Aisi Kaikaia Karna Muni nani ra Sin Smalkaia Sa
1. Smalkuya taim dia takaia sip sa ki?
1 Smalki warkka daukuya taim, aisi kaikaia karna muni uplika ra sin tanka kasak smalkaia nit kabia kaia sa. Baku taim, dia daukaia sip sa ki?
2. Aisi kaikaia karna muni nani ra nahki rispik laka marikaia sip sa? Bara dia muni?
2 Uplika ra Rispik Muns. Jehova sika, upla kupia kaikisa, dia prais kul diman sapa lika lukras (1 Sam. 16:7; Sins.l 21:2). Baha mita, aisi kaikaia karna muni nani ra mayara kulkras. Witin nani ra rispik muni, wihka bila kaikan laka sin marikisa kaka, wan helpka briaia kau wilin kabia (1 Pi. 3:15). Tanka ba sika, tiks kum, apia kaka baiki sakanka kum aisi kaikbia dukyara uplika ra taibi munaia apia. Baibil tanka kau lan taki wabia bara, kau pain aisi kaikaia dukyara trai munbia. Bara laik kaikbia “baha lâka dukyara kakna ra tihmia ra sin” aisi kaikaia (Lawana 1:2, 3).
3. Aisi kaikaia karna muni nani ra lan daukaia dukyara dia tnatka sat sat yus munaia sip sa ki?
3 Sat Sat Tnatka ra Stadi Yabi. Upla lan takbia wisi, lilka nani ba help tara kum sa. Lilka kum ra dia kaiki ba dukyara uplika ra walaia sip sma. Ba’wina lilkika ba dia wan smalki ba ai tanka bribia wisi makabi walanka kum kum dauks. Lilkika ra tanka marikaia want sma ba dukyara tiks kum kum sin yus muns. Bara kupia kraukanka baku lilkika nani ba sin mariks. Sim awarka ra uba ailal lan daukpara. Ulbanka lalka ba wihki tanka bapanka tara nani sin kau buks, bara saitra tanka wala lika dingkpara. Baibil pali ba wina tikska nani ba aisi kais, bara aisi kaikram ba tanka brin sapa kaikaia wisi tanka kum kum makabi wals. Baku lika, Baibil stadi taki uplika ba ai kupia nikban kabia kau tanka plikaia, bara kau pain sin aisi kaikaia.
4. Yawan nahki sip sa wan stadika nani kau pain aisi kaikbia help munaia?
4 Kau Pain Aisi Kaikaia Helpka nani. Upla kum pain aisi kaikras, bara uya kul dimras kabia sin, diara tanka briaia, bara lal swapni kaia sip sa. Nahamna ra sip sma ta baikaia yawan ulbi sakanka nani CD ra walaia sip ba yus munaia. Ulbi sakanka ba ai mihta ra brih, CD ra aisi kakaira ba ra aman wali nina bliki, bara tawa tawa uplika ba kli aisi kaikbia sa kaka, sip sa kau pain aisi kaikaia help munaia. Aplícate a la lectura y escritura wauhkataya ba sin help tara kaia sip sa. Plis kum kum ra kangrigisan almukka nani ba sip sa aisi kaikaia kulka kum ridi daukaia. Laki kaikata sut na sip sa help wan munaia aisi kaikaia karna muni nani ra “Ulbanka hulikira nani” ai tanka briaia ta baikaia. Kan baha nani ra sins laka yabi swak sakan laka bribia (2 Tim. 3:15).