Kupi gha tunda masherenyi ghokukwatithako yirughana yetu?

Kehe mwaka, mbunga dhetu kushwayitha nokutapera mamiliyuna ghoMabayibili noyimbapiratjangwa yonyara-nyara. Atwe kutunga nokuroghuthura Yikota yetu yoghuFumu ndani karo Mabeteli. Atwe kupakera thinga mayovi ghohaguva wa hana karanga muBeteli ndani hatumwa, karo kughamwena hanu ngeshi pana hokoka maghukukutu. Kukona ghutetuke noghukwipure eshi: Kupi ku hana wananga masherenyi ghokukona kufuta yoyiheya eyi?

Mbadi tuna rombanga masherenyi. Ngambi kenge pwa nyandiwa masherenyi ghomengi ghokuyenditha yirughana yetu yokuyuvitha, mbadi tuna djumberanga masherenyi. Myaka dithere dha ka pita, mbapira dhoRuhungu kwa ningire eshi twa tawa eshi Jehova yodiye gha kwatithangako yirughana yetu ndani atwe “mbadi twa ku djumbera endi tu rombe hanu maghamweno.”​—⁠Mateghusi 10:⁠8.

Yitapa yetu yokutunda kumutjima kukwatithako yirughana yokuyuvitha. Hanu hohengi kutapa yokutunderera kumutjima yoyishi kuhafera yimbapiratjangwa yetu yokutunda muBayibili. Hashupi waJehova kurughanitha ruvedhe rwawo, ngcamu dhawo, masherenyi ghawo, ndani yinu yayonayo mukuninga ha rughane mahimeno ghaNyambi mukaye kokahe. (1 Histoli 29:⁠9) KuThikota thoghuFumu ndani kuyigongi yetu, potudi tumbangu toyitapa tuna karanga ko podiyo eshi awa hana shana kutapa hakone kuyirughana kemo. Roruheya masherenyi gha kutunda kwawa hepwe, kenge yira mudidhi ghomuhepwe gha turiremo tunyingaghana mukambangu komutembeli. (Lukasi 21:​1-⁠4) Mudyo shemwa ngeshi kehe yu “gha kone kukupungwera tunu” gha tape “thika di ghana yi ghayara mumutjima wendi.”​—⁠1 Hakorinte 16:⁠2; 2 Hakorinte 9:⁠7.

Atwe twa yi tawa ndani tudi nomakurupero eshi Jehova ñanyi gha kutjokedhe mitjima dhowa ha shana ‘kumufumaneka noghutungi wawo’ mukukwatithako yirughana yoghuFumu podiyo eshi gha kumithemo mahimeno ghendi.​—⁠Yisewe 3:⁠9.

• Pashanye dha kuthighera mbunga dhetu kumaghukareri ghawo nagho?

• Yinye hana rughanithanga ko masherenyi ghoyitapa?