KATAK 11

Kõnono ilo Juon Wãween Ekãitoktoklimo

Jerbal 18:24, 25

ILO TUKADU: Kãitoklimoik armej ro im kõm̦akũt bũrueer ilo am̦ kõnono ilo juon wãween ekairujruj.

Likũt katak eo ilo bũruom̦. Ilo am̦ kõpooje katak ak men eo kwõnaaj kõnono kake, em̦m̦an ñe kwõj kõl̦mãnl̦o̦kjen̦ kõn unin an aorõk ennaan eo kwõj itõn kwal̦o̦ke. Kate eok bwe kwõn lukkuun mel̦el̦e kõn katak eo bwe kwõn maroñ kwal̦o̦ke jãn bũruom̦.
L̦õmn̦ak kõn armej ro. Kõl̦mãnl̦o̦kjen̦ kõn ewi wãween an mel̦el̦e ko kwõnaaj riiti ak katakin armej ro kaki naaj jipañ er. Bareinwõt, kajjioñ lale ta ko kwõmaroñ kõm̦m̦ani bwe kwõn maroñ kwal̦o̦k mel̦el̦e kein ilo juon wãween enaaj kal̦apl̦o̦k an armej ro kaorõki.
Wãween am̦ katakin en kairujruj. Kõnono ilo juon wãween ekãitoktoklimo. Bareinwõt, kwõmaroñ kaalikkar eñjake ko am̦ ilo turin mejam̦ im ilo wãween am̦ kõm̦akũt peim̦.

Kõjparok bwe kwõn jab kõm̦akũt peim̦ ilo juon wãween me ej ãinwõt juon imminene kõnke men in emaroñ kõm̦ad armej ro jãn aer lukkuun roñjake katak eo. Ijoke, wãween am̦ kõm̦akũt peim̦ en jejjet ekkar ñan boin ko kwõj kajjioñ kwal̦o̦ki. Ñe kwõj kaalikkar boin ko raorõk ak kajjioñ kõm̦akũt bũruon armej ro bwe ren jerbale juon boin, eñin iien eo ej aikuj l̦aptata an kairujruj am̦ kõmel̦el̦e. Ijoke kõjparok bwe en jab tarjen joñan am̦ kõm̦m̦ane men in ilo aolepen katak eo kõnke emaroñ kõm̦m̦an an armej ro m̦õk in roñjake.