:9; 60:2; 2 Kor. 4:​3, 4) Innem ewi wãween jemaroñ kam̦ool ñan ro jet—ekoba kõj make—bwe jeraam̦m̦an ko me Revelesõn 21:​3, 4 ej kwal̦o̦k kaki, renaaj jejjet im m̦ool? Jeova ear jab baj kwal̦o̦k wõt kallim̦ur in ñan kõj, ak ear bareinwõt letok un ko unin jemaroñ lõke kallim̦ur in. Ta un kein?

JEOVA EJ KAALIKKAR ÑAN KÕJ BWE KALLIM̦UR EO AN ENAAJ JEJJET IM M̦OOL

5. Ta un ko unin jemaroñ lõke kallim̦ur eo an Anij kõn Pedetaij, im ia eo jemaroñ loi?

5 Jej lo un ko unin jemaroñ lõke kallim̦ur eo an Jeova kõn Pedetaij ilo eoon ko rej wal̦o̦k tokãlik. Eoon kein rej ba: “Eo ej jijet ioon tũroon eo ej ba: ‘Roñjake! Ij kõm̦m̦an men otemjej bwe ren kããl.’ Im ej bar ba: ‘Kwõn je men in, kõnke naan kein rem̦ool im armej remaroñ lõki.’ Im ear ba ñan ña: ‘Em̦õj an naan kein jejjet! Ña Alpha im Omega, jinoin im jem̦l̦o̦kin.’”—Rev. 21:​5, 6a.

6. Etke naan ko ilo Revelesõn 21:​5, 6 rej kal̦apl̦o̦k ad lõke kallim̦ur eo an Anij?

6 Etke eoon kein rej kal̦apl̦o̦k ad lõke kallim̦ur eo an Anij? Bok eo etan Revelation Climax ej kõmel̦el̦eiki eoon kein im ba: “Ej ãinwõt ñe Jeova ej jaini juon peba ñan kam̦ool bwe enaaj kajejjeti kallim̦ur ko an ilju im jekl̦aj.”b Kallim̦ur eo an Anij ej pãd ilo Revelesõn 21:​3, 4. Innem ilo eoon 5 im 6, ej ãinwõt ñe Jeova ej jaini etan ilo kõkkar ñan kam̦ool bwe enaaj kajejjete kallim̦ur eo an. Jen lale ewi wãween an Jeova kaalikkar ñan kõj bwe jemaroñ lõke E.

7. Wõn eo ej jino kõnono ilo eoon 5, im etke men in ej juon men ejejuwaan?

7 Naanin ijjino ko ilo eoon 5 ej ba: “Eo ej jijet ioon tũroon eo ej ba.” (Rev. 21:5a) Naan kein rejejuwaan kõnke eñin ej juon iaan iien ko jilu me Jeova ej make kõnono ilo bokin Revelesõn. Naan kein rar jab itok jãn juon enjel̦ ekajoor, ear jab itok jãn Jesus, bõtab Jeova make ear ba naan kein! Men in ej kam̦ool bwe jemaroñ lukkuun lõke men ko ej ba tokãlik. Etke? Kõnke Jeova “eban riab.” (Tai. 1:2) Kõn men in, jemaroñ lukkuun lõke bwe naan ko ilo Revelesõn 21:​5, 6, renaaj jejjet kũtieer.

“ROÑJAKE! IJ KÕM̦M̦AN MEN OTEMJEJ BWE REN KÃÃL”

8. Ta eo Jeova ej ba ñan lukkuun kaalikkar bwe enaaj jejjet kũtien kallim̦ur eo an? (Aiseia 46:10)

8 Kiiõ, jen etale naan eo “Roñjake!” (Rev. 21:5) Naanin Grik eo me em̦õj ukote ñan “roñjake!” ekkã an wal̦o̦k ilo bokin Revelesõn. Juon bokin kõmel̦el̦e ej ba bwe kar kõjerbale naan in ñan “ba ñan eo ej riit bwe en lukkuun lale naan ko tokãlik.” Kar ta naan kein? Anij ej ba: “Ij kõm̦m̦an men otemjej bwe ren kããl.” Em̦ool bwe Jeova ej kõnono kõn oktak ko renaaj wal̦o̦k ilju im jekl̦aj, bõtab ippãn, joñan an jel̦ã bwe enaaj jejjet kũtien kallim̦ur in, ej kõnono kake ãinwõt ñe em̦õj an jino jejjet kũtien.—Riit Aiseia 46:10.

9. (1) Naan kein “kõm̦m̦an men otemjej bwe ren kããl” rej jitõñl̦o̦k ñan men ko ruo me Jeova enaaj kõm̦m̦ani. Ta kein? (2) Ta eo enaaj wal̦o̦k ñan “lañ” im “lal̦” eo kiiõ?

9 Jen etale naan ko jet ilo Revelesõn 21:5: “Kõm̦m̦an men otemjej bwe ren kããl.” Ilo jebta in, naan kein rej jitõñl̦o̦k ñan men ko ruo me Jeova enaaj kõm̦m̦ani—ko̦kkure im kõkããl. M̦oktata, ta eo Jeova enaaj ko̦kkure? Ilo Revelesõn 21:​1, ej ba: “Lañ eo m̦okta im lal̦ eo m̦okta rar jako.” “Lañ eo m̦okta” ej jitõñl̦o̦k ñan kien ko an lal̦ me Setan im enjel̦ ro an renana rej kõjbwebweiki. (Matu 4:​8, 9; 1 Jon 5:19) Ilo Baibõl̦ eo, “lal̦” emaroñ jitõñl̦o̦k ñan armej ro ilo lal̦ in. (Jen. 11:1; Sam 96:1) Kõn men in, “lal̦ eo m̦okta” ej jitõñl̦o̦k ñan armej ro renana ilo raan kein. Jeova eban baj kakõm̦anm̦ane “lañ” im “lal̦” eo kiiõ; bõtab, enaaj lukkuun ko̦kkuri. Enaaj ko̦kkure lañ im lal̦ eo kiiõ, im enaaj kõm̦m̦an bwe en wõr “juon lañ ekããl im juon lal̦ ekããl”—mel̦el̦ein, juon kien ekããl me enaaj irooj ioon armej ro rewãnõk.  

10. Ta ko Jeova enaaj kõm̦m̦an bwe ren kããl?

10 Ilo Revelesõn 21:​5, jej riit kõn ta eo Jeova ej ba bwe enaaj kõm̦m̦ane. L̦õmn̦ak kõn men in, Jeova ear jab ba: “Ij kõm̦m̦an men ko rekããl.” Ijoke, ear ba: ‘Ij kõm̦m̦an bwe ren kããl.’ Jeova enaaj kõm̦m̦an bwe lal̦ in im armej ro ren bar kããl ikijjeen an kõm̦m̦an bwe ren weeppãn. Ãinwõt an kar Aiseia kanaan kake, aolepen lal̦ in enaaj juon jikin eaiboojoj ãinwõt kar jikin kallibin Iden. Enaaj bareinwõt kõm̦m̦an bwe jen kããl ikijjeen an kãjmour kõj kajjojo. Naaj kãjmour ro rejaje etetal, ro repilo, im ro rejarroñroñ, im joñan ro remej renaaj bar mour.—Ais. 25:8; 35:​1-7.

“NAAN KEIN REM̦OOL IM ARMEJ REMAROÑ LÕKI. . . . EM̦ÕJ AN NAAN KEIN JEJJET!”

11. Ta eo Jeova ear ba bwe Jon en kõm̦m̦ane, im ta unin An kar ba men in?

11 Ta men eo juon Anij ear ba ñan kaalikkar bwe jemaroñ lõke? Jeova ear ba ñan Jon: “Kwõn je men in, kõnke naan kein rem̦ool im armej remaroñ lõki.” (Rev. 21:5) Jeova ear jab baj ba ñan Jon bwe en “je” naan kein, ak ear bar lel̦o̦k unin an jeiki. Ear ba: “Naan kein rem̦ool im armej remaroñ lõki”—mel̦el̦ein bwe naan ko an Anij rejim̦we im m̦ool. El̦ap ad kam̦m̦oolol bwe Jon ear pokake Jeova im “je” naan kein. Tokjãn men in, jemaroñ riit kõn kallim̦ur eo an Anij kõn Pedetaij im kõl̦mãnl̦o̦kjen̦ kõn jeraam̦m̦an ko renaaj wal̦o̦k ilju im jekl̦aj.

12. Etke ekkar bwe Jeova en ba: “Em̦õj an naan kein jejjet!”

12 Ta eo Anij ej ba tokãlik? Ej ba: “Em̦õj an naan kein jejjet!” (Rev. 21:6) Ilo ijin, Jeova ej kõnono ãinwõt ñe em̦õj an kajejjet aolep men ko ear kallim̦ur kaki kõn Pedetaij. Im emaroñ kõnono ilo wãween in kõnke ejjel̦o̦k men en̦ emaroñ kabõjrake jãn an kajejjet karõk ko an. Ewõr bar juon men Jeova ej ba ñan kaalikkar ñan kõj bwe kallim̦ur eo an enaaj jejjet kũtien. Ta in?

“ÑA ALPHA IM OMEGA”

13. Etke Jeova ear ba naan kein: “Ña Alpha im Omega”?

13 Ãinwõt kar kõnono kake m̦oktal̦o̦k, jilu kõttan an Jeova kõnono ilo pijen ko an Jon. (Rev. 1:8; 21:​5, 6; 22:13) Ilo kajjojo iien kein, Jeova ear ba naan kein: “Ña Alpha im Omega.” Lõta eo alpha ej lõta eo jinointata ilo alphabet eo an kajin Grik, im lõta eo omega ej lõta eo ãliktata. Ilo an Jeova ba bwe E “Alpha im Omega,” ej kwal̦o̦k bwe ñe ej jino juon men enaaj wõnm̦aanl̦o̦k kake m̦ae iien ejejjet.

Pija ko: An jejjet kũtien karõk ko an Jeova. 1. “Alpha.” Adam im Iv ilo jikin kallibin Iden. 2. Jet waanjoñak ko kõn men ko renana rar wal̦o̦k itok jãn aer jum̦ae: Setan ãinwõt juon enjel̦ enana, Adam im Iv ke erro ej lel̦l̦ap im l̦al̦l̦ap, m̦weo eutiej ilo Bebel, libõn ri-mej ro, rũttarin̦ae ro, taañko ko, bal̦uun in tarin̦ae ko, an ettoon mejatoto jãn factory ko, im armej ro rej kwal̦o̦k aer jum̦ae kien. Ijo turãjet, pija ko jet rej kwal̦o̦k an wõnm̦aanl̦o̦k wõt karõk ko an Jeova bwe ren jejjet kũtieer: Jesus ej toto ioon al̦al̦ in eñtaan eo, im pija in ej jitõñl̦o̦k ñan karõk eo kõn katõk in mour eo an Jesus; im ri-karejar ro an Jeova jãn iien ko etto im raan kein, im pija in ej jitõñl̦o̦k ñan ro ineen Adam im Iv me rewãnõk. 3. “Omega.” Armej ro rej jerbal ippãn doon ilo Pedetaij im relukkuun m̦õn̦õn̦õ.

Ñe Jeova ej jino juon men, enaaj wõnm̦aanl̦o̦k kake m̦ae iien ejejjet (Lale pãrokõrããp 14, 17)

14. (1) Kwal̦o̦k waanjoñak kõn iien ko me ej ãinwõt ñe Jeova ej ba “Alpha” im “Omega.” (2) Naan ko ilo Jenesis 2:​1-3 rej kaalikkar ta ñan kõj?

14 Ãlikin an kar Jeova kõm̦anm̦an Adam im Iv, Ear kwal̦o̦k kõn karõk eo An jãn jinoin ñan armej ro im lal̦ in. Baibõl̦ ej ba: “Anij ear kõjeraam̦m̦an er, im Anij ear ba ñan er, ‘Kom̦win timmon im orl̦o̦k, im koobrak lal̦, im kajoor jãne.’” (Jen. 1:28) Ke Jeova ear kwal̦o̦k karõk in an, ear ãinwõt ñe ej ba “Alpha.” Enaaj wõr juon iien me ro ineen Adam im Iv me reweeppãn im rej pokake renaaj koobrak lal̦ in im ukote ñan juon pedetaij. Ñe enaaj jejjet karõk in an, enaaj ãinwõt ñe ej ba “Omega.” Ãlikin an kar kadedeikl̦o̦k “lañ im lal̦ im men otemjej ie,” ear ba juon men ñan kwal̦o̦k bwe enaaj kajejjet kũtien karõk eo an. Jej lo ta eo ear ba ilo Jenesis 2:​1-3, UBS. (Riit.) Jeova ear ba bwe raan eo kein kajimjuon, eokkwõjarjar. Men in ej kwal̦o̦k bwe enaaj jejjet kũtien karõk eo an ñan armej ro im lal̦ in ilo jem̦l̦o̦kin raan eo kein kajimjuon.

15. Etke emaroñ kar ãinwõt ñe Setan ear ko̦kkure karõk eo an Anij ñan armej ro?

15 Ãlikin an kar Adam im Iv jum̦ae, rar erom rijjerawiwi im ro ineer rar jolõt jerawiwi im mej jãn erro. (Rom 5:12) Kõn men in, emaroñ ãinwõt ñe Setan ear ko̦kkure karõk eo an Anij ñan koobrak lal̦ in kõn armej ro reweeppãn im rej pokake E. Ej ãinwõt ñe Setan ear kõm̦m̦an bwe Jeova en jab maroñ ba “Omega.” Setan emaroñ kar l̦õmn̦ak bwe Jeova ejjab maroñ kajejjete kallim̦ur eo An. Emaroñ kar l̦õmn̦ak bwe Anij enaaj kar m̦an Adam im Iv im bar kõm̦anm̦an ruo rippãlele me reweeppãn ñan kajejjete karõk eo an ñan armej ro. El̦aññe Anij en kar kõm̦m̦ane men in, Tepil̦ eo emaroñ kar ba bwe Jeova ej juon ri-riab. Etke? Kõnke ãinwõt an Jenesis 1:28 ba, Jeova ear ba ñan Adam im Iv bwe ro ineer renaaj koobrak lal̦ in.

16. Etke Setan emaroñ kar l̦õmn̦ak bwe emaroñ ba bwe Jeova ear likjab in kajejjete karõk eo An?

16 Ta men eo juon Setan emaroñ kar l̦õmn̦ak bwe Anij enaaj kar kõm̦m̦ane? Bõlen Setan emaroñ kar l̦õmn̦ak bwe Jeova enaaj kõtl̦o̦k an Adam im Iv neji, bõtab rein nejier reban weeppãn. (Ekl. 7:20; Rom 3:23) Im el̦aññe ajri ro nejin Adam im Iv rejjab maroñ weeppãn, Tepil̦ eo emaroñ kar ba bwe Jeova ear likjab in kajejjete karõk eo An. Innem lal̦ in eban obrak kõn armej ro reweeppãn.

17. Ewi wãween an kar Jeova em̦m̦akũt ke Setan im armej ro ruo jinoin rar jum̦ae, im ta eo enaaj wal̦o̦k ilo jem̦l̦o̦kin? (Bar lale pija eo.)

17 Wãween an kar Jeova em̦m̦akũt ke Setan im armej ro ruo jinoin rar jum̦ae, emaroñ kar kõm̦m̦an an Setan l̦o̦kjenaan. (Sam 92:5) Ilo an Jeova kõtl̦o̦k bwe Adam im Iv ren neji, men in ear kam̦ool bwe ejjab juon ri-riab ak ej juon eo me ej kwal̦o̦k m̦ool. Im Jeova ear kwal̦o̦k bwe ñe ej ba bwe enaaj kõm̦m̦ane juon men, ejjel̦o̦k men en̦ emaroñ kabõjrake. Ear wõnm̦aanl̦o̦k kake karõk eo an ikijjeen an kar letok juon eo me enaaj lo̦mo̦o̦rene ro ineen Adam im Iv me rej pokake Jeova. (Jen. 3:15; 22:18) Setan emaroñ kar lukkuun ilbõk kõn karõk eo an Jeova kõn katõk in mour eo an Jesus! Etke? Kõnke ej juon karõk me ej pedped ioon yokwe eo em̦ool. (Matu 20:28; Jon 3:16) Ejjel̦o̦k kadkad in ippãn Setan kõnke ej juon eo me el̦ap wõt an l̦õmn̦ak kõn e make. Ta eo enaaj wal̦o̦k kõn wõt katõk in mour eo an Jesus? Ilo jem̦l̦o̦kin Juon To̦ujin Iiõ ko in an Christ Irooj, ro ineen Adam im Iv me reweeppãn im rar pokake renaaj jokwe ilo Pedetaij eo ijin ioon lal̦—ãinwõt an kar Jeova karõke jãn jinoin. Ilo naaj tõre in, enaaj ãinwõt ñe Jeova ej ba, “Omega.”

WÃWEEN AD KAL̦APL̦O̦K AD LÕKE KALLIM̦UR EO AN JEOVA KÕN PEDETAIJ

18. Ta men ko jilu rej kaalikkar bwe Anij enaaj kajejjet kallim̦ur eo an? (Bar lale bo̦o̦k eo etan “Jilu Un ko Unin Ad Maroñ Lõke Kallim̦ur eo an Jeova.”)

18 Ekkar ñan men ko jaar etali, ta ko jemaroñ kwal̦o̦k ñan ro me rej pere bwe enaaj jejjet kũtien kallim̦ur eo an Anij kõn Pedetaij? Kein kajuon, Jeova make ear kwal̦o̦k kallim̦ur in. Bokin Revelesõn ej ba: “Eo ej jijet ioon tũroon eo ej ba: ‘Roñjake! Ij kõm̦m̦an men otemjej bwe ren kããl.’” Ewõr an mãlõtlõt, kajoor, im kõn̦aan ñan kajejjete kallim̦ur in an. Kein karuo, joñan an Jeova jel̦ã bwe enaaj jejjet kũtien kallim̦ur eo an, ej ãinwõt ñe em̦õj an jejjet kũtien. Eñin unin ekkar bwe en ba: “Naan kein rem̦ool im armej remaroñ lõki. . . . Em̦õj an naan kein jejjet!” Kein kajilu, ñe Jeova ej jino juon men enaaj wõnm̦aanl̦o̦k kake m̦ae iien ejejjet, ãinwõt ad lo ilo naan ko an: “Ña Alpha im Omega.” Jeova enaaj kam̦ool bwe Setan ej juon ri-riab me ejjab maroñ kabõjrake jãn An kajejjete karõk ko An.

Jilu Un ko Unin Ad Maroñ Lõke Kallim̦ur eo an Jeova

Juon tũroon ej lukkuun meramtok, im meram eo ej jutak kõn Jeova.
  • “Eo ej jijet ioon tũroon eo ej ba: ‘Roñjake! Ij kõm̦m̦an men otemjej bwe ren kããl.’”—Rev. 21:5

Rijjilõk Jon ej jeje ioon juon peba.
  • “Im ej bar ba: ‘Kwõn je men in, kõnke naan kein rem̦ool im armej remaroñ lõki. . . . Em̦õj an naan kein jejjet!’”—Rev. 21:​5, 6

Alpha im omega, ruo iaan alphabet ko an kajin Grik.
  • “Ña Alpha im Omega.” —Rev. 21:6

19. Ñe armej rej pere kallim̦ur eo an Anij kõn Pedetaij, ta eo kwõmaroñ kõm̦m̦ane?

19 Keememej bwe kajjojo iien kwõj kwal̦o̦k naan kõn men ko Jeova ear ba ñan kaalikkar bwe enaaj kajejjet kallim̦ur eo an, kwõj kal̦apl̦o̦k am̦ lõke kallim̦ur ko an Jeova. Innem ñe kwõnaaj riiti kallim̦ur eo kõn Pedetaij me Revelesõn 21:4 ej kõnono kake im juon ej ba, “Ãinwõt epen aõ tõmake men in,” ta eo kwõmaroñ kõm̦m̦ane? Kwõmaroñ riit im kõmel̦el̦eik l̦o̦k eoon 5 im 6 ñane. Kwal̦o̦k ewi wãween an kar Jeova kapene kallim̦ur eo an ikijjeen an kar jaini ilo kõkkar.—Ais. 65:16.

ENAAJ KAR TA UWAAK EO AM̦?

  • Etke jej bõk kaenõm̦m̦an jãn ad jel̦ã bwe Jeova make ear kallim̦ur bwe enaaj bõktok Pedetaij?

  • Ta ko Anij ear ba ñan kaalikkar ñan kõj bwe enaaj kajejjet kũtien kallim̦ur eo an?

  • Ewi wãween jemaroñ kal̦apl̦o̦k ad lõke kallim̦ur eo an Anij?

AL 145 Kallim̦ur eo an Anij kõn Pedetaij

a Katak in enaaj kõnono kõn wãween an Jeova kam̦ool ñan kõj bwe enaaj kajejjet kũtien kallim̦ur eo an kõn Pedetaij. Kajjojo iien jej kwal̦o̦k kõn kallim̦ur in ñan ro jet, men in ej kõm̦m̦an bwe en l̦apl̦o̦k ad lõke kallim̦ur ko an Jeova.

b Lale bok eo etan Revelation—Its Grand Climax At Hand! pp. 303-304, pars. 8-9.

    Bok im Kein Katak ilo Kajin M̦ajel̦ (1983-2026)
    Log Out
    Log In
    • Kajin M̦ajel̦
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Kilen Kõjerbale
    • Privacy Policy
    • Privacy Settings
    • JW.ORG
    • Log In
    Share