THIHONGA 21
Yinye Beteli?
Dyango dyo yifaneka muAmerika
Kundovetji
Kenya
Kolombiya
MuThiheburayi, Beteli kutongora eshi “Ndhugho dhaNyambi.” (Genesis 28:17, 19) Odyo dina dyaroyera mango ghoHashupi waJehova mukaye kokahe ghoku kuna tundanga mayendithitho ghokuyuvitha. Mbungayendithi kwa hatera kumberewa dhetu dhodhikuru muAmerika mumbara dhaNew York, kodiyo hana yendithanga yirughana yokuMabeteli ghomengi. Kowa hana rughananga kumberewa dhi, kuha toya eshi didhiko dyoHabeteli. Awo kukara pofotji yira didhiko, yoyishi kudya pofotji, kurughanena pofotji karo kukuhonga Bayibili pofotji.—Pisalemi 133:1.
Dyango edi hanu hana kutapanga hadhinda muyirughana. Mukehe Beteli, mwa kara hakafumu nohakamadi wa ha hima kurughana mahimeno ghaNyambi kehepano. (Mateghusi 6:33) Mbadi hana tamburanga masherenyi, ene wo kuwana yidya noyitere karo notunyinga tokukughamwenitha ko. Kehe yu ghadi kuBeteli kwa kara noyirughana yongandji, hamwe kurughana mumberewa endi kutereka. Hamweya kurughana nomahina agha ghana shwayithanga yimbapiratjangwa, hamweya kukenitha mayuwo nokuyogha yitere endi kupangera nokuroyitha yinu, endi noyimweya kengeyo.
Dyango edi dina kwatithangako yirughana yokuyuvitha. Thitambo tho kehe Beteli ne thokutwara ghushemwa ghoBayibili kowanu wahe. Mbapira dhi, dho thitamenedhi thothiwa edhi ha rughana Hakabeteli. Mbungayendithi kwa yendithire ha tjange mbapira dhi, podiyo ha dhi tuma kupitera mukompiyuta dhiyende kwawa toroki hohengi mukaye kokahe, ndani kokudhi tura karo mumahina gha ghana shwayithanga yimbapiratjangwa, podiyo keho hanadhitumanga kumambungakriste ghokupitakana pa 110 000. Yoyiheya eyi dina rughananga didhiko dyoHabeteli, kukwatithako mayuvithero ghombudhi dhodhiwa.—Markusi 13:10.
Hadye hana rughanaga kuBeteli, ndani ngepi edi hana wa pakeranga thinga?
Thirughana munye thomudyo hana rughananga ku kehe Beteli?