Kwoj ke Kememej?
Ewõr ke am kamolol kin am maroñ readi magazine in Imõniaroñroñ ko me kwar bõk iumin jejjo wõt alliñ ko rej kab motlok? Eokwe, joij im lale elañe kwomaroñ uaki kajitõk kein tok ilal:
• Ñããt eo ri jedjed iju ro rar lolok Jesus?
Juõn ukok in Bible eo ej uak: “Ri Kanbil ro rar jab lolok Jesus ilo manger eo (nien mõñã an menin mour ko) ilo boñin eo ear lotak, jab einwõt kar ri lale sheep ro bwe rar lolok e ijo. Rar itok jet alliñ ko tokelik.” Ilo ien eo Jesus ear juõn “ajiri” im ear jokwe ilo juõn em. (Mat. 2:7-11) Elañe ri lolok rein rar lelok gold im menin lelok ko raorõk ilo boñin eo ear lotak, Mary enaj kar lelok ke ruo wõt bao ko ilo temple eo 40 ran ko tokelik?—January-March, page 31.
• Ta eo elõñ armij remaroñ kõmmane ñan kakõmõnmõnlok mour eo air?
Juõn emaroñ kajitõk, ‘Imaroñ ke ukõt wãwen ko ibba im kõmman bwe en lamwan wãwen aõ mour?’ Amy ear kõmman eindein. Ear mweie ak ear jab mõnõnõ. Ear kile bwe jibadõk jerbal ko an lal enañin kar kajebwãbweik e jen tõmak eo an kin Anij. Kin men in, ear beek in bukõt mokta men ko an Ailiñ eo im ear bõk jerbal in pioneer iumin jejjo yiõ ko. Amy ej ba, “Ij eñjake aõ juburu kiõ me iar jab iione mokta” ke ear jolok elap an ien ñan jibadõk mejenkajjik ko an lal.—1/15, page 19.
• Ta eo emaroñ jibañ ro jinen bwe ren lo tõbrak ilo mour eo air?
Elõñ ro jinen rej jerbal ilo jikin jerbal ko. Jet rej kõmmane men in bwe ren kabwe aikwij ko an family eo air, im ro jet rej kõmman eindein kinke rejjab kõnan atartar ion ro jet ñan mour ak rekõnan bwe en wõr air money ñan wia mweiuk ko. Ak bar ro jet, kinke rej mõnõnõ in jerbal ilo jikin jerbal ko air. Ro jinen me rej Christian ewõr juõn jerbal eaorõk ilo mweo imwiir—elaptata ñe ajiri eo ej dik wõt. Jet iair rar bebe bwe ren karõk juõn joñan kin awa ko rej kajerbali ilo jikin jerbal eo ak rar bõjrak jen air jerbal bwe ren kalaplok air ien ñan lale family eo air, im men in ear bõktok elap tõbrak ñan ir.—April-June, page 20-23.
• Ñan “ebeben” et eo Jesus ear jitõñlok ñan e ilo nan ko an ilo Matu 24:34?
Ekkã an Jesus kar kajerbal nan eo “ebeben” ilo juõn wãwen enana, ke ear konono ñan ak kin ro renana. Ak ear jab kõmman men in ke ear konono ibben ri kalor ro an, ro me jitõb kwojarjar eo ear bojak in kabit ir. Renaj kar armij ro remõntata ñan jelã kin ta melelen Matu 24:32, 33 im kamelele kake. Ikijen kamelele in, jemaroñ ba bwe Jesus ear jitõñlok ñan ri kabit ri kalor ro an, ilo ebeben eo kein ka juõn im ilo ran kein.—2/15, page 23-24.
• Ewi wãwen Kien eo kar einwõt juõn dri lale, ekkar ñan Dri Galetia 3:24?
Ilo ien eo etto ekkã an kar walok bwe juõn ri lale ear juõn ri karejar elukkun tiljek im rar liki e ñan kejbãrok juõn ajiri jen jorrãn im lolorjake aolep nan in kakabilek ko an jemen ajiri eo. Ilo juõn wãwen einlok wõt, Kien eo ear kejbãrok Ri Jew ro jen manit ko renana an jukjuk im bed eo, einwõt mareik ro rejjab Christian. Ak einwõt juõn ri lale ej lale juõn ajiri, Kien eo ear jab bed ñan indio, ear bed mae ien eo Christ ear itok.—3/1-E, page 18-21.
• Ekkar ñan Jemes 3:17, ta kadkad ko jej aikwij kwaloki?
Ñan kejbãrok mour erreo, jej aikwij karmijeteik men ko renana ilo mõkaj. (Jen. 39:7-9) Jej aikwij bareinwõt kainemõn armij ro, im bõpraik kij jen ad lej im kaillu armij ak emmakit ilo juõn wãwen jej kokkure ainemõn. Inem kij kajjojo jej aikwij kajitõkin kij make: ‘Armij ro rej watõk ña einwõt juõn armij in kainemõn ke ak juõn eo ej kokkure ainemõn? Ekkã aõ akwel ke ibben ro jet? Emõkaj ke aõ lõkatip, ak kalõkatip armij ro jet? Ij bojak ke in jeorlok bwid ien ko otemjej im jab iun armij bwe en lor nan in jiroñ ko aõ?’—3/15, page 24-25.
• Etke Jesus ear kejmoure juõn ri bilo jidik kin jidik? (Mark 8:22-26)
Bible eo ejjab lukkun uake kajitõk in. Bõtab, emaroñ bwe, ilo ien in ke ear kejmour ri bilo eo jidik kin jidik, Jesus ear lelok ien bwe leo en kamineneik mejen ñan an lolokjen. Ilo wãwen in Jesus ear kwalok yokwe ñan leo ear bilo.—4/1-E, page 30.