KATAK 20
Laajrak eo an Eklejia Eo
Jeova ej juon Anij in laajrak. (1 Korint 14:33) Innem jej kõtmãne bwe armej ro an ren bareinwõt kon̦ im laajrak ilo wãween aer jerbal. Ewi wãween laajrakin eklejia eo? Ewi wãween ad maroñ jipañ bwe en laajrak?
1. Wõn eo ej bõran eklejia eo?
“Christ [ej] bõran eklejia eo.” (Epesõs 5:23) Jãn lañ, ej loloodjake aolep m̦akũtkũt ko an armej ro an Jeova ipel̦aakin lal̦ in. Jesus ear jitõñ “ri-karejar eo etiljek im mãlõtlõt”—juon kumi edik me ej ejaakin em̦m̦aan ro rej lale eklejia im rerũtto ilo tõmak, ak jej bar kũr er Kumi eo Ej Lale Aolep Eklejia ko an Ri-Kõnnaan ro an Jeova (ak Governing Body). (Riit Matu 24:45-47.) Ãinwõt rijjilõk ro ilo tõre ko an Jesus im em̦m̦aan ro rar lale eklejia ilo Jerusalem, Kumi eo Ej Lale Aolep Eklejia ko an Ri-Kõnnaan ro an Jeova rainin ej letok naanin tõl ko ñan aolep eklejia ko ipel̦aakin lal̦ in. (Jerbal 15:2) Bõtab em̦m̦aan rein rejjab ri-tõl ro an doulul eo an Ri-Kõnnaan ro an Jeova. Rej reilo̦k ñan Jeova im Naan eo an ñan tõl er, im rej l̦oore tõl eo an Jesus.
2. Ta ijo kun̦aan em̦m̦aan ro rej lale eklejia?
Em̦m̦aan ro rej lale eklejia rej ro rerũtto ilo tõmak me rej katakin jãn Naanin Anij im jabõte armej ro an Jeova ilo aer jipañ im kõketak er. Rejjab bõk on̦ããn jerbal eo aer. Ijoke, rej jerbal ‘ilo aer m̦õn̦õn̦õ ãinwõt an Anij kõn̦aan, im jab kõn aer kõn̦aan kappok jeraam̦m̦an ñan er make, ak ej kõn aer lukkuun kõn̦aan jipañ.’ (1 Piter 5:1, 2) Rijjipañ ro rej jipañ em̦m̦aan ro rej lale eklejia, im tokãlik rijjipañ rein remaroñ erom juon iaan em̦m̦aan ro rej lale eklejia.
Kumi eo Ej Lale Aolep Eklejia ko an Ri-Kõnnaan ro an Jeova ej jitõñ jet em̦m̦aan ro rej lale eklejia ñan bõk jerbalin em̦m̦aan ro rej lol̦o̦k eklejia (ak circuit overseers). Rej lol̦o̦k eklejia ko ñan lel̦o̦k naanin tõl im rõjañ ñan er. Rein rej bareinwõt lale laajrak ko ilo Baibõl̦ ñan lale el̦aññe ekkar ñan jitõñ em̦m̦aan ak likao ro ñan lale eklejia eo ak erom rijjipañ.—1 Timote 3:1-10, 12; Taitõs 1:5-9.
3. Ta ijo kun̦aan kajjojo iaan Ri-Kõnnaan ro an Jeova?
Aolep ilo eklejia eo rej “nõbar etan Jeova” ikijjeen aer bõk kun̦aaer ilo kweilo̦k ko im kwal̦o̦k naan ekkar ñan maroñ ko aer.—Riit Sam 148:12, 13.
KAM̦WILAL̦L̦O̦K AM̦ MEL̦EL̦E
Katak im lale ewi wãween an Jesus tõl, wãween an em̦m̦aan ro rej lale eklejia kate er ñan anõke joñak eo an, im wãween ad maroñ pokake im rejetake Jesus im em̦m̦aan ro rej lale eklejia.
4. Jesus ej juon ri-tõl ejouj im em̦m̦an
Jesus ej letok ñan kõj juon naanin kũr elukkuun em̦m̦an. Riit Matu 11:28-30, innem bwebwenato kake kajjitõk in:
Ewi wãween an Jesus kõn̦aan bwe jen eñjake kõn tõl eo an?
Ewi wãween an em̦m̦aan ro rej lale eklejia anõke joñak eo an Jesus? Kõjo̦e PIJAIN ALWÕJ eo.
Elukkuun alikkar an Baibõl̦ kwal̦o̦k wãween an em̦m̦aan ro rej lale eklejia aikuj kõm̦m̦ani jerbal ko aer.
Riit Aiseia 32:2 im 1 Piter 5:1-3, innem bwebwenato kake kajjitõk kein:
Ewi wãween am̦ eñjake kõn an em̦m̦aan ro rej lale eklejia lukkuun kate er ñan anõke Jesus ñan kwal̦o̦k jouj im jipañ ro jet?
Ta wãween ko jet me em̦m̦aan ro rej lale eklejia rej anõke Jesus?
5. Em̦m̦aan ro rej lale eklejia rej katakin ikijjeen aer likũt juon joñak
Ewi wãween an Jesus kõn̦aan bwe em̦m̦aan ro rej lale eklejia ren watõk eddo ko aer? Kõjo̦e PIJAIN ALWÕJ eo.
Em̦õj an Jesus letok naanin tõl ko ñan ro rej tõl ilo eklejia eo. Riit Matu 23:8-12, innem bwebwenato kake kajjitõk in:
Ñe kwõj keidi naanin tõl ko ilo Baibõl̦ ñan em̦m̦aan ro rej lale eklejia im men ko em̦õj am̦ loi ippãn ri-tõlin kabuñ ko, ta oktak ko kwõj loi im ewi wãween am̦ l̦õmn̦ak kõn men in?
Em̦m̦aan ro rej lale eklejia rej kõkajoore tõmak eo aer make im tõmak eo an baam̦le eo aer
Rej lale im kõjparok aolep ro ilo eklejia eo
Em̦m̦aan ro rej lale eklejia rej ekkeini aer kwal̦o̦k naan
Em̦m̦aan rein rej ri-katakin. Rej bareinwõt jipañ ilo karreo im ilo jerbal ko jet
6. Jemaroñ pokake im rejetake em̦m̦aan ro rej lale eklejia
Baibõl̦ ej kwal̦o̦k juon un eaorõk ñan ad pokake im rejetake em̦m̦aan ro rej lale eklejia. Riit Hibru 13:17, innem bwebwenato kake kajjitõk kein:
Ekkar im jim̦we ke an Baibõl̦ eo rõjañ kõj ñan pokake im kõttãik kõj ñan ro rej tõl? Etke kwõj ba men in?
Riit Luk 16:10, innem bwebwenato kake kajjitõk in:
Etke eaorõk ñan pokake im rejetake em̦m̦aan ro rej lale eklejia meñe ilo men dikdik ko?
JET ARMEJ REJ BA: “Ejjab menin aikuj bwe kwõn m̦õttan ak uwaan juon doululin kabuñ.”
Kwõl̦ak lale ta tokjãn ko juon emaroñ loi ilo an kabuñ ñan Anij ippãn ro jet ilo juon eklejia?
TARLEP IN KATAK EO ILO TUKADU
Jesus ej bõran eklejia eo. Jem̦õn̦õn̦õ in pokake im rejetake em̦m̦aan ro rej lale eklejia me rej jerbal ium̦win Jesus kõnke rej jipañ im kõkajoor kõj, im rej katakin kõj ikijjeen joñak ko aer.
Ãlij
Wõn eo ej bõran eklejia eo?
Ewi wãween an em̦m̦aan ro rej lale eklejia jipañ eklejia eo?
Ta ijo kun̦aan kajjojo iaan ri-karejar ro an Jeova?
KAL̦APL̦O̦K AM̦ MEL̦EL̦E
Lale men ko rej kam̦ool bwe el̦ap an Kumi eo Ej Lale Aolep Eklejia ko an Ri-Kõnnaan ro an Jeova (Governing Body) im em̦m̦aan ro jet rej lale eklejia lukkuun kea kõn Kũrjin ro rainin.
Katak im lale ta jerbal ko an juon eo ej lol̦o̦k eklejia ko (circuit overseer).
Riit im lale ta ijo kun̦aan kõrã ro ilo eklejia eo.
“Do Jehovah’s Witnesses Have Women Ministers?” (The Watchtower, September 1, 2012)
Lale ewi wãween an em̦m̦aan ro rej lale eklejia lukkuun kate er ñan rõjañ im kõkajoor rũttõmak ro m̦õttaer.
“Em̦m̦aan ro Rej Lale Eklejia Rej Jipañ Kõj ñan Lañlõñ” (Naan in Keeañ, Jãnwõde 1, 2013)