KATAK 8
Etke Kõmij Kõn̦ak Nuknuk ko Rekkar im Rekarbõb Ñe Kõmij Kweilo̦k?
Iceland
Mexico
Guinea-Bissau
Philippines
Ilo am̦ kar lale pija ko ilo bok in, kwaar ke lo bwe Ri Kõnnaan ro an Jeova rej kõn̦ak nuknuk ko rekkar im rekarbõb ñe rej kweilo̦k? Etke kõmij kõm̦m̦ane men in?
Kõmij kõn̦aan kwal̦o̦k kautiej ñan Anij. Anij ejjab kalimjek pao tok in im jekjekin armej ro. (1 Samuel 16:7) Bõtab, ñe kõmij kobatok ippãn doon ñan kabuñ ñan Anij, el̦ap am kõn̦aan kwal̦o̦k kautiej ñan e im ñan ri tõmak ro m̦õttam. El̦aññe jej jãdel̦o̦k im̦aan juon irooj ak juon ri utiej in kien, jej kõn̦ak nuknuk ko rekkar im rekarbõb bwe jen kwal̦o̦k kautiej ñan e. Ãindeinl̦o̦k wõt, ñe kõmij kõn̦ak nuknuk ko rekkar im rekarbõb ilo iien kweilo̦k ko, men in ej kwal̦o̦k bwe kõmij kautiej Jeova Anij, eo ej “Irooj” Bõtata. Men in ej bar kwal̦o̦k bwe kõmij kaorõk jikin kabuñ eo am.—Jenesis 18:25.
Kõmij kaalikkar bwe kõmij jerbale naan in katak ko ilo Baibõl̦. Baibõl̦ ej rõjañ Kũrjin ro bwe ren “kõjparok wãween aer nuknuk, im kõn̦ak nuknuk ko rekkar” ãinwõt ro me ‘rejel̦ã Anij.’ (1 Timote 2:9, 10, UBS) Ta mel̦el̦ein an ba “kõn̦ak nuknuk ko rekkar?” Eokwe, ej mel̦el̦ein bwe kõmij jab kõn̦ak nuknuk ko me rejakkar im relukkuun bab, kadu im mãni. Kõmij jab bar kõn̦ak nuknuk ko me renaaj letok lo̦ñiin armej. Bareinwõt, kõmij jab kõn̦ak nuknuk ko rejabde ak tõreejab ilo juon wãween me el̦e jãn joñan. Meñe ewõr kain nuknuk ko rejakkar, bõtab ej lõñ wõt kain nuknuk ko rem̦m̦an im rekkar me kõmij kõn̦aki. Ilo am l̦oore naan in kakapilõk kein, kõmij maroñ “kaiboojoj katak eo an Anij Ri Lo̦mo̦o̦red” im “nõbar Anij.” (Taitõs 2:10; 1 Piter 2:12, UBS) Ilo am kõn̦ak nuknuk ko rekkar im rekarbõb ñe kõmij kweilo̦k, men in ej jipañ ro jet bwe ren kile aorõkin ad kabuñ ñan Jeova.
Meñe kwõj l̦õmn̦ak bwe ejjel̦o̦k am̦ nuknuk em̦m̦an ñan Im̦õn Kweilo̦k eo, jouj im itok wõt im kobatok ilo iien kweilo̦k ko am. Ejjab aorõk ñan kõn̦aki nuknuk ko el̦ap on̦aer im rekããl. Men eo eaorõk in ej bwe en ekkar im erreo nuknuk ko ad.
Ewi joñan an aorõk bwe jen kõn̦ak nuknuk ko rekkar im rekarbõb ñe jej kabuñ ñan Anij?
Ta naan in kakapilõk eo ilo Baibõl̦ kõmij l̦oore ñe kõmij kõn̦aki nuknuk ko?