THIHONGA 3
Ghushemwa ghoBayibili ngepi haghu wanine karo?
Hahongwa hoBayibili, 1870
Ruhungu rokutanga, 1879
Ruhungu ropashadyarero
Bayibili kwa toyedhire eshi kunyima dhoyifa yaKristusi, hahongi hombango ñanyi hakwiye mumbunga dhoThikriste hapemukithe yihonga yomuBayibili. (Yitenda 20:29, 30) Kapupi kamanana, ghoya hokokire. Awo kwa vungire mañando ghaJesusi pofotji nomañando ghawo hathinda, nokutanga ngirishe dhoThikriste dhoghumbango. (2 Timoteghusi 4:3, 4) Ngepi twa yidimuka eshi eyi tuna honganga ghushemwa ghomuBayibili?
Ruvedhe rwaJehova rokuneghedha ghushemwa rweyire. Aye kwatoyedhire eshi paruvedhe roghuhura, haguva ‘ñanyi hakukwate dighano’ ghushemwa. (Ndaniyera 12:4) Mumwaka 1870, pwakarire kambungaghana ghoka kashanine ghushemwa ghomuBayibili ndani kawanine yihonga yomangirishe ghomengi ghokudhira kutunda muBayibili. Podiyo ka tangire kushana yihonga yoghushemwa yokutunda muBayibili, ndani Jehova gha ka ghamwenine ka tjwathane Bayibili.
Hakafumu homitjima dhodhiwa hakuturiremo mukukuhonga Bayibili. Hahongwa hoBayibili hokare-kare kwa rughanithire makuhongo gha tuna rughanithanga pashadyarero. Nga ha kuhonganga kehe yimingwa. Ngeshi mbadi hana tjwathana thimingwa thongandji, awo nga ha shananga yimingwaghana yayonayo hayithothonone. Pakunongonona eshi thimingwa thokutanga thina kughu pofotji noyimingwaghana yimweya, awo nga ha yitjanganga. Mumakonakono ghawo ghoBayibili, ha wanine karo ghushemwa kuhatera dina dyaNyambi noghuFumu wendi, thitambo thendi kwawanu nokaye, ghukaro wawafu, ndani makurupero ghomavumbukero. Makuhongo ghawo ghomuBayibili kwawashutura kuyihonga yoghumbango.—Johannesi 8:31, 32.
Mumwaka 1879 haHongwa hoBayibili hanongononine eshi ruvedhe rwa kuminemo rokuyuvitha ghushemwa. Mumwaka ghogho, podiyo hatangire kutjanga thimbapira thoRuhungu, ethi tuna taperanga pashadyarero. Kengeno atwe kuyuvitha ghushemwa ghomuBayibili kwawanu mumatunga ghokukuma pa 239 ndani nomandimi ghokukuma pa 700. Kenge ne ghushemwa ghuna kuhanyena kokuhe kupitakana pakare!
Apa gha fire Jesusi, yinye yahokokire kughushemwa ghomuBayibili?
Yinye ya tughamwena tu wane ghushemwa ghomuBayibili karo?