Pain aisi kaikras nani ra, ¿nahki hilp munbia?

1. Pain aisi kaikras uplika nani ra Baibil tânka smalkaia ba, ¿dîa muni isi apia sa?

¹ Upla manis yawan smalki ba spirit lâka dukia nani briaia brinka brisa, sakuna aisi kaikaia karna munisa mita Baibil bara buk wala nani kaikisa taim ai srinhka brisa. Baha mita, tâura Smalkisa bukka yus munaia ba pain apia kabia. Spirit lâka ra, ¿nahki naha uplika nani ra hilp munbia? Kuntri 20 pura baku ra muihni lakri lankira nani ra makabi walan taim, naha kupia kraukanka nani naika laki kaikbia nani ba yan.

2. Pain aisi kaikras uplika nani ra hilp munaia dukiara, ¿ani ulbi sakanka nani brisa?

² Stadi tatakra ba pain aisi kaikras apia kaka sut aisi kaikras ba wal, Gâd bîla wals apia kaka Gâd bîla wals bara ban kaia ra iwma wauhkataya nani ba wal stadika tâ krikbia. Smalki tataukra kum Miriki kuntrika wina wauhkataya wâl ba uplika ra marikisa, baha wina makabi walisa ani ba briaia want sa. Kenia Betel apiska wina wisa naha wauhkataya nani ba yus tara brisa, kan Africa uplika nani ba kau ai brinka sa sturi nani walaia makabi wali bara ansika yabaia natka ra lan takaia watlika ra. Skul diman uplika kum mapara naha natka ba isi kaia sip sa. Sakuna skul wiria baman diman uplika kum ra karna munisa. Stadi tatakra ba wira aisi kaikisa kaka, smalki tataukra manis ba ¡Gâd sturka yamni nani ba!, Yawan Sipsa God Panika Kaia! wauhkataya wal stadika tâ krikisa apia kaka Baibil Sturka nani Bukka yus munisa.

3. Sip aisi kaikras nani ra hilpka pain kum yabaia dukiara, ¿dîa ba wan auya tikaia apia sa?

³ Kupia buki bîla aisas. Sip aisi kaikras nani ba ban kra ai swira brisa bara ai rayaka ba kulkanka mayara brisa. Stadika yabia taim, pain ai dara walbia kaka, sip kabia tânka kasak ba lan takaia. Upla aihkika sip aisi kaikras ba lal swapni sa bara isti lan takisa. Baha mita rispik lâka yabaia aitanisa (1 Pi. 3:15). Witin nani kau lan takaia want kabia yamnika bara spirit lâka ra pâwi ba kaikisa kaka. Baha mita ban naha sât uplika nani ra kupia buki bas.

4. Pain aisi kaikras nani ba ra stadika ridi duakbia dukiara, ¿nahki hilp munaia sip sa?

⁴ Stadi tatakra ba sip pain aisi kaikras kabia sin, kupia buks stadi takaia dukiara ridi takaia. Sudafrika ra smalki tataukra kum kum ba ai stadika nani ra wisa ai pamalika kum pain aisi kaiki ba ra makabia hilp munbia. Stadi tatakra nani ba ridi takbia dukiara, smalki tataukra kum Gran Bretaña wina ba ai bukka pat mark munan ba stadi tatakra ba ra baiki sakanka kum kum marikisa, bara baku stadi tatakra ba kaikisa mark munan ba mita ansika plikaia kau isi sa. Kristian waitna kum India wina ba, ai stadi tatakra nani ra wik wala lisinka ra lilkika taki nani ba marikisa, kli stadika briras kaina ra bahara luki kabia wisa.

5. ¿Yawan nahki wihka bîla kaikan lâka marikbia Baibil stadika kum yabia taim?

⁵ Wihka bîla kaikanka bris. Ani ulbi sakanka yus muni sma ba tânka pali ba dukiara aisas bara stadi tatakra ra hilp muns pain ai tânka briaia. Tâura pain kabia stadika ba 10 minit apia kaka 15 minit baman kabia. Tânka uya aisapa ra, Baiki sakanka kum kum baman laki kaikaia sip sa stadika bani ra. Stadi tatakra ba tawa aisi kaikisa kaka wihka bîla kaikan lâka bris. Witin Jehova ra latwan kaiki wabia ba ra kau pain aisi kaikaia trai munbia. Baku takbia dukiara, pain kabia tâ wina aidrubanka nani ra balbia paiwaia.

6. Upla kum ra, ¿nahki aisi kaikaia hilp munaia sip sa?

⁶ Stadi tatakra ba pain aisi kaikaia lan takbia kaka, isti pali spirit lâka ra pâwbia (Law. 1:1-3). Smalki tataukra manis stadika bani danh takan ningkara Wilin bas aisi kaikaia bara ulbaia wauhkataya ba wina minit kum kum marikisa. Stadi tatakra ba sip apia baku ai dara walbia kaka, witin dîa daukaia lan takan nani ba sut wis kupia bukaia dukiara. Baku sin wiaia sip sma witin ban trai munbia kaka, Jehova yamni munbia bara Witin ra ai pura suni hilp makabaia sip sa (S.L 16:3; 1 Jn. 5:14, 15). Gran Bretaña ra smalki tataukra kum kum ba ai stadi tatakra nani ra wisa dîa lika daukaia sip sa bara tawa tawa baha daukaia, sampla baku, abecedario ba lan takaia, Baibil tikska nani pliki aisi kaikaia bara ulbi sakanka nani bîla kau isi nani ra ulban ba aisi kaikaia. Piu aihkika nani ra upla kum ra aisi kaikaia lan daukaia dukiara pain sa kupia bukaia witin silp daukaia want kabia.

7. ¿Dîa muni pain aisi kaikras uplika nani ra tânka kasak ba smalkaia dukiara swiaia apia sa?

⁷ Skul wiria diman nani ra Jehova mayara kulkras (Job 34:19). Witin upla ai kupia ra dîa bri ba kaikisa (1 Kr. 28:9). Baha mita, sip aisi kaikras nani ra ban tânka kasak ba smalkaia sa. Ulbi sakanka pain manis bâra sa yawan yus munaia sip ba. Piu lubia taim, Smalkisa Bukka yus munaia sip kabia bara uplika ba Baibil tânka tara nani ba lan takbia.