Kwon Likit Men Ko Raorõk Moktata!

Ej jotenin kwelok eo, ak ewõr jet jerbal ko kwoj aikwij kõmmani. Ta eo kwonaj likit moktata?

KWOJ juõn leo belele im juõn jemen. Ñe jemlokin juõn ran eaetok im kamõkmõk ej ebaktok, kwoj jino lemnak kin kwelok eo an congregation eo ilo joten eo. Elañe emõkaj am etal jen jikin jerbal eo, enaj bwe wõt ien ñan am tutu, kõmman am nuknuk, im mõñã jidik mokta jen kwoj aikwij etal ñan mõn kwelok eo. Ilo idiñ, boss eo am ej kebak yuk im kajitõk elañe kwomaroñ kaetoklok ien am jerbal. Ej kallimur bwe enaj kalaplok wõnãm. Money eo kwoj aikwiji.

Ak kwoj juõn lio belele im juõn jinen. Ñe kwoj keboji mõñã ko ilo jota, kwoj lo elõñ nuknuk ko rejañin kametal, jet iair kwonaj aikwiji ilju. Kwoj kajitõkin kwe make, ‘Elañe ij etal ñan kwelok eo jotenin, ñããt eo enaj wõr ien ñan aõ kametal?’ Kwoj kab bõk juõn jerbal ej full-time, im kwoj jino lo joñan an bin ñan lolorjake eddo ko am ilo mweo im ilo ejja ien eo wõt kabwe aikwij ko ñan mour.

Ak kwoj juõn ri school. Ilo room eo am, table eo eobrak kin homework ko am. Elõñ iair kwar bõki elõñ ien remotlok, ak kwar aibedbed kaki, im kiõ jet katak ko rej aikwiji ilo ejja ien eo wõt. Kwo kõnan kajitõk ibben jemõm im jinõm elañe kwomaroñ bedwõt im jab kwelok bwe kwon maroñ kadedelok homework ko am.

Ta eo kwon kar likit mokta: kaetoklok ien am jerbal, kametal nuknuk ko, kõmman homework ko, ak etal ñan kwelok eo an congregation eo? Ta melelen likit men ko raorõk mokta? Ta lemnak eo an Jehovah?

Ta Eo En Moktata?

Ejjabto elikin an ri Israel ro bõk Kien ko Joñoul, rar lo juõn emaan ej ae kane ilo ran in Sabbath. Ear mo men in iumin Kien eo. (Bwinbwin 15:32-34; Duteronomi 5:12-15) Ewi wãwen kwonaj kar ekajete case in? Kwonaj kar jolok bwid eo an leen ke, im kõmmanwa, bwe ear jab jerbal ñan kejbãrok juõn wãwen mour emweie ak ear kõnan kabwe aikwij ko an family eo? Kwonaj ke kar ba ke bwe enaj lõñ ien ko ilo yiõ eo ñan kejbãrok ran in Sabbath eo im bwe an likjap in kejbãroke juõn alen, bõlen kin an likjap in karõk lok iman, enaj bidodo lok ñan jolok an bwid?

Jehovah ear watõk case eo elaplok an aorõk. Tokelik Bible eo ej ba, “Jeova e ar ba ñõn Moses; ‘Emol en mij armij eo.’” (Bwinbwin 15:35) Etke ear kajur eñjake eo an Jehovah kin men eo armij eo ear kõmmane?

Kar wõr jiljino ran ko ñan an armij ae kane im bareinwõt bõk aikwij ko ikijen mõñã, nuknuk, im jikin jokwe. Ran eo kein kajiljilimjuõn kar kajenoloke ñan kabwe aikwij ko air ilo jitõb. Meñe ear jab bwid ñan ae kane, ear bwid ñan kajerbal ien eo ren kar kajerbale ñan kabuñ ñan Jehovah ñan kõmmane men in. Meñe Christian ro rejjab bed iumin Kien eo ikijen Moses, men in ear walok ejjab katakin kij ke ñan ad likit men ko raorõk moktata?​—Dri Pilippai 1:10.

Elikin air bed ilo ene jemaden iumin 40 yiõ ko, ri Israel ro rar bojak ñan deloñ ilo Enen Kallimur eo. Jet rar mõk in mõñã men in letok in manna jen Anij ilo ene jemaden eo im ejelok bere rar reimanlok ñan mõñã mõñã ko jet. Ñan jibañ ir kejbãrok juõn lemnak ejimwe ñe rej deloñ ilo ene eo “e bwijliplip kin milk im hõnni,” Jehovah ear kakememej ir: “Bwe armij e jab mour kin bred wõt, a kin men eo jabrewõt ej walok jen loñin Jeova, armij ej mour.”​—Exodus 3:8; Duteronomi 8:3.

Elap an kar ri Israel ro aikwij jerbal ñan bõk “milk im hõnni.” Rar aikwij anjo ion jar in tarinae ko, kalek moko imwiir, im kõmman jikin kallip ko. Meñe eindein, Jehovah ear kakien armij ro ñan kejbãrok jidik ien kajjojo ran ñan kalmenlokjen kin men ko lor jitõb. Rar bareinwõt aikwij bõk ien ñan katakin ro nejiir kin wãwen ko an Anij. Jehovah ear ba: “Im komin katakin ro nejemi kake [kien ko aõ], im konono kake ñe kwoj jijõt ilo mweo imõm, im ñe kwoj etal ilo ial, im ñe kwoj babu, im ñe kwoj jerkak.”​—Duteronomi 11:19.

Jilu alen ilo juõn yiõ maan ro otemjej in Israel im ri proselyte ro kar kakien ir ñan jãde iman Jehovah. Ilo air kile bwe aolepen family eo enaj kar bõk tokjen ko ilo jitõb jen ien rot kein, elõñ bõran family ko rar karõk bwe limaro beleir im ro nejiir ren etal ibbeir. Ak wõn ro renaj kar kejbãrok moko imwiir im jikin kallip ko air jen ri kijirãt ro ke ear jako family ko? Jehovah ear kallimur: “Ejelok armij e naj ankwõnak eneo am, ñe kwoj wõnliñlok, in walok iman Jeova am Anij, jilu alen ilo yiõ.” (Exodus 34:24) Ri Israel ro rar aikwij lukkun tõmak bwe elañe rar likit mokta men ko lor jitõb, rejamin jerata kin men ko lor kanniek. Jehovah ear kajejjet ke nan ko an? Emol ear!

Bukõt Mokta Ailiñ eo

Jesus ear katakin ri kalor ro an ñan likit tokjen ko ilo jitõb iman men otemjej. Ilo Katak eo an ion Tol eo, ear kakabileklek ro rej roñjake: “Inem komin jab inebata buruemi im ba, ‘Ta je naj mõña?’ ak ‘Ta je naj irak?’ ak ‘E naj kijkan ar balle?’ A komin bukot mokta ailiñ in Anij, im kwojarjar eo An; im naj koorlok men kein otemjej [aikwij ko ilo kanniek] ñõn kom.” (Matu 6:31, 33) Ejjabto elikin an kar Jesus mij, ri Christian ro rekãl im rej kab baptais rar lor kakabilek in. Elõñ iair rar ri Jew ro ak ri proselyte in ri Jew ro me rar etal ñan Jerusalem ñan kememe kwojkwoj in Pentecost eo ilo 33 C.E. Ke rar bed ijo, juõn men rar jab kõtmene kake ear walok. Rar roñ im bõk news eo emõn kin Jesus Christ. Kin air kijerjer in kalaplok air jelã kin tõmak in ekãl, rar bedwõt ilo Jerusalem. Men in aikwij ko air ilo kanniek rar maatlok, ak men ko lor kanniek kar kein karuo ilo aorõkiir. Rar lo Messiah eo! Christian ro jeiir im jatiir rar ajeje men ko ibbeir ilo kanniek bwe aolep ren maroñ wõnmanlok im “ber im bin ilo katak im komao iben dron an ro dri jilik . . . im ilo jar.”​—Jerbal 2:42.

Tokelik, jet Christian ro rar jerwane aikwij eo ñan keini air kamao ibben don ilo kwelok ko. (Dri Hibru 10:23-25) Bõlen rar jino arõk mweiuk, im jerwane men ko lor jitõb ke rar kabwe aikwij ko air make im ko an family ko air. Elikin an rejañ ro jein im jatin bwe ren jab jakkeini air kwelok ibben don, ri jilek Paul ear je: “Komin jab arõk dala; komin jokõne kin men ko ami: bwe E ar ba, ‘I jamin likit yuk, im I jamin illok jen kwe in drio.’”​—Dri Hibru 13:5.

Kakabilek in an Paul ear lukkun jejjet. Enañin lalem yiõ ko elikin an kar Paul jeje letter eo an ñan ri Hebrew ro, jar in tarinae eo an Rome iumin Cestius Gallus ear kabole Jerusalem. Christian ro retiljek rar kememej nan in kakkõl eo an Jesus: “Ñe kom naj lo [men in] . . . , eo ej ber ion im en jab tolõl iloan im, en jab dreloñ bwe en bõk men eo jabrewõt jen mweo imõn. Im eo ej ber ilo jikin kallip en jab jeblak bwe en bõk kobe eo an.” (Mark 13:14-16) Rar jelã bwe lomor eo air ear jab wawa ion jikin jerbal eo air ak aorõkin mweiuk ko air, ak ion air bokake nan in kibel ko an Jesus. Ro rar jerbale nan in kakabilek eo an Paul im likit men ko lor jitõb mokta ejelok bere rar lo bwe ear bidodolok air ilok jen moko imwiir, jikin jerbal ko, nuknuk ko, im mweiuk ko air rar kaorõki im ko, ñan tol ko jen jabdewõt ro rar jab kanemkwoj ir jen arõk money.

Ewi Wãwen Jet Rar Likit Men ko Raorõk Mokta ilo Ran Kein

Christian ro retiljek rainin rej kaorõk air keini air kamao ibben ro jeiir im jatiir, im rej karmijete ir make bwe ren bed ilo kwelok ko. Ilo jet bukwon ko, jikin jerbal ko wõt im rej kõttãik don ie rej bellok. Juõn brother ej ba ej mõnõnõ in binej jenkwon ri jerbal ro mõttan ilo boñin Saturday, ien eo im enañin aolep armij ro ilo bukwon eo rekõnan kajerbale ñan men in kamõnõnõ ko, elañe renaj binej jenkwon ilo jotenin kwelok ko. Brother ro jet me rej ri jerbal ro ilo ejja schedule rot in rej bed ilo kwelok ko an bar juõn congregation ebak elañe jerbal eo air ej bõprae air bed ilo ien kwelok ko air make. Ilo wãwen in, ejeja air jako jen juõn kwelok. Juõn armij ilo Canada eo ej kab itoklimo ilo Bible ear mõkaj an kile aorõkin kwelok ko ilo Theocratic Ministry School im Service Meeting eo, ak schedule eo an ilo jikin jerbal eo ear kõmman bwe en kabañ an bed ilo kwelok ko. Kin men in, ear kõllãik juõn ri jerbal mõttan ñan binej jenkwon ilo ien an jerbal eo an bwe en maroñ anemkwoj in bed ilo kwelok kein raorõk.

Elõñ ro rej eñtan kin nañinmij ko relap ejeja air jako jen juõn kwelok. Rej roñjake program eo ilo moko imwiir ikijen telephone hookup ak ikijen juõn tape rar kanne ñe rejjab maroñ bed ilo Kiiñdom Hall eo. Rej kwalok juõn kamolol emõn kin men in letok ko ilo jitõb jen Jehovah ikijen “dri korijer e tiljek im meletlet”! (Matu 24:45) Christian ro rej kouk ro jemeir im jineir reritto rej lukkun kamolol ñe juõn brother ak sister ej ba ej mõnõnõ in bed ibben jemen ak jinen bwe en maroñ bed ilo kwelok eo an congregation eo.

Karõk Lok Iman!

Ro jemen im jinen me rej kile aikwij ko air make ilo jitõb rej jibañ ro nejiir ñan kamolol kin kwelok ko an Christian. Rej kõtmene bwe ro nejiir ren kõmman homework ko air ilo wõt ien eo rej bõki jen air aibedbed ñan air kõmmani. Ilo jotenin kwelok ko ajiri ro rej kõmman homework ko air ilo ien eo wõt rej jeblak jen school. Rejjab kõtlok bwe men ko rej itoklimo kaki im makitkit ko jet ren bõprae ien kwelok ko an congregation eo.

Einwõt juõn leo belele im jemen, kwoj kõmman ke bwe bed ilo kwelok ko en moktata? Einwõt juõn lio belele im jinen, kwoj karõk ke eddo ko am bwe en wõr ien am bed ilo kwelok? Einwõt juõn jodikdik, kwoj likit ke homework ko am mokta jen ien kwelok ko ke ak kwelok ko mokta jen homework ko am?

Juõn kwelok an congregation ej juõn men in letok ej yokwe jen Jehovah. Kwoj aikwij in kõmman jabdewõt jibadbad ko ñan bõk kunam ilo karõk in. Jehovah enaj lap an kajerammõn yuk elañe kwoj likit men ko raorõk mokta!