Jisõs Ej Itok Einwõt Kiñ

ELIKIN lok wõt an kemour dri oor ro ruo re bilo, Jisõs ej itok ñõn juõn jikin kwelok eo erik ebaak Jerusalem. Ej jiroñ ruo ian dri kaloran im ba: ‘Komin dreloñ iloan jikin kwelok eo im kom naj lo juõn kiru ass. Komin kotlok e im ãñintok e ñõn ibã.’

Ke r’ar ãñintok ass eo ñõn e, Jisõs ej uwe ion. Inem ej uwe lok ñõn Jerusalem ke ebak. Ke ej kebaklok jikin kwelok eo, juõn jar elap in armij ej itok in wonmaik e. Enañin aolepeir rej wutik kobe ko air im erlokwi ilo ial eo. Ro jet rej jeki kimij jen ni ko. Rej eri men kein ilo ial eo bareinwõt, im rej lamij im ba: ‘Anij en kajerammõn kiñ eo ej itok ilo etan Jeova!’

Ien ko etto ilo Israel, kiñ ro rekãl rekõn uwe ñõn loan Jerusalem ion juõn kiru ass ñõn kwalok ir mõke ñõn armij ro. Eñin men eo Jisõs ej kõmõne. Im armij rein rej kwalok air kõnan bwe Jisõs en kiñ ioir. Ak ejjab aolep armij ro re kõnan bwe en kiñ. Je maroñ kile men in jen men eo ej walok ilo ien eo Jisõs ej dreloñ loan temple eo.

Ilo tempel eo Jisõs ej kemour armij ro re bilo im kirro. Ke ajiri ro rej lo men in, rej lamij im nebar Jisõs. Ak men in ej kaillu pris ro, im rej jiroñ Jisõs im ba: ‘Kwoj roñ ke men eo ajiri ro rej ba?’

‘Aet, Ij roñ,’ Jisõs ej uak. ‘Kom ar jab read ke ilo Baibel, ijo ej ba: “Jen loñin ajiri ro Anij e naj bõktok nebar?”’ Inem ajiri ro rej nebar wõt kiñ eo an Anij.

Je kõnan kõmõn einwõt ajiri rein, jejjab ke? Jet armij re maroñ kajeoñ bõprae kij jen ar konono kin ailiñ in Anij. Ak je naj kennanek wõt ro jet kin men ko remõn me Jisõs e naj kõmõni ñõn armij ro.

E jañin kar ien eo bwe Jisõs en jino iroij einwõt kiñ ke e ar ber ion lõl. Ñat eo e naj itok ien in? Ro dri kaloran Jisõs re kõnan jela. Je naj konono kin men in kiõ.