Ulbanka Daknika 3
Idsipt ra pri takan ba wina Israel kingka pas ba kat
Israel uplika nani Idsipt kuntrika ra alba taki bangwi kan ba wina Moses mita saki Sainai ilka ra brihwan, bara baha ra Gâd mita Ai lâka nani yaban. Baha ningkara, Moses mita waitna 12 ra Kenan tasbaia ra blikan biki kaikaia wisi. Sakuna 10 ba witin nani ra sturi saura wal balan. Baha taka mita Israel uplika nani ba kli Idsipt ra taui waia luki bangwan. Bara witin nani baku kasak lukras kan ba mita, Gâd bui mani 40 baku upla iwras tasbaia ra yaban ban wapi tauki kan.
Baha wina, Jasua ra bak saki brin Israel uplika nani ba Kenan tasbaia ra brih wabia wisi. Bara taunka ba dakbi briaia dukyara, Jehova sain nani ailal daukan. Witin yaban Jordan awalka li aubi kan ba takaskan, Jeriko tnaya kutbanka nani ba kriwi kauhwan bara yu ba alki takaskan. Bara mani 6 luan ningkara, witin nani Kenan tasbaia ba dakbi brin.
Jasua wal ta kriki, 356 mani baku Israel ba wihta nani mihta ra kan. Yawan wihta nani ailal dukyara lan taki bangwaisa; Berak, Gidiun, Jipta, Samson, bara Samyuil dukyara sin. Baku sin mairin nani dukyara lan takaisa; Rahab, Dibora, Jail, Rut, Neumi bara Dilaila dukyara sin. Ulbanka Daknika YUHMPA na, 396 mani nani sturka dukyara aisisa.