Ngepi edi yimbapiratjangwa yetu hanayitjanganga nokuyitoroka?

Atwe kutoroka yimbapiratjangwa yetu mumandimi ghokukuma pa 700 podiyo eshi tuyuvithe ‘mbudhi dhodhiwa kumarudhi nomandimi ndani nomako ghomahe.’ (Yihokora 14:⁠6) Ngepi edi yina tu tombokanga? Kupitera mumaghamweno gho hatjangi hokukuthigha-thigha ndani nohatoroki hokupitakana pa 3 300, waheya Hashupi waJehova.

Pakutanga mañando kughatjanga muThihingirisha. Mbungayendithi kuyenditha yirughana yokutjanga yimbapiratjangwa kumbara dhetu dhodhikuru. Awo kutapa yirughana kwawatjangi hokukuthigha-thigha awa hadi kumbara dhodhikuru ndani nokuMabeteli ghamweya. Ngeshi kukara nohatjangi hokukuthigha-thigha ayo kughamwena shemwa mukutjanga yihonga yi twe haguva waheya kumutjima dhawo.

Mañando gho kughatuma kwawatoroki. Ngeshi hana mana kuyitjanga muThihingirisha, awo kuyituma kwawatoroki kupiterera mumakompiyuta mukaye kokahe, kunyima dhoyo hatoroki kurughanena pofotji ha toroke. Hatoroki wa kutorora ‘mañando ghoghuhunga ghoghushemwa’ mukuvishura dighano edi ha tjanga muThihingirisha.​—⁠Muudisi 12:⁠10.

Kompiyuta kuredhupitha yirughana. Kompiyuta mbadi wa kukona kutoroka. Ene hatoroki kuraghanitha mayendithitho ghomukompiyuta mukuninga eshi yirughana yawo yiredhupe. Hashupi waJehova kurughanitha mayendithitho gha ha toya eshi MEPS. Mayendithitho gho, modigho hana nunganga hatoroki wa mañando, ndani kupaka yiperende muthimbapiratjangwa nokuthiroyitha ha thi manithe kurughana.

Pashanye tuna torokanga mandimi gha hana ghambanga haguva hohapu? Yoyishi Jehova gha haka eshi “hanu wahe ngo hapwe kukomonona no ha dimuke ghushemwa.”​—⁠1 Timoteghusi 2:​3, 4.

• Ngepi edi hana tjanganga yimbapiratjangwa yetu?

• Pashanye tuna torokanga yimbapiratjangwa yetu mumandimi ghomengi?