Jehovah Ej “lelok Jinekjij Ñõn Ro Rej Kabukot E”

“Eo ej itok ñõn Anij, emõn en tõmak kin an Anij ber, im kin An lelok jinekjij ñõn ro rej kabukot E.”—DRI HIBRU 11:6.

1, 2. Etke jet ian ri karejar ro an Jehovah rej tarinaik eñjake ko renana?

“IAR juõn ian Ri Kennan ro an Jehovah iumin enañin 30 yiõ, ak I ar jab watõk iõ einwõt juõn iair, meñe I ar kwalok nan full-time im bõk jerbal ko jet raorõk,” Barbara ear ba.a Keith ear kwalok ejja lemnak in wõt. Ear ba: “Jet ien I ar lemnak bwe ejjab tellokiõ bwe In juõn iair, kinke elõñ un ko ibben ri karejar ro an Jehovah unin air mõnõnõ, ak ña ejelok. Kain eñjake rot in ear kabwer iõ.”

² Elõñ ri karejar ro retiljek an Jehovah, jen ien ko etto im kiõ, rar aikwij kate ir kin ejja eñjake rot in wõt. Ear eindein ke kwe? Bõlen kwoj jelmae elõñ abañ ko, ak ri tõmak ro mõttam rej lo mõnõnõ, im ejelok inebata ilo mour eo air. Kin men in, kwomaroñ lemnak bwe Jehovah ejjab buñburuen kake yuk. En jab mõkaj am bõk kain lemnak rot in. Bible eo ej kallimur: “Bwe E ar jab kejekron ak drike iñtan an ro rej iñtan, im E ar jab noje mejen jen e, a ke e ar kir ñõn E, e ar roñjake.” (Sam Ko 22:24) Nan in kanan kein kin Messiah eo rej kwalok bwe Jehovah ejjab roñjake wõt ro rej tiljek ñan e ak ej bareinwõt kajerammõn ir.

3. Etke jej jelmae ijjibed ko an jukjuk im bed in?

³ Armij otemjej rej jelmae ijjibed ko an jukjuk im bed in—ekoba armij ro an Jehovah. Jej bed ilo juõn lal me Ri kijirãt eo elap an Jehovah, Satan Devil eo, ej iroij ion. (2 Dri Korint 4:4; 1 Jon 5:19) Ri karejar ro an Jehovah rej armij ro elaptata Satan ej bukõt kilen ñan mõn ir kinke rar bõk kejbãrok eo ekabwilõñlõñ jen Jehovah. (Job 1:7-12; Reveles̃õn 2:10) Inem, mae ien eo Anij ear karõke, jej aikwij “kijenmij” ilo eñtan ko im “niknik ilo jar,” im liki bwe elap an Jehovah yokwe kij. (Dri Rom 12:12) Jen jab lemnak bwe Jehovah Anij ejjab yokwe kij!

Joñok Ko kin Kijenmij ilo Ien Etto

4. Kwalok jet joñok ko kin ri karejar ro retiljek an Jehovah me rar kijenmij ilo melejoñ ko rar kainebataik ir.

⁴ Elõñ ri karejar ro an Jehovah ilo ien etto rar aikwij kijenmij ilo melejoñ ko rar kainebataik ir. Ñan wanjoñok, Hannah, ear “kanuij buromõj” kinke ejañin wõr nejin—einwõt ñe Anij ear meloklok e. (1 Samuel 1:9-11) Ke Leroij Jezebel ear bukõt Elijah ñan mõn e, ear mijak im jar ñan Jehovah: “Ebwe; kiõ, O Jeova, kwon bõk aõ mour; bwe I jab emõn jen ro jimaõ.” (1 Kiñ Ro 19:4) Im ri jilek Paul ear lo joñan an kar jab wãppen ke ear ba: “Inem ij lo kien, bwe nana ej ber iba, ña I kõnan kõmõn emõn.” Ear ba bareinwõt: “O ña armij iñtan!”—Dri Rom 7:21-24.

5. (a) Ewi wãwen Anij ear kajerammõn Hannah, Elijah, im Paul? (b) Ta nan in kainemõn eo jemaroñ bõk jen Nan in Anij ñe jej aikwij kijenmij kin lemnak ak eñjake ko renana?

⁵ Emol bwe jejelã bwe Hannah, Elijah, im Paul rar aolep kijenmij wõt ilo jerbal eo an Jehovah, im Ear lap an kajerammõn ir. (1 Samuel 1:20; 2:21; 1 Kiñ 19:5-18; 2 Timote 4:8) Mekarta, rar aikwij kijenmij wõt ilo aolep wãwen ko rekaburomõjmõj, kaeñtan, im kalelñoñ. Jejjab aikwij bwilõñ kin men in, elañe jej bõk eñjake ko rej kabwer kij jet ien. Bõtab, ta eo kwomaroñ kõmmane, ñe inebata ko an lal rej kõmman am bere bwe Jehovah ej yokwe yuk? Kwomaroñ bõk kainemõn jen Nan in Anij. Ñan wanjoñok, ilo katak eo lok iman, jaar bwebwenato kin nan ko an Jesus bwe emwij an Jehovah bwini “kolan bõrõmi otemjelok.” (Matu 10:30) Nan kein rej kalikar bwe Jehovah ej itoklimo kin ri karejar ro an kajjojo. Kememej bareinwõt , kin wanjoñok eo an Jesus kin bao ko redik. Elañe juõn iair ej wõtlok ñan lal Jehovah ej loe, emol bwe ejamin kajekdon yuk ilo ien eo kwoj eñtan.

6. Ewi wãwen an Bible eo maroñ kainemõn ro ewõr eñjake ko renana ibbeir?

⁶ Mol ke bwe meñe jejjab wãppen, jemaroñ juõn eo eaorõk iman mejen Ri Kõmanman eo ad, Jehovah Anij? Aet! Emol, elõñ eon ko ilo Bible rej kamole men in. Ñe elap ad kalmenlokjen kin eon kein, jemaroñ errã ibben nan ko an ri jeje sam eo ear ba: “Ke elõñ lemnok ilo buruõ, Am nan in kainemõn ej kalõñliñ aõ.” (Sam Ko 94:19) Jen lale jet ian nan kein ilo Nan in Anij me remaroñ kalaplok ad melele bwe elap an Anij kaorõk kij im enaj kajerammõn kij ñe jej wõnmanlok im kõmanman ankil an.

‘Ro Don’ Jehovah

7. Ilo an kajerbal Malachi, ta nan in kanan eo ekõketak Jehovah ear lelok ñan ailiñ eo enana?

⁷ Juõn wãwen elukkun nana ear walok ibben Ri Jew ro enañin ãbuki yiõ ko mokta jen an Christ lotak. Priest ro rar bõk men in mour ko renañinmij im katok ñan Jehovah. Ri ekajet ro rar kwalok air kalijeklok. Anijnij, riap, kwot, im lũñ rar jededlok ilo ien eo. (Malachi 1:8; 2:9; 3:5) Malachi ear kwalok juõn kanan ekabwilõñlõñ ñan ailiñ in eo ear wãlok im nana. Tokelik, Jehovah ear bar ejaake juõn kõtan emõn ibben armij ro an. Jej konono: “Iroij Ekajur Bõtata ej ba, “Renaj ro droõ. Ilo ran eo inaj kammakit renaj lukkun ro droõ. Inaj tiriamokake ir einwõt an juõn jemen tiriamokake eo nejin ej jerbal ñõne.”—Malachi 3:17.

8. Etke jemaroñ ba bwe Malachi 3:17 ej jerbal ñan jar eo elap ilo juõn wãwen joñan?

⁸ Nan in kanan eo an Malachi ej jejjet kitien ilo ran kein ibben Christian ri kabit ro, me rej 144,000 orair. Emol bwe armij rein rej “armij ro an” Jehovah wõt. (1 Piter 2:9) Kanan eo an Malachi emaroñ bareinwõt juõn nan in rejañ ñan “jar eo elap,” in armij ro “rej jutõk iman tron eo im iman mejen Lam, kõnõki kin nuknuk ko remouj” (Reveles̃õn 7:4, 9) Renaj kobalok ibben ri kabit ro einwõt juõn wõt bwij, iumin juõn S̃eperd, Jesus Christ.—Jon 10:16.

9. Etke Jehovah ej naetan armij ro an einwõt “ro droõ”?

⁹ Ewi lemnak eo an Jehovah kin ro rekõnan karejar ñan e? Einwõt an Malachi 3:17 kwalok, ej watõk ir einwõt an juõn jemen ej yokwe nejin. Im lale mõk ta nan ko ej kajerbali ñan kwalok kin armij ro an—rej einwõt “ro droõ.” Ukok in Bible ko jet rej ukõte nan kein einwõt “aõ make,” “mweiuk ko aõ raorõk,” im “dekã ko aõ raorõk.” Etke Jehovah ej watõk ro rej karejar ñan e einwõt juõn jar in armij ejejuan? Kinke elap an kamolol kake ir. (Dri Hibru 6:10) Ej ruaklok im kaorõk ro rej karejar ñan e kin aolepen burueir.

10. Ewi wãwen an Jehovah kejbãrok armij ro an?

¹⁰ Kwomaroñ lemnak kin juõn mweiuk elap am kaorõke? Kwojjab ke bukõt wãwen ko ñan kejbãroki? Jehovah ej kõmman eindein kin ‘ro dron.’ Emol, ejjab kejbãrok ir aolep ien jen melejoñ im inebata ko otemjej. (Ekklisiastis 9:11) Ak Jehovah emaroñ im enaj kejbãrok tõmak eo an ri karejar ro an retiljek. Ej kakajur ir bwe ren maroñ kijenmij ilo jabdewõt melejoñ rej jelmae. (1 Dri Korint 10:13) Inem, Moses ear jiroñ armij ro an Anij, Ri Israel ro: “Kwon bin im beran wõt. ... bwe Jeova am Anij, Eo ej karwan yuk; E jamin likjõp jen yuk, ak illok jen kwe.” (Duteronomi 31:6) Jehovah ej kajerammõn armij ro an. Ej watõk ir, einwõt ‘ro dron.’

Jehovah Eo Ej Ri “Lelok Jinekjij”

11, 12. Ewi wãwen jelã eo bwe Jehovah ej Ri Letok Jinekjej eo ad emaroñ jibañ kij jolok jabdewõt bere ko ibbed?

¹¹ Bar juõn men ej kamol bwe Jehovah ej kaorõk ri karejar ro an ej ilo an lelok jinekjej ñan ir. Ear jiroñ Ri Israel ro: “Komin melejjoñe iõ im kom naj lo bwe inaj kebellok window ko ilõñ im lutõkwõj men ko otemjej remmõn iomi.” (Malachi 3:10) Emol bwe, ilo jemlokin, Jehovah enaj lelok mour indio ñan ri karejar ro an. (Jon 5:24; Reveles̃õn 21:4) Jinekjej in ej kalikar joñan yokwe im joij eo an Jehovah. Bareinwõt ej kwalok bwe ej lukkun kaorõk ro rej karejar ñan e. Ñe jej katak im watõk Jehovah einwõt Eo Ej Lelok Jinekjej ilo mõnõnõ, men in emaroñ jibañ kij jolok jabdewõt bere ko kin kõtan eo ad ibben Anij. Ilo mol, Jehovah ekõnan bwe jen tõmak bwe E eo ej Ri Lelok Jinekjej! Paul ear je: “Eo ej itok ñõn Anij, emõn en tõmak kin an Anij ber, im kin An lelok jinekjij ñõn ro rej kabukot E.”—Dri Hibru 11:6.

¹² Emol bwe, jej karejar ñan Jehovah kinke jej yokwe e—im ejjab kinke jekõnan bõk wõt men eo ear kallimur kake. Ak, ejjab juõn men ejõkkar im kibbon elañe jej debij ilo buruõd juõn kejatdikdik ñan bõk juõn jinekjej. (Dri Kolosse 3:23, 24) Kin an yokwe im kaorõk ir, Jehovah ej bõk eddo eo mokta im kajerammõn aolep ro rej bukõt e.

13. Etke binmour eo ej men in kamol eo elaptata bwe Jehovah ej yokwe kij?

¹³ Men eo elaptata an kamol bwe Jehovah ej kaorõk armij ej ilo an letok binmour eo ñan lomoren armij. Ri jilek Jon ear je: “Bwe kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” (Jon 3:16) Katok in binmour eo kin Jesus Christ ej jumae lemnak eo bwe Jehovah ejjab yokwe kij. Alikar bwe, elañe Jehovah ear mõnõnõ in lelok Nejin eo ear keutak—men in ej kamol bwe elap an yokwe kij.

14. Ewi wãwen an alikar lemnak eo an Paul kin binmour eo?

¹⁴ Inem, elañe kwoj bõk lemnak ko rejjab jimwe ak kwoj bere, kwon kalmenlokjen kin binmour eo. Aet, kwon watõke einwõt juõn men in lewõj jen Jehovah. Ri jilek Paul ear kõmman eindein. Ear ba: “O ña armij iñtan!” Ak ear wõnmanlok im ba: “Ij kamolol Anij kin Jisõs Kraist ar Iroij,” kin eo, Paul ear ba: “Eo e ar yokwe iõ, im mõke lelok E kin iõ.” (Dri Rom 7:24, 25; Dri Galetia 2:20) Paul ear jab jua ilo an ba menin. Ear tõmak bwe Jehovah ear kaorõk e. Einwõt Paul, kwomaroñ watõk binmour eo einwõt juõn men in lewõj jen Anij. Jehovah ejjab Ri Lomor eo wõt ak ej juõn Ri Lelok Jinekjej bareinwõt.

Kwon Ekkõl Wõt kin ‘Men in Etao’ ko an Satan

15-17. (a) Ewi wãwen an Satan kajerbal lemnak ko rejjab jimwe ñan etaouk armij? (b) Ewi wãwen bwebwenato eo kin Job emaroñ rejañ kij?

¹⁵ Ak, emaroñ bin am tõmak bwe nan ko ilo Nan in Anij rej jerbal ñan yuk. Bõlen kwoj lemnak bwe kejatdikdik in kin mour indio ilo lal eo ekãl an Anij ej ñan armij ro jet ak ejjab tellokin am bõke. Elañe eindein, ta eo kwomaroñ kõmmane?

¹⁶ Kwomaroñ kememej nan in rejañ eo an Paul ñan Ri Epesõs ro: “Komin kõnõk aolepen ken tõrinae an Anij, bwe komin maroñ in jutõk mae etao ko an devil.” (Dri Epesõs 6:11) Ñe jej lemnak kin men in etao ko an Satan, emõkaj ad lemnak kin arõk mweiuk im mour etton. Emol bwe men kein rar kabo elõñ armij ro an Anij ilo ien etto im ilo ran kein. Bõtab, jejjab kõnan meloklok kin bar juõn men in etao an Satan—jibadbad ko an ñan likit ilo lemnak ko an armij ro bwe Jehovah Anij ejjab yokwe ir.

¹⁷ Devil eo elukkun kabel ilo an kajerbal lemnak rot kein ñan an kõmman bwe armij ro ren illok jen Anij. Kememej wõt kin nan ko an Bildad ñan Job: “Inem ekijkan juõn armij e maroñ in wãnik iben Anij? ak ekijkan an maroñ erreo, eo ej lotak jen kõra? Lo, im aliñ eo ejelok an jatõltil, im iju ko re jab erreo iman mejen: E nañin drik armij, eo e likakrõk wõt! im nejin armij, eo ej likakrõk!” (Job 25:4-6; Jon 8:44) Nan kein relukkun kabwerer ñan armij! Inem kwon jab kõtlok bwe Satan en kabwer yuk. Jen men in, kwon ekkõl wõt kin etao ko an Satan bwe kwon beran im kate yuk ñan kõmman men eo emõn. (2 Dri Korint 2:11) Ikijen Job, meñe ear aikwij bõk kajimwe, Jehovah ear kajerammõn e kin an kijenmij wõt ilo an lelok ruo alen men ko ear luji.—Job 42:10.

Jehovah “Elap Jen Buruer”

18, 19. Ewi wãwen Anij “elap jen buruer,” im ilo wãwen et ‘ejela men otemjej’?

¹⁸ Emol bwe, jet ien emaroñ bwe an bin jolok eñjake in ebwer elañe etto an bed ibben juõn armij. Ak, jitõbõn Jehovah emaroñ jibañ yuk ñan “jolõllok jikin ko re kajur . . . emwij koutiej e nae jela an Anij.” (2 Dri Korint 10:4, 5) Ñe lemnak ko rejjab jimwe rej kabwer yuk, kwon kalmenlokjen kin nan ko an ri jilek Jon: “Ilo men in je naj jela bwe kij jen mol im je naj karel buruer iman mejen. Bwe elañe buruer ej liakelok kij, Anij elap jen buruer im E jela men otemjelok.”—1 Jon 3:​19, 20.

¹⁹ Ta melelen nan kein “Anij elap jen buruer”? Jet ien, buruõd emaroñ liakelok kij, elaptata ñe jej jelã bwe jejjab wãppen im elõñ likjap ibbed. Ak kin wãwen ad mour, jej iminene in bõk juõn lemnak ejjab jimwe kin kij make, einwõt ejelok juõn men jej kõmmane emaroñ kabuñburuen Jehovah. Nan ko an ri jilek Jon rej kakememej kij bwe Jehovah elap jen buruõd! Ejjab kalimjek wõt bwid im likjap ko ad ak ej lale ta eo jemaroñ kõtõbrake. Bareinwõt ej jelã kin jibadbad im mejenkajjik ko ad. David ear je: “Bwe E jela wãwen kõmõnmõn kim; E kememej bwe kim bõñõlñõl.” (Sam Ko 103:14) Aet, Jehovah elaplok an jelã kin kij jen kij make!

“Bokrõnat e Wõleo” im “juõn Belin Kiñ”

20. Nan in kanan eo an Isaiah kin ien air naj jeblak ñan ailiñ eo air, ear kwalok ta kin wãwen an Jehovah lemnak kin ri karejar ro an?

²⁰ Ikijen ri kanan Isaiah, Jehovah ear lelok ñan armij ro an ilo ien etto juõn kejatdikdik bwe enaj kar kajeblak ir. Kinke rar bed ilo kamakoko ilo ailiñ in Babylon, kallimur in ear kakajur armij ro an! Ke ear reimanlok ñan ien eo armij ro an renaj kar jeblak ñan ailiñ eo air, Jehovah ear ba: “Kwo naj bareinwõt juõn bokrõnat e wõleo ilo pein Jeova, im juõn belin kiñ ilo pein am Anij.” (Aiseia 62:3) Ilo nan kein, Jehovah ear kaibujuij armij ro an. Ear kõmman eindein bareinwõt ñan ailiñ eo an ilo ran kein, Israel eo ilo jitõb. Ej kõmman einwõt ñe ear kwotak ir bwe armij otemjej ren lo ir.

21. Ewi wãwen kwomaroñ liki bwe Jehovah enaj kajerammõn yuk kin am tiljek im kijenmij wõt?

²¹ Meñe kanan in ear jejjet kitien mokta ibben ri kabit ro, ej kalikar kin wãwen an Jehovah kaibujuij aolep ro rej jerbal ñan e. Kin men in, ñe jej bere bwe Jehovah ej yokwe kij, jej aikwij kememej bwe meñe jejjab wãppen, jemaroñ aorõk einwõt “juõn bokrõnat ewõleo” im “juõn belin kiñ” iman mejen Jehovah. Inem jen kamõnõnõik buruen Jehovah ilo ad kõmanman ankil an. (Jabõn Kennan Ko 27:11) Ilo ad kõmman eindein, Jehovah enaj kajerammõn yuk kin am kijenmij im tiljek wõt!

[Kamelele ko itulal]

Kwoj Kememej Ke?

• Ewi wãwen jej ‘ro dron’ Jehovah?

• Etke eaorõk bwe jen watõk Jehovah einwõt Ri Lelok Jinekjej eo?

• Ta men in ‘etao ko’ an Satan jej aikwij kejbãrok kij jeni?

• Ilo wãwen et eo Anij “elap jen buruer”?

[Pija eo ilo peij 24]

Paul

[Pija eo ilo peij 24]

Elijah

[Pija eo ilo peij 24]

Hannah

[Pija eo ilo peij 26]

Bible eo eobrak kin nan in kakabilek ko remõn