Katak 1

Emaroñ Wõr Juõn Am Ilju Eo Ekamõnõnõ!

1, 2. Ri Kõmanmõn eo am ekõnan ta ñan kwe?

JUÕN jiburlep eo emãnãn jen juõn eo kwoj yokwe. Ettõñ jen buru ilo juõn ien mõñã emõn ibben ro jeram rejitenburu. Mõnõnõ eo am ñe kwoj lo an ajiri ro nejõm ikkure ilo lemõnõnõ. Ien ko kein rej tõre ko rekamõnõnõ ilo mour. Bõtab, ñan elõñ, abañ ko relap kin mour rej walok jen ien ñan ien. Elañe wãwen eo in kwar iione, kwon jab ebwer.

² Ej ankil an Anij bwe kwon lañliñ kin mõnõnõ eo ñan indio iumin wãwen ko remõntata ilo melan ko raibujuij. Menin ejjab ettõnak bajjek, bwe emol Anij ekõnan lewõj key eo ñan juõn ilju eo ekamõnõnõ. Key eo ej jelãlokjen.

3. Jelãlokjen et eo ej key eo ñan mõnõnõ, im etke jemaroñ liki bwe Anij emaroñ letok jelãlokjen in?

³ Jej konono kin juõn kain jelãlokjen eo ejej uan im ellãlok jen meletlet an armij. Eñin ej “jelãlokjen [eo] kin Anij.” (Jabõn Kennan Ko 2:5) Enañin 2,000 yiõ ko remotlok, juõn ri jeje Bible ear ba: “Im otemjej armij rej kaleki; a Eo e ar kalek men otemjej, E Anij.” (Dri Hibru 3:4) Lemnak kin joñan jelãlokjen eo ewõr ibben eo Ri Kõmanman men otemjej! Bible eo ej ba bwe Anij ej bwini im naetan iju ko otemjej. Melele in ekabwilõñlõñ, ke ewõr billion iju ko ilo galaxy in ad, im ro ri jedjed iju rej ba bwe ebar wõr enañin jibuki billion galaxy ko jet! (Sam 147:4) Anij ebar jelã men otemjej kin kij, inem bar wõn emaroñ letok uak ko remõnlok ñan kajitõk ko raorõk kin mour?​—Matu 10:30.

4. Etke jen watõk bwe Anij en letok nan in kamelele ko ñan tel kij, im book et eo ej kajejjet aikwij in?

⁴ Pijaiki ruo emaan rej kajeoñ kõmmane waan ettõr ko waerro. Juõn iair kin an ebwer ej jolallok kein jerbal ko an. Eo juõn ilo inemõn ej kajimwe abañ eo, ej iñite key eo, im ettõñdikdik ke ej kejjo engine eo im emõn an jo. Ejamin bin am kile wõn eo ian lõmarein ruo kar wõr an book in kamelele jen company eo. Ejjab jimwe lemnak in ke bwe Anij en kar letok nan in kamelele ko ñan tel kij ilo mour? Einwõt am maroñ jelã, eindein an Bible eo ba​—ej juõn book in kamelele im tel jen Ri Kõmanman eo ad, kar kõmmane ñan letok jelãlokjen eo kin Anij.​—2 Timote 3:16.

5. Ewi aorõkin jelãlokjen eo ej bed ilo Bible eo?

⁵ Elañe nan kein ilo Bible eo remol, lemnak kin joñan aorõkin jelãlokjen eo ebed ilo book in! Ilo Jabõn Kennan Ko 2:1-5 ej rejañ kij bwe jen bukõt meletlet, ñan kũbũji einwõt ñe jej bukõt juõn mweiuk ettino im e aorõk​—ejjab ilo jelãlokjen eo an armij, ak ilo Nan eo an Anij make. Elañe jej bukõte ie, jenaj “lo jelãlokjen [eo] kin Anij.” Kin an Anij melele kin joñan maroñ ibbed im aikwij ko ad, ej letok katak ko ñan jibañ kij lo ainemõn im mõnõnõ ilo mour ko ad. (Sam 103:14; Aiseia 48:17) Bareinwõt, jelãlokjen eo kin Anij ej letok ñan kij ennan ko rekairujruj im remõn.

MOUR INDIO!

6. Ta bedbed in liki eo Jesus Christ ear letok ikijen jelãlokjen eo kin Anij?

⁶ Eo ebuñbuñ ilo bwebwenato, Jesus Christ, ear kalikar tokjen jelãlokjen in kin Anij. Ear ba: “Im men in mour in drio, bwe ren jelã Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Lemnak mõk​—jelãlokjen eo ej tellok ñan mour indio!

7. Ta kein kamol eo ke Anij ear jab karõk bwe jen mij?

⁷ Jab mõkaj in kajettokjen melele in kin mour indio einwõt ej juõn ettõnak bajjek. Ijellokin, lale mõk wãwen kar kõmanmõn enbwinin armij. Ekabwilõñlõñ wãwen kar lamlame ñan edjoñ, roñlokjen, ãtbwin, lolokjen, im eñjake. Ekanuij lõñ men ko ion lal rej kamõnõnõik kij​—mõñã ko renno, ainikien emõn an bao ko, bwin melu in ut ko, melan ko raibujuij, kamao eo ekamõnõnõ ibben ro mõttad! Im kamelij eo ad elaplok an kabwilõñlõñ jen juõn computer ekajur, bwe ej kamaroñ kij ñan kamolol im mõnõnõ kaki. Kwoj lemnak ke bwe Ri Kõmanmõn eo ad ekõnan bwe jen mij im luji aolepen men kein? Ejjab ekkar lok ñan kile ke bwe ekõnan bwe jen mour ilo mõnõnõ im mour ñan indio? Eokwe, eñin tokjen jelãlokjen eo kin Anij ñan yuk.

MOUR ILO PARADISE

8. Ta eo Bible ej ba kake kin ilju eo an armij?

⁸ Men eo Bible ej ba kake kin ilju eo an lal im armij ro emaroñ kitibuj juõn wõt nan​—Paradise! Jesus Christ ear kennan kake ke ear jiroñlok juõn emaan eo ear bojak in mij: “Kwo naj bed ibba ilo Paradise.” (Luk 23:43) Ennan eo kin Paradise ejelok bere ear kakememej leo kin bed eo ekamõnõnõ an ro jemed im jined moktata, Adam im Eve. Ke Anij ear kõmanmõn ir, rar wãppen im mour ilo juõn jikin kallip eo Ri Kõmanmõn eo ear karõke im kalbwini. Ilo jimwe kar naetan jikin kallip in Eden, ke ãt in ej melelen mõnõnõ.

9. Kar ewi wãwen mour ilo Paradise eo jinoin?

⁹ Jikin kallip in ear lap an kamõnõnõ! Kar juõn paradise emol. Ian wijki ko raibujuij ie kar wõr wijki ko rar kalle leen ko renno. Ke Adam im Eve rar wate melan eo air, idak jen den ko renno ie, im aintok leen wijki ko, kar ejelok unin air inebata ak lelñoñ. Bar menin mour ko rar jab menin kalelñoñ, kinke Anij ear kairoij leo im lio belen ioir aolep ilo yokwe. Kobatok ibben menin, armij ro ruo moktata rar kanuij ejmour. Toan wõt airro bokake Anij, ear bed imairro juõn ilju eo ekamõnõnõ ñan indio. Kar lelok ñan ir jerbal eo emõn ñan kejbãrok kabijukneir eaibujuij ilo Paradise. Bareinwõt, Anij ear lelok ñan Adam im Eve maroñ eo ñan airro “kobrak lõl im kajur jen e.” Irro im ro ineiir ren kar erakelok tõrerein Paradise eo mae ien aolepen lal in ad en kar erom juõn jikin aibujuij im kamõnõnõ.​—Jenesis 1:28.

10. Ke Jesus ear konono kin Paradise, ta eo ear lemnak kake?

¹⁰ Bõtab, ke Jesus ear kennan kin Paradise, ear jab kajitõk ibben juõn emaan eo ear bojak in mij bwe en lemnak kin ien ko remotlok. Jaab, Jesus ear konono kin ran ko rej itok! Ear jelã bwe aolepen lal, eo kabijukned, enaj kar erom juõn paradise. Ilo wãwen in, Anij enaj kajejjet karõk eo an jen jinoin kin armij im lal in ad. (Aiseia 55:10, 11) Aet, Paradise enaj jeblaktok! Im enaj ewi wãwen? Kõtlok bwe Nan eo an Anij, Bible eo Ekwojarjar, en uak.

MOUR ILO PARADISE EO EMWIJ KAJEBLAKTOK

11. Ilo Paradise eo naj kajeblaktok, ta enaj walok ñan nañinmij, bwijwõlã, im mij?

¹¹ Ejamin bar wõr nañinmij, bwijwõlã, im mij. “Inem mejen ro re bilo re naj bellok, im naj bõk binjen lojilñin ro re roñjamon. Inem armij e kirro e naj kãki einwõt juõn hart, im lo an dri ban konono e naj al.” (Aiseia 35:5, 6) “Anij e naj ber ibbeir [armij]. Im e naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.”​—Reveles̃õn 21:3, 4.

12. Etke jemaroñ liki bwe enaj ejelok kõtõrãi kien, kowadoñ im nana ilo Paradise eo enaj itok?

¹² Kõtõrãi kien, kowadoñ, im nana renaj jako ñan indio. “Ro rej kõmman nana renaj jako . . . Jidik wõt ien, im eo enana enaj jako . . . E jamin bed. A ro ettã burueir renaj jolet lal.” (Psalm 37:9-11, New World Translation) “A ro renana, naj kamakit ir jen lal; im ro rejelã mon, naj totak ir jen e.”​—Proverbs 2:22, NW.

13. Ewi wãwen Anij enaj bõktok ainemõn?

¹³ Ainemõn enaj lap ibelakin lal. “Ej [Anij] kejemlok tõrinae ko ñõn jemlokin lõl; Ej kabwilok libon eo im bukwe mõri.” (Sam 46:9) “Ro remõn re naj jerammõn, im e naj lõñ ainemõn mae ien joko aliñ.”​—Sam 72:7.

14, 15. Ta eo Bible ej ba kake kin moko, jerbal, im mõñã ilo Paradise eo naj kajeblaktok?

¹⁴ Moko renaj kon im jerbal ko rekajuburu. “Re naj kalek moko im jokwe ilo ir . . . Rejamin kalek im bar juõn ej jokwe ie; re jamin kallip im bar juõn ej mõña: bwe einwõt ran ko an juõn wijki, ej ran ko an ro droõ, im ro I ar kãlet ir, naj etto air mõnõnõ kake jerbal an peir. Re jamin jerbal bata, ak keutak ñõn kokkure.”​—Aiseia 65:21-23.

¹⁵ Enaj kanuij lõñ mõñã ko rõũne. “Enaj kanuij lõñ wheat ion lal; ion jabõn tol ko renaj jioblok.” (Psalm 72:16, NW) “Lõl e ar letok an lõñlok, aet am Anij wõt, E naj kejerammõn kim.”​—Sam 67:6.

16. Etke mour ilo Paradise enaj lap an kamõnõnõ?

¹⁶ Mour indio ilo juõn paradise ilal enaj kamõnõnõ. “Ro remõn renaj jolet lal, im jokwe iloan ñan indio.” (Psalm 37:29, NW) “Ene jemaren im eo e mõra re naj mõnõnõ; im ene jemaren e naj lõñliñ, im ebul einwõt mãr ros.”​—Aiseia 35:1.

JELÃLOKJEN IM ILJU EO AM

17. (a) Ta eo kwoj aikwij kõmmane elañe kwoj reel kin mour ilo Paradise? (b) Ewi wãwen ad jelã bwe Anij enaj bõktok oktak ko relap ñan lal in?

¹⁷ Elañe mour ilo Paradise ekareel yuk, jab kõtlok bwe jabdewõt men en bõprae yuk jen am bõk jelãlokjen eo kin Anij. Ej yokwe armij im enaj bõktok oktak ko rej menin aikwij ñan kõmman bwe lal en juõn paradise. Ealikar, bwe elañe ear wõr am maroñ ñan kajemlok eñtan im ekajet bwid ko elap air walok ilo lal, kwo jamin kar kõmman eindein ke? Jen kõtmene ke bwe enaj diklok ibben Anij? Ilo mol, Bible eo ej konono ilo kajin alikar kin juõn ien ñe Anij enaj jolok jukjuk im bed in ebwok im kõkãle kin juõn kien ewãppen im ewãnik. (Daniel 2:44, NW) Ak ebar lõñlok men ko Bible eo ej kwalok kake. Ej kwalok ñan kij wãwen jemaroñ ellã im mour iloan lal eo ekãl Anij ear kallimur kake.​—2 Piter 3:13; 1 Jon 2:17.

18. Ta jelãlokjen eo kin Anij emaroñ kõmmane ñan yuk kiõ?

¹⁸ Jelãlokjen eo kin Anij emaroñ lap kunan ñan yuk kiõ wõt. Bible eo ej uaki kajitõk ko remũlal im elap air kabwokbwok ilo mour. Am bõk nan in tel eo jene enaj jibañ yuk ejaake juõn jimjera eo ibben Anij. Juõn jerammõn elap! Im menin enaj kamaroñ yuk ñan lo ainemõn eo im Anij wõt emaroñ letok. (Dri Rom 15:13, 33) Ilo am jino bõk jelãlokjen in eaorõk, kwoj jibadõk men eo eaorõktata im elap an emõn ilo mour eo am. Kwonaj jamin ajlok kin am kar bõk jelãlokjen in kin Anij eo ej tellok ñan mour indio.

19. Ta kajitõk eo jenaj etale ilo katak in tok juõn?

¹⁹ Emwij ad jitõñlok ñan Bible eo einwõt juõn book kobban ej jelãlokjen eo kin Anij. Bõtab, ewi wãwen ad jelã, bwe ejjab juõn book jen armij ro remeletlet, ak ej juõn men eo ekanuij laplok? Jenaj etale kajitõk in ilo katak in tok juõn.

ETALE JELÃLOKJEN EO AM

Etke jelãlokjen eo kin Anij emaroñ tel yuk ñan mõnõnõ eo ej indio?

Naj ewi wãwen mour ilo Paradise eo ilal im ej itok wõt?

Etke kwonaj bõk tokjen jen am bõk jelãlokjen eo kin Anij kiõ?