Box In Kajitõk

◼ Etke jej aikwij lale nuknuk ko ad im baotokid ñe jej lolok moko an Society ilo Brooklyn, Patterson, im Wallkill, New York, im ran office ko ibelakin lõl?

Christian ro rej kõtmene air kejbarok mwiliid. Ien otemjej nuknuk ko ad im baotokid ren kalikar utiej eo ekkar an ri karejar ro an Jehovah Anij. Men in elaptata an mol ñe jej lolok moko an Society ilo New York ak ilo ra ko jet ibelakin lõl.

Ilo 1998, district im international convention ko renaj walok. Thousand im thousand ro jeid im jatid jen elõñ ailiñ ko renaj lolok headquarter ko an Society ilo New York im bareinwõt ra ko ilo ailiñ ko jet. Ejjab ilo ien eo wõt jej lolok jikin kein, ak ilo ien ko jet bareinwõt, jej aikwij ‘ilo men otemjej kwalok karkarim einwõt dri jerbal an Anij,’ ekoba nuknuk ko ad im baotokid rekkar.​—2 Kor. 6:3, 4.

Ilo bwebwenato kin aorõkin nuknuk ko im baotokid rekkar, Organized to Accomplish Our Ministry ej konono kin aikwij eo kin erreo ilo enbwin, kõnak nuknuk ko rekarbõb, im baotokid emõn ñe jej jerbal ilo jerbal in kwalok nan im bed ilo kwelok ko an Christian. Inem, ilo peij 131, paragraph 2, ej ba: “Ejja men eo wõt ej jerbal ñe jej lolok Bethel ilo New York ak jabdewõt ran office ko an Society. Kememej, ãt in Bethel ej melelen ‘Imõn Anij,’ inem ilid, baotokid, im mwilid ren einlok wõt ta eo rej kõtmene kake kij ñe jej bed ilo kwelok ko ilo Kingdom Hall.” Ejja kien in eutiej ej aikwij jerbal ñõn ri kwalok ro kin Ailiñ eo ilo bukwon eo im bareinwõt ro jen jikin ko retolok me rej itok ñõn aluij im kamao ibben ro uan family in Bethel im ñõn lolok ran office ko.

Nuknuk ko ad ej aikwij wor juõn kilan emõn ñõn ro jet ikijen wãwen eo rej lemnak kin kabuñ eo emõl an Jehovah. Bõtab, kimij lo bwe ke rar lolok ran office ko an Society, jet brother im sister ro rej jabde ilo air nuknuk. Nuknuk rot en rejakkar ñe jej lolok jabdewõt imõn Bethel. Ilo men in, einwõt ilo aolep wãwen mour in Christian, jekõnan kejbarok ejja kien eo eutiej me ej kõmmõn bwe armij ro an Anij ren einjuõn jen lõl in ilo ad kõmmõn men otemjej ñõn aibujuij an Anij. (Rom. 12:2; 1 Kor. 10:31) Ej bareinwõt emõn ñõn konono ibben ri katak Bible ro ad im ro jet me rej kab lolok Bethel im kakememej ir kin aorõkin lale ilid im baotokid.

Inem ñe kwoj lolok ran office ko an Society, kajitõkin yuk make: ‘Nuknuk eo aõ im baotokiõ ekkar ke?’ (Keiri Micah 6:8.) ‘Ej emõn ke an kwalok kin Anij eo ij kabuñ ñõn e? Ro jet renaj ke mad ak lõkatip kin baotokiõ? Ij likit ke juõn joñok emõn ñõn ro jet ej kab juõn alen rej lotok?’ Ien otemjej, ikijen ilid im baotokid, “kaibujuij katak eo an Anij Dri Lomorer ilo men ko otemjelok.”​—Titus 2:10.