Dawan Pata ba dukyara Ridi Kap

Yawan Jisas nina blablikra baku, uba lilia tara sin kulkisa, mani bani tihmia kum ra Jisas pruan kupia kraukaia dukyara diara sut ridi dauki kaia! (Luk 22:19.) Diaura kaina manas ridi takaia sip sa ki?

◼ Awarka, Pliska ba sin: Sut pain nu takaia sa Dawan Pata ba dia awarka, bara ani pliska pali ra daukan kabia. Kangrigisan wal —apia kaka kau— sim Aidrubanka Watla yus munbia sa kaka, kau pali awarka kat waia, bara pain asla taki waia sa. Kan aidrubanka kumi bani ningkara taimka yaban ba kunhku sa. Kasak trai munaia sa, watla dimaika ra, bara pliska wala nani ra sin upla ba tutukwan kabia apia.

◼ Paiwanka: Smalki tataukra bani upla paiwaia wisi ai wahya sut ba pat brin sa ki? Paiwanka ra dia wi ba sin nu sa? Upla paiwma taim, nahki wima sapa pat ridi takram ki? Yaura paiwanka kum yabaia lukisma? Paiwaia wahya sut ba upla ra laki yaban kabia trai munaia sa.

◼ Nahki Wabia: Dawan Pata ra waia luki uplika ra, bara muihni-lakri kum kum ba sin, diaura wabia, apia kaka, tnatka wala ra kra help nit kabia. Dia daukai ba pat luki brin sa ki?

◼ Brit, Wain ba sin: Aman kais brit, wain ba sin yu lapta iwras kainara laki yaban kabia apia. Heven ra waia bak sakan muihni-lakri kum sip waras munisa kaka, brit, wain ba sin bribia dukyara kaina wina ridi taki kaia sa. Kaina manas sin britka, bara wainka satka pain ba brisi, tibil ra kahbaia sa. (Aihwakisa Febrero 15, 2003, wah. 14, 15 baiki.s 14, 17 ba kais.)

◼ Aidrubanka Watla ba: Kaina wina sin, aidrubanka watla ba pain klin munan kabia. Plitka nani ba, kapka nani ba, tibilka ba, bara tibil kwalka ba sin, aidrubanka ta krikras kaina pali ra, ai pliska kat pat brisal mangkan kabia. Aidrubaia pliska wala kum yus munan kabia kaka, aisanka ba upla sut pain walbia dukyara, bin daukaika aitani kum bara kabia ba ridi dauks. Asla Dadaukra wihki Laki Yayabra nani ba pat wahbi sakan kaia sa, bara kaina wina ai warkka pali ba, nahki diara daukbia ba, bara ai kwalka aitani dimaia ba dukyara sin lan daukan kaia sa.

Yua kau tara —Jisas pruan Kupia Kraukanka na ra— yawan kumi bani, bara kangrigisan ba sin kau pali misar want sa kasak pain ridi kaia. Jehova ai Luhpia latwankira —Jisas Kraist— sakripaiska bak diara sut wanki ba tawan, ya ya ai kupia wina ai tingkika laka mariki ba dukyara, Jehova bui nahamna ra pura luan yamni munan kabia.