“Spiritkam lapta bri bangwi bas”
1. Wan smalkanka ba dia marikaia sa?
1 Kristian warkka sat kumi sin tayat kaikaia apia sa. Kau ni sat wala sa. Ba’ mita wan kupia kraukisa: “Spiritkam lapta bri bangwi bas, Dawan dukya dauki bas” (Rom 12:11, Lâ Raya Wauhkataya, 1986). Sakuna, diara manas sin bara sa smalkaia warkka ra wan spiritka daskisa. Baku bara dia daukaia sip sa, baha laptika ba King warkka ba tawan brisma ba ban bri kaia? (2 Tim. 1:6, 7.)
2. Selp Baibil stadi taki ba bara liliakira smalkaia warkka dauki ba wal dia wilkanka brisa?
2 Selp Baibil stadi takanka. Smalki Tataukra pain kum yaba Gâd laka nani ba latwan pali kaikisa bara tanka kasak lan taki ba wal lilia takisa (Lawana 119:97). Selp wan stadika bri taim tanka painkira manas lan taki ba mita, rait apia wan kupia bukisa, bara kau lan takan wan daukisa? Wel, Gâd ra latwan kaiki ba mita, bara sturi yamni lan taki ba wan walkara marikaia wan dauki ba mita sin wan kupia bukisa Gâd ra mayunra yabaia bara wan bila ni upla sut ra wih smalkaia (Hibru 13:15). Kasak sika, liliakira sturi yamni ba brihwi taim marikisa dia pitka kat yawan warkka na kulkisa.
3. Smalkaia warkka ra Gâd Spiritka ba nahki muni help wan munisa?
3 Gâd Spiritka hulikira ba makas. Gâd warkka pain daukaia ba tanis selp lika daukma apia, apia pali. Rait aihwa tawan lauaia ba Gâd Spiritka manas wanki ba mita sa (1 Pi. 4:11). Ba’ mita Witinka karnika tara ba lamara auya kaka dutki kaia laka nit ba wankbia bara smalki tauki warkka ra sibriras daukbia (Ais. 40:26, 29-31). Apastil Pâl ba trabil nani sat sat ai warkka mapara balan kaiki, naku win: “Sakuna Dawan helpka ba mita, ban nanara kat bapi buisna” (W.n 26:21, 22). Wel naiwa sin Jehova spiritka hulikira wal yawan sip sa smalki tauki warkka ra lapta kaia. Ba’ mita yawan pura sunra bak baha ba makabi kaia sa (Luk 11:9-13).
4. Tawan lauaia laka ba dia yamnika bribalaia sip sa, sakuna dia aman kaikaia sa ki?
4 King laka smalkaia dukyara karna wark takisma ba kristian wala nani ba mai kaiki witin nani sin kau ai kupia wilin takisa (2 Kor. 9:2). Baku sin, kupiam aiskakira ni dia wisma ba sut kasak luki aisisma kaka kau isi kabia upla nani ba wan walbia. Ban sakuna, sim pyua ra naha lauanka laka na nit sa aman kaiki bara kupia swapnika laka ni aisaia (Taitus 3:2). Kan pyu sut ra yawan marikaia want sa upla ra rispik munisa, bara dia daukaia want ba selp ai mihta ra sa.
5. Dia pali Gâd wan makabisa, bara dia muni trai kaiki nina blikaia sa?
5 Kingka laka Smalki Tataukra baku pyu banira wan spiritka ba lapta bri bangwi kap. Jehova ra pura suni bara Baibil stadi taki bak, spiritkam ba kau lapta dauks, Witinka sika ai Spiritka karna tara ba wankaia sip sa. Naha tnatka bak baman sika wan warkka sip kabia daukaia “Spirit Hulikira karnika wal bara kasak lukanka aihwa ni sin” (1 Tes. 1:5).