Peptaij​—Juon Mejãnkajjik El̦ap Tokjãn!

Jesus ear katakin bwe peptaij ej juon men juon Kũrjin ej aikuj in kõm̦m̦ane. (Riit Matu 28:19, 20.) Ak ta in peptaij? Im ta ko juon armej ej aikuj kõm̦m̦ani ñan tõpare mejãnkajjik in?

1. Ta in peptaij?

Naan in “peptaij” ej itok jãn juon naan ilo kajin Grik me ej mel̦el̦ein “katulo̦k” ium̦win dãn. Ke Jesus ear peptaij, ear tulo̦k ilo Reba Jordan, innem ear “ato jãn dãn eo.” (Mark 1:9, 10) Ejja ãindeinl̦o̦k wõt, ñe Kũrjin ro rem̦ool rej peptaij, aolepen ãnbwinnier ej tulo̦k ium̦win dãn.

2. Ta eo juon ej kaalikkare ñe ej peptaij?

Ilo an juon peptaij, ej kaalikkar bwe em̦õj an ajel̦o̦k mour eo an ñan Jeova Anij. Ewi wãween an juon ajel̦o̦k mour eo an? M̦okta jãn an peptaij, ej jar ñan Jeova im ba ñane bwe ekõn̦aan karejar ñan E ñan indeeo. Ej kallim̦ur bwe enaaj kabuñ ñan Jeova wõt im kõm̦m̦an bwe ankilaan Anij en men eo eaorõktata ilo mour eo an. Ej kããlõt ñan ‘kaarmejjeteik e make im . . . jab bõjrak jãn an l̦oore’ joñak eo an Jesus im katak ko an. (Matu 16:24) An ajel̦o̦k mour eo an im peptaij ej kõmaroñe bwe en wõr juon an jem̦jerã epaak ippãn Jeova im rũttõmak ro m̦õttan.

3. Ta ko juon armej ej aikuj in kõm̦m̦ani bwe en maroñ peptaij?

M̦okta jãn am̦ maroñ peptaij, eaorõk ñan katak kõn Jeova im kalõk ak kõkajoore tõmak eo am̦ ilo e. (Riit Hibru 11:6.) Ilo an eddekl̦o̦k jel̦ãl̦o̦kjen̦ im tõmak eo am̦ ilo Jeova, yokwe eo am̦ ñane enaaj bareinwõt l̦apl̦o̦k. Innem ejjel̦o̦k pere kwõnaaj kõn̦aan kwal̦o̦k naan kõn e im mour ekkar ñan kien ko an. (2 Timote 4:2; 1 Jon 5:3) Ñe juon armej ej mour “ekkar ñan wãween eo Jeova ej m̦õn̦õn̦õ kake, kõnke [en] maroñ lukkuun kabuñbũruon,” emaroñ pepe ñan ajel̦o̦k mour eo an ñan Anij im peptaij.​—Kolosse 1:9, 10.a

KAM̦WILAL̦L̦O̦K AM̦ MEL̦EL̦E

4. Jemaroñ katak jãn iien peptaij eo an Jesus

Riit Matu 3:13-17 ñan kal̦apl̦o̦k am̦ mel̦el̦e kõn men ko jet rar wal̦o̦k ilo iien peptaij eo an Jesus. Innem bwebwenato kake kajjitõk kein:

• Jesus ear ke juon niñniñ ke ear peptaij?

• Ewi wãween an kar peptaij? Kar ke utdikdiki kõn dãn?

Jesus ear jinoe jerbal eo an ejejuwaan ijin ioon lal̦ me Anij ear lel̦o̦k ñane ke ear peptaij. Riit Luk 3:21-23 im Jon 6:38, innem bwebwenato kake kajjitõk in:

• Ãlikin an kar Jesus peptaij, jerbal ta eo ear likũt m̦oktata ilo mour eo an?

5. Peptaij ej juon mejãnkajjik kwõmaroñ tõpare

Ilo jinoin kwõmaroñ l̦õmn̦ak bwe am̦ ajel̦o̦k mour eo am̦ im peptaij ej juon men elukkuun pen ñan tõpare. Bõtab kwõmaroñ kõm̦m̦an wõnm̦aanl̦o̦k ko m̦ae iien kwõj eñjake bwe kwõpojak ñan kõm̦m̦ane jokãlõt in eaorõk. Ñan lale jet iaan armej ro rar kõm̦m̦ane men in, kõjo̦e PIJAIN ALWÕJ eo.

PIJAIN ALWÕJ: Building a Relationship With Jehovah (1:11)

Riit Jon 17:3 im Jemes 1:5, innem bwebwenato kake kajjitõk in:

• Ta ko remaroñ jipañ juon armej bwe en pojak ñan an peptaij?

1. Jej ajel̦o̦k mour eo ad ñan Jeova ilo ad ba ñane bwe jekõn̦aan karejar ñane ñan indeeo

2. Ilo iien eo jej peptaij, jej kaalikkar ñan ro rej pãd ijo bwe em̦õj ad ajel̦o̦k mour eo ad ñan Anij

6. Ñe jej peptaij jej erom uwaan baam̦le eo an Jeova

Ñe jej peptaij, jej erom m̦õttan juon baam̦le me ej pãd ipel̦aakin lal̦ in im rej bõrokuk ippãn doon. Meñe eoktak jikin ko jej itok jãni im eoktak wãween ad kar dik im rũttol̦o̦k jãn doon, ak kõj aolep ewõr juon wõt ad tõmak im jej mour ekkar ñan kien ko an Anij. Riit Sam 25:14, UBS im 1 Piter 2:17, innem bwebwenato kake kajjitõk in:

• Ñe juon ej peptaij, ewi wãween an men in jelõte kõtaan eo an ippãn Jeova im ippãn ro rej karejar ñan E?

TARLEP IN KATAK EO ILO TUKADU

Jesus ear katakin bwe Kũrjin ro rej aikuj in peptaij. Bwe juon en tõpare mejãnkajjik in, ej aikuj in kalõk juon tõmak ekajoor ilo Jeova, mour ekkar ñan kien ko An, im ajel̦o̦k mour eo an ñan E.

Ãlij

• Ta in peptaij, im etke eaorõk?

• Ewi wãween an peptaij im ajel̦o̦k mour ekkejell̦o̦k ippãn doon?

• Ta buñtõn ne ko juon ej aikuj kõm̦m̦ani bwe en maroñ ajel̦o̦k mour eo an im peptaij?

KAL̦APL̦O̦K AM̦ MEL̦EL̦E

Katak kõn ta mel̦el̦e ko rejim̦we im ta mel̦el̦e ko rebõd kõn peptaij.

“What Is Baptism?” (Katak eo ilo online)

Etale ta ko juon armej emaroñ kõm̦m̦ani bwe en maroñ peptaij.

“Ad Yokwe im Kam̦m̦oolol Jeova Ej Kõm̦akũt Kõj ñan Peptaij” (Naan in Keeañ, M̦aaj 2020)

Lale ta eo ear kõm̦m̦akũt juon em̦m̦aan ñan peptaij.

“Rar Kõn̦aan bwe In Make Pukot im Lo Katak ko Rem̦ool jãn Baibõl̦” (Naan in Keeañ, Pãpode 1, 2013)

Lale etke peptaij ej juon mejãnkajjik ekanooj in l̦ap tokjãn im ta ko kwõmaroñ kõm̦m̦ani m̦okta jãn am̦ maroñ peptaij.

“Should I Get Baptized?” (Questions Young People Ask​—Answers That Work, Volume 2, chapter 37)