Kamol Am Bojak Ñan Ran Eo An Jehovah
“Kin men in komin bareinwõt pojõk; bwe ilo auõ komij jab lemnok, Nejin armij ej itok.”—MATU 24:44.
1. Etke jej aikwij itoklimo kin ran eo an Jehovah?
ENAJ JUÕN ran in tarinae im kwi, illu im mijak, marok im jorrãn. “Ran in kwi eo elap” an Jehovah enaj itok ñan jukjuk im bed in enana, einwõt Ibwijleplep eo ear itok im kamaloñ jukjuk im bed eo enana ilo ran eo an Noah. Emol enaj itok. Ak, “jabdewõt eo ej kir etan Jehovah enaj bõk lomor.” (Joel 2:30-32, NW; Amos 5:18-20, NW) Anij enaj kokkure ri kijirãt ro an im lomoren armij ro an. Ilo juõn eñjake ekaiuriur, ri kanan Zephaniah ej ba: “Ran in kwi eo elap an Jehovah ej ebak. Ej ebak, im ej itok wõt ilo mõkaj.” (Zephaniah 1:14, NW) Bõtab, ñããt eo ekajet in ekwojarjar enaj walok?
2, 3. Etke ej aorõk bwe jen kebojak kin ran eo an Jehovah?
2 “A ran eo im auõ eo ejelok juõn e jela kake, im jab enjel ro i lõñ, jab Nejin, a Jema wõt,” Jesus ear ba. (Matu 24:36) Kinke jejjab jelã jejjet in ien eo, ej aorõk bwe jen jek ilo buruõd nan ko ilo unin tel in yiõ ñan 2004: “Komin ekil . . . Komin bareinwõt pojõk.”—Matu 24:42, 44.
3 Ñan kalikar kin ewi joñan mõkaj in an ro rej bojak in aini ir im likit ro jet, Jesus ear ba: “Ien eo ruo armij re naj ber ilo jikin kallip; naj bõk juõn, im likit juõn. Ruo kõra re naj irir kin ken irir; naj bõk juõn, im likit juõn.” (Matu 24:40, 41) Ilo ien eo, jenaj et? Jenaj bojak ke, ak jenaj ilbõk kin ad jabojak? Men in elap an wawa ion ta eo jej kõmmane kiõ. Ñan kamol bwe jej bojak ñan ran eo an Jehovah ej aikwij bwe jen kejbãrok kij jen ad bõk juõn lemnak ekkã an walok ilo ran kein, im jej aikwij kejbãrok kij bwe jen jab bo ilo wãwen eo ilo jitõb, im kejbãrok kij jen jet manit ko an lal.
Kejbãrok Yuk Jen juõn Lemnak in Jab Kea
4. Kain lemnak rot eo ear bed ibben armij ro ilo ran eo an Noah?
4 Lemnak kin ran ko an Noah. “Kin tõmak Noa, emwij an Anij kowe e kin men ko re jañin walok, ilo an mijõk Anij e ar kabojõk wa eo ñõn lomoren e im ro nukin; kin eo e ar liakelok lõl, im jolit kwojarjar eo ekar ñõn tõmak,” Bible eo ej ba. (Dri Hibru 11:7) Wa eo enaj kar lukkun kilep im juõn men ejõkkar ñan jikin eo. Bareinwõt, Noah ear juõn “dri kwalok e kwojarjar.” (2 Piter 2:5) Jerbal in kalek wa eo im jerbal eo an ñan kwalok nan rar jab jibañ armij ro ilo ran eo an ñan kajimwe wãwen mour eo air. Etke? Kinke rar “mõña im irak, r’ar belele im lelok bwe ren belele.” Ro me Noah ear kwalok nan ñan ir rar lukkun boub kin inebata im men in kamõnõnõ ko air im rar “jaje ñõn ter eo ibij liplip eo ej itok, im bõklok ir otemjej.”—Matu 24:38, 39.
5. Kar ewi wãwen mour eo an Ri Sodom ro ilo ran eo an Lot?
5 Ekar eindein ilo ran ko an Lot. Jeje ko an Bible eo rej jiroñ kij: “R’ar mõña, r’ar irak, r’ar wiakake, r’ar wiaik, r’ar kallip, r’ar kalek. A ilo ran eo ke Lot e ar ilok jen Sodõm e buñ kijeek im brimston jen lõñ, im mõn ir otemjej.” (Luk 17:28, 29) Elikin an enjel ro kakkõl Lot kin jorrãn eo ebak, ear konono ibben likao ro belen ro nejin kin ta eo enaj kar walok. Bõtab, iman mejeir, rar lemnak ear juõn “dri kajirere.”—Jenesis 19:14.
6. Ta lemnak eo jej aikwij kejbãrok kij jen e?
6 Einwõt ear walok ilo ran ko an Noah im Lot, “e naj eindrein an Nejin armij itok.” (Matu 24:39; Luk 17:30) Emol, lemnak eo an elõñ armij ilo ran kein ej einwõt lemnak in jab kea. Jej aikwij kejbãrok kij jen ad bo ilo kain lemnak rot in. Ejelok nana ñan kamõnõnõ kij kin mõñã im idak ñan emõn joñan. Mour in belele ej juõn karõk jen Anij bareinwõt. Bõtab, elañe men kein rej men ko moktata ilo mour eo ad im jej likiti iman men ko ilo jitõb, jemaroñ ba ke bwe jej bojak ñan ran in kwi eo an Jehovah?
7. Ta kajitõk eo eaorõk jej aikwij kajitõk kake mokta jen ad jibadõk jabdewõt men in jibadbad eo, im etke?
7 “E karu ien jen kiõ,” ri jilek Paul ear ba. Inem “ro eor kõra beleir ren einwõt ñe ejelok ibeir.” (1 Dri Korint 7:29-31) Ekadu wõt ien ibbed ñan kamwijlok jerbal eo Anij ear letoke ñan kwalok nan kin Ailiñ eo. (Matu 24:14) Paul ear bareinwõt rejañ ro emwij air mare bwe ren jab madjake mour in belele eo air im likit men ko an Ailiñ eo bwe en eo kein karuo ilo mour eo air. Alikar, lemnak eo Paul ear rejañ aolep bwe ren bõke ear oktan lemnak in jab kea. Jesus ear ba: “Komin bukot mokta ailiñ in Anij, im kwojarjar eo An; im naj koorlok men kein otemjej ñõn kom.” (Matu 6:33) Ñe jej kõmman jabdewõt bebe ak jibadõk jabdewõt men, ej juõn men eaorõk bwe jen kajitõk, ‘Ewi wãwen bebe in enaj jelet aõ bukõt mokta men ko an Ailiñ eo ilo mour eo aõ?’
8. Elañe inebata ko an mour jen ran ñan ran rej men ko moktata ilo mour eo ad, ta eo jej aikwij kõmmane?
8 Ta elañe jej jelã bwe jej boub wõt kin inebata ko an mour jen ran-ñan-ran im ejelok ien ñan bukõt men ko lor jitõb? Wãwen mour eo ad ej einjuõn ke jen wãwen mour eo an ro ri turud ejelok air jelã kin Bible im rejjab kwalok nan kin Ailiñ eo? Elañe ej eindein, jej aikwij jar kin men in. Jehovah emaroñ kamaroñ kij ñan kajimwe lemnak eo ad. (Dri Rom 15:5; Dri Pilippai 3:15) Emaroñ jibañ kij bukõt mokta men ko an Ailiñ eo, kõmman emõn, im kajejjet kitien kallimur eo ad ñan e.—Dri Rom 12:2; 2 Dri Korint 13:7.
Jumae Mejki ilo Jitõb
9. Ekkar ñan Reveles̃õn 16:14-16, etke ej aorõk bwe jen jab mejki ilo jitõb?
9 Kanan eo ej konono kin tarinae eo ej itok wõt “tõrinae in ran elap, ran in Anij ekajur otem kajur” ilo Armageddon ej kakkõl bwe jet armij rejamin ekil wõt. “Lo Ij iwij einwõt dri kwot,” Iroij Jesus Christ ej ba. “Emõnõnõ eo ej ekil im drebij nuknuk ko an, bwe en jab etetal im kelwan, im rej lo an jok.” (Reveles̃õn 16:14-16) Nuknuk ko rej kõkkar kin kakõlle ko einwõt Christian Ri Kennan ro an Jehovah. Ej koba jerbal eo ad einwõt ri keañ ro an Ailiñ eo im mwilid einwõt mwilin Christian. Elañe jej jirliklok im kiki ilo jitõb, jemaroñ luji kakõllan Christian eo ad. Men in ej men in kajookok im kauwatata. Jej aikwij kejbãrok bwe jen jab mejki ilo jitõb. Ewi wãwen ad maroñ jumae kain mejki rot in?
10. Etke konono Bible jen ran ñan ran ej jibañ kij ñan ekil wõt ilo jitõb?
10 Bible eo ej kalikar ilo an eliji kin aikwij eo ñan ekil wõt im bojak ilo wãwen otemjej. Ñan wanjoñok, bwebwenato ko an Gospel rej kakememej kij: “Komin ekil” (Matu 24:42; 25:13; Mark 13:35, 37); “komin bareinwõt pojõk” (Matu 24:44); “komin ekil im jar” (Mark 13:33); “komin pojõk” (Luk 12:40). Elikin an ba bwe ran eo an Jehovah enaj itok ilo ien eo jejjab kõtmene ilo lal in, ri jilek Paul ear rejañ ri tõmak ro mõttan: “Jen jab kiki einwõt ro jet, a jen mmij im jadõr.” (1 Dri Tessalonika 5:6) Ilo book eo eliktata ilo Bible eo, Christ Jesus eo eaibujuij ej konono kin an itok ilo idiñ, im ba: “Ij iwij ilo mõkõj.” (Reveles̃õn 3:11; 22:7, 12, 20) Elõñ ian ri Hibru ri kanan ro bareinwõt rar kamelele im kakkõl kin ran in ekajet eo elap an Jehovah. (Aiseia 2:12, 17; Jeremiah 30:7, NW; Joel 2:11, NW; Zephaniah 3:8, NW) Konono Nan in Anij, Bible eo, ran otemjej im kalikari men ko jej konono ej juõn men in jibañ emõn ñan kõmman bwe jen ekil wõt ilo jitõb.
11. Etke katak Bible ibbed make ej aorõk ñan ekil wõt ilo jitõb?
11 Aet, niknik ilo ad katak Bible ibbed make im kajerbal book ko rej bedbed ion Bible im “dri korijer eo e tiljek im meletlet” ear litoki rej lujure kij ñan ekil wõt ilo jitõb! (Matu 24:45-47) Bõtab, ñan bõk tokjen ko jen ad katak ibbed make, jej aikwij ekkeini im jab bõjrak in katak ibbed make. (Dri Hibru 5:14–6:3) Jej aikwij keini im bõk ekan ko rebin ilo jitõb. Emaroñ bin lo ien ñan kõmman men in ilo ran kein. (Dri Epesõs 5:15, 16) Meñe eindein, ejabwe ad konono Bible im book ko rej bedbed ion Bible ilo ien eo wõt ejelok abañ ie. Ekkeini katak ibbed make ej aorõk elañe jekõnan “jimewõt ilo tõmak” im ekil wõt.—Taitõs 1:13.
12. Ewi wãwen kwelok, assembly, im convention ko an Christian rej jibañ kij tarinaik mejki ilo jitõb?
12 Kwelok, assembly, im convention ko an Christian rej jibañ kij ñan tarinaik mejki ilo jitõb. Ewi wãwen? Ikijen nan in jiroñ ko jej bõki jeni. Ilo kwelok kein, ejjab mol ke bwe emakijkij air kakememej kij kin joñan ebakin ran eo an Jehovah? Kwelok ko an Christian ilo week otemjej rej bareinwõt letok ien ko remõn ñan ad ‘kõkãtõk dron ñõn yokwe im jerbal ko remõn.’ Kain rejañ rot in, ej jibañ juõn bwe en ekil wõt ilo jitõb. Eñin unin, jej bõk nan in kaiñi eo ñan keini in kwelok ibben don ñe jej “lo an ran eo ebaktok.—Dri Hibru 10:24, 25.
13. Ewi wãwen jerbal eo an Christian ej jibañ kij bwe jen ekil wõt ilo jitõb?
13 Bareinwõt jej ekil wõt ñe jej bõk kunad ilo jerbal in kwalok nan kin aolepen buruõd. Ebar wõr ke juõn wãwen emõnlok ñan kememej ilo alikar kin kakõllan ien kein im meleleir jen ad konono kaki ibben armij ro jet? Im ñe jej lo an ro me jej katakin ir kin Bible wõnmanlok ilo jitõb im jerbali katak ko ilo mour eo air, ej kalaplok eñjake eo ad ekaiuriur. “Komin kapojõk buruemi,” ri jilek Piter ear ba, “komin jadõr im kejatrikrik kom wõt.” (1 Piter 1:13) “Boub wõt ilo jerbal eo an Iroij” ej juõn wãwen emõn ñan anjo ion mejki ilo jitõb.—1 Dri Korint 15:58.
Kejbãrok Yuk jen Manit ko Rej Kajorrãn Mour in Jitõb
14. Einwõt an Luk 21:34-36 kalikar, kain mour rot eo Jesus ear kakkõl kij bwe jen jab lore?
14 Ilo kanan eo an elap kin bed eo an, Jesus ear letok bar juõn nan in kakkõl. Ear ba: “Komin kejbãrok kom ñe ab obrõk buruemi kin dõr, im karek, im inebata ko an lõl in, im emõkõj an ran eo itok einwõt jen: bwe ein drein e naj itok ion ro otemjej rej jokwe ion mejen aolepen lõl. A komin ekil im jar ien otemjej, bwe komin maroñ in ko jen men otemjej men ko re naj walok, im bwe komin jutõk iman mejen Nejin armij.” (Luk 21:34-36) Jesus ear kalikar ilo jejjet kin manit ko armij ro an lal renaj jibadõki: dõr ilo mõñã, kadõk, im juõn wãwen mour eo ej bõktok inebata ko.
15. Etke jej aikwij kejbãrok kij jen dõr im kadõk?
15 Dõr im idak le jen joñan rej jõkkar ñan kien ko an Bible im jej aikwij kejbãrok kij jen e. “Jab kobalok ibben ri kadõk ro, im ro rej dõr,” Bible eo ej ba. (Proverbs 23:20, NW) Bõtab, mõñã im idak rejjab aikwij tõbar juõn joñan elap mokta jen air jelet mour in jitõb eo ad. Mõñã im idak rej kõmman bwe juõn en mejki im jowan mokta jen an broklep ak kadõk. “An eo dri jowõn e kõnan,” jabõn kennan eo ej ba, “im ejelok iben, a naj kamãtõk an eo e owõn.” (Jabõn Kennan Ko 13:4) Kain armij rot in emaroñ kõnan kõmanman ankil an Anij, ak ejjab jejjet kitien kõnan eo an kinke ej jerwan.
16. Ewi wãwen jemaroñ kejbãrok bwe inebata ko an family eo ad ren jab kautameik kij?
16 Ta inebata ko an mour Jesus ear kakkõl kaki? Rej kitibuj men ko jej itoklimo kaki, kabwe aikwij ko an family eo, im men ko eirlok wõt. Ejjab juõn men in meletlet ñan kõtlok bwe men kein ren kautameik kij! “Wõn iami kin inebata buruen e maroñ in kaitoklok an mour ilo juõn mokwõj in pã?” Jesus ear kajitõk. Ear kakabilek ri roñjake ro an: “Komin jab inebata buruemi im ba, Ta je naj mõña? Ak ta je naj irak? Ak e naj kijkan ar balle? Bwe ro dri ailiñ ko rej bukot men kein otemjej; bwe Jememiuj i lõñ E jela ami aikwij men kein otemjej.” Ilo ad bukot mokta Ailiñ eo im liki bwe Jehovah enaj kabwe aikwij ko ad jenaj anjo ion inebata ko ad im naj ekil wõt.—Matu 6:25-34.
17. Ewi wãwen arõk mweiuk emaroñ bõktok inebata?
17 Inebata emaroñ walok ñe jej jibadõk mweiuk ko. Ñan wanjoñok, jet armij rej kabañ mour ko air ilo air wiaik men ko le jen joñan money ko air. Ibben ro jet rej lorak ilo karõk ko ñan kamweie ir ilo mõkaj im kajerbal money ko air ilo juõn wãwen ekauwatata ñan koorlok jeen. Ñan ro jet, katak ko ilo college ak university einwõt juõn ial ñan lo tõbrak ak ear einwõt juõn jen. Emol, ej aikwij wõr juõn joñan jelãlokjen jen school eo ñan jerbal ilo jimwe ilo juõn jikin jerbal. Bõtab, ilo mol ñe jet armij rej jolok elap ien ñan bõk jelãlokjen eo elaplok, ear kajorrãn air mour ilo jitõb. Ej juõn wãwen ekauwatata ñan bed ie einwõt ñe ran eo an Jehovah ebaktok! Bible eo ej kakkõl: “Ro re kanuij kõnan bwe ren dri mweie, re buñ ilo kabo im oujir im elõñ mõm ko re bwebwe im nana, rej kamaloñ armij im kokkure ir ilo jikin joko.”—1 Timote 6:9.
18. Ñan kejbãrok bwe jen jab arõk mweiuk, ta maroñ eo jej aikwij kaddek?
18 Men eo ej aorõk ñan kejbãrok kij jen arõk mweiuk ej ñan kaddek juõn maroñ in jelã ta eo emõn im ta eo enana ñe jej aikwij kõmman bebe ko. Jenaj bõk maroñ in ilo ad keini in bõk ‘ekõn ko rebin rej ekar ñõn ro re ridto.’ (Dri Hibru 5:13, 14) Jej aikwij “melejoñ men ko re lijiklok” ñe jej karõk ta men ko jej aikwij kõmmani mokta enaj kejbãrok kij jen ad kãlet men ko rebwid.—Dri Pilippai 1:10.
19. Elañe jej lo bwe jidik wõt ien ibbed ñan jibadõk men ko ilo jitõb, ta eo jej aikwij kõmmani?
19 Mour in arõk mweiuk emaroñ kabiloik kij, im kõmman bwe en wõr jidik wõt ien ñan jibadõk men ko ilo jitõb. Ewi wãwen ad maroñ melejoñe kij make im jab lorak ilo kain mour rot in? Jej aikwij jar im lemnak kin ewi wãwen im joñan ad maroñ kõmman bwe mour eo ad en lamwan. Solomon eo ear King in Israel eo etto ear ba: “Kiki an juõn dri jerbal, emõn wõt, elañe ej kõñi elõñ ak erik; a kin an obrõk dri mweie e jab itok an kiki.” (Ekklisiastis 5:12) Ñe jej aikwij lale elõñ mweiuk ko jidik wõt tokjeir ej kañ ke elap ien im kajur eo ad? Ñe elaplok men ko mweied, enaj aikwij kalaplok ien im maroñ ibbed ñan lale im kejbãroki. Emaroñ wõr ke tokjen ñan kij elañe jej kadiklok men ko mweied im kabidodolok mour eo ad?
Inem, Komin Bojak Wõt
20, 21. (a) Ta nan in rejañ eo ri jilek Peter ej letok ikijen ran eo an Jehovah? (b) Ta jerbal im kõmman ko jej aikwij wõnmanlok im kõmmani ñan kamol ad bojak kin ran eo an Jehovah?
20 Lal eo ilo ran eo an Noah ear jemlok, im jukjuk im bed in enaj jemlok. Ri jilek Piter ear kallimuri kij: “Ran in Iroij e naj itok einwõt dri kwot, im ilo e lõñ ko re naj jokolok kin ñõrñõr elap, im men ko ilo e re naj unlok kin bwil elap, im lõl kab men in kõmõn ko ilo e naj kanuij tili ir.” Ejjab lañ in kõkkar ko ak—kien ko renana—im jab lal in kõkkar eo ak—armij ro rej jenolok jen Anij—renaj ellã im mour jen bwil in illu eo an Anij. Ñan kalikar kin ewi wãwen ad maroñ kamol ad bojak ñan ran eo, Peter ej ba: “Inem naj ein drein an men kein otemjej unlok, ta men eo komin wõjake ilo kõmõn wãnik im kabuñ rokwojarjar!”—2 Piter 3:10-12.
21 Ad keini in bed ilo kwelok ko an Christian im bõk kunad ilo jerbal in kwalok nan rej mõttan men ko rewãnik im kwojarjar. Jej aikwij kõmmani men kein ñe jej kabuñ kin aolepen buruõd ñan Anij im kõttar ilo meanwõd kin ran eo elap an Jehovah. Jen “kate [kij] bwe [Anij] En lo [kij] ilo ainemõn im ejelok ami mãr ak not[ad] iman mejen.”—2 Piter 3:14.
Kwoj Kememej Ke?
• Etke jej aikwij bojak wõt ilo ran eo an Jehovah?
• Elañe jej jibadõk men ko an mour im rej moktata ilo mour eo ad, ta eo jej aikwij kõmmane?
• Ta eo enaj jibañ kij bwe jen jab mejki ilo jitõb?
• Kain wãwen rot ko an mour jej aikwij kejbãrok kij jeni, im ewi wãwen?
[Pija ko ilo peij 10, 11]
Armij ro ilo ran eo an Noah rar jab ekil wõt kin ien ekajet eo ear ebaktok—kwoj ke?
[Pija eo ilo peij 12]
Kwomaroñ ke kabidodolok mour eo am bwe en laplok ien ñan am jibadõk men ko ilo jitõb?