Ngepi edi hakuru hombunga hana ghamwenanga mbunga?

Hayendithi ghombunga dhetu mbadi hana wa futanga. Kenge yakarire mumbunga dhaWakriste dhokutanga, hakuru hombunga kwawa tura ha ‘koneke mbunga dhaNyambi.’ (Yitenda 20:​28) Awo kwakara nothitamenedhi thothiwa thokukarera Nyambi nokupiteritha mbunga dhaNyambi “kadi nomuthineko ene noghuhima thika di gha yi wa kurupera Nyambi. Mbadi mukuwaruwerera, ne mumahimeno ghoye ghoshemwa muyikarera.” (1 Petrusi 5:​1-⁠3) Ngepi hana tu ghamwenanga hakuru hombunga?

Awo kutupakera thinga nokutukunga. Hakuru hombunga kutapa mayendithitho ghokushwagha muBayibili nokutughamwena tu kare pepi naJehova. Yoyishi Nyambi ghawa pa thirughana thi thomudyo, awo mbadi hana raghuranga haguva, ene kutughamwena tu kare mughukaro ghoghuwa nokukara noyishamberera. (2 Hakorinte 1:​24) Kenge yina karanga eshi mudithi ghondjwi ghana pakeranga thinga kehe ndjwi, hakuru hombunga nagho kuyereka kudimuka keheyu mumbunga.​—⁠Yisewe 27:⁠23.

Awo kutuhonga edi shotu kumithemo mahimeno ghaNyambi. Kehe thivike, hakuru hombunga kupiteritha mbunga kumakongano hatanarithe matawero ghetu. (Yitenda15:​32) Karo awo kupiteritha yirughana yokuyuvitha, ndani kurughana netu pofotji ha tu deghure muyirughana yokuyuvitha.

Awo kutupa matjokedhero. Mukutughamwena tu ture po makwatathano ghomawa naJehova, hakuru hombunga kutudhingura kumaghumbo ghetu endi kutughambitha kuThikota thoghuFumu ha tu ghamwene nokututjokedha kupitera muMatjangwa.​—⁠Jakobusi 5:​14, 15.

Kushwayithako yirughana yomumbungakriste, thingi thohakuru hombunga kurughana podiyo eshi hapakere thinga madhiko ghawo. Twa kona kuwafumaneka.​—⁠1 Hakatesalonika 5:​12, 13.

• Yinye hana rughananga hakuru hombunga mumbungakriste?

• Hakuru hombunga ngepi edi hatughamwenanga?