Juõn Kiru Ass Ej Konono

KWO nañin roñ ke kin an juõn kiru ass konono? Bwelen kwo naj ba ‘Jaab, bwe men in mour ko re ban konono.’ Ak Baibel eo ej kwalok kin juõn kiru ass im e ar konono. Jen lale wãwen an kar walok men in.

Dri Israel ro r’ar iten bojak in dreloñ na loan enen Ke’nean. Be’lak, kiñ in Mo’ab, e mijõk dri Israel ro. Kin men in e ar kir juõn eman e meletlet etan Be’leam bwe en itok im kole dri Israel ro. Be’lak ej kalimur bwe e naj lelok elap monni ñõn Be’leam, im kin men in Be’leam ej uwe ion kiru ass eo nejin im ilok ñõn iben Be’lak.

Jeova e jab kõnan bwe Be’leam en kole armij ro An. Kin men in ej jilkinlok juõn enjel kin juõn jãji e aitok bwe en jutak ilo ial eo im kabwijrak Be’leam. Be’leam ejjab maroñ lo enjel eo kin mejen, ak kiru ass eo e ar kajeoñ in jeor jen enjel eo, ak ke e ar jab maroñ in jeor, e babu ilo ial eo. E lukkun illu Be’leam, im e ar dreñlokwe ass eo kin jokwõn eo an.

Inem Jeova e ar kõmõn bwe kiru ass eo nejin Be’leam en konono iben. ‘Ta eo I ar kõmõne ñõn kwe bwe kwon dreñlokwe io?’ ass eo ej kajitõk.

‘Kin am kajirere kake iõ,’ Be’leam ej ba. ‘Elañe e ar wor juõn jãji ilo peiõ I naj kar mõn yuk!’

‘I kin kõmõn einwõt ñõn kwe mokta ke?’ ass eo ej kajitõk.

‘Jaab,’ Be’leam ej uak.

Ilo ien in Jeova e ar kotlok bwe Be’leam en lo enjel eo me ej jutak ilo ial eo im jibwe jãji eo ilo pein. Enjel eo ej ba: ‘Etke kw’ar dreñlokwe ass ne nejõm? I ar itok in boprae yuk bwe kwon jab ilok in kole Israel. Elañe ass eo nejõm e ar jab jeor jen Iõ, I naj kar mõn yuk, a I naj kar kejbarok an ass ne nejõm mour.’

Be’leam ej ba: ‘I ar jerawiwi. Bwe I ar jab jela bwe kw’ar jutak ilo ial eo.’ Enjel eo ej kotlok Be’leam, im Be’leam e ar ilok wõt ñõn iben Be’lak. E ar kajeoñ wõt in kole Israel, ak Jeova e ar kõmõn bwe en oktak im kajerammõn Israel jilu alen.