KATAK 36
Kwal̦o̦k M̦ool ilo Jabdewõt Men Jej Kõm̦m̦ani
Aolep rekõn̦aan m̦õttãik ro me rej m̦ool. Jeova ej kõtmãne bwe ro m̦õttan ren bareinwõt m̦ool. Bõtab ejjab pidodo ñan kõm̦m̦ane men in kõn ad mour ilo juon lal̦ me elõñ armej rejjab kwal̦o̦k m̦ool. Ta tokjãn ko rej wal̦o̦k itok jãn ad m̦ool ilo jabdewõt men jej kõm̦m̦ani?
1. Ta un eo eaorõktata unin ad kwal̦o̦k m̦ool?
Ñe jej m̦ool ñan ro jet, jej kwal̦o̦k bwe jej yokwe Jeova im kautiej e. L̦õmn̦ak kõn men in: Jeova ejel̦ã kõn aolep men ko jej l̦õmn̦ak kaki im kõm̦m̦ani. (Hibru 4:13) Ej lo ñe jej kããlõt ñan kwal̦o̦k m̦ool ilo men ko jej kõm̦m̦ani, im el̦ap an m̦õn̦õn̦õ ñe jej kõm̦m̦ane men in. Naan eo an ej ba bwe Jeova ej jem̦jerãiki eo ej “jim̦we an etetal, ej kõm̦m̦an wãnõk, im e kõnono m̦ool ilo bũruon.”—Sam 15:1, 2.
2. Ta jet iaan wãween ko jemaroñ m̦ool ilo men ko jej kõm̦m̦ani ilo mour ko ad kajjojo raan?
Jeova ekõn̦aan bwe jen “kõnono m̦ool ñan doon.” (Zekaraia 8:16, 17, UBS) Ta mel̦el̦ein naan kein? Jekdo̦o̦n ñe jej kõnono ñan ro ilo baam̦le eo ad, ri-jerbal ro m̦õttad, ro jeid im jatid ilo tõmak, ak ri-jerbal ro an kien, ak jejjab riab ak lel̦o̦k mel̦el̦e ko rejjab alikkar im remaroñ m̦on̦e er. Armej ro rem̦ool rejjab m̦on̦e ro jet ak ko̦o̦t jãn er. (Riit Jabõn Kõnnaan 24:28 im Epesõs 4:28.) Im rej kõl̦l̦ãik aolepen owõj ko aer. (Rom 13:5-7) Ilo wãween kein im wãween ko jet, jej ‘m̦ool ilo ad kõm̦m̦an ilo men otemjej.’—Hibru 13:18.
3. Ta tokjãn ko rej wal̦o̦k itok jãn ad kwal̦o̦k m̦ool?
Ñe elõñ armej rejel̦ã im rej lo bwe jej juon eo em̦ool ilo kõm̦m̦an im naan ko an, ro jet renaaj lõke kõj. Jej jipañ bwe eklejia eo me ej ãinwõt baam̦le eo ad, ren eñjake aer jokwane im jab inepata. Im erreo bõklõkõt eo ad. Ñe jej m̦ool, men in emaroñ bareinwõt “bõktok nõbar ilo jabdewõt wãween ñan katak ko an Anij, eo ej ad ri-Lo̦mo̦o̦r,” im kareele ro jet ilikin eklejia eo bwe ren kõn̦aan kobatok ñan kabuñ eo em̦ool.—Taitõs 2:10.
KAM̦WILAL̦L̦O̦K AM̦ MEL̦EL̦E
Lale wãween am̦ m̦ool ej jelõt Jeova im mour eo am̦, im katak ewi wãween kwõmaroñ m̦ool ilo wãween ko kajjojo ilo mour eo am̦.
4. Ad m̦ool ej kabuñbũruon Jeova
Riit Sam 44:21 im Malakai 3:16, innem bwebwenato kake kajjitõk kein:
Etke kwõj l̦õmn̦ak bwe ejjab menin mãlõtlõt ñan tõmak bwe jemaroñ n̦ooje m̦ool eo?
Kwõl̦ak lale ewi wãween an Jeova eñjake ñe jej kããlõt in kwal̦o̦k m̦ool, meñe emaroñ pen ñan kõj?
Ñe ajri ro rej kwal̦o̦k m̦ool, rej kam̦õn̦õn̦õik rũtto ro jemãer im jineer. Ejja ãindeinl̦o̦k wõt, ñe jej kwal̦o̦k m̦ool jej kam̦õn̦õn̦õik Jemãdwõj ilañ Jeova
5. Kwõn m̦ool aolep iien
Elõñ armej rej tõmak bwe jejjab maroñ m̦ool aolep iien. Bõtab lale etke jej aikuj in kwal̦o̦k m̦ool aolep iien. Kõjo̦e PIJAIN ALWÕJ eo.
Riit Hibru 13:18, innem bwebwenato kõn wãween ko jemaroñ m̦ool . . .
ñan baam̦le eo ad.
ilo jikin jerbal eo ad ak jikuul̦.
ilo wãween ko jet.
6. Jej bõk tokjãn jãn ad m̦ool
Ñe jej kwal̦o̦k m̦ool men in emaroñ kõm̦m̦an bwe en wal̦o̦k jet apañ ko. Bõtab tokãlik, jej loe bwe ej men eo em̦m̦antata ñan kõm̦m̦ane. Riit Sam 34:12-16, innem bwebwenato kake kajjitõk in:
Ñe kwõj m̦ool, ewi wãween an men in kõm̦m̦an bwe en em̦m̦anl̦o̦k mour eo am̦?
Rippãlele ro me rej m̦ool, rej kõkajoore mourin m̦are eo aerro
Ri-jerbal ro rem̦ool rej kõm̦m̦an bwe bo̦o̦j eo aer en lõke er
Jitijen ro rem̦ool rej kõm̦m̦an juon ãt em̦m̦an ippãn ri-jerbal ro an kien
JET ARMEJ REJ BA: “Jet iien jej riab bajjek, innem ejjel̦o̦k jorrããn.”
Etke kwõj tõmak bwe Jeova edike aolep kain riab?
TARLEP IN KATAK EO ILO TUKADU
Jeova ekõn̦aan bwe ro jeran ren m̦ool ilo aolep men ko rej ba im kõm̦m̦ani.
Ãlij
Ta jet iaan wãween ko jemaroñ kwal̦o̦k m̦ool ie?
Etke ejjab menin mãlõtlõt ñan l̦õmn̦ak bwe jemaroñ n̦ooje m̦ool eo?
Etke kokõn̦aan kwal̦o̦k m̦ool aolep iien?
KAL̦APL̦O̦K AM̦ MEL̦EL̦E
Ewi wãween an rũtto ro jemãn im jinen maroñ katakin ajri ro nejier ñan kwal̦o̦k m̦ool?
Ta tokjãn ko rej itok jãn ad kajejjeti men ko jaar kallim̦ur bwe jenaaj kõm̦m̦ane?
L̦õmn̦ak kõn etke jej aikuj kõl̦l̦ã eowõj meñe jet iien ejjab jim̦we wãween aer kõjerbale.
“Taxes—Must You Pay Them?” (The Watchtower, September 1, 2011)
Ta eo ear kõm̦m̦akũt juon em̦m̦aan me ekkã an riab im m̦on̦e armej ñan ukote mour eo an im kappok on̦ããn an mour ilo wãween eo ejim̦we?
“I Learned That Jehovah Is Merciful and Forgiving” (The Watchtower, May 1, 2015)