Ya Ba, Raitpali, Tasba Withka Sa Ki?

Upla ailal baha makabi walanka ra bankra bila kumi wal ansa muni bangbia: God. Ban sakuna, tankira sa kan Baibil ba wiras sa ulbanka kumira sin Jisus Kraist apia kaka ai Aisika ba witin nani raitpali naha tasba withka aimaki banghwi sa. Mapa tani ra, Jisus win: “Naha tasba withka ba latara kangbi sakan kabia.” Ba purkara win: “Naha tasba withka ba aula. Bara witin yang purira karnika apu sa.”—Jan 12:31; 14:30; 16:11.

Baku bamna, naha tasba withka ba Jisus mapara sa. Ya kabia naha withka ba?

Tasba aiskara nahki yaba mina wapanka sainka kum wanki sa

Upla lukanka yamni brih traimunanka nani ba purkara, tasbana sibrinkira pali wal panis wauhwan sturi luan nani ba bilara. Naha daukanka ba mita upla nani aitanka briba ai lukanka bapi sa, sim ulbi sasakra David Lawrence prahki daukan ba baku: “ ‘Laman laka Tasbara’​—upla aihkika ba brin dauki sa. ‘Kupia yamni laka upla nani wal’​—tasbara tawan aihkika ba pana pana ai walka nani wal brih bangwi sa. Bara, dia taki sa? Dia muni mapara aiklabaia laka nani barasa tawan nani aihkika ba brinka apia sa sakuna?”

Mapara talia sa, rait apia? Upla brinka aihwa ba laman lakara iwi kaia want sakuna, pat pat misbara kaikisa bara ai walkara pana pana ikisa raitpali wail laka wal. Luki kaiks sibrinkira wal rau sauhkanka tara daukan ba tala kauhlara. Waitna ba pasa saura rumka yus munisa, asla kuki brikaia pliska nani, pauta klauhwan nani lulkaika, angkaia bumka nani, bara tnatka saurakira wala nani wal ai tahkiara rau muni bara kupia latwanka tnatka kumi apu wal ikisa.

Man lukisma upla nani ba, laman bara lilia laka lihki nani ba, yakan witin nani, sip kabia watawan laka sibrinkira paliba daukaia pana pana ai walka mapara? Dia karnika nani uplara brih wisa naha sat saurka yahpika daukaia apia kaka daukanka karna wan munan dauki nani ba? Man yu kum makabi walram saurakira bara karnakira sip kaikras ba kum uplara munka raumunanka laka nani ba daukaia?

Ya nani ba naha tasba withka nani sa

Baku sa lukanka nani wal yawan taukaia apia sa, kan Baibil ba param marikisa upla sinskira kum, waitna nani bara nisan nani sip kaikras ba bui witin nanira ta brih aula. Wisa: “Tasba aiska ba saura dadaukra karnika munhtara sa.” Baibil ba param marikisa, aisi bara: “Witinka Dibil bara Sitan makiba [...] Tasbara iwi nani sutra mahwakisa.”​—1 Jn. 5:19; Reveleshen 12:9.

Jisus, piu kum “Dibil bui traikakaikata bara,” namhpa namhpa lukras kata Sitan ba tasba withka kabia. Baibil ba marikisa dia takan ba: “Dibil ba witin ra brih wata il kum pura palira, bara marikata tasba kingka laka nani sutna bara ai pranika nani sin, bara win: ‘Naha diara nani sut maikamna man kahwi bara yangra mayunra laka aikma kaka.’ Bara Jisus bui witinra win: ‘Taki was, Sitan!’ ”​—Matyu 4:​1, 8–10.

Bahara luki kaiks. Sitan traikakaikata Jisusra prisant yabaia “tasba kingka laka nani sutna.” Nanara, Sitan ba raitpali naha kingka laka nani withka apia kan kaka, ai prisantka ba raitpali traikakaikan ka kum kaia kan? Apia, kasakpali. Baha purkara kaiks, Jisus apia wiras kata baha tasba gabamintka nani ba Sitan dukia apia sa, daukaia kan Sitan bui witin nani purara karnika apu kata. Baku ba mita, Sitan Dibil ba raitpali tasba withka sip kaikras ba! Kan, Baibil ba makisa “naha piua iwanka tnatka godka sa.” (2 Korint nanira 4:4) Ban sakuna, nahki muni karnika ailal pali brin upla saurakira pali kum witin baku?

Aima kum bilara Sitan takaia kan ba insal kum kan God bui paskan, tumanka dimata witinra God pliska ba dukiara. Kasak kulkras kata la tanka kat God withka aimakanka ba. Naha dukiara, piuta satka kumra yus munan bila twatwilkra baku kunin munaia pas mairinra, Eva, bara baku brin witin bara ai maia waitna, Adam, ai adarka nani nina blikaia God bila walaia watlikara. (Genesis 3:​1–6; 2 Korint nanira 11:3) Baku sin karna aisi bapata Adam bara Eva kiamka nani sutra sipsa God wina tnayara lakaya. Baha dukiara, God piu yabata Sitan ba traikaiki marikbia witin karna aisi bapanka ba dukiara. Sakuna Sitan sip briras kata marikaia.​—Job 1:​6–12; 2:​1–10.

Diara kum tara ba sika, Sitan witin yakan tasba aiskara withka aimakras. Insal wala nanira kupia alkan witin wal asla taki God mapara buaia. Naha nani ba lasa taki banghwan, spirit nani Sitan aikuki saurka daukan ba. Witin nani dukiara Baibil ba aisisa naha tnatkara Kristian nanira wi ba baku: “Dutki banghwi kap Dibil warkka nani mapara; kan yawan nani brih banghwisa aiklabanka kum, tala bara wina wal mapara apia, sakuna [...] naha tihmuka tasbaia withka nani ba mapara, spirit saura karnika nani kasbrika pliska nanira ba mapara.”​—Efesus nanira 6:​11, 12.

Spirit saurakira nani ba mapara bus

Naha tasba withka saurakira nani sip kaikras ba, witin nani ridi banghwi sa upla nani sutra mawahkaia, bara tnayara lakaia God ra mayunaia laka ba wina. Ba dukiara tnatka kum yus muniba sika upla nani pruya ningkara rayasa lukanka ba kainara brih waya, ban sakuna God Bilara param wan marikisa prurara diara kumi sin wan tanka briras. (Genesis 2:17; 3:19; Ezequiel 18:4; Salmo 146:​3, 4; Eclesiastes 9:​5, 10) Takiba sika, spirit saura warkka dadaukra kum ku apia kaka “bila baikra” kum sip kaikras pliska ba wina, spirit saurakira kum ba sipsa upla pruan kum bila baikra tnata luki daukaia, bara sin ai taika apia kaka aipanika nani raya bara aisaya. Pruan ba “bila baikra” baku kabia sin, raitpali ba lasa kum sa!

Baha mita, man yu kum baha “bila baikra” satka kum walma sa kaka, swirka kunin mai munbiara. Dia mai wibia ba tnayara laks, bara Jisus win ba kli aisi wis: “Taki was, Sitan!” (Matyu 4:10; Jems 4:7) Swirka spirit nani tanka kaikaia dukiara mai brih wabia ra spirit saurakira nani aikuki laka tankara iwaia. Baha laka tankara iwaia ba nina makisa spirit saurakira laka, bara God ba kaina manas marikisa witin ra mayunra yabi nani bara tnayara lakbia tanka nani sutra. Baibil ba latubi sa ya ya “tanka pliki kaikanka laka yus muni nani ba sutra”, “spirit saura warkka dadaukra kumra makabi wali apia kaka diara kainara takaia nani ba kaiki lan pali bara” apia kaka “pruan nanira makabi walaia.”​—Deuteronomio 18:​10–12; Galeshan nanira 5:​19–21; Reveleshen 21:8.

Kan spirit saurakira laka ba lasa nani karnika munuhtara mangki ba mita, aikuki daukaia warkka traikakanka mapara bus, nahki kat lilia baku kabia, apia pain pali wan dara wali baku kabia sin apia. Naha nani daukanka tilara bara sa glas balka wal diara nani tanka pliki kaikaia, Ouija tatka nani, wan dara walanka wina tnayara ba kaikanka laka, wan mihta bila lainka nani aisi kaikaia laka (quiromancia), bara slilma ra diara tanka pliki kaikaia laka. Lasa nani sin bin nani daukisa bara tnatka daukanka wala nani sin utla nani ai karnika mununhtara laki bri ba wina.

Baha purkara, spirit saurakira nani ba yus muni sa upla saura daukaia tniwanka briba wal waungtaya ulbi kainara brih waia, lilka marikanka, bara tilivisanra daukanka sunu apia nani uba pain baku marikiba bara ai wîna brinka tanka dukiara paskanka mapara dauki nani ba. Lasa nani ba nu bangwi sa upla nani ba aisinska lukanka wina lukanka saura nani ba saki lulkras kaka, naha nani na mina wapanka kum sip dikisakaia apia ba swisa baha nani sika sunu apia lakara brihwi sa, sim lasa nani daukan baku.​—Genesis 6:​1, 2; 1 Tesalonaika nanira 4:​3–8; Judas 6.

Rait, bankra ailal nanira kikan daukbia spirit saurakira nani ba naha tasba withka aimakisa lukanka ba. Ban sakuna, baha kasak lukras laka ba sirang wan ikbiara, kan Baibil wisa: “Sitan pali sin ingni insalka baku takisa.” (2 Korint nanira 11:14) Ai kuninka kau trikkira ba sika ailal ba aidara walras sa witin bara lasa nani bara ba. Sakuna yarka kunin mai munbiara! Dibil bara ai lasika nani ba rait aihwa uplika nani sa, bara mapara ban bapi bui kaia.​—1 Piter 5:​8, 9.

Liliapali, piua ba lamara aula Sitan bara ai nina blablikra nani ba apu kabia! “Tasba ba [lasa nani sin withta aimaki bangwi ba] lui auya,” Baibil ba wisa, “sakuna ya God kupia laka dauki ba bankaiara bara kabia.” (1 Jn. 2:17) Nahki pain kabia baha karnika saurakira ba sakbia piuara! Bamna, God kupia laka dauki nani ba tilara kap bara baku lika raya bankaia liliaka ba bribia kasakkira tasbaia raya daukbia bara.​—Salmo 37:​9–11, 29; 2 Piter 3:13; Reveleshen 21:​3, 4.

Diara wala mapara marikras kaka, Baibil marikanka nani ba bila lakanka ulbanka Tasba Rayaba wina brin. (New World Translation of the Holy Scriptures—With References)

[Wahya 4 lilkika ba]

Sitan ba sipkan Jisusra yabaia naha tasba gabamintka nani ba witin ai dukia apia kaka?